¹ Ku toondezwa kwa Jeeso Kirisiti, kwa a vaa heewa nne IREEZA, kuti a vonesa vahikaana vaakwe zintu zi lukeere ku pangahala mu vu fwiihi; mmi neeza ku tuma mane choku zii zuziriza che ingiloyi lyaakwe ku muhikaana waakwe Johani: ² Iiye yaa va kweete vupaki vwe lyinzwi lye IREEZA, mane nne mulaeza kaha Jeeso Kirisiti, mane nne che zintu zoonse zaa vaati nna vona. ³ Kwiina mikoonde kwaakwe iiye yoo vala, mane nnaavo va zuwa a a manzwi e chiporofita iichi; mane nne ku woonda[ ku pangahaza] zi ngolyetwa mwa teni: Ka kuti inako chi yaa mana. ⁴ Johani kuya cha makereke a mana iyaanza nne oovere eena mwa Eshiya: Chisemo chive nnaanwe, nne ikozo, kuzwa kwaalyi iiye yo wiina kwa teni, yaa veena kwa teni, mane nni yoo keeza; mane nne kuzwa ku inhuho ziina ku mana iyaanza nne zoovere ziina ha vusu vwe chipura chaakwe; ⁵ Mane nne kwa Jeeso Kirisiti, iiye mupaki/ mushupi yoo sepahala, nneeye woku zaalwa intaanzi ku vafu, mane nne Simwiine wuva [uva] Simwiine ve inkaanda. Kwaalyi iiye yaa vat u suni, choku tu shaanza mu zivi zeetu cha malaha aakwe iiye mwiine, ⁶ Iiye yaa va tu chiti vasimwiine nne vapurisita/ varuti kwe IREEZA iisi; ku jolola nne ku vusa zive kwaalyi choku ikalyilyira. Kuve voovo vulyo. ⁷ Muvone, u keeza cha makope, mane lyiinso lyimwe nne lyimwe kalyi muvone, mane nnaavo vava mu ghiinti: mane nne vantu voonse ve inkaanda kava lyire che ivaka lyaakwe. Nnovo vuti, kuve vulyo. ⁸ Njeeme Alufa nne Omegha, intaanzi nne ku maninina/ makongero, ku waamba Simwiine, iiye yo wiina kwa teni, a veena kwa teni, mane nne yoo keeza, si ziho zoonse. ⁹ Imme Johani nni veere nni weenu, nne mulyikani weenu muku nyaandiswa, nne mu muvuso nne mu inkulo inde ya Jeeso Kirisiti, nni veena mu chida chi sumpwa Patamosi, cha mavaka e lyiinzwi lye IREEZA, nne kuha vupaki kaha Jeeso Kirisiti. ¹⁰ Nni veena mu luhuho mu izuva lye IREEZA, choku zuwa lyiinzwi ikaando ku masulye aangu mane iiri [mbwakache/mbakache] intorombita, ¹¹ Nni lyiti, njeeme Alufa nne Omegha, we intaanzi nne wa mamanimani: mmi mane hape, cho vona uchi ngolye mu ivuuka, choku chi tumiza ku makereke eena ku mana iyaanza nne oovere eena kwa Eshiya; Kwa Efesasi, mane nne kwa Shaameena, mane nne kwa Perigamosi, mane nne kwa Chiyaachira, mane nne kwa Saradisi, mane nne kwa Filadelufiya, mane nne kwa Lawudikiya. ¹² Mmi ninaa chevuka kuti nni vone lyiinzwi saka lyi waamba nnaame, muku chevuka kwaangu, nni naa vona tukuni twa makandera tu mana iyaanza nne toovere; ¹³ Mmi mukati ka makandera eena ku mana iyaanza nne oovere, cho kuva nne zumwe yoo swana mane iiri mwaana wo mukwaame, nna zweete zizwaato zi musika ku mateende, mmi ha maheta aakwe nna zweete chizwaato che igauda. ¹⁴ Mutwi nne insuki zaakwe nni zituva mane iiri lusiinga, hape mane iiri kapuku kuku tuva; mmi menso aakwe nni a suvira mane iiri mulyiro; ¹⁵ Mateende aakwe aawo nni a kola mane iiri chisipi che buraasi, muku vaa ku kola mane iiri a vaati nni a hiishwa mu ibiimbiro; lyiinzwi lyaakwe iilyo choku swana iiri mulyumo wa menzi maangi. ¹⁶ Mmi mu iyaanza lyaakwe lya malyo a vaa kweete inkaani ziina ku mana iyaanza nne zoovere; Chizwa mu kalomo kaakwe nni yaava mulyiinga u[wu] shengete koo vere: mmi vusu vwaakwe nni vwaava ku vereenga mane iiri izuva chilyi zuweekete a hulu. ¹⁷ Mmi chiinga nna muvona, nni nna wiira ha mateende aakwe siina muntu yoo fwiire. Ku zwaaho iiye mpwaa nni viikire iyaanza lyaakwe lya malyo, cho kuni cho kuti, Siye ku kalyirwa; njeeme we intaanzi nni wa mamanimani: ¹⁸ Njeeme iiye yoo hala, yaa vaa fwiire; mmi muvone, chini halyilyiire muku saa kosoki, kuve mboona vulyo; mane nniina makiyi e ihere nne lufu. ¹⁹ Ngolye zintu zi waa vona, nne zintu ziina ha teni, mane nne zintu zeeti nni zive kwa teni kuzwa ha hanu; ²⁰ Mmi zilyi wuungwiire ze inkaani ziina ku mana iyaanza nne zoovere zi waa vona ziina mu iyaanza lya malyo, mane nne tu ziimikizo twa makandera twe igauda twiina ku mana iyaanza nne toovere, inkaani ziina ku mana iyaanza nne zoovere nje mangiloyi a makereke a mana iyaanza nne oovere; mmi mane nne tusamu twa makandera tu mana iyaanza nne toovere tu waa vona nje makereke a mana iyaanza nne oovere.