¹ Bino niibyo bigambo Musa bye yakobeire Isiraeri yenayena emitala wa Yoludaani mu idungu, mu Alaba awoolekera Sufu, wakati w'e Palani n'e Toferi n'e Labani n'e Kazerosi n'e Dizakabu. ² Niilwo lugendo olw'e naku eikumi n'e lumu okuva e Kolebu okubita awali olusozi Seyiri okutuuka e Kadesubanea. ³ Awo olwatuukire mu mwaka ogw'ana, mu mwezi ogw'eikumi n'ogumu, ku lunaku olw'omwezi ogw'o luberyeberye, Musa n'atumula n'a baana ba Isiraeri, nga byonabyona bwe byabbaire Mukama bye yamulagiire okubakobera; ⁴ bwe yamalire okwita Sikoni kabaka w'Abamoli, eyatyamanga mu Kesuboni, ne Ogi kabaka w'e Basani, eyatyamanga mu Asutaloosi, mu Ederei: ⁵ emitala wa Yoludaani, mu nsi ya Mowaabu, Musa gye yatandiikire okulangira amateeka gano, ⁶ ng'atumula nti Mukama Katonda waisu yatumuliire naife ku Kolebu, ng'a tumula nti mulwiire okutyama ku lusozi luno: ⁷ mukyuke, mutambule, mwabe mu nsi ey'e nsozi ey'Abamoli, n'o mu bifo byonabyona ebiriraineewo, mu Alaba, mu nsi ey'e nsozi, ey'o lusenyu, n'o mu Bukiika obulyo, n'o ku itale ly'enyanza, ensi y’Abakanani, n'e Lebanooni, okutuuka ku mwiga omunene, omwiga Fulaati. ⁸ Bona, ensi ngiteekere mu maiso ganyu: muyingire, mulye ensi Mukama gye yalayiriire bazeiza banyu, Ibulayimu, n'o Isaaka, n'o Yakobo, okubawa ibo n'e izaire lyabwe eririirawo. ⁹ Nzena natumwire naimwe mu biseera ebyo, nga nkoba nti nze ti nsobola kubasitula nzeka: ¹⁰ Mukama Katonda wanyu abongeire, era, bona, watyanu muli ng’e munyenye egy'o mu igulu okubba obungi. ¹¹ Mukama, Katonda wa bazeiza banyu, abongere emirundi lukumi okusinga nga bwe muli, era abawe omukisa, nga bwe yabasuubizirye! ¹² Nze nsobola ntya nzenka okusitula okutegana kwanyu n'o mugugu gwanyu n'o kutongana kwanyu? ¹³ Mwetwalire abasaiza ab'a magezi era abategeevu era Ab'a maani, ng'e bika byanyu bwe biri, nzena ndi bafuula abakulu banyu. ¹⁴ Mwena ni mwiramu ni mutumula nti ekigambo ky'otumwire kisa ife okukikola. ¹⁵ Kale ni ntwala abakulu b'e bika byanyu, abasaiza ab'a magezi, era Ab'a maani, ni mbafuula abakulu banyu, abaami b'e nkumi, era abaami b'e bikumi, era abaami b'ataanu, era abaami b'a makumi, era abamyuka, ng'e bika byanyu bwe biri. ¹⁶ Era nakutiire abalamuli banyu mu biseera ebyo, nga ntumula nti muwulirenga ensonga gya bagande banyu, musalirenga emisango egy'e nsonga omuntu n'o mugande we n'o munaigwanga ali awamu naye. ¹⁷ Ti musaliriryanga bwe mwasalanga emisango; mwawuliranga Abatobato n'a bakulu okubekankanya; ti mutyanga maiso g'o muntu; kubanga omusango gwa Katonda: era ensonga eyabalemanga mugireetanga gye ndi, nzena nagiwuliranga. ¹⁸ Era nabalagiire mu biseera ebyo byonabyona eby'a bagwaniire okukola. ¹⁹ Awo ni tutambula okuva e Kolebu, ni tubita mu idungu lidi lyonalyona einene ery'e ntiisya lye mwaboine mu ngira eribita mu nsi ey’e nsozi ey’Abamoli, nga Mukama Katonda waisu bwe yatulagiire; ni tutuuka e Kadesubanea. ²⁰ Ne mbakoba nti mutuukire mu nsi ey’e nsozi ey’Abamoli, Mukama Katonda waisu gy’atuwa. ²¹ Bona, Mukama Katonda wo ateekere ensi mu maiso go: yambuka olye nga Mukama Katonda wa bazeiza bo bwe yakukobere; totya so totengera. ²² Ni musemberera buli muntu ku imwe, ni mutumula nti tutume abantu abatutangira, batume abantu abaatutangira, batutangiririre