¹ Gi onro pertama minggu iro, hantek onro magon tuu pita,wawe-wawe tulak pah polowong Yesus nelang ngoit rempah-rempah sa haut reo persiap. ² Dan reo kahaba watu idu haut taguling teke polowong. ³ Kode, tawuk reo masuk, reo bakoi kahong bangkai Tuhan Yesus. ⁴ Hantek reo magon taheran-heran ket hal iro tiba-tiba naan ruo kaulun samakai pama milau-milau sokonrong gi higa reo. ⁵ Wawe-wawe iru tuu takut palus nyuntup wae reo, kode karuo ulun iro sawada, "Kolowangun iko ngeto ulun sa wolum gi padang ulun-ulun mate? ⁶ Yesus bakoi oeng gi yiitu, Io haut bangkit. itungleh ne'o inun sa haut na wada-Ne hmpahmiko hantek Io magon gi Galilea. ⁷ Io sawada bahwa Pea Murunsia harus na sarah pah longon ulun-ulun ba dosa,na balasangar, palus sagar bangkit kamulek gi onro katolu." ⁸ Bulu, wawe-wawe kaitung pah papaneran Yesus. ⁹ Ukah reo mulek teke polowong Yesus, reo nyarita kahai peristiwa iro hmpah kasawalas rasul amput kawan panotah Yesus sa lainne. ¹⁰ Wawe-wawe sa nyarita hal iro hmpah kawan rasul adalah Maria Magdalena, Yohana, Maria ine Yakobus,bayapapire wawe lain. ¹¹ Kode, papaneran wawe-wawe iro na anggap rarupus uluh kawan rasul dan reo bakoi harap hmpah wawe-wawe iro. ¹² Kode, Petrus sokonrong palus malempat pah polowong Yesus.Io mambungkuk palus nginte pah huang, kode io ekat kahong kain linan pamunut bangkai. Ukah iro, Petrus buli anri tuu heran bnawo inun sa haut terjadi. Yesus nantarang Tonga hmpah Panotah-Ne gi lalan Nuju Emaus ¹³ Gi onro iro pada, ruo kaulun panotah Yesus barangkat pah erai desa ba ngaran Emaus sa jarakne kira-kira onom pulu stadia teke kota Yerusalem. ¹⁴ Karuo ulun iro nyurah ne'o kahai peristiwa sa terjadi. ¹⁵ Hantek reo rahat bapaner-paner dan batukar pikiran, Yesus sokonrong hawi nyanrupak bulu malan sameh-sameh reo. ¹⁶ Kode, mato reo tahalang hampe reo bakoi kaiuh mantaru Iyo. ¹⁷ Yesus sawada hmpah reo, "Inun sa ikam baruo paner nelang malan? karuo ulun iro mihinroi palus wae reo tuu sedih ¹⁸ Salah seorang teke reo sa bangaran Kleopas sawada hmpah-Iyo, "Inunkah Iko ereai-eraine ulun asing gi Yerusalem sa bakoi kotoe ne'o inun sa terjadi gi raha wayu-wayu itu?" ¹⁹ Yesus sawada Iyo Ne'o Yesus teke Nazaret. Io adalah erangka ulun nabi sa ponu kuasa huang papaneran baya perbuatan-Ne gi hadapan Allah tala dan gi hadapan kahai bangsa kain ²⁰ Kode, imam-imam kepala dan kawan pemimpin kain manyarah Iyo pakai na hukum mate, palus reo mambalasangar-Ne. ²¹ Sabujurne kain baharap bahwa Ioleh sa sagar ngampibebas bangsa Israel. Kode,onro itu adalah onro ka tolu teke kahaine iro terjadi. ²² Kode, papire wawe teke padang kain haut nyangkemah kain. Hantek reo duloi gi polowong pita-pita tuu, ²³ reo bakoi kahong bangkai Yesus. Balalu, reo mulek palus nyawada bahwa reo haut nginte tantarangan malaikat-malaikat, sa nyawada bahwa Iyo wolum. ²⁴ Kamulek, papire teke kain tulak pah polowong palus kahaba pada kakala sa na wada ulah wawe-wawe iro. Kode, reo bakoi nginte Yesus.'' ²⁵ Kamulek Yesus sawada hmpah reo, "Oh, miiro budune iko bulu moloma ate pakai harap kahai inun sa haut na wada ulah kawan nabi. ²⁶ Bakoikah Kristus harus ngingkam penderitaan