¹ ಯೇಸು ತನ್ನ ಶಿಷ್ಯಲ್ಗು ಸೋಪ್ಪಿಂದೆಮಂಟ್ಟೆ ಐಶ್ವರ್ಯವಂತೂಡೈನಒಕ್ಕ ಮನುಷ್ಯಡ್ಗಿ ಒಕ್ಕ ಇಂಟ್ವಾರ್ತೆವಾಡುoಡೆ.ಊಡ ವಿಷಯಂಗ ಯಜಮಾನುಡ ದೇಗ್ಗರ-ಊಡು ನೀ ಆಸ್ತಿನಿ ಪಡ್ಸೆಸ್ತಾ ಉಂಡಾಡು ಅನಿ ಯವ್ಲೋ ದೂರು ಸೋಪ್ಪುಂಡಲಾಗ ಯಜಮಾನುಡು ವಾಡ್ನಿ ಪಿಲ್ಚಿ ² ದೇಮಿ ನೀನು ನೀ ವಿಷಯಮ್ಲಾ ಇನೇ ಸಂಗತಿ?ನೀ ಇಂಟ್ಟವಾರ್ತೆಯ ಲೆಕ್ಕಂನಿ ಒಪ್ಪಿಚ್ಚು;ನುವ್ವ ಇಂಕ ಇoಟ್ಟವಾರ್ತೆಯಡೈಏಕಾಯೇಲೆದು ಅನಿ ಸೋಪ್ನಾಡು. ³ ಇಟ್ಟುoಡಲಾಗ ಈ ಇಂಟ್ಟೂರ್ತೆವಾಡು-ನಾನೆಮಿ ಸೇತ್ನು?ನಾ ಯಜಮಾನುಡು ನನ್ನಿಂಕ ಈ ಇಂಟ್ವಾರ್ತೆಯ ಕೆಲಸಂನ್ನಿ ತೀಸುಡ್ಸಾತಾಡುಕದ.ತೊಡೆದಾನ್ಗಿ ನಾಕಿ ಭಯಂಲೇದು;ಬಿಕ್ಷಂಬೇಡೆದಾನ್ಗಿ ನಾಕಿ ನಾಚ್ಕೆಆಯ್ತಾದಿ. ⁴ ಇಂಟ್ವಾರ್ತೆಯ ಕೆಲ್ಸಂನ್ನಿಂಕ ನನ್ನಿ ತಿಸ್ನಾಪೈನಾ ಜನಾಲು ನನ್ನಿ ತಮ್ಮ ಇಂಟ್ಲೊಗ ಸೆರ್ಬಿಚ್ಗಾನಟ್ಲಾ ನೀನು ಸೇಯ್ಯಿಬೀಕೈoಡದಾನ್ನಿ ಗೊತ್ತಾಯ ಅನಿ ತನ್ಲೋಗ ಅನ್ಗನಿ ⁵ ಯಜಮಾನುಡು ಸಾಲ್ಮೊಲ್ಲ ಪ್ರತಿಯೋಕ್ಕಡ್ನೀಪಿಲ್ಚಿ ಮೊದ್ಲೆನೆವಾಡ್ನಿ-ನುವ್ವ ನನ್ನಿ ಯಜಮಾನುಡ್ಗಿ ಏಮಿ ಇಯ್ಯಲ ಅನಿ ಅಡ್ಗಲು ⁶ ಬುದ್ದಲಿ ನೂನ ಅನ್ನಪ್ದು ವಾಡ್ಗಿ-ಈ ನೀ ಪತ್ರಂನಿ ತಿಸ್ಗಾನಿ ಬಿರ್ನಾ ಕುಚ್ಗಾನಿ ಯಾಭಾಯಿ ಬುದ್ದಲಿ ಅನಿ ರಾಯಿ ಅನಿ ಸೋಪ್ನಾಡು. ⁷ ಬಳಿಕ ಮಲೋಕ್ಕಡ್ನಿ-ನುವ್ವ ಏಮಿ ಸೇಯ್ಯಾಲ ಅನಿ ಅಡ್ಗಾಲು ವಾಡು-ನೂರು ಖಂಡಗ ಗೋದಿ ಅನ್ನಪ್ದು ವಾಡ್ಗಿ-ಈ ನೀ ಪತ್ರಂನಿ ತಿಸ್ಗಾನಿ ಯನ್ಭಾಯಿ ಖಂಡಗ ಅನಿ ರಾಯಿ ಅನಿ ಸೋಪ್ನಾಡು. ⁸ ಯಜಮಾನುಡು ದೀನ್ನಿ ಇನಿ ಅನ್ಯಾಯಗಾರಡೈನಾ ಆ ಇಂಟ ವಾರ್ತೆಯವಾಡ್ನಿ-ಊಡು ಜಾಣತನಂಸೇಸ್ನಾಡು ಅನಿ ಹೊಗಳ್ನಾಡು.