¹ Awo Sulemaani n'ataka okuzimbira eriina lya Mukama enyumba, n'e nyumba y'o bwakabaka bwe. ² Sulemaani n'a yawula abasaiza emitwalo musanvu, okwetiikanga emigugu, n'a basaiza emitwalo munaana abaatemanga ku nsozi, n'e nkumi isatu mu lukaaga okubalabiriranga. ³ Sulemaani n'a tuma eri Kulamu kabaka w'e Tuulo ng'a tumula nti nga bwe wakolanga Dawudi itawange n'o muweererya emivule okuzimba enyumba okubba omwo, otyo bw'obba okola nanze. ⁴ Bona, nzimbira eriina lya Mukama Katonda wange enyumba okugiwonga eri iye, n'o kwotererya mu maiso ge obubaani obw'e by'a kaloosa ebiwoomereri, n'o lw'e migaati egitawaawo, n'o lw'e biweebwayo ebyokyebwa amaakeeri n'o lweigulo, ku sabbiiti n'e myezi nga gyakaiza giize giboneke n"o ku mbaga egyatekeibwewo egya Mukama Katonda waisu. Kino niikyo kiragiro eky'e mirembe gyonagoyna eri Isiraeri. ⁵ N'e nyunba gye nzimba nene: kubanga Katonda waisu mukulu okusinga bakatonda bonabona. ⁶ Naye yani asobola okumuzimbira enyumba, kubanga eigulu n'e igulu erya waigulu talituukamu? nze ninze ani muzimbire enyumba, wabula okwotereryanga obubaani mu maiso ge? ⁷ Kale, mpeererya omusaiza alina amagezi okukola omulimu ogwe zaabu, n'e feeza n'e bikomo n'e byoma, n'o lugoye olw'e fulungu n'o lutwakaali ne kaniki, era omutegeevu okukola enjola egy'e ngeri gyonagoyna, okubba awamu n'a basaiza ab'a magezi abali nanze mu Yuda n'o mu Yerusaalemi, Dawudi itawange be yateekereteekere. ⁸ Era mpeererya n'e mivule n'e miberosi n'e mitoogo ng'o gitoola ku Lebanooni: kubanga maite ng'a baidu bo bategeevu okutema emisaale ku Lebanooni; era, bona, abaidu bange babbanga wamu n'a baidu bo, ⁹ okunteekerateekera emisaale mingi: kubanga enyumba gy'e njaba okuzimba eribba nene kitalo. ¹⁰ Era, bona, ndiwa abaidu bo, ababaizi abatema emisaale, ebigero eby'e ŋaanu empuule emitwaalo ibiri, n'e bigero eby'e sayiri emitwalo ibiri, n'e bideku eby'o mwenge emitwalo ibiri, n'e bideku eby'a mafuta emitwalo ibiri. ¹¹ Awo Kulamu kabaka w’e Tuulo n'airamu ng'a wandiika ebbaluwa n'a giweererya Sulemaani, nti Kubanga Mukama ataka abantu be, kyeyaviire akufuula kabaka waabwe. ¹² Era Kulamu n'atumula nti Mukama Katonda wa Isiraeri yebazibwe eyatondere eigulu n'e nsi, awaire Dawudi kabaka omwana omutegeevu, eyaweweibwe amagezi n'o kumanya, ayaba okuzimbira Mukama enyumba n'o kuzimbira obwakabaka bwe enyumba. ¹³ Atyanu mpeererya omusaiza ow'a magezi eyaweweibwe okutegeera, owa Kulamu itawange, ¹⁴ Omwana w'o mukali ow'o ku bawala ba Daani, n'o itaaye yabbaire musaiza we Tuulo, ow'a magezi okukola omulimu ogwe zaabu n'o gwe feeza n'o gw'e bikomo n'ogw'ebyoma n'o gw'a mabbaale n'o gw'e misaale n'o gw'e ngoye egy'e fulungu n'e kaniki n'e bafuta ensa n'e ngoye entwakaali; era n'o kwola enjola egy'e ngeri gyonagoyna, n'o kugunja engeri yonayona egunjibwa: alagiirwe ekifo wamu N'a basaiza bo ab'a magezi n'a basaiza ab'a magezi aba mukama wange Dawudi itaawo. ¹⁵ Kale, eŋaanu n'e sayiri, amafuta n'o mwenge, mukama wange bye yatumwireku; atume eri abaidu be: ¹⁶ fena tulitema emisaale ku Lebanooni, nga bw'otaka obungi: era tuligireeta gy'oli nga tugikulula ku nyanza ne tugituukya e Yopa; wena oliginiinisya e Yerusaalemi. ¹⁷ Awo Sulemaani n'abona banaigwanga bonabona abali mu nsi y'e Isiraeri ng'o kubala bwe kwabbaire Dawudi itaaye kwe yababalire: ne waboneka kasiriivu mu mitwalo itaanu mu nkumi isatu mu lukaaga. ¹⁸ N'a teekawo emitwalo musanvu ku ibo okwetiikanga emigugu, n'e mitwaalo munaana abaatemanga ku nsozi n'abalabilrii enkumi isatu mu lukaaga okukozesyanga abantu.