¹ Ne Bezaaleeri no Okoliyaabu bakolanga emirimu, na buli muntu alina omwoyo ogw'amagezi, Mukama gw'ateekeremu amagezi n'okutegeera amanye okukola omulimu gwonagwona ogw'okuweererya okw'omu watukuvu, nga byonabyona Mukama bye yalagiire. ² Musa n'ayeta Bezaaleeri no Okoliyaabu, na buli muntu eyabbaire, omwoyo ogw'amagezi, Mukama gwe yateekeremu amagezi mu mwoyo gwe, buli muntu omwoyo gwe gwe gwakubbirizirye okwiza ku mulimu okugukola: ³ Musa n'abawa ekiweebwayo kyonakyona abaana ba Isiraeri kye baaleetere olw'emirimu egy'okuweererya okw'omu watukuvu, okugikola. Era ne bamuleeteranga ebiweebwayo n'emyoyo egy'eidembe buli makeeri. ⁴ N'ab'amagezi bonabona, abaakolere emirimu gyonagyona egy'omu watukuvu, ne bava buli muntu ku mulimu gwe, gwe babbaire bakola; ⁵ ne bakoba Musa nti Abantu baleeta bingi ebisukiriire einu okumala okukola emirimu, Mukama gye yalagiire okukola. ⁶ Musa n'alagira, ne balangirira mu lusiisira lwonalwona, nti Omusaiza era n'omukali alekere awo okukola ate omulimu gwonagwona ogw'ekiweebwayo eky'awatukuvu. Abantu ne baziyizibwa okuleeta. ⁷ Kubanga ebintu bye babbaire nabyo byamalire emirimu gyonagyona okugikola, era byasukiriirewo. ⁸ Na buli muntu eyabbaire n'omwoyo ogw'amagezi eyakolere omulimu ogwo n'akola eweema n'emitanda ikumi; egya bafuta ensa erangiibwe, ne kaniki, n'olugoye olw'efulungu, n'olumyofu, na bakerubi omulimu ogw'omukozi ow'amagezi bwe yagukolere. ⁹ Obuwanvu bwa buli mutanda bwabbaire emikono abiri mu munaana, n'obugazi bwa buli mutanda emikono ena: emitanda gyonagyona gyabbaire gye kigero kimu. ¹⁰ N'agaita emitanda etaanu gyonka na gyonka: era n'emitanda etaanu egindi n'agigaita gyonka na gyonka. ¹¹ N'akola eŋangu egya kaniki ku lukugiro lw'omutanda ogumu okuva mu nsonda ey'emigaite: era atyo n'akola ku lukugiro lw'omutanda ogw'oku mambali g'emigaite egy'okubiri. ¹² Yakolere eŋangu ataanu ku mutanda gumu, n'eŋangu ataanu ku lukugiro lw'omutanda ogw'omu migaite egy'okubiri: eŋangu gyabonagaine gyonka na gyonka. ¹³ Era n'akola ebikwaso ebya zaabu ataanu, n'agaita emitanda gyonka an gyonka n'ebikwaso: eweema n'ebba imu. ¹⁴ Era n'akola emitanda egy'ebyoya by'embuli okubba eweema ku weema: yakolere emitanda ikumi na gumu. ¹⁵ Obuwanvu bwa buli mutanda bwabbaire emikono asatu, n'obugazi bwa buli mutanda emikono ena: emitanda ikumi na gumu gyabbaire gye kigero kimu. ¹⁶ N'agaita emitanda itaanu gyonka, n'emitanda omukaaga gyonka. ¹⁷ N'akola eŋangu ataanu ku lukugiro lw'omutanda ogw'oku mbali g'emigaite, n'eŋangu ataanu n'agikola ku lukugiro lw'omutanda ogw'oku mbali g'emigaite egy'okubiri. ¹⁸ Era n'akola ebikwaso ataano eby'ebikomo okugaita eweema, ebbe imu. ¹⁹ Era n'agikolera eweema eky'okugibikaku eky'amawu g'entama amainike amamyofu, no kungulu eky'okugibiikaku eky'amawu g'entukulu. ²⁰ Era n'akola embaawo egy'eweema egy'omusaale gwa sita, okwemerera. ²¹ Emikono ikumi niibwo bwabbaire obuwanvu bw'olubaawo, n'omukono n'ekitundu obugazi bwa buli lubaawo. ²² Ku buli lubaawo kwabbaireku enimi ibiri, egyagaitiibwe gyonka na zokka: atyo bwe yakolere ku mbaawo gyonagyona egy'eweema. ²³ N'akola embaawo egy'eweema; embaawo abiri egy'oluuyi lw'obukiika obulyo mu bukiika obulyo: ²⁴ era n'akola ebiina ebye feeza ana wansi w'embaawo abiri; ebiina bibiri wansi w'olubaawo lumu eby'enimi gyalwo eibiri, n'ebiina bibiri wansi w'olubaawo olundi eby'enimi gyalwo ibiri. ²⁵ Era egy'oluuyi olw'okubiri olw'eweema, ku luuyi olw'obukiika obugooda, n'akola embaawo abiri, ²⁶ n'ebiina byagyo ebye feeza ana; ebiina bibiri wansi w'olubaawo lumu, n'ebiina bibiri wansi w'olubaawo olundi. ²⁷ Era egy'oluuyi olw'eweema olw'enyuma mu bugwaisana n'akola embaawomukaaga. ²⁸ Era n'akola embaawo ibiri egy'ensonda ez'eweema ku luuyi olw'enyuma. ²⁹ Zaali bbiri bbiri wansi, era gityo bwe gyabbaire enamba waigulu waagyo okutuuka ku mpeta eimu: atyo bwe yagikolere gyombiri mu nsonda gyombiri. ³⁰ gyabbaire embaawo munaana, n'ebiina byagyo ebye feeza, ebiina kumi na mukaaga; ebiina ebibiri wansi wa buli lubaawo. ³¹ Era n'akola emisaale egy'omusaale gwe sita; itaanu egy'embaawo egy'oluuyi lumu olw'eweema, ³² n'emisaale itaanu egy'embaawo egy'oluuyi olundi olw'eweema, n'emisaale itaanu egy'embaawo egy'eweema ez'oluuyi olw'enyuma olw'ebugwaisana. ³³ N'omusaale ogwa wakati n'agubitya wakati mu mbaawo eruuyi n'eruuyi. ³⁴ N'embaawo n'agibiikaku zaabu, n'akola empeta gyagyo egya zaabu omw'okuteekera emisaale, n'emisaale n'agibikaku zaabu. ³⁵ N'akola eijijii erya kaniki, n'olugoye olw'efulungu, n'olumyofu, ne bafuta ensa erangiibwe; na bakerubi omulimu ogw'omukozi ow'amagezi bwe yalikolere. ³⁶ N'alikolera empagi ina egy'omusaale gwa sita, n'agiibiikaku zaabu: n'ebikwaso byagyo byabbaire bye zaabu; n'agifumbira ebiina bina ebya feeza. ³⁷ N'alukolera akatimba olwigi olw'eweema, aka kaniki, n'olugoye olw'efulungu, n'olumyofu, ne bafuta ensa erangiibwe, omulimu ogw'omudaliza; ³⁸ n'empagi gyaku itaano n'ebikwaso byagyo: n'emitwe gyagyo n'emiziziko gyagyo n'abibiikaku zaabu: n'ebiina byagyo bitaanu byabbaire bye bikomo.