Capitulo 11 Ñanderu Tumpa haihu Israelpe õre
1
Hamerãnga pota ãpyrãndu: ¿Ñanderu Tumpara hejama hẽnta Israel:. Mba´ety. She rãnga jyve Israelpe õ, Abraham tayre, Benjamin hẽnta ĩrũre.
2
Ñanderu Tumpa hejã hẽnta Israelva, arykai vãĩ hai pyhỹrõshu reta, ti ¿Pikuããra Elias ĩnẽẽ, porã ñonorã vẽkua Ñanderu Tumpa hỹnonde:, hai hei:
3
Sheru, hair eta rãnga juka nde Tumpa ĩñẽẽ mbeu’iare, opa ity reta mymba jukahase õpe, hãma potashuka jyre jyve.
4
Mbaivara Ñanderu Tumpa heishu: She apyhỹrõmã she pevarã 7.000 kuimbai hỹnypyã jatyka mbavare Baal hỹnonde, õmombaishu verã.
5
Kyrãite jyve ã'ẽ, mbovyĩ hemby i. Ñanderu Tumpa pya kaviterã, hekapyare.
6
Kova rãnga iko Ñanderu Tumpa pya kavi rupii. Ha'ẽã kuimbai haereka taype mbai japo kavirã. Kyrãrã Ñanderu Tumpa pya kavikue ha'ẽãpo, pya kavi ãñeteva.
7
Hãmera, ¿marãjy:. Opaite ko mbai Israel vare potatẽ hipityva, hipityã. Tẽvã Ñanderu Tumpa hekapyare, hipityma hai. Ĩrũ retany rojã reta,
8
kuatia mbyparava hei: Ñanderu Tumpa veru tẽnta Israel ĩãrẽ, espíritu mbypehy verãre, mbotyva hasare potã hesharã haereka mboty shi reta japysa potã hẽndu retarã, hãma kova iko ã'ẽ peve.
9
David hei: Ñymẽsare tikoshi pysa haere nõhẽ, oapy retarã, jahea he verã.
10
Opa timbotyshi hesare, avy hesha verã, kupe tijapashi opa ara pevarã.]S Judio mbavare hãrõva
11
Hãrã apyrãndu: ¿Vapi Israelita varã, opairã oa: Mba'ety. Israelita vare ñẽẽ hẽnduara mẽĩ rãnga tẽnta yngare haimba Judio vare, ohojepe jyve, Israelita vare pya poshy verã haereka ñymy kyrẽy verã reta jyve.
12
Israel ñẽẽ hẽnduã rupii, heta veru mbaikavi ynga tẽntare pevarã, hãma Israel porãmba japo rupii yngava tẽntape õre kuaa jyve pyrỹ mondojepeva hape, mbaivara mbapo ikoshi tẽnta yngavare, Israelitare ñymby heka kavirã.
13
She aipota haipe. Pee tẽnta yngaipi õre, she rãnga hai tẽnta yngavare pevarã Apostol, kova he'ise Ñanderu Tumpa mbouva haire pevarã, hãrã she ahaihu kova ojapo verã.
14
She ãñehãã amỹ kyrẽy verãre Israelpe õre, mbovy ohojepe verã haire pãũvi.
15
Israel mbijiche Ñanderu Tumparã, yngava tẽntaipi õre, pya my pẽnte hãndi Ñanderu Tumpa, mbaivara mbapo ikoshi yngava tẽntare, Israel pya my pẽnte jyve hãndi Ñanderu Tumparã, katupo heta nõhẽ yngava tẽntare ñymanõivi tykove añeteva kyty.
16
Ko pãhã tynonde japoava mbijicheama Ñanderu Tumpa pevararã, kyrãi jyve harina mu hũ ũãva, shara hai japoashi pãhã tynonde õ. Hãma yvyra jypy mbijichea Ñanderu Tumpa pevarãrã, katupo kyrãi jyve opiate hãkare.
17
Ko Olivo hai Judiore, haire jasyja ha shi mbovy hãka, hãma ñõnoã jyhe Olivo kaa hupi õ, voka hai Judio mbavare. Hãme rãnga pimẽ pẽĩ hapo peve, hãrã rikuaapo nde rikohe ko Olivo jypy tyy haikaviva rupĩi.