itu palus masuk pah huang kemuliaan-ne.'' ²⁷ Balalu, Yesus menjelaskan kahai inun sa ta tulis huang kahai Kitab Suci ne'o tonga-Ne, mulai teke Kitab Musa hanpe kahai Kitab kawan nabi. ²⁸ Hantek reohaut rupak pah desa Emaus, Yesus palus malan seakan-akan hamen nampalus perjalanan-Ne ²⁹ Kode, reo nahan Iyo anri sawada, "Duloileh baya kain sabab onro haut kai kamalom palus mato onro kai lotong.'' Maka, Yesus duloi baya reo. ³⁰ Hantek Io bagabung baya reo gi meja makan, Yesus ngepo roti palus memberkati ne. Io molah-molah ne,balalu ngunru ne hmpah reo. ³¹ Tawuk iro, mato reo tabuka bulu reo kataru Yesus. Kode, tiba-tiba Yesus jawoh teke pangintean reo. ³² Ukah iro,sawada leh reo erai anri sa lain, "Bakoikah ate takam bakobar-kobar hantek Io basurah anri takam sa uhang perjalanan dan hantek Io menjelaskan Kitab Suci hmpah takam?" ³³ Gi tawuk iro pada,reo sokonrong palus mulek pah Yerusalem.reo nangkahong kasawalas muri baya ulun-ulun sa baya reorahat bakumpul sameh-sameh. ³⁴ Murid-murid iro sawada hmpah reo baruo,''Tuhan bujur-bujur haut bangkit palus nantarang tonga hmpah Simon!'' ³⁵ Karuo panotah iro pada nyarita inunsa haut terjadi huang perjalanan reo. Reo nyarita kolowangun reo mantaru Yesus hantek Io molah roti. yesus Nantarang Tonga hmpah Panotah-panotah-Ne ³⁶ Hantek karuo ulun iro magon nyarita peristiwa itu, Yesus sokonrong gi suan-suan reo palus sawada hmpah reo, ''Damai nyinrahko.'' ³⁷ Kode, reo emah dan takut Reo manyangka bahwa reo rahat nginte kamme ³⁸ Kamulek, Yesus sawada hmpah reo, "Kolowangun iko emmah palus karaguan timul gi ate ko? ³⁹ Iteleh longon-Ku baya poo-Ku itu bujur-bujur Uki jame leh Uki dan iteleh, kamme bakoi memiliki daging baya taulang kakala sa iko ite gi-Uki.'' ⁴⁰ Ukah Yesus nyawada itu, Io nutui longon baya poo-Ne hmpah reo. ⁴¹ Sementara reo magon mete harap ket arai palus taheran-heran, Yesus nunti hmpah reo, ''Inunkahgi yiitu ikongompun bana pakai na okan?'' ⁴² Balalu reo ngunru erangka hila kenah pangang hmpah-Iyo. ⁴³ Yesus ngepo kenah iro baya pangokanne gi muka reo. ⁴⁴ Kamulek, yesus sawada hmpah reo, "Ituleh papaneran sa Uki wada hmpah iko hantek Uki magon baya iko.Kahai sa ta tulis ne'o Uki huang hukum Taurat Musa, Kitab kawan nabi, dan Mazmur harus na ampiganap.'' ⁴⁵ Kamulek Yesus ngugah pikiran reo hampe reo kaiuh memahami Kitab Suci. ⁴⁶ Yesus sawada kia hmpah reo, "Naan tatulis bahwa Kristus harus menderita palus bangkit teke padang ulun mate gi onro katolu. ⁴⁷ Dan, pertobatan pakai pengampunan dosa sagar nyata huang ngaran-Ne hmpah kahai bangsa, mulai teke Yerusalem. ⁴⁸ Iko adalah saksi-saksi teke kahai itu. ⁴⁹ Kontoeleh, Uki ngirim janyi Uma-Ku hmpah iko. Kode duloi leh gi kota Yerusalem hampe iko na ampilengkap anri kuasa teke duoi obo.'' Yesus Taengkat pah Surga ⁵⁰ Kamulek, Yesus ngajak kawan panotah-Ne pah luar kota hampe gi Betania. Gi raha, Io ngengkat longon-Ne palus memberkati reo. ⁵¹ Hante Yesus memeberkati reo, Io bapisah teke reo palus taengkat pah surga. ⁵² Balalu, reo nyamah-Ne palus mulek pah Yerusalem anri tuu baarai. ⁵³ Reo saratang duloi gi huang Bait Allah palus nawat Allah tala.