¹ Gibasangire abaana abajeemu bw'atumula Mukama, abateesya ebigambo, naye ti nanze; era ababiika n'ekibiika, naye ti ky'o mwoyo gwange, Kaisi batumule ekibbiibi ku kibbiibi: ² abatambula okuserengeta okwaba e Misiri, so nga tebabwirye mu munwa gwange; okwenywezya mu maani ga Falaawo, n'okwesiga ekiwolyo eky'e Misiri! ³ Amaani ga Falaawo kyegaliva gabba ensoni Gyanyu, n'okwesiga ekiwolyo eky'e Misiri kulibba kuswala kwanyu. ⁴ Kubanga abakulu niibo bali Zowani, n'ababaka be batuukire e Kanesi. ⁵ Bonabona balikwatirwa ensoni abantu abatasobola kubagasa abatayamba waire okugasa wabula ensoni era ekivumi. ⁶ Omugugu ogw'ensolo egy'omu bukiika obulyo. Babita mu nsi ey'okubona enaku n'okusaatibwa, omuva empologoma enkali n'ensaiza, embalasaasa n'omusota ogw'omusyo ogubuuka nga batiika obugaiga bwabwe ku mabega g'endogoyi entonto, n'ebintu byabwe ku mabbango g'eŋamira nga baaba eri abantu abatayaba kubagasa. ⁷ Kubanga Misiri abbeerera bwereere era busa: kyenviire mweta Lakabu atyama obutyami. ⁸ Kale yaba okiwandiikire ku kipande mu maiso gaabwe, okiteeke n'o mu kitabo, kibbe kye birseera ebyaba okwiza emirembe n'emirembe. ⁹ Kubanga niibo bantu abajeemu, abaana ab'obubbeyi, abaana abataganya kuwulira mateeka ga Mukama: ¹⁰ abakoba ababoni nti Temubonanga; n'abalaguli nti Temutulaguliranga bya mazima, mutukobere ebiweweevu mulagule eby'obubbeyi: ¹¹ muve mu luguudo, mukyame okuva mu ngira, Omutukuvu owa Isiraeri mumumalewo mu maiso gaisu. ¹² Kyava atumula Omutukuvu owa Isiraeri nti Kubanga munyoomere ekigambo kino ne mwesiga okujooga n'obubambaavu ne mwesigama okwo; ¹³ obutali butuukirivu buno kyebuliva bubba gye muli ng'ekituli ekiwagule ekitaka okugwa, ekizimba enkundi mu kisenge ekiwanvu, okumenyeka kwakyo kwiza mangu obutamanyirira. ¹⁴ Era alikimenya ng'ekintu eky'omubbumbi bwe kimenyeka, ng'akimenyamenya awabula kusaasira; n'okuboneka ne wataaboneka lugyo mu bitundu byakyo olw'okusena omusyo mu kyoto, oba olw'okusena amaizi mu kidiba. ¹⁵ Kubanga atyo bw'atumula Mukama Katonda, Omutukuvu owa Isiraeri nti mu kwira n'omu kuwumula imwe mulirokokera; mu kutereera n'omu kwesiga imwe mulibba amaanyi ganyu: imwe ne mutataka. ¹⁶ Naye ne mukoba nti Bbe, kubanga tuliirukira ku mbalaasi; kyemuliva mwiruka: era nti Tulyebagala ku gy'embiro; abalibasengererya kyebaliva babba ab'embiro. ¹⁷ Olukumi baliiruka olw'okubogola kw'omumu; olw'okuboggola kw'abataanu muliiruka: okutuusya lwe mulisigala ng'omulongooti oguli ku ntiiko y'olusozi, era ng'ebendera eri ku kasozi. ¹⁸ Era Mukama kyaliva alinda, abakwatirwe ekisa, era kyaliva agulumizibwa abasaasire: kubanga Mukama Katonda abona ensonga; balina omukisa bonabona abamulindirira. ¹⁹ Kubanga abantu balityama ku Sayuuni e Yerusaalemi: tolikunga ate maliga; talireka kukukwatirwa kisa olw'eidoboozi ery'okukunga kwo; bw'aliwulira alikwiramu. ²⁰ Era Mukama waire ng'akuwa emere ey'okubona enaku n'amaizi ag'okubonyaabonyezebwa, naye abegeresya bo nga tebakaali bagisibwa ate, naye amaiso go galibona abegeresya bo: ²¹ n'amatu go gaawuliranga ekigambo ekikuvaaku enyuma nga kitumula nti eno niiyo engira, mugitambuliremu; bwe mwakyamiranga ku mukono omulyo, era bwe mwakyamiranga ku mugooda. ²² Era mulyonoona ebibiika ku bifaananyi byo ebyole eby'e feeza, n'ebisaanikira ku bifaananyi byo ebifumbe eby'e zaabu: olibisuulira dala ng'ekintu ekitali kirongoofu; olikikoba nti Vaawo. ²³ Era alitonyesya maizi eg'ensigo gyo, gy'olisiga mu itakali; era aligaba emere ey'ekyengera eky'eitakali, era eribba njimu era nyingi: ku lunaku ludi ebisibo byo biririira mu malundiro amagazi. ²⁴ Era ente n'endogoyi entonto egirima eitakali gyalyanga ebyokulya ebirimu omunyu, ebyaweweibwe n'olugali n'ekiwujo. ²⁵ Era ku buli lusozi olugulumivu na ku buli kasozi akawanvu kulibba ensulo n'emiiga gy'amaizi, ku lunaku olw'okwita abangi, ebigo bwe birigwa. ²⁶ Era omusana gw'omwezi gulibba ng'omusana gw'eisana, n'omusana gw'eisana gulyeyongera emirundi musanvu ng'omusana gw'enaku omusanvu, ku lunaku Mukama lw'alisibiraku ekinuule eky’abantu be n'awonya ekiwundu eky'okufumitibwa kwabwe. ²⁷ Bona, eriina lya Mukama liva wala, nga lyaka n'obusungu bwe, era nga linyooka omwoka omuziyivu omunwa gwe gwizwire okunyiiga, n'olulimi lwe luli ng'omusyo ogwokya: ²⁸ n'omwoka gwe guli ng'omwiga ogwanjaala, ogutuuka n'omu ikoti, okukuŋunta amawanga n'olugali olw'obutalimu: n'olukoba oluwabya lulibba mu mba gy'amawanga. ²⁹ Mulibba n'olwembo ng'obwire bwe bakwata embaga entukuvu n'eisanyu ery'omu mumwoyo, ng'omuntu bw'ayaba n'endere okwiza ku lusozi lwa Mukama, eri Olwazi lwa Isiraeri. ³⁰ Era Mukama aliwulirya eidoboozi lye ery'ekitiibwa, era aliraga okwika kw'omukono gwe, n'okunyiiga kw'obusungu bwe, n'olulimi lw'omusyo ogwokya n'okubwatuka n'o n'empunga n'omuzira. ³¹ Kubanga olw'eidoboozi lya Mukama Omwasuli alimenyekamenyeka, eyakubbanga n'oluga. ³² Na buli lwe bamukubbanga n'omwigo ogwalagiirwe, Mukama gw'alimuteekaku, wabbangawo ebitaasa n'enanga: era alirwana nabo mu ntalo egy'okusiisikya. ³³ Kubanga Tofesi kyategekeibwe okuva eira; Niiwo awo, kyateekeirweteekeirwe kabaka; akifiire kiwanvu era kinene: ekikoomi kyakyo musyo ne nku nyingi; omwoka gwa Mukama, ng'omwiga ogw'ekibiriiti, gukyasya.