¹ Para pangomo' pajak ba urokng ba doso nyeketi' Yesus mao' nangarotno' Io. ² Ako'koo' urokng-urokng Farisi ba ahlu-ahli Taurat mulai' ngarutuk, "Urokng nyian narimo' urokng-urokng badoso malah makotn barage ne'ido'." ³ Ako'koo, Yesus ngatootn parumpamaan nyian ka ne'ido', ⁴ "Sape ge ka antaro kito' nang kalo' ado 100 eko' domba, lalu angit seko', pasti ino' ningaatno' 99 eko' laine ka padokng utotn? Buke' ge' io pasti ampus ngagui' nang tasasat koo sampe tamu? ⁵ Lalu pas dah tamu, io pasti ngampekng domba koo ka bahue sambil karepootn. ⁶ Dah ngaramus karumoh, io pasti namui' ayukng-ayuknge ba sakampongane sambil bakato ka ne'ido', 'Repo-repolah ba aku karamo aku dah namui' dombaku nang angit,' ⁷ Aku bakato kakau, jakoolah pasti ado karepootn nang labih kayo' ka sarugo karamo 1 urokng nang batobat daripado 99 urokng banar nang ino' paralu ka patobatotn. PARUMPAMAAN DUIT PERAK NANG ANGIT ⁸ Atopun ambini mae nang ado sapuluh kapikng duit perak, kalo' io ka angitotn sakapikng ka antarae, ino' nutukng sensan ba nyapu rumahe, lalu ngago' kapikng duit koo ba ati-ati sampe io namui' duit koo? ⁹ Lalu, kalo' io dah namuan io, io pasti nyaru' agukng-ayuknge ba sakampongane sambil bakato ka ne'ido', 'Barepo-repolah ba aku karamo aku dah namuan sakapikngnang angit koo.' ¹⁰ Aku bakato kakau, jakoo ugo' ado karepootn ka antaro para malaekat Allah karamo seko' urokng badoso nang batobat." PARUMPAMAAN DUO KAMUDO ANGAKI Anak bungsu ningootn Bapo'-e ¹¹ Ako'koo Yesus bakato, "Ado seko' urokng baranak duo aki-aki. ¹² Anak nang bungsu bakato ka bapo'-e, 'Bapa', bareotn ka aku bagiotn harto ku.' Lalu bapo'-e pun magi kakayaatne ka kaduo anake. ¹³ Ino' lamo ako'koo, anak bungsu koo ngomi'an samuo hartae, lalu ampus kanagari nang jauh lalu kanaun io ngamburotn hatare koo idup bapoya-poya. ¹⁴ Waktu io dah ngabisotn samuae, tajadilah bancano kaparotn nang hebat ka nagari koo, lalu io pun mulai' bakakurangan. ¹⁵ Jadi, ampuslah io lalu bakarajo ka urokng panduduk nagari koo, lalu dinyuruh ka umo mare' makotn enyekng-enyekng-e. ¹⁶ Io taniti sidi ngisio' parute ba buoh karob nang enyekng-enyekng koo makatni', tapi ino' seko' urokng pun nang mare' io. Anak bungsu puokng ka bapo'e ¹⁷ Waktu anak bungsu koo sadar, io bakato, 'Manyak sidi pakarajo-pakarajo bapo'ku nang ado ba pamakanan nang balimpoh-limpoh, tapi aku kasio ampir mati pangokng. ¹⁸ Aku pasti umpat lalu puokng ka bapo'ku. Aku mao bakato ka io: Bapo', aku dah badoso ka sarugo ba kaadapatn ngu. ¹⁹ Aku ino' agi' pantas disabut anak ngu, jadiotn aku saloh seko' urokng pakarajo ngu.' ²⁰ Jadi, badirilah io lalu ampus ka bapo'e. Tapi, waktu kamudo' koo masih jauh sidi, bapo'e nanang io lalu panuh raso kasih sidi, bapo'e batalamo' io nekokng lalu io ngidungi'. ²¹ Ako'koo, kamudo' koo bakato ka bapo'e, 'Bapo' aku dah badoso ka sarugo ba jaadapatn ngu. Aku ino' agi' pantas disabut anak ngu.' ²² Tapi, bapo' ngu koo bakato palayan-palayane, 'Ancang bo! tabanan jubah nang paling gagas lalu pakeotnlah ka io. Pakeotn ugo' cincit ka jari kokote ngan sandal kapahae. ²³ Tabanan kasio anak sapi nang mano' lalu sambalehlah. Je' diri' makotn sambil barepo-repo, ²⁴ karamo anakku nyian dah mati, tapi kanio' idup agi'! io dah angit, io dah angit tapi dah tamu!' Jadi ne'ido' pun mulai' barepo-repo." Anak Sulong Bero ka bapo'e ²⁵ "Waktu koo, si anak Sulong gi ado ka umo, lalu pas io dah kaseket rumahe, io nangar bunyi musik ba tari-tarian. ²⁶ Jadi, io nyaru' saloh seko' ambo-ambo koo batanyo' dameo nang tajadi. ²⁷ Palayan koo nyahuti' io, 'Adi' ngu dah atokng,lalu bapo' ngu nyambaleh anak sapi nang mano', karamo io puok salamat.' ²⁸ Tapi, anak sulong koo bero lalu bai' taamo' lalh bapo'e kauar mujuk io. ²⁹ Tapi, io bakato ka bapo'e, Batahutn-tahutn aku dah bakarajo ngalayani' kau lalu ino' suoh ngalalaiotn parentah ngu, tapi kau malah ino' suoh mare' aku seko' pun kambing mudo' supayo aku biso bapesto ba ayukng-ayukng ku. ³⁰ Tapi, waktu anakngu koo puokng dah ngabisotn harta ngu ba palacur-palacur, bapo' nyambalehotn anak sapi nang mano'.' ³¹ Jadi, bapo'e nyahuti' io, 'Anakku, kau salalu sabayo-bayo ba aku, lalu samuhee anu'ku koo ugo' anu'ngu. ³² Tapi, ari nyian diri' arus bapesto lalu diri' barepo-repo sabab adi' ngh nyian dah mati, tapi kanio' io idup agi'; io dah angit, tapu kanio' dah tamu."