¹ Hama hoka vate araivi jokueva angel shymbyhesaka. Hoka jy syrya pyrymby hykkoveva, ita verava sãkãvaraīmī ohē Ñanderu handi avisharay vapyarivi. ² Hoko tēnta vasu mbytepe handi jy syryva hymbeype mokuereape ēē hoka yvyra pyrymynguerava, 12 ñoi iava pente jasype, ia handi hoky mynguera henta'ore. ³ Haipe mba'etyma mbai jypejuahea (maldecir) Ñanderu handi avisharay vapy'ēhaipera, handi Tumpa jokuere (angeles) momba'vare. ⁴ Haireta heshapo hova, hara hee ēmpo syvare. ⁵ Haipe mba'etyma pyntu, handi afaltã myhendyava, hairã kuarasy sapeva. Ñandeja Ñanderu teipo sape shuretakui heko kaviteretara, hara hai sapeposhu ara nymbaty vasuraivi hynga ara nymbatyvapevarã. ⁶ Hamera hoka ara vateivi jokuera (angel) heishe neē aēteva hara opañoipo iko haipekavi, hara Ñandeja Ñanderu, hokavare Tumpa iñeē mbau'ia (Profeta) je Espiritu ija, mbyheshaka araveteivi joueva rupi jokuevare hokavare mbai aremba ikovera. ⁷ Pikua kavi, narea she aijy[o, hairã aijypo hoka ara haroambape, vy'apo hoka neē henduva ko profecia kovarehe ēevã kuatia neēpe. ⁸ Sharanga Juan agendu handi ahesha kova mbai, hara ahēndu handi opa aheshara aa hoka aravateivi jokuera (angel) ipy hynonde shuretakui amombai vasushuveraa, shymby heshakavekuavi opaite kova mbai. ⁹ Hai heishe: avy iñesu, jokuevairanga tejyveshe nde handi hara ndyryvyre handi hoka Tumpa iñeē mbeu'iare (profeta) emombaivasu Ñanderupe. ¹⁰ Hara heishe: avypore sella kova profecia koo ēēva ñeē kuatiape'õ kooima'ē hoka ara hupiaverarea. ¹¹ Hameranga hokava poramba japoiva tijapoitoho porambava, hoka nymyngyava tyñymyngyave toho, hoka heko kaviva tyheko kavive toho. Hoka heko kyamba nymby heko kya'aiteve toho. ¹² Pimo'ã shara areãpo aijy, hara she ambyhepypo pepentei japovekuarehe. ¹³ She hai jypy hare japyva (Alfa y Omega) tynonde hare opava (principio y el fin) ¹⁴ Vy'apo hokavare mondea, joiva handi japova hai (1 Juan 3:23) potava haretaipo hou hoka yvyra īa pyrymby haikaviva, hairetapo ichekui tenta vaãsu hõcheipi. ¹⁵ Katoapepo imē ñaumbare hokare Ñanderure puã'iheare poraramba hetaite japoretara (Mateo 7.6) paje hiare, ynga taype ma'īmbarehea vokavare puruka'iare, handi tã'ãnga omombai'iare, handi opaite haihuva handi japupei ikova. ¹⁶ She Hesu amondo she vate araivi ajokueva (angeles) apyrymbykaakavera, she tupaope'õre hoka mbai ikoverare. She ranga David jypy, handi ñymoñashia, hoka jasy tata mashyava hakaviva koīmarã. ¹⁷ Hoka Espiritu kavi handi avisharay hyreko ranga hei: ei hara hoka henduvapo hei: ei handi hokavare ju'uheva tou, hara hoka potava me'ēareiposhu hoka tykove ryheva jy rei heipo jyve ei. ¹⁸ She aikuaka opaite henduva kova kuatia mbyparava (profecia) harã pota haipe: ime'ē mbivapyvarã kova kuatia neivaraimī hokava, Ñanderu Tumpa mbivapyīpo jyveshu hoka mbai jukava (plaga) mbyparava kova kuatiape. ¹⁹ Harã imerāē hekyshia ñeē kova kuatiaivirã Ñanderu Tumpa hekyapo shi he kuatia tykove ryhevaivi handi tentavãsuivi mbijijeapo, Ñanderu pevãrã kuatia tykove ryheva mbyparavarãimī. ²⁰ Hai kuakuava kova mabi, hei: nyrei, she areã ai (haira hoka hora harõambape) kyrãpokui (Amen), ei yreja Hesukrito. ²¹ Hesukrito pyakaviva handi pyryparekokue toi opaiteva handi.