¹ Mo malatsing a ga Ahasura( yo ke Ahasura yo o neng a busa go tswa kwa India go fitlha bokgakala jwa Itopia, dikgaolo di le 127), ² mo malatsing ao kgosi Ahasura o ne a ntse mo setilong sa bogosi sa gagwe mo kagong ya phemelo ya Susa. ³ Mo ngwageng wa boraro wa go busa ga gagwe, o ne a direla badiredi ba gagwe le batlhanka ba gagwe moletlo. Masole a Peresia le Media, banna ba ba tlotlegang le babusi ba dikgaolo ba ne ba na le ene. ⁴ O ne a supa bontle jwa khumo ya bogosi jwa gagwe le bogolo, tlotla le kgalalelo ya bogosi jwa gagwe ka malatsi a le mantsi, a le 180. ⁵ Fa malatsi a a sena go feta, kgosi a dira moletlo wa malatsi a le 7. O ne a o direla botlhe ba ba mo kagong ya phemelo ya Susa, go tloga ka yo o mmotlana ka maemo go fitlha ka yo mogolo ka maemo. O ne o diretswe mo lelwapaneng la tshingwana ya ntlo ya segosi. ⁶ Lelwapana la tshingwana le ne le kgabisitswe ka disiro tsa matsela a a boleta a masweu le a mahibidu, ka megala ya matsela a a boleta a mmala o montle, di kaleditswe ka maseka a selefera mo dipilareng tsa mmabole. Go ne go na le ditilo tsa manobonobo tsa gauta le selefera mo bodilong jwa dipapetlana tsa mmabole le matlapana a a kgabisitsweng. ⁷ Dino di ne di nwelwa mo dinwelong tsa gauta. Senwelo sengwe le sengwe se ne se farologanye le se sengwe le gone mofine wa segosi wa tsisiwa o le montsi ka gonne kgosi a ne a ikaeletse go fa go le gontsi. ⁸ Go nwa go ne go dirwa go ya ka taolo e e reng, ''Go se ka ga patelediwa.'' Kgosi o ne a laetse babereki ba ntlo ya segosi go direla moeng mongwe le mongwe go ya ka fa a eletsang ka teng. ⁹ Gape, mohumagadi wa kgosi, Basheti, le ene a direla basadi moletlo mo ntlong ya segosi ya ga kgosi Ahasura. ¹⁰ Ka letsatsi la bosupa, fa pelo ya kgosi e itumetse ka lebaka la go nwa mofine, a raya Mehumane, Harebona, Bikitha, Bisitha, Abagatha, Sethare le Karekara( badiredi ba ba 7 ba ba direlang fa go ene), ¹¹ go tsisa mohumagadi Basheti fa pele ga gagwe a rwele korone ya segosi. O ne a batla go bontsha badiredi le batho bontle jwa gagwe, gonne o ne a na le dipopego tse di kgatlhang. ¹² Mme mohumagadi Basheti a gana go tla fa a utlwa lefoko le le tsisitsweng kwa go ene ke badiredi. Foo kgosi a tenega mo go golo; bogale jwa gagwe jwa tuka mo go ene. ¹³ Kgosi a buisanya le banna ba ba neng ba itsege ba le botlhale, ba ba neng ba tlhaloganya dinako(gonne se e ne e le tsamaiso ya kgosi mo go ba ba neng ba le baitseanape ba tsa molao le tsa katlholo). ¹⁴ Jaanong ba ba neng ba tsalana nae e ne e le Kareshena, Shethara, Atematha, Tarashishi, Merese, Maresena le Memukane, magosana a a 7 a Peresia le Media. Ba ne ba letlelesega go tsena ka kwa kgosing gape ba ne ba na le maemo a magolo mo bogosing. ¹⁵ ''Mohumagadi Basheti o ka dirwa eng se se tsamaelanang le molao, gonne ga a a ka a ikobela taolo ya ga kgosi Ahasura, e e neng ya tsisiwa kwa go ene ke badiredi?'' ¹⁶ Memukane a bua fa pele ga kgosi le badiredi, ''Mohumagadi Basheti ga a fosetsa kgosi a le nosi fela, mme o foseditse badiredi botlhe, le batho botlhe ba ba mo dikgaolong tsotlhe tsa ga kgosi Ahasura. ¹⁷ Gonne kgang e ya mohumagadi e tla itsewe ke basadi botlhe. E tla dira gore ba tshware banna ba bone ka kilo. Ba tla re, 'Kgosi Ahasura o ne a laola mohumagadi Basheti go tsisiwa kwa go ene, mme o ne a gana.' ¹⁸ Pele ga letsatsi le le phirima basadi ba ba tlotlegang ba Peresia le Media ba ba utlwileng ka kgang e ya mohumagadi ba tla bua fela jalo kgatlhanong le badiredi botlhe ba kgosi. Go tla nna le kilo e kgolo le go tenega. ¹⁹ Fa se se itumedisa kgosi, a go romelwe taolo ya segosi e tswa mo go ene, a e kwalwe mo melaong ya Baperesia le Bamedia, e e ka sekeng ya phimolwa, gore Basheti a se ka a tla fa pele ga gagwe. A kgosi a neele mongwe yo o mo gaisang maemo a bohumagadi. ²⁰ Fa taolo ya kgosi e bolelwa phatlalatsa mo bogosing jwa gagwe jo bo bophara, basadi botlhe ba tla tlotla banna ba bone, go tswa kwa go ba ba botlana ka maemo go fitlha kwa go ba bagolo ka maemo.'' ²¹ Kgosi le banna ba gagwe ba ba tlotlegang ba ne ba itumedisiwa ke kgakololo e, kgosi a dira jaaka Memukane a ne a rotloetsa. ²² A romela makwalo kwa dikgaolong tsa segosi tsotlhe, a romelela kgaolo nngwe le nngwe ka tsela e e kwalang ka yone le ka leleme le le buiwang ke batho ba yone. A laola gore monna mongwe le mongwe a nne mong wa ba ntlo ya gagwe. Taolo e e ne ya ntshiwa ka leleme la batho bangwe le bangwe mo bogosing.