18
Hãrã avy ñymby vatevei I, ryheshatããri ynga hãka retarã, rĩñymby vate rirã, rikuaa kavipo ndeeã rymyngaru Olivo hapo, hai hapo rupii rãnga opa myngaru yvyra hãkare tyy haikaviva rupii haereka nde jyve.
19
Katupo nde rere: Mbovy hãkare jasyjaha shimĩnjea verã hẽnda kuepe.
20
Ãñete rãnga, jasyjaha shi hãkare jyrojã retarã, hãrã nde ni ñonohã hẽnda kuepe shara riroja, hãme rãnga avy ñymby vate I, rykyjeĩ rãngapo.
21
Ñanderu Tumpa parekoã jasyjashi verã ha kaĩte retarã, ñymo ã, kova mbaikatu jehu jyve nde kui.
22
Mãĩhe, Ñanderu Tumpa rãnga pya kavi, tẽvã katu jahe jyve pyry rehe. Hai jahe he ñẽẽ hẽndumbashuare, hãrã nde ñẽẽ rỹhẽndushurã hai heshakapo kui pya kaviva, rypoishi Ñanderu Tumparã katy ndi jasyjapo jyvekui hai jy yvyraivi
23
Hãma Israelva jasyja vekua Ñanderu Tumpa jy yvyraivi, Ñanderu Tumpa ñono jypo jyvekui jyrojajyhe retarã. Shara hai reko pyrãtã, ñonojy he verã.
24
Nde, jypyiterã hai Olivo kaahupi õ, katy ã'ẽ nĩnõnojyhe yvyra Olivore, ñopyĩara pee Judiova ñono kavi ñõipo jyhe jy yvyrare.]S Tẽnta Israel oho jepepo ]p
25
Shy ryvyre, aipota pikuaa kavi ko mbai ñemiã pe õ: Avy pimoã mbai pikuaa, Israel vare jyrojã po reta, opa iche peve tẽnta yngavare paũvi, opiate oho jepe verãre.
26
Kova ikomarã, haiperãpo opiate Israel vare ohojepe kui, mby parahava rãĩmi: Ôu pokui Jerusalenvi mondojepe verã Israel vare, mbysyry poshikui Jacob mbai porãmba vekua.
27
Hãrã ã mẽẽshu reta shiñẽẽ ã nõhẽpo reta mbai porãmbaivi.^
28
Ã'ẽ heta Israel vare ñymby vaisho teri ihe Hesukrito ĩñẽẽ, kyrã haire mẽẽ verã jyvepe, kyrã tẽvã Ñanderu Tumpa haihushu reta ara õñepỹ rõãivive, shara haire pỹhyrõshu reta. ]
29
Ñanderu Tumpa mẽẽva hekyjy vyãpo, hai jyparekokue haereka heja reiã pyrỹ hẽnorã.
30
Pee rãnga pỹ hẽnduã jyveshu Ñanderu Tumpa ĩñẽẽ, ã'ẽ katy pipity Ñanderu Tumpa jyparekokue, Israel vare ñẽẽ hẽnduarã.
31
Kyraĩ jyve Israel ã'ẽvã ñẽẽ hẽnduã, hãma potã teri reta Ñanderu Tumpa jyparekokue jopeha pyare, pee katy pipityma, tẽvã vãhẽpo jyve ara Israel pe õre hipity verã Ñanderu Tumpa jyparekokue.
32
Ñanderu Tumpa rãnga mbaty opavare ñẽẽ hẽndu mbape, jyvacheĩ opavare pareko verã.
33
Tivisha rãnga Ñanderu Tumpa ĩmẽrea, mbai kuaakue haereka ñanka kavikue. Ñande ko yvy ĩarẽ jaikova, katuã ñambeu kavi, ñande ñany mbai kuaa rupii, Ñanderu Tumpa hape hareka pota japova.
34
Hãrã ¿mbavara kuaa Ñanderu Tumpa ñãka py õ: ti, ¿mbavarapo mboishu:.
35
¿Mbavara mãinunga mẽẽshu arykae, hai õmỹẽngovia jy verã:
36
Opaite mbai ẽvã rãngashuvi ou, hai rupii japoha haereka iko hai pevarã, hãrã tyrojaha Ñanderu Tumpa opa ara. Amẽn.