¹ Awo ni bamala emyaka isatu nga wabula ntalo eri Obusuuli n'e Isiraeri. ² Awo olwatuuka mu mwaka ogw'o kusatu Yekosafaati kabaka wa Yuda n'a serengeta eri kabaka wa Isiraeri. ³ Awo kabaka wa Isiraeri n'akoba abaidu be nti mumaite nga Lamosugireyaadi kyaisu, feena tusirika ni tutakitoola mu mukono gwa kabaka w’e Busuuli? ⁴ N'akoba Yekosafaati nti wayaba nanze e Lamosugireyaadi okulwana? Awo Yekosafaati n'akoba kabaka wa Isiraeri nti Nze ninga iwe bw'oli, abantu bange ng'a bantu bo, embalaasi gyange ng'e mbalaasi gyo. ⁵ Awo Yekosafaati n'akoba kabaka wa Isiraeri nti nkwegayiriire, buulya ekigambo kya Mukama watyanu. ⁶ Awo kabaka wa Isiraeri n'akuŋaanya banabbi abasaiza nga bina, n'abakoba nti ntabaale e Lamosugireyaadi oba ndekeyo? Ni batumula nti Yambuka; kubanga Mukama alikigabula mu mukono gwa kabaka. ⁷ Naye Yekosafaati n'atumula nti wabula wano ate nabbi wa Mukama, tumubuulye? ⁸ Kabaka wa Isiraeri n'akoba Yekosafaati nti waliwo ate omusaiza omumu gwe tusobola okubuuliryaamu Mukama, Mikaaya mutaane wa Imula: naye mukyawa; kubanga tandagulaku bisa wabula ebibbiibi. Yekosafaati n'atumula nti Kabaka aleke okutumula atyo. ⁹ Awo kabaka wa Isiraeri n'ayeta omumbowa n'atumula nti Yanguwa osyome Mikaaya mutaane wa Imula. ¹⁰ Era kabaka wa Isiraeri n'o Yekosafaati kabaka wa Yuda ne batyama buli muntu ku ntebe ye nga bavaire ebivaalo byabwe, mu mbuga eri ku mulyango gwa wankaaki w'e Samaliya; banabbi bonabona ni balagulira mu maiso gaabwe. ¹¹ Awo Zedekiya mutaane wa Kenaana ne yeekolera amaziga ag'e byoma n'atumula nti atyo bw'atumula Mukama nti Olitomera Abasuuli na gano Okutuusya lwe balimalibwawo. ¹² Na banabbi bonabona ne balaguIa batyo, nga batumula nti Yambuka e Lamosugireyaadi obone omukisa: kubanga Mukama alikigabula mu mukono gwa kabaka. ¹³ Awo omubaka eyayambukire okweta Mikaaya n'a mukoba nti Bona, ebigambo bya banabbi bikobera kabaka ebisa n'o munwa gumu: nkwegayiriire, ekigambo kyo kifaanane ekigambo ky'o mumu ku ibo, otumule ebisa. ¹⁴ Awo Mikaaya n'atumila nti Nga Mukama bw'ali omulamu, Mukama ky'eyankoba ekyo kye natumula. ¹⁵ Awo bwe yaizire eri kabaka, kabaka n'amukoba nti Mikaaya, tutabaale e Lamosugireyaadi oba tulekeyo? N'amwiramu nti Yambuka obone omukisa; era Mukama alikigabula mu mukono gwa kabaka. ¹⁶ Awo kabaka n'amukoba nti Nakulayirya emirundi imeka oleke okunkobera ekigambo n'e kimu wabula amazima mu liina lya Mukama? ¹⁷ N'atumula nti mboine Isiraeri yenayena ng'asaasaaniire ku nsozi ng'e ntama egibula musumba: Mukama n'atumula nti Abo babula mukama wabwe; baireyo buli muntu mu nyumba ye mirembe. ¹⁸ Awo kabaka