¹ Mukama kaisi n'akoba Musa nti Yingira eri Falaawo, omukobe nti Bw'atyo bw'atumula Mukama, Katonda w'Abaebbulaniya nti Baleke abantu bange bampeererye. ² Kubanga bw'ewagaana okubaleka n'otumula okubakwata, ³ bona, omukono gwa Mukama guli ku magana go agali mu itale, ku mbalaasi, ku ndogoyi, ku ŋamira, ku nte, no ku ntama: nsotoka omuzibu einu. ⁴ Era Mukama alyawula amagana g'Abaisiraeri n'amagana ag'e Misiri; so tewalifa n'eimu mu ago ag'abaana ba Isiraeri gonagona. ⁵ Mukama n'ateekawo ekiseera kye yatakire, ng'atumula nti eizo Mukama bw'alikola ekyo mu nsi. ⁶ Mukama n'akola kidi bwe bwakyeire enkya, amagana gonagona ag'e Misiri ne gafa: naye mu magana g'abaana ba Isiraeri tewaafiire n'eimu. ⁷ Falaawo n'atuma, bona, mu magana g'Abaisiraeri tewabbaire waire n'eimu efiire. Naye Falaawo omwoyo ne gukakanyala, n'atabaleka abantu. ⁸ Mukama n'akoba Musa no Alooni nti Mwetwalire engalo egy'eikoke ery'omu kyoto, Musa alimansirye waigulu mu maiso ga Falaawo. ⁹ Era liribba nfuufu ku nsi yonayona ey'e Misiri, liribba iyute erikanuka mu mabbwa ku muntu no ku nsolo, mu nsi yonayona ey'e Misiri. ¹⁰ Ne batwala eikoke ery'omu kyoto, ne bemerera mu maiso ga Falaawo; Musa n'alimansya waggulu; ne libba eiyute erikanuka mu mabbwa ku muntu no ku nsolo. ¹¹ Abasawo ne batasobola kwemerera mu maiso ga Musa ku lw'amayute; kubanga, amayute gabbaire ku basawo, no ku Bamisiri bonabona. ¹² Mukama n'akakanyalya omwoyo gwa Falaawo, n'atabawulira; nga Mukama bwe yakobere Musa. ¹³ Mukama n'akoba Musa nti Ogolokoka amakeeri mu makeeri, n'oyemerera mu maiso ga Falaawo, n'omukoba nti atyo bw'atumula Mukama, Katonda w'Abaebbulaniya, nti Leka abantu bange, bampeererye. ¹⁴ Kubanga omulundi guno naakuleetera ebibonyobonyo byange byonabyona omwoyo gwo n'abaidu bo n'abantu bo; Kaisi omanye nga wabula mu nsi yonayona afaanana nga nze. ¹⁵ Kubanga atyanu nandigoloire omukono gwange, nandikukubbire iwe n'abantu bo no kawumpuli, wandizikiriire mu nsi: ¹⁶ naye dala mazima kyenviire nkwemererya okukulaga amaanni gange iwe, era eriina lyange okubuulirwa mu nsi guonagyona. ¹⁷ Okutuusya atyanu wegulumizirye ku bantu bange, obutabaleka? ¹⁸ bona, eizo nga mu kiseera kino nditonnyesya omuzira omuzito einu, ogutabonekanga mu Misiri kasookeire esooka okubbaawo okutuusya atyanu. ¹⁹ Kale, atyanu, tuma, oyanguye okuyingirya amagana go ne byonabyona by'olina mu itale; buli muntu n'ensolo ababoneka mu itale abataaleetebwe mu nyumba, omuzira gulibakubba, balifa. ²⁰ Eyatya ekigambo kya Mukama mu baidu ba Falaawo n'abairukirya abaidu be n'amagana ge mu nyumba: ²¹ ataakitiire ekigambo kya Mukama n'abaleka abaidu be n'amagana ge mu itale. ²² Mukama n'akoba Musa nti Golola omukono gwo eri eigulu, omuzira gubbe mu nsi yonayona ey'e Misiri, ku muntu, no ku nsolo, no ku mwido gwonagwona ogw'omu nsuku, mu nsi yonayona ey'e Misiri. ²³ Musa n'agolola omwigo gwe eri eigulu: Mukama n'aleeta okubwatuka n'omuzira, omusyo ne gwika ku nsi; Mukama n'atonnyesya omuzira ku nsi ey'e Misiri. ²⁴ Awo ne wabba omuzira, n'omulsyo ne gwaka wakati w'omuzira, omuzito einu, ogutabbangawo mu nsi yonayona ey'e Misiri kasookeire ebba eigwanga. ²⁵ Omuzira ne gukubba mu nsi yonayona ey'e Misiri buli ekyabbaire mu itale, omuntu era n'ensolo; omuzira ne gukuba buli mwido ogw'omu nsuku, ne gumenya buli musaale ogw'omu nsuku. ²⁶ Mu nsi ey'e Goseni yonka, mwe babbaire abaana ba Isiraeri, niimwo mutabbaire muzira. ²⁷ Falaawo n'atuma, n'ayeta Musa no Alooni, n'abakoba nti Nyonoonere omulundi guno: Mukama niiye mutuukirivu, nzena n'abantu bange tuli babbiibi. ²⁸ Musabe Mukama; kubanga okubwatuka okw'amaani n'omuzira biimalire; nzena ndibaleka, muleke okulwawo ate. ²⁹ Musa n'amukoba nti Bwe ndimala okuva mu kibuga, kaisi ne mwanjululirya Mukama engalo gyange; okubwatuka kuliwaawo, so tewalibba muzira ate; kaisi omanye ng'ensi ya Mukama. ³⁰ Naye iwe n'abaidu bo, maite nga temulitya atyanu Mukama Katonda. ³¹ Enkosi ne sayiri ne bikubbibwa: kubanga sayiri yabbaire etandika okubona, n'enkosi gyabbaire gisanswire. ³² Naye eŋaano ne kusemesi tebyakubbiibwe: kubanga byabbaire nga bikaali kumera. ³³ Musa n'ava mu kibuga eri Falaawo, n'ayanjululilya Mukama engalo gye: okubwatuka n'omuzira ne biwaawo, so amaizi n'etetonya ku nsi. ³⁴ Falaawo bwe yaboine ng'amaizi n'omuzira n'okubwatuka nga biweirewo, ne yeeyongera okwonoona, n'akakanyalya omwoyo gwe, iye n'abaidu be. ³⁵ Falaawo omwoyo gwe ne gukakanyala, n'atabaleka abaana ba Isiraeri; nga bwe yatumuliire Mukama mu Musa.