¹ Muweererye abaana b'entama b'oyo afuga ensi okuva e Seera ekiringiriire eidungu okutuuka ku lusozi lwo muwala wa Sayuuni. ² Kubanga olulituuka ng'enyonyi egyagotere ng'ekisu ekyasaansaanire batyo bwe balibba bawala ba Mowaabu ku misomoko gya Alunoni. ³ Teesya ebigambo, mala omusango; fuula ekiwolyo kyo okubba ng'obwire wakati mu iwango: gisa ababbingiibwe; tolyamu lukwe adaagana. ⁴ Abange ababbingiibwe batyame naiwe; Mowaabu, bba kiirukiro gy'ali mu maiso g'omunyagi: kubanga omukanga azikiriire, okunyaga kuweire, abajoogi bakomere mu nsi. ⁵ N'entebe ey'obwakabaka yanywezebwanga mu kusaasira, era walibbaawo aligityamaku mu mazima, mu weema ya Dawudi; ng'asala emisango, era ng'asengererya eby'ensonga, era omwangu okukolanga eby'obutuukirivu. ⁶ Tuwuliire amalala ga Mowaabu, nga wa malala mangi einu; ekyeju kye n'amalala ge n'obusungu bwe; okwenyumirirya kwe kubulamu. ⁷ Mowaabu kyaliva awowoganira Mowaabu, buli muntu aliwowogana: mulinakuwalira emigaati egy'e izabbibu egy'e Kirukaleseesi, nga mukubbiibwe dala. ⁸ Kubanga enimiro egy'e Kesubooni giwotoka, n'omuzabbibu ogw'e Sibuma; abakungu ab'amawanga bamenyeire dala emisaale gyagwo egyasingire obusa; gyabunire okutuuka e Yazeri, gyatuukire mu idungu; amatabi gaagwo gaalanda, gaasomoka enyanza. ⁹ Kyenaava nkungira amaliga awamu n'okukunga kwa Yazeri olw'omuzabbibu ogw'e Sibuma: nakufukirira amaizi n'amaliga gange, iwe Kesubooni ne Ereyale: kubanga ku bibala byo eby'ekyengera no ku bikungulwa byo kukubbiibweku olube. ¹⁰ N'eisanyu litooleibwewo, n'emizira giweire mu nimiro enjimu; n'o mu nsuku gy'emizabbibu temulibba kwemba, waire eidoboozi ery'okusanyuka: tewalibba musogoli alisogolera omwenge mu masogolero; nkomerye emizira gy'abasogoli. ¹¹ Ebyenda byange kyebiva bikungira Mowaabu ng'enanga, n'o munda mwange mukungira Kirukeresi. ¹² Awo olulituuka, Mowaabu bw'alyeyanjula, bw'alyekooya ku kifo ekigulumivu, n'aiza mu watukuvu we okusaba, talisobola. ¹³ Ekyo niikyo kigambo Mukama kye yatumwire ku Mowaabu mu biseera eby'eira. ¹⁴ Naye atyanu Mukama atumwire nti Emyaka isatu nga gikaali kuwaaku, ng'emyaka egy'omusenze akolera empeera bwe gibba, ekitiibwa kye Mowaabu kirinyoomebwa awamu n'ekibiina kye kyonakyona ekinene; n'abo abalifikkawo baliba batono inu so tebalibba kintu.