wa Isiraeri n'akoba Yekosafaati nti tinkukobere nga taalagule bisa eri nze wabula ebibbiibi? ¹⁹ N'atumula nti Kale wulira ekigambo kya Mukama: Mboine Mukama ng'atyaime ku ntebe ye n'eigye lyonalyona ery'o mu igulu nga bayemereire gy'ali ku mukono gwe omulyo n'o ku mugooda. ²⁰ Mukama n'atumula nti yani eyasendasenda Akabu ayambuke e Lamosugireyaadi agwe? Omumu n'atumula atyo; ogondi n'atumula atyo. ²¹ Awo ne wafuluma omuzimu ni gwemerera mu maiso ga Mukama ni gutumula nti nze namusendasenda. ²² Mukama n'agukoba nti otya? Ni gutumula nti nafuluma ni mba omuzimu ogw'obubbeyi mu munwa gwa banabbi be bonabona. N'atumula nti iwe wamusendasenda n'okusobola wasobola: fuluma okole otyo. ²³ Kale, bona, Mukama atekere omuzimu ogw'o bubbeyi mu munwa gwa banabbi bo bano bonabona: era Mukama akwogeireku akabbiibi. ²⁴ Awo Zeddekiya mutaane wa Kenaana n'asembera n'akubba Mikaaya oluyi, n'atumula nti Omwoyo gwa Mukama gwambitireku gutya okutumula naiwe? ²⁵ Mikaaya n'atumula nti bona, olibona ku lunaku olwo bw'oliyingira mu kisenge eky'omunda okwegisa. ²⁶ Awo kabaka wa Isiraeri n'atumula nti mutwale Mikaaya mumwirye eri Amoni omukulu w'ekibuga n'eri Yowaasi mutaane wa kabaka; ²⁷ mutumule nti atyo bw'atumula kabaka nti olusaiza luno muluteeke mu ikomera mululiisyenga emere ey'okubona enaku n'a maizi ag'o kubona enaku, okutuusya lwe ndiirawo emirembe. ²⁸ Awo Mikaaya n'atumula nti okwirawo bw'oliirawo emirembe, Mukama nga tatumulire mu nze. N'atumula nti Muwulire, imwe amawanga mwenamwena. ²⁹ Awo kabaka wa Isiraeri n'o Yekosafaati kabaka wa Yuda ni bambuka e Lamosugireyaadi. ³⁰ Kabaka wa Isiraeri n'akoba Yekosafaati nti Neefiire ne nyingira mu lutalo; naye iwe vaala ebivaalo byo. Awo kabaka wa Isiraeri ni yeefuula n'ayingira mu lutalo. ³¹ Awo kabaka w'e Busuuli yabbaire alagiire abaami asatu mu babiri ab'a magaali ge ng'atumula nti temulwana na batobato waire abakulu, wabula kabaka wa Isiraeri yenka. ³² Awo olwatuukire abaami b'amagaali bwe baboine Yekosafaati ni batumula nti mazima niiye kabaka wa Isiraeri; ne bakyama okulwana naye: Yekosafaati n'atumulira waigulu. ³³ Awo olwatuukire abaami b'a magaali bwe baboinea nga ti niiye kabaka wa Isiraeri, awo ni bakoma okumusengererya. ³⁴ Awo ne wabbaawo omuntu eyanaanwire omutego gwe nga tagendereire n'alasa kabaka wa Isiraeri ebivaalo bye eby'e byoma we bigaitira: Kyeyaviire akoba omubbinga w'eigaali lye nti kyusya omukono gwo ontoole mu igye; kubanga nfumitiibwe inu. ³⁵ Olutalo ni lweyongera ku lunaku olwo: kabaka ni bamukwatirira mu igaali lye okulwana n'Abasuuli, n'afa olweigulo: omusaayi ni guva