¹ Awo Sulemaani mutaane wa Dawudi n'anywezebwa mu bwakabaka bwe, Mukama Katonda we n'abba naye, n'a mugulumizya inu. ² Sulemaani n'atumula ne Isiraeri yenayena, abaami b'e nkumi n'a b'e bikumi n'abalamuzi na buli mukulu mu Isiraeri yenayena, emitwe gy'e nyumba gya baitawabwe. ³ Awo Sulemaani n'e kibiina kyonakyona wamu naye ne baaba mu kifo ekigulumivu ekyabbaire e Gibyoni; kubanga eyo niiyo yabbaire eweema ya Katonda ey'o kusisinkanirangamu, Musa omwidu wa Mukama gye yakolere mu idungu. ⁴ Naye esanduuku ya Katonda Dawudi yabbaire aginiinisirye n'agitoola e Kiriyasuyalimu n'a gireeta mu kifo Dawudi kye yagitegekeire: kubanga yabbaire agikubbiire eweema e Yerusaalemi. ⁵ Era ate ekyoto eky'e kikomo Bezaaleri mutaane wa Uli mutaane wa Kuuli kye yakolere kyabbaire yiiyo mu maiso g'e weema ya Mukama: Sulemaani n'e kibiina na bayabanga gye kiri. ⁶ Sulemaani n'ayambukayo eri ekyoto eky'e kikomo mu maiso ga Mukama ekyabbaire ku weema ey'o kusisinkanirangamu, n'a weerayo okwo ebiweebwayo ebyokyebwa lukumi. ⁷ Mu bwire obwo Katonda n'abonekera Sulemaani, n'a mukoba nti Saba kye mba nkuwa. ⁸ Sulemaani n'akoba Katonda nti Walagire Dawudi itawange ekisa kingi, n'onfuula kabaka mu kifo kye. ⁹ Kale, Ai Mukama Katonda, ekigambo kye wasuubizirye Dawudi itawange kinywezebwe: kubanga onfiire kabaka w'a bantu abafaanana enfuufu ey'o ku nsi obungi. ¹⁰ Mpa amagezi n'o kumanya, nfulumenga nyingirenga mu maiso g'a bantu bano: kubanga yani asobola okusalira emisango abantu bo bano abenkaniire awo obukulu? ¹¹ Katonda n'akoba Sulemaani nti kubanga ekyo kibbaire mu mwoyo gwo, so tosabire bugaiga, ebintu, waire ekitiibwa, waire obulamu bw'abo abakukyawa, so tosabire kuwangaala; naye weesabiire amagezi n'o kumanya, osalirenga emisango abantu bange, be nkufuuliire kabaka: ¹² amagezi n'o kumanya oweweibwe; era ndikuwa n'o bugaiga n'e bintu n'e kitiibwa by'atabbanga nabyo n'o mumu ku bakabaka abaakusookere, so tiwaliba oluvanyuma lwo alibba nabyo. ¹³ Awo Sulemaani n'ava ku lugendo lwe n'aiza eri ekifo ekigulumivu ekyabbaire e Gibyoni, ng'ava mu maiso g'e weema ey'o kusisinkanirangamu, n'aiza e Yerusaalemi; n'afuga Isiraeri. ¹⁴ Sulemaani n'akuŋaanya amagaali n'a beebagala embalaasi: era yabbaire n'amagaali lukumi mu bina n'abeebagala embalaasi mutwaalo gumu mu nkumi ibiri, be yateekere mu bibuga eby'a magaali n'awali kabaka e Yerusaalemi. ¹⁵ Kabaka n'afuula efeeza ne zaabu mu Yerusaalemi okubba ng'a mabbaale obungi, okubba ng'a mabbaale, n'e mivule yagifiire okubba ng'e misukamooli egiri mu nsenyu obungi. ¹⁶ Era embalaasi Sulemaani gye yabbaire nagyo bagitoolanga mu Misiri; abasuubuzi ba kabaka ni bagiweebwanga bisibo, buli kisibo n'o muwendo gwakyo. ¹⁷ Era egaali balisyomanga nga balitoola mu Misiri nga liizirira (sekeri) lukaaga egye feeza, n'e mbalaasi ng'eizirira kikumi mu ataanu; era bakabaka bonabona ab'Abakiiti batyo na bakabaka ab'e Busuuli, bagitoolangamu mu mukono gwabwe.