¹ N'akoba Musa nti Niina eri Mukama, iwe no Alooni, Nadabu, no Abiku, n'ensanvu ey'abakaire ba Isiraeri; era musinzirye wala: ² Musa yenka asemberere Mukama; naye ibo baleke okusembera so abantu baleke okuniina awamu naye. ³ Musa n'aiza n'akoba abantu ebigambo byonabyona ebya Mukama, n'emisango gyonagyona: abantu bonabona ne bairamu n'eidoboozi limu, ne bomatumula nti Ebigambo byonabyona Mukama by'atumwire tulibikola. ⁴ Musa n'awandiika ebigambo byonabyona ebya Mukama, n'agolokoka amakeeri mu makeeri, n'azimba ekyoto wansi w'olusozi, n'empagi ikumi na ibiri, ng'ebika eikumi n'ebibiri ebya Isiraeri. ⁵ N'atuma abavubuka ab'abaana ba Isiraeri, ne bookya ebyokwokya, ne bawaayo ebiweebwayo olw'emirembe eby'ente eri Mukama. ⁶ Musa n'atwala ekitundu ky'omusaayi, n'akifuka mu bibya; n'ekitundu ky'omusaayi, n'akimansira ku kyoto. ⁷ N'atoola ekitabo eky'endagaanu, n'asoma mu matu g'abantu: ne batumula nti Byonabyona Mukama by'atumwire tulibikola, era tuliwulira. ⁸ Musa n'atoola omusaayi, n'agumansira ku bantu, n'atumula nti Bona omusaayi ogw'endagaanu, Mukama gy'alagaime naimwe mu bigambo bino byonabyona. ⁹ Musa kaisi n'aniina, no Alooni, Nadabu, na Abiku, n'ensanvu ey'abakaire ba Isiraeri: ¹⁰ ne babona Katonda wa Isiraeri; ne wansi w'ebigere bye ne wabba ng'omulimu ogw'amabbaale amaaliire aga safiro, agafaanana ng'eigulu lyene okutangaala. ¹¹ So ku bakungu b'abaana ba Isiraeri n'atateekaku mukono gwe: ne bamubona Katonda, ne balya ne banywa: ¹² Mukama n'akoba Musa nti Niina gye ndi ku lusozi, obbeeyo : nanze ndikuwa ebipande by'amabbaale, n'amateeka n'ekiragiro, bye mpandiikire, obyegeresye. ¹³ Musa n'agolokoka no Yoswa omuweereza we: Musa n'aniina ku lusozi lwa Katonda. ¹⁴ N'akoba abakaire nti Mutulindirire wano, okutuusya lwe tulibaizira ate: no Alooni no Kuuli, bona, bali wamu naimwe: buli alina ensonga, asemberere ibo. ¹⁵ Musa n'aniina ku lusozi, ekireri ne kibiika olusozi. ¹⁶ Ekitiibwa kya Mukama ne kibba ku lusozi Sinaayi, ekireri ne kirubiikira enaku mukaaga: ku lunaku olw'omusanvu n'ayeta Musa ng'ayema wakati w'ekireri. ¹⁷ Ekifaananyi ky'ekitiibwa kya Mukama ne kibba ng'omusyo ogwaka ku ntiiko y'olusozi mu maiso g'abaana ba Isiraeri. ¹⁸ Musa n'ayingira wakati mu kireri, n'aniina ku lusozi: Musa n'amala ku lusozi enaku ana emisana n'obwire.