¹ Awo kabaka Dawudi yabbaire mukaire era ng'akootakoota; ni bamubiikaku ebivaalo, naye n'atafuna lubugumu. ² Abaidu be kyebaviire bamukoba nti Basagiriire mukama wange kabaka omuwala omutomuto atamaite musaiza: ayemererenga mu maiso ga kabaka, amuweererye; era agalamirenga mu kifubba kyo, mukama wange kabaka afune olubbugumu. ³ Awo ni basagira omuwala omusa okubuna ensalo gyonagyona egya Isiraeri, ni babona Abisaagi Omusunamu, ni bamuleetera kabaka. ⁴ Awo omuwala yabbaire musa inu; n'aweereryanga kabaka n'amujanjabanga; naye kabaka n'atamumanya. ⁵ Awo Adoniya mutaane wa Kagisi ni yeegulumizya ng'atumula nti nze ndibba kabaka: ni yeetegekera amagaali n'abeebagala embalaasi, N'abasaiza ataanu okwirukiranga mu maiso ge. ⁶ So itaaye yabbaire tamunyiizyanga n'akatono ng'atumula nti kiki ekikuyonderye otyo? era yabbaire musaiza musa inu; era niiye yairanga ku Abusaalomu. ⁷ N'ateesya n'o Yowaabu mutaane wa Zeruyiya n'o Abiyasaali kabona: abo ni bamusengererya; Adoniya ni bamuyamba. ⁸ Naye Zadooki kabona n'o Benaya mutaane wa Yekoyaada n'o Nasani nabbi no Simeeyi n'o Leeyi N'abasaiza ab'a maani aba Dawudi tebabbaire n'o Adoniya. ⁹ Adoniya n'aitira entama n'e nte n'ebye sava awali eibbaale Zokeresi eririraine e Enerogeri: n'ayeta Bagande be bonabona abaana ba kabaka, N'abasaiza ba Yuda bonabona abaidu ba kabaka: ¹⁰ naye Nasani nabbi n'o Benaya n'a basaiza ab'a maani n'o Sulemaani mugande we n'atabeeta. ¹¹ Awo Nasani n'akoba Basuseba maye wa Sulemaani ng'atumula nti Towuliire nga Adoniya mutaane wa Kagisi aliire obwakabaka, Dawudi mukama waisu nga takimaite? ¹² Kale iza, nkwegayiriire, nkuwe amagezi, owone obulamu bwo iwe n'o bulamu bwa mutaane n'o Sulemaani. ¹³ Yaba oyingire eri kabaka Dawudi, omukobe nti Mukama wange, Ai kabaka, tewalayirira muzaana wo nti Sulemaani mutaane wo talireka kulya obwakabaka oluvanyuma lwange, era niiye alityama ku ntebe yange? kale kiki ekimuliisirye obwakabaka Adoniya? ¹⁴ Awo, bona, bwewaabba ng'okaali otumula eyo n'o kabaka, nzena nayingira oluvanyuma lwo, ni nywezya ebigambo byo. ¹⁵ Awo Basuseba n'a yingira eri kabaka mu kisenge: era kabaka yabbaire mukaire inu; n'o Abisaagi Omusunammu yaweereryanga kabaka. ¹⁶ Awo Basuseba n'akutama n'avuunamira kabaka. Kabaka n'atumula nti Otaka ki? ¹⁷ N'amukoba nti Mukama wange, walayiire Mukama Katonda wo eri omuzaana wo nti Sulemaani mutaane wo niiye alirya obwakabaka: oluvanyuma lwange, era niiye alityama ku ntebe yange. ¹⁸ Kale, bona, Adoniya yaliire obwakabaka; naiwe, mukama wange kabaka, tokimaite: ¹⁹ era aitire ente n'ebye sava n'entama nyingi, era ayetere abaana ba kabaka bonabona n'o Abiyasaali kabona n'o Yowaabu omukulu w'eigye: naye Sulemaani omwidu wo tamwetere. ²⁰ Weena, mukama wange kabaka, amaiso ga Isiraeri yenayena gali ku niiwe obakobere alityama ku ntebe ya mukama wange kabaka oluvanyuma lwe: ²¹ Bw'otookole otyo, awo olulituuka, mukama wange kabaka bw'aligonera awamu na bazeizabe, nze n'o mutaane wange Sulemaani tulyetebwa aboonoonyi. ²² Kale, bona, bwe yabbaire akaali n'o kabaka, Nasani nabbi n'ayingira. ²³ Ne bakobera kabaka nti Bona, Nasani nabbi. Awo bwe yayingiire mu maiso ga kabaka, n'avuunama amaiso ge mu maiso ga kabaka. ²⁴ Nasani n'atumula nti Mukama wange, ai kabaka, watumwire nti Adoniya niiye alirya obwakabaka oluvanyuma lwange, era niiye alityama ku ntebe yange? ²⁵ Kubanga aserengetere atyanu, era aitire ente n'ebye sava n'e ntama nyingi, era ayetere abaana ba kabaka bonabona n'a bakulu b'e igye n'o Abisaayi kabona; era, bona, balya era banywira mu maiso ge, nga batumula nti kabaka Adoniya abbe omulamu. ²⁶ Naye nze, ninze omwidu wo, n'o Zadooki kabona n'o Benaya mutaane wa Yekoyaada n'o mwidu wo Sulemaani tatwetere. ²⁷ Ekigambo ekyo kikoleibwe mukama wange kabaka, n'ototegeeza baidu bo alityama ku ntebe ya mukama wange kabaka oluvannyuma lwe? ²⁸ Awo kabaka Dawudi n'airamu n'akoba nti njetera