¹ Awo enaku gya Dawudi ne gibba nga giri kumpi okutuuka afe; n'akuutira Sulemaani mutaane we ng'atumula nti ² Nze njaba bonabona ab'o mu nsi gye baaba: kale bba n’a maani weerage obusaiza; ³ era okwatanga Mukama Katonda wo bye yakukuutiire, okutambuliranga mu mangira ge; okukwatanga amateeka ge, n'ebiragiro bye, n'ebyo bye yategeezerye, ng'ebyo bwe biri ebyawandikiibwe mu mateeka ga Musa, kaisi obonenga omukisa mu byonabyona by'okola, na buli gyewakyukiranga: ⁴ Mukama anywezye ekigambo kye, kye yatumwire ku nze nti Abaana bo bwe begendereryanga engira yabwe, okutambuliranga mu maiso gange mu mazima n'o mwoyo gwabwe gwonagwona n'e meeme yaabwe yonayona, tewaakugotenga (atyo bwe yatumwire) omusaiza ku ntebe ya Isiraeri. ⁵ Ate omaite n'ekyo Yowaabu mutaane wa Zeruyiya kye yankolere, kye yakolere abakulu ababiri ab'eigye lya Isiraeri, Abuneeri mutaane wa Neeri n'o Amasa mutaane wa Yeseri, be yaitire n'ayiwa omusaayi ogw'o mu ntalo mu mirembe, n'asiiga omusaayi ogw'o mu ntalo ku lukoba lwe, lwe yabbaire yeesibire mu nkende n'o mu ngaito gye egyabbire mu bigere bye. ⁶ Kale mukole ng'a magezi go bwe gali, so toganyanga mutwe gwe oguliku envi kwika emagombe mirembe. ⁷ Naye okolanga kusa bataane ba Baluzirayi Omugireyaadi, era babbenga ku abo abalyanga ku meenza yo: kubanga baizire gye ndi batyo bwe nairukire Abusaalomu Mugande wo. ⁸ Era, bona, waliwo naiwe Simeeyi mutaane wa Gera Omubenyamini ow'e Bakulimu, eyalaamire ekiraamo ekizibu ku lunaku kwe nayabiire e Makanayimu: naye n'aserengetya okunsisinkana ku Yoludaani ne mulayirira Mukama nga ntumula nti njaba kukwita ne kitala. ⁹ Kale tomwetanga abulaku musango, kubanga oli musaiza wa magezi; era olimanya ebikugwanira okumukola, n'o mutwe gwe ogubulaku envi oligwitisya emagombe n'o musaayi. ¹⁰ Awo Dawudi na gonera wamu na bazeizabe, ni bamuziika mu kibuga kya Dawudi. ¹¹ N'enaku Dawudi gye yafugiire Isiraeri gyabbaire emyaka ana: yafugiire emyaka musanvu e Kebbulooni, n'afugira emyaka asatu na isatu e Yerusaalemi. ¹² Awo Sulemaani n'atyama ku ntebe ya Dawudi itaaye; obwakabaka bwe ni bunywezebwa inu. ¹³ Awo Adoniya mutaane wa Kagisi n'aiza eri Basuseba maye wa Sulemaani. N'atumula nti Toiza mirembe? N'atumula nti Mirembe. ¹⁴ Ate n'atumula nti ndiku kye ntaka okukukobera: N'atumula nti nkobera. ¹⁵ N'atumula nti omaite ng'o bwakabaka bwabbaire bwange, Isiraeri yenayena ne bekalisisya amaiso gabwe ku nze, nze mbulye: naye obwakabaka bukyukire ne bufuuka bwa Mugande wange: kubanga bwabbaire bubwe okuva eri Mukama. ¹⁶ Kale nkusaba ekigambo kimu, tonyima. N'amukoba nti tumula. ¹⁷ N'atumula nti Nkwegayiriire; koba Sulemaani kabaka, (kubanga taakwime,) ampe Abisaagi Omusunamu mufumbirwe. ¹⁸ Awo Basuseba n'atumula nti Kale; nakutumulirayo eri kabaka. ¹⁹ Basuseba Kyeyaviire ayaba eri kabaka Sulemaani, okutumulirayo Adoniya. Kabaka n'agolokoka okumusisinkana, n'amuvuunamira, n'atyama ku ntebe ye, n'ateesesyawo maye entebe; n'atyama ku mukono gwe omulyo. ²⁰ Awo n'atumula nti nkusaba ekigambo kimu ekitono; tonyima. Kabaka n'a mukoba nti Saba, mawange; kubanga tinakwime. ²¹ N'aytumula nti Abisaagi Omusunamu aweebwe Adoniya mugande wo okumufumbirwa. ²² Kabaka Sulemaani n'airamu n'akoba maye nti era kiki ekikusabya Abisaagi Omusunamu olwa Adoniya? musabire n'o bwakabaka; kubanga niiye mugande wange omukulu; sabira niiye n'o Abiyasaali kabona n'o Yowaabu mutaane wa Zeruyiya. ²³ Awo kabaka Sulemaani n'alayira Mukama nti Katonda ankole atyo n'o kusingawo, oba nga Adoniya tatumwire kigambo ekyo kyo kumwitisya. ²⁴ Kale nga Mukama bw'ali omulamu, anywezerye n'a ntyamisya ku ntebe ya Dawudi itawange, era ampaire enyumba, nga bwe yasuubizirye, mazima Adoniya anaitibwa