¹ Mu naku egyo nga wabula kabaka mu Isiraeri: n'o mu naku egyo ekika ky'Abadaani beesagiriire obusika obw'o kutyamamu; kubanga okutuusya ku lunaku olwo obusika bwabwe babbaire nga bakaali kubuweebwa mu bika bya Isiraeri. ² Awo abaana ba Daani ni batuma ab'o mu kika kyabwe abasaiza bataanu ku muwendo gwabwe gwonagwona, abasaiza abazira, okuva mu Zola n'o mu Esutaoli, okukeeta ensi n'o kugikebera; ni babakoba nti mwabe mukebere ensi: ni batuuka mu nsi y'Efulayimu ey'e nsozi, eri enyumba ya Miika, ni bagona omwo. ³ Bwe babbaire bali eyo mu nyumba ya Miika, ni bategeera eidoboozi ly'o muvubuka Omuleevi: ni bakyama okwaba eyo, ni bamukoba nti yani eyakuleetere wano? era okola ki mu kifo kino? era kiki ky'olina wano? ⁴ N'a bakoba nti atyo n'atyo Miika bwe yankoleire, n’e mpeera, nzena ni nfuuka kabona we. ⁵ Ne bamukoba nti Tukwegayiriire, buulya Katonda atulagule, tumanye oba ng'o lugendo lwaisu lwe twaaba lulibba n'o mukisa. ⁶ Kabona n'a bakoba nti Mwabe mirembe: olugendo lwanyu lwe mwaba luli mu maiso ga Mukama. ⁷ Awo abasaiza abo abataano kaisi ne beeyabira, ne batuuka e Layisi, ni babona abantu abali omwo, nga batyama mirembe, ng'e ngeri ey'Abasidoni bw'eri, nga basirikire nga balina emirembe; kubanga wabula muntu mu nsi mwene buyinza eyandisoboire okubaswaza mu kigambo kyonakona, era babbaire wala Abasidoni, so tebaikiriryanga kimu n'o muntu yenayena. ⁸ Ne batuuka eri bagande babwe e Zola n'e Esutaoli: bagande babwe ni babakoba nti mutumula mutya? ⁹ Ne batumula nti Mugolokoke twambuke okulwana nabo: kubanga tumalire okubona ensi, era, bona, nsa inu: mweena musirikire? temugayaala kwaba n'o kuyingira okulya ensi. ¹⁰ Bwe mulyaba, mulisanga abantu abatamanyiriire, era ensi ngazi: kubanga Katonda agibawaire mu mukono gwanyu; ekifo ekitabulwamu kintu ekiri mu nsi. ¹¹ Ne wavaayo okwaba ab'o mu kika ky'Abadaani, abaaviire mu Zola n'o mu Esutaoli, abasaiza lukaaga abeesibire eby'o kulwanisya. ¹² Ni bambuka, ne basiisira mu Kiriyasuyalimu mu Yuda: kyebaviire beeta ekifo ekyo Makanedani okutuusya watyanu: bona, kiri nyuma w'e Kiriyasuyalimu. ¹³ Ni bavaayo ni batuuka mu nsi ya Efulayimu ey'e nsozi, ni baiza ni batuuka ku nyumba ya Miika. ¹⁴ Awo abasaiza bataano abaabire okukeeta ensi ey'e Layisi ni bairamu ni bakoba bagande baabwe nti Mumaite nga mu nyumba gino mulimu ekanzu, na baterafi, n'ekifaananyi ekyole, n'e kifaananyi ekisaanuukye? kale mulowooze ekibagwanira okukola. ¹⁵ Ne bakyamira eyo, ni baiza ni batuuka ku nyumba y'o muvubuka Omuleevi, niiyo enyumba ya Miika, ni bamubuulya bw'ali. ¹⁶ N'a basaiza badi olukumi abeesiba eby'o kulwanisya ab'o ku baana ba Daani babbaire bemereire ku mulyango gwa wankaaki. ¹⁷ N'a basaiza abataanu abaabire okukeeta ensi ni bambuka ne bayingira omwo, ne batwala ekifaananyi ekyole, n'e kanzo, n'a baterafi, n'e kifaananyi ekisaanuukye: n'o kabona yabbaire ayemerire ku mulyango gwa wankaaki wamu n'a basaiza babbaire olukaaga abeesibire ebyokulwanisya. ¹⁸ Awo abo bwe bayingiire mu nyumba ya Miika ni batoolamu ekifaananyi ekyole n'e kanzo n'a baterafi n'e kifaananyi ekisaanuukye, kabona n'a bakoba nti mukola ki? ¹⁹ Ni bamukoba nti Sirika, engalo gyo ogiteeke ku munwa gwo oyabe naife, obbe gye tuli itawaisu era kabona: kisinga kusa iwe okubba kabona eri enyumba y'o muntu omumu, oba okubba kabona eri ekika n'e nyumba mu Isiraeri? ²⁰ Omwoyo gwa kabona ni gusanyuka, n'a twala ekanzo na baterafi n'e kifaananyi ekyole, n'a yaba wakati mu bantu. ²¹ Awo ne bakyuka ni beeyabira; ne batangirya abaana abatobato n'e nsolo n'e bintu. ²² Bwe babbaire balekere enyuma walaku enyumba ya Miika, abasaiza Ababbaire mu nyumba egiriraine enyumba ya Miika ni bakuŋaana, ni batuuka ku baana ba Daani. ²³ Ni bakoowoola abaana ba Daani. Ne bakyusya amaiso gaabwe ni bakoba Miika nti Obbaire otya okwiza n'e kibiina ekyenkaniire wano? ²⁴ N'a tumula nti Muntoolaku bakatonda bange be nakolere n'o kabona ni mweyabira, nanze nina ki ate? kale mumbuulya mutya nti Obbbaire otya? ²⁵ Abaana ba Daani ni bamukoba nti eidoboozi lyo lireke okuwulirwa mu ife, abasaiza ab'o busungu baleke okubagwaku, weena n'ofa n'a b'o mu nyumba yo. ²⁶ Abaana ba Daani ni beetambulira: awo Miika bwe yaboine nga bamuyinzirye amaani n'akyuka n'a irayo mu nyumba ye. ²⁷ Ni batwala ebyo Miika bye yabbaire akolere; n'o kabona gwe yabbaire naye, ni batuuka e Layisi, eri abantu ababbaire basirikire abatamanyiriire, ni babaita n'o bwogi bw'e kitala; ekibuga ni bakyokya omusyo. ²⁸ So tewabbaawo mulokozi, kubanga kyabbaire wala w'e Sidoni, so tebaikiriryanga kimu n'o muntu yenayena: era kyabbaire mu kiwonvu ekiriraine Besulekobu. Ni bazimba ekibuga ni batyama omwo. ²⁹ Ne batuuma ekibuga eriina lyakyo Daani, ng'e riina lya Daani wabwe bwe lyabbaire eyazaaliirwe Isiraeri: naye eriina ly'e kibuga lyabbaire Layisi oluberyeberye. ³⁰ Awo abaana ba Daani ni beesimbira ekifaananyi kidi ekyole: n'o Yonasaani, mutaane wa Gerusomu, mutaane wa Musa, iye n'a bataane be niibo babbaire bakabona eri ekika ky'Abadaani okutuusya ku lunaku ensi lwe yanyagiirweku. ³¹ Awo ne beesimbira ekifaananyi kya Miika ekyole kye y'akolere, enaku gyonagyna enyumba ya Katonda ng'e kaali mu Siiro.