¹ Mukama n'akoba Musa nti Yingira eri Falaawo; kubanga nkakanyairye omwoyo gwe N'omwoyo gw'abaidu be, Kaisi ndage obubonero bwange buno wakati waabwe: ² era kaisi obuulire mu matu g'omwana wo no mu g'omwana w'omwana wo, bye nkolere ku Misiri, n'obubonero bwange bwe nkolere wakati waabwe; kaisi mumanye nga niinze Mukama. ³ Musa no Alooni ne bayingirya eri Falaawo, ne bamukoba nti atyo bw'atumula Mukama Katonda w'Abaebbulaniya nti Olituukya waina okugaana okwetoowaza mu maiso gange? Leka abantu bange, bampeererye. ⁴ Naye, bw'ewagaana okubaleka abantu bange, bona, eizo ndireeta enzige mu nsalo yo: ⁵ girisaanikira kungulu ku nsi, ensi ereke okuboneka: girirya ebisigaire ebyawonawo, omuzira bye gwabalekera, ne girya buli musaale ogubamerera mu nsuku: ⁶ era enyumba gyo girizula, n'enyumba gy'abaidu bo bonabona n'enyumba z'Abamisiri bonabona: nga baitaawo bwe bataboine waire itawabwe ba itaawo, okuva lwe babbairewo ku nsi okutuukya watyanu. N'akyuka, n'ava eri Falaawo. ⁷ Abaidu ba Falaawo ne bamukoba nti Alituusya waina ono okutubbeerera omutego? Leka abantu, baweererye Mukama Katonda waabwe: okaali kumanya nga Misiri efiire? ⁸ Ne bairibwa Musa na Alooni eri Falaawo: n'abakoba nti Mwabe, muweererye Mukama Katonda wanyu: naye b'ani abalyaba? ⁹ Musa n'atumula nti Tulyaba n'abaana baisu abatobato era n'abakaire baisu, n'abaana baisu ab'obwisuka era n'abaana baisu ab'obuwala, n'entama gyaisu era n'ente gyaisu bwe tulyaba; kubanga obubbiibi buli mu maiso ganyu kubanga kitugwaniire ife okukolera Mukama embaga. ¹⁰ N'abakoba nti Mukama abbe naimwe nga bwe ndibaleka imwe n'abaana banyu abawere: mubone; ¹¹ Bbe imwe abasaiza abakulu mwabe atyanu, mumuweererye Mukama; kubanga ekyo kye mutaka. Ne babbingibwa mu maiso ga Falaawo. ¹² Mukama n'akoba Musa nti Golola omukono gwo ku nsi ey'e Misiri wabbe enzige, giniine ku nsi ey'e Misiri, girye buli mwido ogw'ensi, byonabyona omuzira bye gwalekawo. ¹³ Musa n'agolola omwigo gwe ku nsi ey'e Misiri, Mukama n'aleeta empunga ku nsi eyaviire ebuvaisana ku lunaku ludi obwire okuziba n'okukya; bwe bwakyeire amakeeri, embuyaga egyaviire ebuvaisana ne gireeta enzige. ¹⁴ Enzige ne giniina ku nsi yonayona ey'e Misiri, ne gigwa mu nsalo gyonagyona egy'e Misiri: gyabbaire nzibu inu; eira n'eira tewabbanga nzige nga egyo, waire enyuma wagyo tewalibba nga egyo. ¹⁵ Kubanga gyasaanikiire kungulu ku nsi yonayona, ensi n'efuusibwa endikirirya; ne girya buli mwido gwonagwona ogw'ensi n'ebibala byonabyona eby'emisaale, omuzira bye gwalekerewo: ne watasigala kintu kibisi, waire omusaale waire omwido ogw'omu nsuku, mu nsi yonayona ey'e Misiri. ¹⁶ Falaawo kaisi ayeta mangu Musa no Alooni; n'atumula nti Nyonoonere Mukama Katonda wanyu, naimwe. ¹⁷ Kale atyanu nkwegayiriire, munsonyiwe okwonoona kwange omulundi guno gwonka, mumusabe Mukama Katonda wanyu, antooleku olumbe luno lwonka. ¹⁸ N'ava eri Falaawo, n'asaba Mukama. ¹⁹ Mukama n'aleeta empunga egy'amaani einu egyaviire ebugwaisana, ne gitwala enzige ne gigisuula mu Nyanza Emyofu; tewaasigaire nzige n'eimu mu nsalo yonayona ey'e Misiri. ²⁰ Naye Mukama n'akakanyalya omwoyo gwa Falaawo, n'ataleka abaana ba Isiraeri. ²¹ Mukama n'akoba Musa nti Golola omukono gwo eri eigulu, endikirirya ebbe ku nsi ey'e Misiri, endikirirya ewulikika. ²² Musa n'agolola omukono gwe eri eigulu; endikirirya ekwaite n'ebba mu nsi yonayona ey'e Misiri enaku isatu; ²³ tebabonagaine, waire omuntu yenayena teyagolokokere mu kifo kye enaku isatu: naye abaana ba Isiraeri bonabona babbaire omusana mu nyumba gyabwe. ²⁴ Falaawo n'ayeta Musa n'atumula nti Mwabe muweererye Mukama; entama gyanyu n'ente gyanyu nigyo gibbe gisigale gyonka: abaana abawere boona baabe naimwe. ²⁵ Musa n'atumula nti Kikugwaniire ate okutuwa mu mikono gyaisu sadaaka n'ebiweebwayo ebyokyebwa, tuweeyo sadaaka eri Mukama Katonda waisu. ²⁶ Era n'amagana gaisu galyaba naife; tewalisigala kinuulo n'ekimu; kubanga kitugwaniire okugitwalaku, tuweererye Mukama, Katonda waisu; era tetumaite bye tulimuweerezesya Mukama, okutuusya lwe tulituuka eyo. ²⁷ Naye Mukama n'akakanyalya omwoyo gwa Falaawo, n'atataka kubaleka. ²⁸ Falaawo n'amukoba nti Vaawo wendi, weekuume, oleke okubona amaiso gange ate; kubanga ku lunaku lw'oliboneramu amaiso gange, olifa. ²⁹ Musa n'atumula nti Otumwire kusa; tindibona ate maiso go.