¹ ಸಹೋದುರುಲಾ ಮಾ ಕರ್ತುಡೈನಾ ಯೇಸು ಕ್ರೀಸ್ತುಡ ಪ್ರತ್ಯಕ್ಷತುಮು ವೀಷಯ್ಮಾಯೀನು ಮಾಮು ವಾಡ ಹೆಗ್ರುಲ ಕುಡ್ನೋನೆ ವೀಶಯ್ಮಾಯೀನು ಮೀಮುಲ್ನೀ ಬೆದ್ಕೊನೆದೀ ಎಮಂಟೆ. ² ಕಾರ್ತುಡ ದೀನ್ಮು ಈಷ್ಟೆ ಹತ್ರುಮಾಯೆ ಅನೆದ್ನೀ ದೆವುಡ್ ಅತ್ಮುಮು ಪ್ರೆರೀತ್ಮಾಯೀನ ನುಡೀಈದೇ ಅನೆದಾಯೀ ಪೌಲುಡು ಅಟ್ಟ ಸೋಪ್ನಾಡು ಅನೆ ದಾಯುನು ಪೌಲುಡು ಅಟ್ಟ ರಾಸೆ ಅನೆದಾಯುನು ಯೋಳಾರಾ ಸೋಪ್ತೇನು ಮೀರು ಜಲ್ದೀ ಬುದ್ದೀಗೆಟ್ಟ ಚಂಚಲುಲಾಯೀ ಕಲ್ವಲ್ಮು ಕಡೋದನ್ದ್ರೀ. ³ ಯೇಳು ಯಾವ್ ವೀದುಮ್ಲಾನು ಮೀಮ್ಮುಲ್ನೀ ಮೊಸ್ನು ಗೋಲೀಚ್ನತ್ಗ ಸೊಸ್ಕೊನ್ದ್ರೀ ಎದ್ನಂಟೆ ಮೊಂದ್ಲು ಮತ್ಮು ಬ್ರಷ್ಟತೆ ಉಂಟಾಯೀ ಅರ್ದಮು ಸ್ವರುಪುಡು ಬೈಲೀಕೀ ವಸ್ತಾಡು ಹೊರ್ತು ಆ ದೀನ್ಮು ವಚ್ಚೆಟ್ಲೆದು. ⁴ ಯಾವ್ದೀ ದೇವುಡು ಅನ್ವೀಚ್ನ್ಹೊಂಟಾದೋ ಯಾವ್ದೀ ಪೂಜಾ ಹೊಂತಾದೋ ದಾನ್ನಂತ ನಾಶನ್ಮೀ ಅದೀನ್ಮು ಅಯೀನ ಆ ಮಾಗೋಡು ಎದ್ರೀಚ್ಚೀ ದನ್ನಂತ ಪೈನಾಯೀ ತನ್ನೀ ತಾನೇ ಹೆಕ್ವಸೆಸ್ನೋನೀ ತಾನು ದೆವುಡನೀ ಸೋಪ್ನೋನೀ ದೇವುಡು ಗರ್ಬಗುಡೀಲಾನೇ ಕುಚ್ಹೊಂಟಾಡು. ⁵ ನಾನು ಮೀ ಜೋತ್ಲ ವುನ್ಡ್ನಪಡು ಈ ಸಂಗತೀಲ್ನೀ ಸೋಪ್ಪೆಂದೀ ಜ್ಞಾಪುಕುಡು ಲೆದಾ ⁶ ಈದ್ಕಾಕುನ್ನ ಆ ಮನುಷ್ಯುಡು ನೇಮಕ್ಮು ಅಯೀನ ಸ್ತಳುಮ್ಲಾನೆ ಹೊರತು ಬೈಲೀಕೀ ವಚ್ಚೆದಾನ್ನೀ ಏಮೀ ಅಡ್ಡೀ ಸೆಸ್ತಾದೋ ಅದೀ ಮೀಕಿ ತಿಲ್ಸೆವುನ್ದಾದೀ. ⁷ .ಅದರ್ಮುಮು ಈಪ್ಡು ಗುಪ್ತು ಮೈಯೀ ತಮ್ ಕಾರ್ಯಮ್ನೀ ಸಾದೀಸ್ತಾದೀ ಆಯ್ತೇ ಈಪ್ಡು ಗಂಟ ಅಡ್ಡೀ ಸೆಸೋಡು ಸೀಸೀಡ್ಸೆ ಗಂಟ ಅದೀ ಗುಪ್ತು ಮಾಯೆ ವುನ್ಟಾದೀ. ⁸ ವಾಡು ಸೀಸಲ್ಪುಡೀನ ತಕ್ಷನ್ಮೆ ಆ ಅದರ್ಮಮು ಸ್ವರುಪುಡು ಕನೋಸ್ತಾಡು ವಾಡ್ನೀ ಯೇಸು ಕರ್ತುಡು ತನ್ ನೋರ್ ಉಸ್ರೀಂಚ ಸೋಪ್ತಾಡು ತನ್ ಪ್ರತ್ಯಕ್ಶುಮು ಪ್ರಕಾಶ್ಮೀಂಚ ಸಹರೀಸ್ತಾಡು. ⁹ ಆ ಅದರ್ಮುಮು ಸ್ವರುಪುಡು ಪ್ರತ್ಯಕ್ಶುತುಮು ಸೈತಾನುಡಾ ಮಾಮುಲ್ನೀ ಅನುಗುಣವುನ್ದಾದೀ ಅದೀ ಮೊಸ್ಮು ಗೊಲೀಚ್ಚೆ ಸಕಲ್ಮು ವೀದ್ಮಾಯೀನ ಮಹತ್ಕರ್ಯಮು ಸೂಚಕಕಾರ್ಯಮು ಅದ್ಬುತಕಾರ್ಯಮು ಈವುಟ್ಲೀನ್ಚಾನು ದುರ್ನೀತೀ ಅನ್ನೀ ವಂಚನೆ ಯೀಂಚಾನು ಕೂಡೀ ನಾಶನ್ಮು ಮಾರ್ಗುಮ್ಲ ವುನ್ದೊಲ್ಕೊಸ್ಕರಮು ಸಂಬವೀಸ್ತಾದೀ. ¹⁰ ವಾಳು ಸತ್ಯಮ್ನೀಂದ ಪ್ರೀತೀನೀ ಪೆತ್ಳೆನೀನ ಕಾರುನ್ಮೀಂಚ ರಕ್ಷನ್ಮುನೀ ಹೋದ್ನುಣ್ಣ ನಾಶ್ಮುಯ್ತಾರು. ¹¹ ಅದೆ ಕಾರುಣ್ಣ ಮೀಂಚ ದೇವುಡು ಅಸತ್ಯುಮು ನಡೆಬಚ್ಚೆ ಬ್ರಮೇನೀ ವಾಳ್ತಾಕೇ ಅಮ್ಪೀಚ್ಚೀ ಆ ಸುಳ್ಳೀ ನಮ್ಬೇದಾನ್ನೀ ವಾಳ್ನೀ ಈಡುಸ್ತಾಡು. ¹² ಸತ್ಯುಮ್ನೀ ನಂಬ್ನುನ್ನ ಅನೀತೀಲಾ ಅನಂದ್ಮು ಪಡೆ ಅಂದ್ರು ಈ ಪ್ರಕಾರ್ಮು ನ್ಯಾಯ್ಮು ತೀರ್ಪೀಕೀ ನೋನಾಯ್ತಾರು. ¹³ ಕರ್ತುಡ್ನೀ ಪ್ರೀಯುಡಾಯೀನ ಸಹೋದರುಲಾ ಮೀರು ಪವೀತ್ರತ್ಮು ಡೀಂಚ ಶುದ್ದೀಕರೀಚ್ಹೋಳಾಯೀ ಸತ್ಯುಮು ಮೀಂದ ನಂಬೀಕ್ಮು ಪೆಟ್ಟೀ ರಕ್ಷಣ್ಮುನೀ ಪಡ್ಸೆ ದಾನ್ನಾಯೀ ದೇವುಡು ಮೀಮ್ಮುಲ್ನೀ ಅದೀಯೀಂಚ ಅರೀಚ್ನೋನೀದಾನೀಂಚ ಮಾಮು ಮೀ ವೀಷಯಮ್ಲ ಎಪ್ಡು ದೆವುಡೀಕೀ ಕೃತಜ್ಞತ್ಮು ಸ್ತುತೀ ಸೆಸೇದಾನ್ನು ಬದ್ದುಲಾಯೀನಾಮು. ¹⁴ ಮೀರು ಈಟ್ಟೆ ರಕ್ಷಫಾಲ್ಪಟ್ಟ ಮಾ ಕ್ರೀಸ್ತುಡೈನಾ ಯೇಸು ಕ್ರೀಸ್ತುಡ ಪ್ರಬಾವುಮ್ನೀ ಸಂಪಾದೀಚ್ನೋವಾಲನೀ ದೇವುಡು ಮಾ ಸುವಾರ್ತುಮು ಮುಲಕ್ಮುಯೀ ಮೀಮ್ಮುಲ್ನೀ ಪೀಲಚ್ಚೆ. ¹⁵ ಈಟ್ಟುನ್ದೆ ದಾನ್ನೀಂಚ ಸಹೋದರುಲಾ ದ್ರ್ದ್ಮಾಯೀ ನೀಲ್ಪದಮ್ದ್ರೀ ಮಾಮು ಮಾಟೀನ್ಚಾವ್ನೀ ಪತ್ರೀಕ್ಮುಯೀನ್ನಚಾವ್ನೀ ಮೀಕೀ ತೀಳೀಚೀ ಬೋದನ್ಮುನೀ ಮೀರು ಬದ್ರುಮಾಯೀ ಪಟ್ನೋನುನ್ದನ್ದ್ರೀ. ¹⁶ ಮಮ್ಮುಲ್ನೀ ಪ್ರೀತೀಚ್ಚೀ ಮಾಕೀ ನೀತ್ಯುಮೈನ ಅದರಣ್ಮು ನೀ ಉತ್ತಮು ಅಯೀನ ನೀರೆಕ್ಷೆನೀ ಕೃಪೆಯೀಂಚ ಅನುಗ್ರಹೀಚ್ಚೀನ ಮಾ ತಂದ್ರೀಯಾಯೀನ ದೇವುಡು ¹⁷ ಮಾ ಕರ್ತುಡೈನಾ ಯೇಸು ಕ್ರೀಸ್ತುಡು ಮೀ ಹೃದಯಲ್ನೀ ಸಂತೈಸೀಚ್ಚೀ ಸಕಲ್ಮು ಸತ್ಕರ್ಯುಮ್ಲಾನು ಸದ್ವಕ್ಯುಮ್ಲಾನು ದ್ರುಡ್ಮುಪಡೀಯ್ನೀ.