¹ She Pablo, Hesukristo jy Apostol Ñanderu Tumpa ñany mondojepeva haereka Ñanderu Hesukristo, ñande jairoja heva; hai potava rupii. ² Ambypara ko shi ñeẽ Timoteope, shy ray raĩmi ãñẽte jyrojava she rupii. She airure Ñanderu Tumpa Ñanderuite, Ñanderu Hesukristo tiñono pyrehe mbai haikaviva, jyparekokue, haereka tymẽ pee pya kavi. ³ She ndei teri aha tẽnta Macedonia kytyrã, airure nde rypyta verã tẽnta Efesope, rereshu verã opaite pyrỹmboi'ia japuvare ỹnteñoma kỹrã japo verã. ⁴ Avy hẽndu opaite ñeẽ mbeuva ãñẽte mbava, haereka ñeẽ mbe uava aryka'e opa mbava ryheva. Kova mbai rãnga ñeẽ ĩnjeta rei he verã hapishare, haereka ñany mborymba jajapo verã hekope kavi Ñanderu Tumpa potava jairoja rupii. ⁵ She rãnga hai nde katu verã ẽẽ jyhaihu opa ouva pya põtivi, pya kavivi, haere jyrojakue ãñete vaivi. ⁶ Ĩme katy ẽẽ pyny mbytepe ñymy mbyryva kova maĩ nungaivi, pysy verã ñeẽ vyro rẽi vekuaĩ. ⁷ Kyrẽy pẽvẽĩ iko shia Moise mbypara vekua pyrỹmboi'iheare, tẽvã haire kũãã mondo mbaivara hei jyre, haereka haire pyrỹmboi opaite kuaava reta raĩmi. ⁸ Jaikuaa rãnga Moise mbypara vekua haikavitẽvã, jaiporu hekope kavi poruha verã raĩmirã. ⁹ Jaikuaa pojy Moise mbypara vekua ñonoha heko kavi vare pevarã: Vokava Moise mbypara vekua rãnga tykove porãmba haere oñembo tuisha iare pevarã jyve, poshy reiva haere mbai porãmba pee iare pevarã, Ñanderu Tumpape omombai vasu mbava, jukava tuupe jukava ishype haere hapishape pevarã jyve. ¹⁰ Jyreko mba teriva poko ijeheva haere kuimbai jyrekova pevarã, haere kuimbai taupe raĩmi iva pevarã jyve, haere ñẽmi pẽĩ pyryrekova iva pevarã, hãrã Moise mbypara vekuape ẽẽjy ĩmẽrãeã pevarã, puã iva ñeẽ kaviva. ¹¹ Voka ñeẽ kaviva ryheva heiva raĩmi, sheve meẽha ambeu verã, ñeẽ pyryheky jyva mbai porãmbaivi, Ñanderu Tumpa heko katupy. ¹² She ameẽ shyvya Ñanderu Hesukristope, shymỹ pyrãta iva kova pevarã, jyroja shy reherã haereka shiñono hai shi jokue i verã. ¹³ Japo shyrehe opaite kova mbai aryka'e she aĩnjeta porãmba tẽ ai heva, ãmoña ai haere shy poshy aishuva hai jyroja heva retare. Tẽvã, Ñanderu Tumpa shy pareko, ajapo ai vokava aikũã rupii haereka airojã Hesu rerã. ¹⁴ Hãrã Ñanderu Tumpa pya kavi she pevarã tivishave kova jyroja haereka jyhaihu ryheve, ĩmẽ jareva Kristo Hesu rupii. ¹⁵ Kova ñeẽ ãñeteva, haereka opaite kuaretare roja verã: Hesukristo ou vekua yvy ĩãrẽ heko porãmba ia retape mondojepe verã, hãrã heko porãmba iareta mbytepe she hai porãmba aiteve vekua. ¹⁶ Tẽvã, Ñanderu Tumpa shy pareko veva, Hesukristo heshaka she verã sherãni pya kavikue haere shypory ñymyha ãnga verã opaite jyroja he verãre pevarã, hipity verã jyve tykove opambava Hesu ẽvãpe hãndi vate arapy. ¹⁷ Hãrã ñamombai vasu haere ñambitivisa ñõĩpo mburuvisha vasu opa mbavape, mba'e rãmba mano verã, haere katumba tẽ jaheshava haere ha e ñoĩteva Ñanderu Tumpa Amen. ¹⁸ Nde Timoteo, shy ray, aheja nde kova ñeẽ nypyrãtã verã, rirojape haere pya kỹambape ryheve, nymbeuva raĩmi ñandy ryvyre Ñanderu Tumpa heepe. ¹⁹ Ĩme mbijiche ijuhuviva pya kỹamba verã, hãrã vokava rehe javy hai jyrojakue. ²⁰ Kỹrã ikohe Himeneo haere Alejadrope, vokavare ãmeẽ Ãñãpe kua verãre avy tẽ ĩnjeta porãmba verã Ñanderu Tumpare.