mu kiwundu ni gukulukutira munda w'eigaali. ³⁶ Awo ne wabba okulangirwa mu igye lyonalyona eisana ng'alitaka okugwa nga batumula nti Buli muntu aire mu kibuga ky'ewaabwe, era buli muntu aire mu nsi y'ewaabwe. ³⁷ Awo kabaka n'afa n'aleetebwa e Samaliya; ni baziika kabaka mu Samaliya. ³⁸ Ne boozerya eigaali awali ekidiba eky'e Samaliya; embwa ne gikomba omusaayi gwe; (era abenzi banaabiranga eyo;) ng'e kigambo kya Mukama bwe kyabbaire kye yatumwire. ³⁹ Era ebikolwa ebindi byonabyona ebya Akabu ne byonabyona bye yakolere n'e nyumba ey'amasanga gye yazimbire n'ebibuga byonabyona bye yazimbire tebyawandiikiibwe mu kitabo eky'e by'o mu mirembe gya bakabaka ba Isiraeri? ⁴⁰ Awo Akabu ne yeegonera wamu na bazeiza be; Akaziya mutaane we n'afuga mu kifo kye. ⁴¹ Awo Yekosafaati mutaane wa Asa n'atandika okufuga Yuda mu mwaka ogw'okuna ogwa Akabu kabaka wa Isiraeri. ⁴² Yekosafaati yabbaire yaakamala emyaka asatu na itaanu bwe yaliire obwakabaka: n'afugira emyaka abiri na itaanu mu Yerusaalemi. N'o maye eriina lye lyabbaire Azuba muwala wa Siruki. ⁴³ Awo n'atambuliranga mu ngira yonayona eya Asa itaaye; n'atakyama okugivaamu, ng'akola ebyabbaire mu maiso ga Mukama ebisa: naye ebifo ebigulumivu tibyatoleibwewo; abantu nga bakaali baweerayo sadaaka ni bootererya obubaani mu bifo ebigulumivu. ⁴⁴ Era Yekosafaati n'atabagana n'o kabaka wa Isiraeri. ⁴⁵ Era ebikolwa ebindi byonabyona ebya Yekosafaati n'amaani ge ge yalagire era bwe yalwaine tebyawandiikiibwe mu kitabo eky'e by'omu mirembe gya bakabaka ba Yuda? ⁴⁶ N'abaalyanga ebisiyaga abaasigairewo ku mirembe gya itaaye Asa n'abatoola mu nsi. ⁴⁷ Awo nga wabula kabaka mu Edomu: omusigire nga iye kabaka. ⁴⁸ Yekosafaati n'asiba malikebu egy'e Talusiisi egy'okwaaba e Ofiri okusyomayo ezaabu: naye ne gitayaba; kubanga malikebu gyamenyekeire e Ezyonigeba. ⁴⁹ Awo Akaziya mutaane wa Akabu n'akoba Yekosafaati nti Abaidu bange baabe n'abaidu bo mu malikebu. Naye Yekosafaati n'ataikirirya. ⁵⁰ Yekosafaati ni yeekungira wamu na bazeiza be n'a ziikibwa wamu na bazeiza be mu kibuga kya Dawudi zeiza we: awo Yekolaamu mutaane we n'afuga mu kifo kye. ⁵¹ Akaziya mutaane wa Akabu n'atandika okufuga Isiraeri mu Samaliya mu mwaka ogw'e ikumi n'o musanvu ogwa Yekosafaati kabaka wa Yuda n'afugira Isiraeri emyaka ibiri. ⁵² N'akola ebyabbaire mu maiso ga Mukama Ebibbiibi n'atambulira mu ngira ya itaaye n'o mu ngira ya maye n'o mu ngira ya Yerobowaamu mutaane wa Nebati mwe yayonooneserye Isiraeri. ⁵³ N'aweererya Baali n'a musinza n'a sunguwalya Mukama Katonda wa Isiraeri nga byonabyona bwe byabbaire itaaye bye yakolere.