¹ Awo Yoswa bwe yamalire okufa, abaana ba. Isiraeri ne babuulya Mukama nti yani alisooka okuniina eri Abakanani, okubalwanisya? ² Mukama n'a tumula nti Yuda niiye aliniina: bona, ngabwire ensi mu mukono gwe. ³ Yuda n'a koba Simyoni mugande we nti Oyabe nanze mu mugabo gwange, tulwanisye Abakanani; era nzena ntyo ndyaba naiwe mu mugabo gwo. Awo Simyoni n'ayaba naye. ⁴ Yuda n'aniina; Mukama n'agabula Abakanani n'Abaperizi mu mukono gwabwe: ne babaitira mu Bezeki abasaiza mutwalo. ⁵ Ne basanga Adonibezeki mu Bezeki: ni bamulwanisya, ni baita Abakanani n'Abaperizi. ⁶ Naye Adonibezeki n'airuka; ni bamusengererya, ni bamukwata; ne bamusalaku engalo gye ensaiza n'ebigere bye ebisaiza. ⁷ Edonibezeki n'atumula nti Bakabaka ensanvu, abasaliibweku engalo gyabwe ensaiza n'e bigere byabwe ebisaiza, bakuŋaanyiryanga (emere yaabwe) wansi w'e meenza yange: nga nze bwe nakolere, n'o Katonda bw'a mpalanire atyo. Ni bamuleeta e Yerusaalemi, n'afiira eyo. ⁸ Abaana ba Yuda ni balwanisya Yerusaalemi, ni bakimenya, ne bakiita n'e kitala, ni bookya ekibuga omusyo. ⁹ Awo bwe bamalire, abaana ba Yuda ni baserengeta okulwanyisya Abakanani abatyaime mu nsi ey'e nsozi, n'o mu bukiika obulyo, n'o mu nsi ey'olusenyu. ¹⁰ N'o Yuda ni balumba Abakanani abatyaime mu Kebbulooni: (naye eriina lya Kebbulooni nga niiye Kiriasualuba eda:) ni baita Sesayi, n'o Akimaani; n'o Talumaayi. ¹¹ N'avaayo, n'alumba abaatyama mu Debiri. (N'e riina lya Debiri nga niiye Kiriasuseferi eda.) ¹² Kalebu n'atumula nti Oyo aliita Kiriasuseferi n'akimenya, ndimuwa Akusa muwala wange okumukwa. ¹³ Osunieri, omwana wa Kenazi, mugande wa Kalebu omutomuto, n'akimenya: n'a muwa Akusa muwala we okumukwa. ¹⁴ Awo bwe yaizire (gy'ali), n'a saba itaaye enimiro: n'ava ku ndogoyi ye; Kalebu n'a mukoba nti otaka ki? ¹⁵ N'amukoba nti Mpa omukisa; kubanga wanteekere mu nsi ey'obukiika obulyo, era, mpa n'e nsulo egy'a maizi: Kalebu n'a muwa ensulo egy'e ngulu n'e gya wansi. ¹⁶ N'abaana ab'Omukeeni, muko wa Musa, ni baniina nga bava mu kibuga eky'e nkindu awamu n'abaana ba Yuda ne baaba mu lukoola lwa Yuda, oluli ku bukiika obulyo obwa Aladi; ne baaba ne batyama n'a bantu. ¹⁷ N'o Yuda n'a yaba n'o Simyoni mugande we, ne bakubba Abakanani abaatyaime mu Zefasi, ne bakizikiririrya dala. N'e riina ly'e bibuga lyayeteibwe Koluma. ¹⁸ Era Yuda n'a menya Gaza n'e nsalo yaakyo, n'e Asukuloni n'e nsalo yaakyo, ne Ekuloni n'e nsalo yaakyo. ¹⁹ Era Mukama yabbaire wamu n'o Yuda; n'abbinga (abatyame) mu nsi ey'e nsozi; kubanga tebyasoboire kubbinga abaatyama mu kiwonvu, kubanga babbaire balina amagaali ag'e kyoma. ²⁰ Ne bawa Kalebu Kebbulooni, nga Musa bwe yatumwire: n'abbingira omwo abaana abasatu aba Anaki. ²¹ N'a baana ba Benyamini ne batabbinga Bayebusi abaatyama mu Yerusaalemi: naye Abayebusi ne batyama n'a baana ba Benyamini mu Yerusaalemi, ne watyanu. ²² N'e nyumba ya Yusufu, era boona ne baniina ne balumba Beseri. Mukama n'abba wamu nabo. ²³ N'e nyumba ya Yusufu ni batuma okukeeta Beseri. (Eriina ly'e kibuga eira lyabbaire Luzi.) ²⁴ N'abakeeti ne babona omusaiza ng'ava mu kibuga, ne bamukoba nti tulage, tukwegayiriire, we twayingirira mu kibuga, feena twakukola kusa. ²⁵ N'abalaga we bayingirira mu kibuga, ne baita ekibuga n'e kitala; naye ne baita omusaiza oyo n'e nyumba ye yonayona. ²⁶ Omusaiza oyo n'a yaba mu nsi ey'Abakiiti, n'a zimba ekibuga, n'a kituuma eriina lyakyo Luzi: niilyo liina lyakyo ne watyanu. ²⁷ Manase n'atabbinga (abatyama) mu Besuseani n'e byalo byakyo, ne mu Taanaki n'e byalo byakyo, waire abatyama mu Doli n'e byalo byakyo, waire abaatyama mu Ibuleamu n'e byalo byakyo, waire abatyama mu Megido n'e byalo byakyo: naye Abakanani ni bataka okutyama mu nsi eyo: ²⁸ Awo olwatuukire, Isiraeri bwe yafunire amaani, ni bakozesya Abakanani emirimu, ne batababbingira dala. ²⁹ Efulayimu n'atabbinga Bakanani abaatyama mu Gezeri; naye Abakanani ni batyama mu Gezeri wakati mu ibo: ³⁰ Zebbulooni n'atabbinga abatyaime mu Kituloni, waire abatyama mu Nakaloli; naye Abakanani ni batyama mu ibo; ne bafuuka ab'o kuwanga omusolo. ³¹ Aseri n'atabbinga abatyama mu Ako, waire abaatyama mu Sidoni; waire mu Alabu, waire mu Akuzibu; waire mu Keruba, waire mu Afiki waire mu Lekobu: ³² naye Abaseri ne batyama mu Bakanani, niibo batyaime mu nsi: kubanga tebabbingire. ³³ Nafutaali n'atabbinga abatyama mu Besusemesi, waire abatyama mu Besuanasi; naye n'atyama mu Bakanani, be batyaine mu nsi: era naye abatyaime mu Besusemesi n'o mu Besuanasi ne bafuuka ab'o kuwanga omusolo. ³⁴ Abamoli ne basengererya abaana ba Daani mu nsi ey'e nsozi: kubanga tebaabaganyirye kuserengeta mu kiwonvu: ³⁵ naye Abamoli bataka okutyama ku lusozi Keresi, mu Ayalooni, n'o mu Saalubimu: naye omukono gw'e nyumba ya Yusufu ne gusinga, n'o kufuuka ni bafuuka ab'o kuwanga omusolo ³⁶ N'e nsalo ey'Abamoli yaviire awayambukirwa Akulabbimu, okuva ku lwazi, n'e ngulu.