ensi, bairewo batukobere engira bwe eri gye tubba twambukiramu, n’e bibuga bwe biri mwe tulituuka. ²³ Ekigambo ekyo ni kinsanyusya inu: ni nonda ku imwe abantu ikumi na babiri, buli kika omuntu mumu: ²⁴ ni bakyuka ni baniina ku lusozi, ni batuuka mu kiwonvu kya Esukoli, ni bakikeeta. ²⁵ Ni batwala ku bibala by'e nsi mu ngalo gyabwe, ni babireeta gye tuli, ni batukobera ni batumula nti ensi eyo nsa Mukama Katonda waisu gy'atuwa. ²⁶ Naye imwe ni mutaikirirya kwambuka, naye ni mujeemera ekiragiro kya Mukama Katonda wanyu: ²⁷ ni mwemulugunyirya mu wema gyanyu, ni mutumula nti kubanga Mukama yatukyawire, kyeyaviire atutoola mu nsi y'e Misiri, okutugabula mu mikono gy'Abamoli, okutuzikirirya. ²⁸ Twambuka waina? bagande baisu batusaanuukirye emyoyo gyaisu, nga batumula nti Abantu banene bawanvu okusinga ife; ebibuga binene, byazimbiibweku ebigo okutuuka mu igulu; era twaboine yo abaana ba Abanaki. ²⁹ Awo kaisi ni mbakoba nti ti mubatya, so ti mubatekemukira. ³⁰ Mukama Katonda wanyu abatangira iye yabalwaniriranga, nga byonabyona bwe byabbaire bye yabakoleire mu Misiri mu maiso ganyu; ³¹ n'o mu idungu, mwe waboneire Mukama Katonda wo bwe yakusitwire ng'o musaiza bw'a situla omwana we, mu ngira yonayona gye mwabitiremu, okutuusya lwe mwatuukire mu kifo kino. ³² Naye mu kigambo ekyo temwaikiriirye Mukama Katonda wanyu, ³³ eyabatangiranga mu ngira, okubasagiriranga ekifo eky'o kukubiramu eweema gyanyu, ng'a yema mu musyo obwire, okubalaganga engira ye mwabitamu, n'o mu kireri emisana. ³⁴ Awo Mukama n'a wulira eidoboozi ly'e bigambo byanyu, n'a sunguwala, n'alayira ng'a tumula nti ³⁵ Mazima ti walibbawo n'o mumu ku bantu bano ab'e mirembe gino emibbiibi alibona ensi ensa, gye nalayiriire okuwa bazeiza banyu, ³⁶ wabula Kalebu omwana wa Yefune, oyo niiye y'aligibona; era oyo ndimuwa ensi gye yaniinireku n'a baana be: kubanga yasengereirye Mukama mu byonabyona: ³⁷ Mukama n'a nsunguwalira nze ku bwanyu, ng'a tumula nti weena toliyingira omwo: ³⁸ Yoswa omwana wa Nuni, ayemereire mu maiso go, oyo aliyingira omwo: mugumye omwoyo; kubanga niiye aligisikisya Isiraeri. ³⁹ Era n'abaana banyu Abatobato, be mwatumwire nga baaba okubba omwandu, n'a baana banyu, abatamaite atyanu bisa waire ebibbiibi, ibo baliyingira omwo, era ndigibawa ibo, era baligirya. ⁴⁰ Naye imwe mukyuke mutambule mu idungu mu ngira ebita mu nyanza Emyofu. ⁴¹ kaisi ni mwiramu ni munkoba nti tusoberye ku Mukama; twayambuka ni tulwana, nga byonabyona bwe biri Mukama Katonda waisu bye yatulagiire. Ni mwesiba buli muntu ebibye eby'o kulwanisya, ni mwanguwa okuniina ku lusozi. ⁴² Awo Mukama n'a nkoba nti bakobe nti ti muniina so ti mulwana; kubanga nze tindi mu imwe; muleke okubbingibwa mu maiso g'abalabe banyu: ⁴³ Awo ni ntumula na imwe, ni mutawulira; naye ni mujeemera ekiragiro kya Mukama ni mukwatibwa amalala, ni muniina ku lusozi. ⁴⁴ Awo Abamoli abatyamanga ku lusozi olwo, ni bafuluma okubalumba ni bababbinga, ng'e njoki bwe gikola, ni babakubbirakubbira ku Seyiri okutuusya ku Koluma. ⁴⁵ Ni mwirayo ni mukunga amaliga mu maiso ga Mukama; naye Mukama n'a tawulira idoboozi lyanyu, so n'a tabategera kitu. ⁴⁶ Awo ni mutyamira mu Kadesi enaku nyingi, ng'e naku bwe giri gye mwamalireyo. Ensuula