¹ Mmi nna nni toondeza lwiizi lwa meenzi a jolola o vuhalo, nni a tuva mane iiri ivootoro, nni luzwa mu chipura che IREEZA nni che imbereere. ² Mmi hakati ke inzira ya teni, nne ku imbalyi zoovere zo lwiizi lwa teni, ku veena isamu lyo vuhalo, lyi ikala nni lyiha zihantu ziina ikumi nne zoovere zi saa swani, nne kuti lyi vizwa mweezi nne mweezi: mane makova e isamu lya teni ngo ku hoza/ sirika vantu voonse. ³ Mane keeti nni ku kwiina zikuto hape: mmi mbwiita chipura che IREEZA nni che imbereere mwa teni; ku zwaaho vahikaana vaakwe mbaavo veeti nniva ku muteendera. ⁴ Mmi kava vone chifateho [vusu] chaakwe; mane nne izina lyaakwe kalyi kwiina ha zifateho zaavo. ⁵ Mane keeti nni ku kwiina iseri kwa teni uuko; nne kuti kava sakani nne makandera nnaangati iseri lye izuva; Ka kuti IREEZA Simwiine njo vaha iseri: mmi kava vusirire. ⁶ Mmi nna waamba name, iizi zaambantu ziina vusakusima nne ku sepahala: Mane Simwiine IREEZA wa vaporofita va jolola nna tuminiza ingiloyi lyaakwe ku iiza ku toondeza vahikaana vaakwe zintu zi lukeere ku pangahala[chitahala] mu chivaka chiniini. ⁷ Mu vone nni keeza choku hweera: mmi kwiina mikoonde iiye yoo woondesereza manzwi eeyi ivuuka ye chiporofita. ⁸ Mmi iime Johani nni nna vona iizi zintu, mane choku zi zuwa. Mmi chiinga nna zuwa choku vona, nni nna wiira haansi lya mateende e ingiloyi lyiva nni toondeza iizi zintu. ⁹ Mpwaa waambiire naame kuti, vone kuti saanzi u chi chiti: Ka kuti nni muhikaana-kuninaako, mane wuva mwaako va vaporofita, naavo vamwi mane va pangahaza manzwi eeyi ivuuka: Rapere IREEZA. ¹⁰ Ku zwaaho choku nnicho kuti, saanzi u waambi manzwi e chiporofita eeyi ivuuka: Ka kuti chivaka chiina ha fwihi a hulu. ¹¹ Iiye yoo fosaheere aa zwiire ku vusu mboona vo vulyo, mane naaye yo wii zwiire ikwe aa zwiiririre voovo vulyo: iiye yoo jolola aa zwiiririre nne ku jolola, mane nnaye yoo shiyeeme a zwiiririre mboona vo vulyo. ¹² Mmi muvone nni keeza choku hweera; ituwero yaangu niina naayo, kuti nnihe zumwe nne zumwe muntu kuya che miteendo[ misevezi] yaakwe mweeti nniyi ku ikalyiire. ¹³ Njeeme Alufa nne Omegha, intaanzi nne mamanimani, matangiro nne mamaninikizo. ¹⁴ Mmi kwiina mikoonde kwaavo va pangaheeza milawo yaakwe yiina ikumi, kuti va woolye kuva nne iswanero/itukero/ chivaka ku isamu lyo vuhalo, nne kuti mane chive njira che milyaango mu muzi. ¹⁵ Mmi ku zwaaho hanze cho kuva nne vambwa, valozi, nne mahuulye, nne veihayi va vantu [ziihazi za vantu], nne varapera madimona , mane nne va panga nne ku suna mapa. ¹⁶ Mmi iime naava Jeeso nni tumite ingiloyi lyaangu kwaako kuti lyiize lyihe vupaki vweezi zintu ku makereke oonse.Njeeme muhisi mane nne mwaana wa Daafita, hape mane nne inkaani yi tuva ya kakusasani[a]. ¹⁷ Mmi luhuho nne yoo sesa vati, wiize. Mane naaye yoo zuwa ati wiize. Naaye yoo fwiire inyoota eeze. Iini kamba iini yoo saka, aa hiinde meenzi o vuhalo mahala vulyo. ¹⁸ Mane nni paka ku wumwe nne wumwe muntu yoo zuwa a a manzwi e ichi chiporofita e iiyi ivuuka, kuti haiva zumwe muntu vulyo kaa weere manzwi kweezi zintu, IREEZA kaa mu weerere ku imbazi zi ngolyetwa mweeyi ivuuka: ¹⁹ Mmi hape haiva muntu zumwe vulyo kaa hunguza mu manzwi eeyi ivuuka ye chiporofita, IREEZA kaa zwiisa izina[chivaka/chiave] lyaakwe mu ivuuka yo vuhalo, mane nne mu muzi wu jolola, nne mu zintu zoonse zilotu zi ngolyetwa mweeyi ivuuka. ²⁰ Mmi iiye yoo paka iizi zintu uti, cho vusakusima nni keeza choku hweera: Kuve mboona vo vulyo. Mane wiize, Simwiine Jeeso. ²¹ Ikozo ya Simwiine Jeeso Kirisiti ive naanwe mu voonse. Kuve vulyo.