¹ N'a bataane ba Lewubeeni omuberyeberye wa Isiraeri, (kubanga niiye Yabbaire omubereberye; naye kubanga yayonoonere ekiriri kya itaaye, eby'okuzaalibwa kwe okw'oluberyeberye bataane ba Yusufu mutaane wa Isiraeri kyebaviire babiweebwa; so taviibwaku okubala amaina ng'o kuzaalibwa okw'o luberyeberye bwe kwabbaire. ² Kubanga Yuda yasingire bagande be, era mu iye niimwo mwaviire omulangira; naye eby'o kuzaalibwa okw'o luberyeberye byabbaire bya Yusufu:) ³ Bataane ba Lewubeeni omuberyeberye wa Isiraeri; Kanoki, n'o Palu, Kezulooni, n'o Kalumi. ⁴ Bataane ba Yoweeri; Semaaya mutaane we, Gogi mutaane we, Simeeyi mutaane we; ⁵ Miika mutaane we, Leyaya mutaane we, Baali mutaane we; ⁶ Beera mutaane we, Tirugasupiruneseri kabaka w'e Bwasuli gwe yatwaire nga musibe: niiye yabbaire omukulu w'Abalewubeeni. ⁷ Ni baaba nge enganda gyabwe bwe gyabbaire, okuzaalibwa kwabwe bwe kwabaliibwe; omukulu Yeyeri, n'o Zekaliya, ⁸ n'o Bera mutaane wa Azazi, mutaane wa Sema, mutaane wa Yoweeri eyabbanga mu Aloweri, okutuusya e Nebo n'o Baalumyoni: ⁹ n'e buvaisana yabbanga okutuuka awayingirirwa mu idungu okuva ku mwiga Fulaati: kubanga ebisibo byabwe nga byeyongeire mu nsi ya Gireyaadi. ¹⁰ Awo ku mirembe gya Sawulo ni balwana n’a bakaguli, ne baitibwa n'o mukono gwabwe ne babbanga mu weema gyabwe okubuna ensi yonayona eri ku luuyi olw'e buvaisana olw'e Gireyaadi. ¹¹ Awo bataane ba Gaadi ne babbanga okuboolekera mu nsi y'e Basani okutuusya ku Saleka: ¹² Yoweeri omukulu, n'o Safamu ow'o kubiri, n'o Yanayi, n'o Safati mu Basani: ¹³ n'a bagande baabwe ab'o mu nda gya bazeiza babwe; Mikayiri, n'o Mesulamu, n'o Seeba, n'o Yolayi, n'o Yakani, n'o Ziya, n'o Eberi, musanvu. ¹⁴ Abo niibo babbaire bataane ba Abikayiri mutaane wa Kuuli, mutaane wa Yalowa, mutaane wa Gireyaadi, mutaane wa Mikayiri, mutaane wa Yesisayi, mutaane wa Yakudo, mutaane wa Buzi; Abo niibo babbaire bataane ba Abikayiri mutaane wa Kuuli, mutaane wa Yalowa, mutaane wa Gireyaadi, mutaane wa Mikayiri, mutaane wa Yesisayi, mutaane wa Yakudo, mutaane wa Buzi; ¹⁵ Aki mutaane wa Abudyeri, mutaane wa Guni, abakulu b'e nyumba gya bazeiza babwe. ¹⁶ Ni babbanga mu Gireyaadi mu Basani, n'o mu bibuga byaku, n'o mu byaIo byonabona ebiriraine Saloni, okutuuka ku nsalo gyabyo. ¹⁷ Abo bonabona baabaliibwe ng'o kuzaalibwa kwabwe bwe kwabbaire ku mirembe gya Yosamu kabaka we Yuda, n'o ku mirembe gya Yerobowaamu kabaka we Isiraeri. ¹⁸ Bataane ba Lewubeeni, n'aba Gaadi, n'e kitundu ky'e kika kya Manase, eky'abasaiza abazira, abasaiza abasobola okukwata engabo n'e kitala, n'o kulasa n'e mitego, era ab'a magezi okulwana, babbaire emitwaalo ina mu nkumi ina mu lusanvu mu nkaaga, abasoboire okutabaala. ¹⁹ Ni balwana n'Abakaguli, n'o Yetuli, n'o Nafisi, n'o Nodabu. ²⁰ Ne bayambwa nga balwana nabo, Abakaguli ni bagabulwa mu mukono gwabwe ni bonabona ababbaire nabo: kubanga bakungiriire Katonda mu lutalo, n'aikirirya okwegayirira kwabwe; kubanga baamwesigire. ²¹ Ne banyaga ebisibo byabwe; ku ŋamira gyabwe emitwaalo itaanu, n'o ku ntama obusiriivu bubiri mu emitwaalo itaanu, n'o ku ndogoyi enkumi ibiri, n'o ku bantu kasiriivu. ²² Kubanga bangi abaagwire nga baitiibwe kubanga olutalo lwaviire eri Katonda. Ni babbanga mu kifo kyabwe okutuuka ku kutwalibwa. ²³ Awo abaana b'e kitundu ky'e kika kya Manase ni babbanga mu nsi: ne baala okuva ku Basani ni batuuka ku Baalukerumooni ne Seniri n'o lusozi Kerumooni. ²⁴ Era bano niibo babbaire emitwe gy'e nyumba gya bazeiza babwe; Eferi, n'o Isi, n'o Eryeri, n'o Azulyeri, n'o Yeremiya, n'o Kodaviya, n'o Yakudyeri, abasaiza ab'a maani abazira, abaatiikiriri, emitwe gy'e nyumba gya bazeiza babwe. ²⁵ Ne basobya Katonda wa bazeiza wabwe, ne baaba nga benda okusengererya bakatonda b'a mawanga ag'o mu nsi, Katonda be yazikiririirye mu maiso gaabwe. ²⁶ Awo Katonda wa Isiraeri n'a kubbirirya omwoyo gwa Puli kabaka w'e Bwasuli n'o mwoyo gwa Tirugasupiruneseri kabaka w’e Bwasuli, n'a batwala n'a batoolayo, Abalewubeeni n'Abagaadi n'e kitundu ky'e kika kya Manase n'abaleeta e Kala ne Kaboli, ne Kaala, n'eri omwiga Gozani, ne watyanu.