atyanu. ²⁵ Awo kabaka Sulemaani n'atuma mu mukono gwa Benaya mutaane wa Yekoyaada; n'amugwaku n'okufa n'afa. ²⁶ Kabaka n'akoba Abiyasaali kabona nti Yaba e Anasosi mu byalo byo iwe; kubanga osaaniire okufa: naye tinakwite mu biseera bino, kubanga wasitulanga esanduuku ya Mukama Katonda mu maiso ga Dawudi itawange, era kubanga wabonyaabonyezeibwe mu byonabyona ebyabonyabonyerye itawange. ²⁷ Awo Sulemaani n'abbinga Abiyasaali obutabba kabona eri Mukama; atuukirirye ekigambo kya Mukama, kye yatumwire ku nyumba ya Eri mu Siiro. ²⁸ Ebigambo ebyo ni bituuka eri Yowaabu: kubanga Yowaabu yabbaire akyukire okusengererya Adoniya, waire nga tiyasengereirye Abusaalomu. Yowaabu n'airukira mu Wema ya Mukama, n'akwata ku maziga g'e kyoto. ²⁹ Ni bakobera kabaka Sulemaani nti Yowaabu airukire mu Weema ya Mukama, era bona, ali ku kyoto. Awo Sulemaani n'atuma Benaya mutaane wa Yekoyaada ng'a tumula nti yaba omugweku. ³⁰ Benaya n'atuuka ku Weema ya Mukama, n'a mukoba nti Kabaka bw'atumula ati nti Fuluma. N'atumula nti Bbe; naye naafiira wano. Benaya n'airirya kabaka ebigambo ng'atumula nti atyo bw'atumwire Yowaabu, era bw'angiriremu tyo. ³¹ Awo kabaka n'amukoba nti kola nga bw'atumwire, omugweku omuziike; otoolewo omusaayi, Yowaabu gwe yayiwire Awabula nsonga, ku nze n'o ku nyumba ya itawange. ³² Era Mukama aliirya omusaayi gwe ku mutwe gwe iye, kubanga yagwire ku basaiza babiri abaamusinga obutuukirivu n'o busa, n'abaita n'e kitala, itawange Dawudi n'atakimanya, Abuneeri mutaane wa Neeri, omukulu w'e igye lya Isiraeri, ne Amasa mutaane wa Yeseri, omukulu w'e igye lya Yuda. ³³ Gutyo omusaayi gwabwe guliira ku mutwe gwa Yowaabu n'o ku mutwe gw'e izaire lye enaku gyogyona: naye eri Dawudi n'eri eizaire lye n'eri enyumba ye n'eri entebe ye, eribaayo emirembe enaku gyonagyona okuva eri Mukama. ³⁴ Awo Benaya mutaane wa Yekoyaada n'ayambuka n'amugwaku n'amwita; ni bamuziika mu nyumba ye iye mu idungu. ³⁵ Awo kabaka n'ateekawo Benaya mutaane wa Yekoyaada okubba omukulu w'eigye mu kifo kye: kabaka n'ateekawo Zadooki kabona mu kifo kya Abiyasaali. ³⁶ Kabaka n'atuma n'ayeta Simeeyi n'a mukoba nti Weezimbire enyumba mu Yerusaalemi, obbe omwo, so tovangayo okwaba yonayona. ³⁷ Kubanga ku lunaku kw'oliviirayo n'osomoka akaiga Kiduloni, tegeerera dala nga tolireka kufa: omusaayi gwo gulibba ku mutwe gwo iwe. ³⁸ Simeeyi n'akoba kabaka nti Ekigambo ekyo kisa: nga mukama wange kabaka bw'atumwire, atyo omwidu wo bw'alikola. Simeeyi n'amala enaku nyingi mu Yerusaalemi. ³⁹ Awo olwatuukire emyaka isatu bwe gyaweireku, abaidu ababiri aba Simeeyi ne bairuka ne baiza eri Akisi mutaane wa Maaka kabaka w'e Gaasi. Ne bakobera Simeeyi nti bona, abaddu bo bali e Gaasi. ⁴⁰ Simeeyi n'a golokoka n'ateeka amatandiiko ku ndogoyi ye n'ayaba e Gaasi eri Akisi okumusaagira abaidu be: Simeeyi n'ayaba n'asyoma abaidu be e Gaasi. ⁴¹ Ne bakobera Sulemaani nga Simeeyi yaabire e Gaasi okuva e Yerusaalemi era ng'airirewo. ⁴² Kabaka n'atuma n'ayeta Simeeyi n'amukoba nti tinakuliirye Mukama ni nkutegeezerya dala nga ntumula nti tegeerera dala nga ku lunaku kw'oliviirayo n'otambula okwaba yonayona, tolireka kufa? n'onkoba nti ekigambo kye mpuliire kisa. ⁴³ Kale kiki ekikulobeire okwekuuma ekirayiro kya Mukama n'e kiragiro kye nakulagiire? ⁴⁴ Era kabaka n'akoba Simeeyi nti Omaite obubbiibi bwonabwona omwoyo gwo bwe gutegeera, bwe wakolere Dawudi itawange: Mukama kyaliva airya obubbiibi bwo ku mutwe gwo iwe. ⁴⁵ Naye kabaka Sulemaani aliweebwa omukisa, n'e ntebe ya Dawudi erinywezebwa mu maiso ga Mukama enaku gyonagyona. ⁴⁶ Awo kabaka n'alagira Benaya mutaane wa Yekoyaada; n'afuluma n'amugwaku n'okufa n'afa. Obwakabaka ni bunywezebwa mu mukono gwa Sulemaani.