⁰¹ Zoonse iizi zintu chiinga zaa mana nni nna vona lyimwe ingiloyi choku suuka nni lyi kazwa ku iwulu, che ziho zikaando; mmi inkaanda nni yaa shaala yi munikite[minikite] che ivaka lyo ku vereenga kwaalyo. ⁰² Mmi nni lyaa huwa a hulu che lyiinzwi ikaando, nni lyiti, Babilona mukaando chaa wa, chaa wa mane chaa va meikalo a vajavulusi/ madimona, nne mahangiriro e inhuho imbilaala, nne chikalamunaanga che zizuni ziina ikwe zi toyetwa. ⁰³ Ka kuti inkaanda yoonse yi vaa nywi choku kolwa vujwara vo vukalyi vo vuhuulye vwaakwe, nne vasimwiine ve inkaanda choku panga vuhuulye nnaaye nne va mapangapanga ve inkaanda va vaati nni va humiswa nnaaye che zintu ziingi zaa veena naazo. ⁰⁴ Mmi nni nna zuwa lyimwe lyiinzwi kuzwa ku iwulu nni lyiti, muzwe mwaalyi vantu vaangu, kuti saanzi muvi nne chiave mu ikatulo ye zivi zaakwe, nne kuti saanzi mu taambulyi ku imbazi zaakwe. ⁰⁵ Ka kuti zivi zaakwe chi ziva kasiki ku iwulu, mane nne IREEZA chaa va zi kumbulukwa zi pangalyikantu zaakwe. ⁰⁶ Mu muchitire zaa vaalyi ku muchitira, mu mu weerere koovere mu zoonse zaa va mu pangi; che inkomoki yaa va mu nywinsikiza mu mu nywiinsikiza mwa teni koovere. ⁰⁷ Ka kuti a valyi teembi a hulu maaswe, nne kulyi haza nenza, mu muhe masukuluka nne ku mu zuwisa inkulo ku sasama[vutuku]; a vaalyi kulyi lwiira mu inkulo yaakwe nnaati, mpu nnii keere aaha imme narukazi, nni saa fwiirwa, nni seeti nnini zunguvalyirwa kamba ku zuwa inkulo ku sasama. ⁰⁸ Chiingi mpaaho imbazi kazi mwiirire mu chivaka chi mwiina mafu, nne chilyiro, nne lwiinza/ inzala; mmi kaa sumikwe a hulu cho mulyiro: Ka kuti IREEZA yoo mu watula u kolyete a hulu maaswe. ¹⁰ Nni va zimaniine kulye choku tiya ku bukuka kwaakwe,nni vati a aah a aah, vati vone wuna muzi mukaando Babilona, wuna muzi wu kolyete! Uu mu chivakazana vulyo chiniini ikatulo chiya wu sikira. ⁰⁹ Mmi vasimwiine ve inkaanda, va va chiti vuhuulye nnaaye, kava mulyirire, choku boonda choku vona vuusi vo kuhiya kwaakwe, ¹¹ Mmi va mapangapanga ve inkaanda kava lyire choku boonda nni va lyirira uuwu muzi; Ka kuti keeti nni ku kwiina yoo va wulyira hape zi pangantu zaavo: ¹² Zi pangantu ze ighawuda, zi pangantu za malyi, nne mavwe a sunitwa a hulu, nne mapirara, nne majira malotu kuya che mivala yiina kwa teni, nne mivalamivala, nne mapuraanga oonse e tine, nne zoonse zi pangwa ha luziya lo unzovu, nne zi pangwa ha chikuni chimwe nne chimwe chilotu, nne iburasi, nne chisipi, nne maravera, ¹³ Nne isinamona , nne minuunko milotu yoonse, nne zi siingavo, nne zi nuunkisa vulotu, nne iwaine[zinywiiwantu] nne mafuta e ihika, nne vusu vwe chinkwe, nne mahira, nne zinyolozi, nne imbereere, nne imbiizi zomu muzi, nne imoota nne zikombwa za vantu. ¹⁴ Mane nne zintu zoonse zoo va lakamiine chi zaazwa kwaako, nne zoonse zo vaalyi ku hiindira ku iwulu nno waana kuti zilotu nnaazo chi zaa zwiiswa kwaako, ku chita kuti ndwa/nlwa mamanimani hape nno zivona kwaako. ¹⁵ Va mapangapanga veezi zintu, va vaati nni va humisiwa nnaaye Babilona, kava ziime kulye a hulu cho kulyi kalyilyirwa ku vona ku hiishwa kwaakwe, nni va lyira choku boonda, ¹⁶ Nni vati aah aaha, wuna muzi mukaando, wu vaa zweete nenza zizwaato zilotu, che mivala miingi miingi, nne che ighawuda, nne mavwe malotu nne mapirara! ¹⁷ Ka kuti mu chivakazana vulyo chiniini vuti vuhumi vwaawo voonse choku mana. Ku zwaaho zumwe nne zumwe yoo tiiza chisepe, nne voonse va waanika mu zisepe, nne va yeenda mu meenzi, mane nne voonse vapanga malyi choku wuza mu meenzi choku ziima kulye, ¹⁸ Choku taanga kulyira chiinga va vona vuusi voku hiya/bukuka, nni vati, toota njo wuhi muzi wu swana[kola] nno wu muzi mukaando! ¹⁹ Mmi nni valyiitira iduuduusha mu mitwi yaavo, nni valyira, ku huwa nne ku boonda nni vati aah, aah, wuna muzi mukaando, uuwo wu vaa chiti kuti voonse va vaalyi ku teendinsaana naawokuzo ku wuza che iwate/ meenzi va vaa manini vaa huma che ivaka lyoo peene wa teni! Awu mu chivaka chii mwiina vulyo chaa rutunuka/zakunuka. ²⁰ Mu mu lyitumerere, uunwe iwulu, nnaanwe vaapositoloyi, nne vaporofita, ka kuti IREEZA chaa woola ku mu vozololyekeza. ²¹ Mmi ingiloyi lyi kolyete a hulu nni lyaa hiinda ivwe ikaando lyi kola lye chisiriso, choku lyi sohera mu iwate, nni lyiti, mboona vo vuti che ziho za mahoonda Babilona muzi mukaando mweeti nna soherwa haansi, mane keeti nna voolye a ve kwa teni kamba ku waanika. ²² Ku zwaaho milyumo ya mabaanjo, nne va munembo, nne ve intorombita zoonse, keeti nni zi voolye choku zuweeka mwaako Babilona, mane nne va mapangapanga ve zintu zi saa swani cho vuungi vwaazo keeti nni zi vonwa mwaako hape: ²³ Mane nne iseri lye ikaandiraa keeti nni lyi munike/minike mwaako hape, nne mulyumo wa maseso keeti nni wu zuweeke mwaako hape, Ka kuti va mapangapanga vaako va vaalyi vaavo vantu ve inkaanda vava kolyete: mmi cho vulozi vwaako vantu vaangi vava woolyi ku ziyereha. ²⁴ Mmi mwaalyi kuva waaniki malaha a vaporofita, nni a vajolola, mane nni a va vee hayiiwa mu inkaanda.