Basuseba. N'aiza awali kabaka n'ayemerera mu maiso ga kabaka. ²⁹ Kabaka n'alayira n'atumula nti Nga Mukama bw'ali omulamu eyanunwire emeeme yange okugitoola mu kabbiibi konakona, ³⁰ mazima nga bwe nakulayiriire Mukama, Katonda wa Isiraeri, nga ntumula nti Sulemaani mutaane wo niiye alirya obwakabaka oluvanyuma lwange, era niiye alityama ku ntebe yange mu kifo kyange; mazima ntyo bwe nakola watyanu. ³¹ Awo Basuseba n'avuunama amaiso ge, ni yeeyanzya kabaka, n'atumula nti Mukama wange kabaka Dawudi abbe omulamu enaku gyonagyona. ³² Kabaka Dawudi n'atumula nti njetera Zadooki kabona no Nasani nabbi no Benaya mutaane wa Yekoyaada. Ni baiza mu maiso ga kabaka. ³³ Kabaka n'a bakoba nti Mutwale wamu naimwe abaidu ba mukama wanyu, mwebagalye Sulemaani mutaane wange enyumbu yange nze, mumuserengetye e Gikoni: ³⁴ kale Zadooki kabona n'o Nasani nabbi bamufukiireku eyo amafuta okubba kabaka wa Isiraeri: mufuuwe eikondeere mutumule nti Kabaka Sulemaani abbe omulamu. ³⁵ Kaisi ni mwambuka nga mumusengererya, naye eyayiza n'atyama ku ntebe yange; kubanga niiye yabba kabaka mu kifo kyange: era mutairewo okubba omukulu wa Isirarei ne Yuda. ³⁶ Benaya mutaane wa Yekoyaada n'airamu kabaka n'atumula nti Amiina: Mukama, Katonda wa mukama wange kabaka, atumule atyo. ³⁷ Nga Mukama bwe yabbanga n'o mukama wange kabaka, era abbenga n'o Sulemaani, afuule entebe ye enkulu okusinga entebe ya mukama wange kabaka Dawudi. ³⁸ Awo Zadooki kabona n'o Nasani nabbi n'o Benaya mutaane wa Yekoyaada n'Abakeresi n'Abaperesi ni baserengeta ne beebagalya Sulemaani enyumbu ya kabaka Dawudi, ni bamuleeta e Gikoni. ³⁹ Awo Zadooki kabona n'atoola eiziga ery'a mafuta mu weema, n'afuka amafuta ku Sulemaani. Ne bafuuwa eikondeere; abantu bonabona ne batumula nti Kabaka Sulemaani abbe omulamu. ⁴⁰ Abantu bonabona ni bambuka okumusengererya, abantu ne bafuuwa endere, ni basanyuka eisanyu lingi, eitakali n'o kwatika ni lyatika olw'oluyoogaanu lwabwe. ⁴¹ Adoniya n'abageni bonabona ababbaire naye ni baluwulira bwe babbaire nga bamala okulya. Awo Yowaabu bwe yawuliire eidoboozi ly'e ikondeere, n'atumula n'e idoboozi lino ekibuga nga kiyoogaana lwa ki? ⁴² Bwe yabbaire ng'akaali atumula, bona, Yonasaani mutaane wa Abyasaali kabona n'aiza: Adoniya n'atumula nti Yingira; kubanga oli musaiza musa, era oleetere ebigambo ebisa. ⁴³ Yonasaani n'airamu n'akoba Adoniya nti Mazima mukama waisu kabaka Dawudi afiire Sulemaani kabaka: ⁴⁴ era kabaka atumire naye Zadooki kabona n'o Nasani nabbi n'o Benaya mutaane wa Yekoyaada n'Abakeresi n'Abaperesi, era bamwebagairye enyumbu ya kabaka: ⁴⁵ era Zadooki kabona no Nasani nabbi bamufukiireko amafuta e Gikoni: era bambukire okuvaayo nga basanyuka n'o kuwuuma ekibuga ne kiwuumira dala. Eryo niilyo eidoboozi lye muwulire. ⁴⁶ Era Sulemaani atyaime ku ntebe y'o bwakabaka. ⁴⁷ Era ate abaidu ba kabaka baizire okusabira mukama waisu kabaka Dawudi nga batumula nti Katonda wo afuule eriina lya Sulemaani eisa okusinga eriina lyo, era afuule entebe ye enkulu okusinga entebe yo: kabaka n'akutamira ku kitanda kye. ⁴⁸ Era ati kabaka bw'atumwire nti Yeebazibwe Mukama, Katonda wa Isiraeri, awaire atyanu ow'o kutyama ku ntebe yange, amaiso gange nga gakibona n'okubona. ⁴⁹ Awo abageni ba Adoniya bonabona ni batya, ni bagolokoka, ni baaba buli muntu ewuwe. ⁵⁰ Adoniya n'atekemuka olwa Sulemaani; n'agolokoka n'ayaba n'akwata ku maziga g'ekyoto. ⁵¹ Ne babuulira Sulemaani nti bona, Adoniya atekemukiire kabaka Sulemaani: kubanga, bona, akwaite ku maziga g'e kyoto, ng'atumula nti Kabaka Sulemaani andayiriire watyanu nga taiza kwita mwidu we n'e kitala. ⁵² Sulemaani n'atumula nti Bw'alyeraga okubba omusajja omusa, tiwalibba luziiri lwe oluligwa wansi: naye obubbiibi bwe buliboneka ku iye, alifa. ⁵³ Awo kabaka Sulemaani n'atuma, ni bamuserengetya okuva ku kyoto. N'aiza n'avuunamira kabaka Sulemaani: Sulemaani n'amukoba nti yaba ewuwo.