ಯಂದ್ಗoಟ್ಟೆ ಲೌಕಿಕಲು ತಮ್ಮಟೋಳ ವಿಷಯಮ್ಲಾ ಎಲ್ಗನ್ನ ರಾಜ್ಯಮೊಳ್ಗಿoತಾನು ಜಾಣಲೈನಾಳು. ⁹ ಧನಂಮೂಲ್ಕoಗ್ಗ ಮೀಕಿ ಸ್ನೇಹಿತಲ್ನಿ ಸೇಸ್ಗಂಡ್ಡಿ;ಇಟ್ಟೆ ಸೇಸ್ತೆ ಆದಿ ಮೀ ಸೈ ಉಡ್ಸಿಪೈನಪ್ದು ವಾಳು ಮಿಮ್ಮಲ್ನಿ ಶಾಶ್ವತಮೈನಾ ವಾಸಸ್ಥನಂನ್ಲಾ ಸೇರ್ಗನ್ನವಾಳು ಅನಿ ನಾನು ನೀಕಿ ಸೋಪ್ತಾನು. ¹⁰ ನಂಬ್ಬಿಗಸ್ತುಡೈನವಾಡು ಬಹಳoಆಯ್ದಟ್ಲಾ ನಂಬಿಗಸ್ತುಡೈನಾಡು.ಕೊಂಚಮೈನಡಾಟ್ಲಾ ಅನ್ಯಾಯಗಾರಂಆಯ್ನೋಡು ಬಹಳಂ ಆಯ್ನಾದಾಟ್ಲಾನು ಅನ್ಯಾಯಗಾರಂಆಯ್ತಾಡು. ¹¹ ಅನ್ಯಾಯಂನ ಧನಂನ ವಿಷಯಮ್ಲಾ ಮೀಳು ನಂಬಿಗಸ್ತುಲೈತೆ ನಿಜಮೈನ ಧನಂನ್ನಿ ಮೀ ವಶಾನ್ಗಿ ಯವ್ಳು ಇಸ್ತಾರು? ¹² ಮಲೋಕ್ಕಡ ಸೊತ್ತಿನ ವಿಷಯಮ್ಲಾ ಮೀಳು ನಂಬಿಗಸ್ತುಲುಕಾಗಬಾತೆ ಮೀದಾನ್ನಿ ಮೀಕಿ ಯವ್ಳು ಇಸ್ತಾಳು? ¹³ ಯಾವ ಮನ್ಸಿಆಯ್ನಾ ಇದ್ದರು ಯಜಮಾನುಲ್ಗಿ ಸೇವೆ ಸೇಸೆಕಾಯೇಲೇದು;ವಾಡು ಒಕ್ಕಡ್ನಿ ದ್ವೆಷಿಚ್ಚಿ ಮಲೊಕ್ಕಡ್ನೀ ಪ್ರೀತಿಸ್ತಾಡು,ಲೇದೆ ಒಕ್ಕಡ್ನಿ ಹೊoದ್ಗಾನಿ ಮಲೋಕ್ಕಡ್ನಿ ತಾತ್ಸಾರಸೇಸ್ತಾಡು.ಮೀಳು ದೇವುಡ್ನೀ ಧನಂನ್ನಿ ಕೂಡ ಸೇವಿಚ್ಚಕಾಯೇಟ್ಲೇದು ಅನ್ನಾಡು. ¹⁴ ಫರಿಸಾಯಲು ಈ ಮಾಟ್ಲಿoತ್ತ ಇನಿ ತಾವು ದುಡ್ಲುಆಶೆಉಳ್ಳವಾಲೈಡದಾನ್ನಿಂಕ ಹಾಸ್ಯಂಸೇಸ್ನಾರು. ¹⁵ ಆತುಡು ನೀತಿವಂತಲನಿ ಸೂಪಿಚ್ಗನ್ನವಾಳು ಮೀಳು;ಆಯ್ತೆ ದೇವುಡು ಮೀ ಹೃದಯಾಲ್ನಿ ತಿಲ್ಚಗ್ಗನ್ನಾಡು.ಮನುಷ್ಯಲ ಶ್ರೇಷ್ಠoಅನ್ಬಿಚ್ಗಾಂನಾದಿ ದೇವುಡ ದೃಷ್ಟಿಲಾ ಅಸಹ್ಯಮೈನದ್ದಿ. ¹⁶ ಧರ್ಮಶಾಸ್ತ್ರಮು ಪ್ರವಾದಿಲು ಯೋಹಾನುಡ ತನ್ಕಮೇ.