¹ Awo Mowaabu n'ajeemera Isiraeri Akabu ng'amalire okufa. ² Akaziya n'agwa mu kituli ekiruke ekyabbaire mu kisenge kye ekya waigulu ekyabbaire mu Samaliya, n'alwala: n'atuma ababaka, n'abakoba nti Mwabe mulagulwe eri Baaluzebubi katonda ow'e Ekuloni oba nga ndiwona endwaire eno. ³ Naye malayika wa Mukama n'akoba Eriya Omutisubi nti Golokoka osisinkane ababaka ba kabaka w'e Samaliya obakobe nti Kubanga wabula Katonda mu Isiraeri kyemuva mwaba okulagulwa eri Baaluzebubi katonda ow'e Ekuloni? ⁴ Kale, Atyo bw'atumula Mukama nti toliva ku kitanda ky'oniinireku, naye tolireka kufa. Eriya n'ayaba. ⁵ Ababaka ni bairawo gy'ali, n'abakoba nti kiki ekibairiryewo? ⁶ Ni bamukoba nti waizire omusaiza okutusisinkana n'atukoba nti mwabe mwireyo eri kabaka abatumire, mumukobe nti Atyo bw'atumula Mukama nti Kubanga wabula Katonda mu Isiraeri kyova otuma okulagulwa eri Baaluzebubi katonda ow'e Ekuloni? kyoliva oleka okuva ku kitanda ky'oniinireku, naye tolireka kufa. ⁷ N'abakoba nti Omusaiza aizire okubasisinkana n'abakobera ebigambo ebyo afaanana atya? ⁸ Ne bamwiramu nti Yabbaire musaiza w'o bwoya bungi, era nga yeesibire olukoba olw'o luwu mu nkende ye. ⁹ Awo kabaka n'atuma gy'ali omwami w'ataanu n'abasaiza be ataanu. N'ayambuka gy'ali: kale, bona, ng'atyaime ku ntiiko y'olusozi. N'atumula naye nti Niiwe omusaiza wa Katonda, kabaka atumwire nti Serengeta. ¹⁰ Awo Eriya n'airamu n'akoba omwami w'ataanu nti oba ndi musaiza wa Katonda, omusyo guve mu igulu gwokye iwe n'abasaiza bo ataanu. Omusyo ne guva mu igulu ne gumwokya iye n'abasaiza be ataanu. ¹¹ Awo n'atuma nate gy'ali omwami w'ataanu ogondi n'abasaiza be ataanu. N'airamu n'amukoba nti Niiwe omusaiza wa Katonda, atyo kabaka bw'atumwire nti Yanguwa okuserengeta. ¹² Awo Eriya n'airamu n'abakoba nti oba nga ndi musaiza wa Katonda, omusyo guve mu igulu gwokye iwe n'abasaiza bo ataanu. Omusyo gwa Katonda ni guva mu igulu ni gumwokya iye n'abasaiza be ataanu. ¹³ Awo n'atuma ate omwami w'ataanu ogondi n'abasaiza be ataanu. Omwami w'ataanu ow'okusatu n'ayambuka n'aiza n'afukamira ku makumbo ge mu maiso g'Eriya, n'amwegayirira n'amukoba nti Niiwe omusaiza wa Katonda, nkwegayiriire, obulamu bwange n'obulamu bwa banu ataanu abaidu bo bube bwo muwendo mungi mu maiso go. ¹⁴ Bona, omusyo gwaviire mu igulu ne gwokya abaami b'ataanu bombiri abaasookere n'abasaiza baabwe ataanu: naye watyanu obulamu bwange bubbe bwo muwendo mungi mu maiso go. ¹⁵ Awo malayika wa Mukama n'akoba Eriya nti Serengeta naye tomutya. N'agolokoka n'aserengeta naye n'ayaba eri kabaka. ¹⁶ N'amukoba nti Atyo bw'atumula Mukama nti Kubanga watumire ababaka okulagulwa eri Baaluzebubi katonda ow'e Ekuloni, kubanga wabula katonda mu Isiraeri okulagulwa eri ekigambo kye kyewaviire okola otyo? kyoliva oleka okuva ku kitanda ky'oniinireku, naye tolireka kufa. ¹⁷ Awo n'afa ng'e kigambo kya Mukama bwe kyabbaire Eriya kye yatumwire. Yekolaamu n'atandika okufuga mu kifo kye mu mwaka ogw'okubiri ogwa Yekolaamu mutaane wa Yekosafaati kabaka wa Yuda; kubanga teyabbaire mwana w'o bwisuka. ¹⁸ Era ebikolwa ebindi byonabyona ebya Akaziya bye yakolere tebyawandiikiibwe mu kitabo eky'eby'omu mirembe gya bakabaka ba Isiraeri?