¹ Lipes iro, Yesus benimpin oleh Roh la padekng belantara kalaq beneresa oleh Iblis. ² Dan, Uhaq berpuasa opat pulu olo dan opat pulu malepm, lipes iro Uhaq jadiq lauq. ³ Lalu, empetlah si pencoba iro dan biongau la Yesus, “Amen Ko adalah Anak Allah, perentahkanlah nadeq batuq-batuq ohoq jadiq roti.” ⁴ Namun, Uhaq ngejawab dan biongau, “Naan tertulis, ‘Senarikng beaw bolupm ete roti ngauq, tapiq, oleh setiep firman yaq losek lalo molot Allah.’” ⁵ Oditn iro, Iblis oit-Uhaq la kota suci dan pekenaq-Uhaq mo puncek Bait Allah, ⁶ dan biongau la-Uhaq, “Amen Ko Anak Allah, pelotulah diriq-Ko la iwaq kerna naan tertulis: ‘Mengenai Ko, Allah akan memerentahkan malaikat-malaikat-Uhaq dan mengkat Ko mo kami mali nadeq kenekng-Ko boteq titur la batuq.’” ⁷ Yesus biongau la uhaq, “Sinai oliq, naan tertulis, ‘Ka boteq peresa Tuhen Allahko.’” ⁸ Eso Sinai, Iblis oit Yesus la punan saikng yaq sangat mo dan pekitaq la-Uhaq sekorekng kerajaan dunia ampetn kemegahanyaq, ⁹ dan biongau la-Uhaq, “Sekorekng yaq ohoq antekng denyen aap la-Ko, jika Ko sujud dan menyembah aap.” ¹⁰ Lipes iro, Yesus biongau la uhaq, “Enyahlah, Iblis! Naan tertulis, ‘Ko harus menyembah Tuhen Allahko dan la-Uhaq maha ko beribadah.’" ¹¹ Setelah iro, Iblis lemaq oroq ete Uhaq, dan perhatikan, malaikat-malaikat empet kalaq melayani Uhaq. Yesus Ngemulai Pelayanan Uhaq mo Galilea (Mek.1:14-15; Luk.4:14-15) ¹² Lalu, beraq Yesus dingaq bahwa Yohanes epuq tenangkep, Uhaq menyingkir la Galilea. ¹³ Uhaq molak Nazaret dan empeq serta nongko mo Kapernaum, mo dirikng nohen, mo perbatasan Zebulon dan Naftali, ¹⁴ Nadeq digenapi oon yaq tenokai lalo Nabi Yesaya: ¹⁵ “Tana Zebulon dan tana Naftali, lalaq diniq nohen, mo empai Yordan, Galilea, wilayah ulutn-ulutn abaq ete Yahudi, ¹⁶ bangsa yaq nongko sua kegelapan epuq kitaq Terakng yaq solai, dan bagiq mali yaq nongko mo negeri dan sua inu-inu kematian, Terakng iro epuq timur. ¹⁷ Sejak watu iro, Yesus mulai berkhotbah dan nokai, “Bertobatlah kerna Kerajaan Surga epuq diniq!” Yesus Nogeq Murid-Uhaq yaq Pertama (Mrk.1:16-20; Luk.5:1-11) ¹⁸ v 18 Beraq Yesus manan mo dirikng nohen Galilea, Uhaq kitaq duaq eraibutukng, yaq iro Simon yaq tenokai Petrus, dan Andreas, eraibutukngyaq, sedang ngamukng jala mo nohen sebab mali adalah penjala kinas. ¹⁹ Dan, Uhaq biongau la mali, “Ayoqlah nyang Aap dan Aap akan pejadiqka penjala senarikng.” ²⁰ Mali langsung molak jala-jalayaq dan nyang Uhaq. ²¹ Dan, saat manan ete iro, Uhaq kitaq duaq eraibutukng yaq bali, Yakobus anak Zebedeus dan Yohanes, eraibutukngyaq. Mali nongko sua erai alur beroh Zebedeus, tamen mali, sedeng ngebueq jala-jalayaq. Dan, Uhaq nogek mali. ²² Dan, mali langsung molak alur ampetn tamen mali, lalu nyang Yesus. Yesus Ngajer dan Peleheq Senarikng Deoq ²³ Lipes iro, Yesus keliling la seluruh daerah Galilea, ngajer mo sinagoge-sinagoge mali, ngaber berita Injil Kerajaan, dan peleheq segala masem rotetn, dan segala masem meraraq mo antara senarikng deoq. ²⁴ Dan, berita tentang Uhaq tesebar sampei la seluruh Siria. Dan, mali oit la-Uhaq sekorekng ulutn berotetn yaq menderita berbagei masem rotetn dan rasa meraraq, dan yaq kerasukan setan, yaq rotetn ayan, dan yaq lumpuh, dan Uhaq peleheq mali. ²⁵ Kerumunan solai ete senarikng deoq pun nyang Uhaq ete Galilea, Dekapolis, Yerusalem, Yudea, dan ete empai sunge Yordan.