ಇತರ್ಗಿ ದೇವುಡ ರಾಜ್ಯಾಮು ಸಾರಲ್ಪಡ್ತಾವುoದ್ದಿ.ದಾಟಲಾ ಸಕಳಲುಬಲತ್ಕಾರಂಗ ನುಗ್ತಾರು. ¹⁷ ರ್ಮಶಾಸ್ತ್ರಲೊಗ ಒಕ್ಕ ಗುಡುಸೈನಾ ಪೊಡಿ ಪಾಯೇದಾನ್ಗಿoತಾನು ಆಕಾಶಮು ಭೂಮಿಯು ಅಲ್ಸಿಪಾಯೇದಿ ಸುಲಭಂ. ¹⁸ ತನ್ನ ಪೆಂಡ್ಲಾಮ್ನಿ ಉಡ್ಸಿ ಬೇರೆಒಕ್ಕದಾನ್ನಿ ಪೆಂಡ್ಲಿಸೇಸ್ಗಾನ ಪ್ರತಿಯೋಕ್ಕಡು ವ್ಯಭಿಚಾರಂ ಸೇಸೆವಾಡೈನಾಡು;ಮಲಿ ಮೊಗಡ್ನಿ ಉಡ್ಸಿoದಾನ್ನಿ ಪೆಂಡ್ಲಿಸೇಸ್ಗನ್ನಾವಾಡು ವ್ಯಭಿಚಾರಂಸೇಸೆವಾಡೈನಾಡು. ¹⁹ ಒಕ್ಕ ಮನುಷ್ಯಡುoಡ್ಯಾ.ವಾಡು ಸಕಲಾತಿ ನಯಂಮೈನ ನಾರುಮಡಿ ಮುಂತೈನ ವಸ್ತ್ರಲ್ನಿ ಧರಿಚ್ಗಾನ್ನಿ ಪ್ರತಿದಿನಮು ವೈಭವಂಜೊತ್ಲಾನೆ ಸುಖಸಂತೋಷಂಪೋಡ್ತಾವುoಟಾಡು. ²⁰ ವಾಡು ಇಂಟ್ವಾಕಲ ಲಾಜರಡನ ಒಕ್ಕ ಭಿಕ್ಷುಗಾರುಡು ಪೋದ್ಪಾಯ್ನಾಟಾಡು. ²¹ ಊಡು ಪೈನಿಂಡಾ ಪುಂಡ್ಲುಲೆಸ್ನಾವಿ;ಐಶ್ವರ್ಯವಂತುಡ ಮೆಜ್ನಿಂಕ ಪೋಡ ಎನ್ಗಲ್ನಿ ತಿನಿ ಆಕಲಿ ತೀರ್ಪಾಗಾವಲಅನ್ಕಾವುನ್ತಾಡು;ಇಂತಾ ಮಾತ್ರoಕಾಗ್ನೆ ಕುಕ್ಕುಲು ಸಹ ವಚ್ಚಿ ವಾಡ ಪುಂಡ್ಲ್ನಿ ನೆಕ್ಕೆವಿ. ²² ಇಟ್ತುಂಡಾಗ ಕೊಂಚ್ಚಂಕಾಲಂ ಪೈನ ಆ ಬಿಕ್ಷುಗಾರುಡು ಸಚ್ಚಾಡು;ದೇವದೂತಲು ವಾಡ್ನಿ ತಿಸ್ಗಾನಿಪಾಯಿ ಅಬ್ರಹಾಮುಡ ಎದ್ಗಿ ಒರ್ಗಿಚ್ಚಾಡು.ಆ ಐಶ್ವರ್ಯವಂತುಡು ಸಹ ಸಚ್ಚಾಡು;ವಾಡ್ಗಿ ಉತ್ತರ ಕ್ರೀಯೇಲು ಆಯಾವಿ. ²³ ವಾಡು ಪಾತಾಳಂಲೊಗ ಯಾತನೆಪೋಡ್ತಾ ಉಂಡಾಗ ಕಂಡ್ಲೆತ್ತಿ ದೂರಂನ್ನಿಂಕ ಅಬ್ರಹಾಮುಡ್ನೀ ಊಡ ಎದ್ಗಿ ಒರ್ರಿಕ್ಕನುಂಡ ಲಾಜರುಡ್ನೀ ಸೂಸಿ ²⁴ ತಂಡ್ರಿಯೇ,ಅಬ್ರಹಾಮುಡೆ,ನಾ ಪೈನಾ ದಯಂಪೊಡಿ ಲಾಜರಡ್ನಿ ಅಂಪಿಚ್ಚು;ವಾಡು ತನ್ನ ತುದಿಎಳ್ನಿ ನುಳ್ಲಾ ಅದ್ದಿ ನಾ ನಾಲಕ್ನಿ ಸಲ್ಲಗ ಸೇಯ್ನಿ;ಈ ಉರಿಲಾ ಸಂಕಟಂಪೋಡ್ತಾನು ಅನಿ ಕೂಸಿ ಸೋಪ್ನಾಡು. ²⁵ ಆಯ್ತೆ ಅಬ್ರಹಾಮುಡು-ಕಂದಾ,ನುವ್ವ ಆಶಿಚ್ಚಿನ ಸುಖಮ್ನಿ ನೀ ಜೀವಂಮಾನಮ್ಲಾ ಹೊಂದಿನಾವು;ಅಟ್ಟೆ ಲಾಜರುಡು ಕಷ್ಟಮ್ನಿ ಹೊಂದಿನಾವಾಡು ಅನ್ನದಾನ್ನಿ ನೆನಪ್ಗಿ ತಿಸ್ಗೋ.ಇಪ್ಪಡೈನ ಇನಾ ಊಡ್ಗಿ ಸಮಾಧಾನಂ,ಆಯ್ತೆ ನೀಕಿ ಸಂಕಟಂ. ²⁶ ಮಾತ್ರoಕಾಗ್ನೆ ಮಾಕು ಮೀಕು ನಡ್ವೆ ಪೆದ್ದದೊಂದು ಡೋಂಗರಂ ಸ್ಥಾಪಿಚ್ಚಿoದ್ದಿ;ಅಯ್ನಾಕಾರಣಂ ಈ ಕಡ್ನಿoಕ್ಕ ಮೀ ದೇಗ್ಗರ್ಗಿ ಪೋವಾಲಾಅನ್ಕುನ್ನವಾಳು ಪಾಯೇಟ್ಲೇರು;ಮಲಿ ಆ ಕಡ್ನಿoಕ್ಕ ಮಾ ದೇಗ್ಗರ್ಗಿ ಯವ್ಲೋ ದಾಟೆಕಾಯೇಟ್ಲೇದು ಅನ್ನಾಡು. ²⁷ ಅಪ್ಡು ವಾಡು-ಅಬ್ಬಾ,ಅಟೈತೆ ಲಾಜರಡ್ನಿ ನಾ ತಂಡ್ರಿಯ ಇಂಟ್ಗಿ ಅoಪ್ಪಿಚ್ಚಾಲನಿ ನಿನ್ನಿ ಬೇಡ್ಗಂಟಾನು. ²⁸ ಐದುಮಂದಿ ಅನ್ನದೊಮ್ಮಳುoಡಾಳು;ವಾಳು ಸಹ ಈ ಯಾತನಂನ ಸ್ಥಳಾನ್ಗಿ ವಚ್ಚಾರು;ರಾಗುಂಡಟ್ಟವಾಡು ತಾನು ಸೂಸಿಂದಾನ್ನಿ ವಾಳ್ಗಿ ಬಾಗ ಸೋಪ್ನಿ ಅನ್ನಾಡು. ²⁹ ಆಯ್ತೆ ಅಬ್ರಹಾಮುಡು-ಮೋಶೆಯ ಧರ್ಮಶಾಸ್ತ್ರಮು ಪ್ರವಾದಿಲಾ ಗ್ರಂಥಲು ವಾಳಾ ಉಂಡಾವಿ;ಅವುಟ್ಲಿನೀ ಅಡ್ಗಿನಿ ಅನಾಲು ವಾಡು- ³⁰ ತಂಡ್ರಿಯೇ,ಅಬ್ರಹಾಮುಡೆ,ಅಟ್ಕಾದು;ಸಚ್ಚನೋಳ ಕಡ್ನಿಂಕ ಒಕ್ಕಡು ವಾಳ ದೇಗ್ಗರ್ಗಿ ಪಾತೆ ವಾಳು ದೇವುಡ ಕಡ್ಗಿ ತಿರ್ರಿಕಂಟಾರು ಅನ್ನಾಡು. ³¹ .ಅಬ್ರಹಾಮುಡು ವಾಡ್ಗಿ -ವಾಳು ಮೋಶೆಯ ಮಾಟ್ನಿ ಪ್ರವಾದಿಲ ಮಾಟ್ನಿ ಇನ್ಗುಂಡಬಾತೆ ಸಚ್ಚಿ ಪೈನಾಡೋಕ್ಕಡು ಜೀವಿತಡೈ ಲೇಸ್ನಾ ಒಪ್ಪೆಲೆದು ಅನಿ ಸೋಪ್ನಾಡು.