¹ Metuh arie pertama minggu iyah, katika arie masih suung, labinie yah ingkas ka kubur Yesus samil manaing bumbu-bumbu am jadie urang siap. ² Lalue urang baulih batu am bakah jadie taguling mulae kubur. ³ Tapie, metuh urang tamae, urang hontae badapat dengan bangkai Tuhan Yesus. ⁴ Katika urang masih taheran-heran laie iyah, tiba-tiba tege dua urang am mahonie pakaian bakilau-kilau badirie ka damping urang. ⁵ Kawan labinie yah golae lalue manundukkan muha urang, tapie dua urang yah bapaner, "Ngapa kolai mangaue urang am hirup ka antara urang-urang matie? ⁶ Yesus honta ara ka ditie, Inya jadie bangkit. Ingatkan apa am jadie diparah-Nya ka kolai katika Inya masih ka Galilea. ⁷ Inya paner amun Anae Kalunen harus konae sorah ka jarie urang-urang badosa, konae salibkan, lalue konae bangkit baulang metuh arie katolue." ⁸ Maka, labinie-labinie yah taingat paner Yesus. ⁹ Salopas urang baulang mulae kubur Yesus, urang mangisah urasnya ka sebelah rasul baumae kawan anae buah Yesus am bukan. ¹⁰ Labinie-labinie am mangisah hal iyah ka kawan rasul yah am Maria Magdalena, Yohana, Maria inay Yakobus, lalue labinie am bukan jam. ¹¹ Tapie, paner labinie-labinie yah konae anggap baya paner am honta ara buktinya laie kawan rasul lalue urang honta percaya ka labinie-labinie iyah. ¹² Tapie, Petrus badirie lalue badarie ka kubur Yesus. Inya mambungkuk lalue mailae ka lalam, tapie inya baya baulih kain pembungkus bangkai. Salopas yah, Petrus pulang dengan heran laie apa am jadie tajadie. (Yesus Mailaekan Dirie nya ka Anae buah-Nya ka Jalan Honae ka Emaus) ¹³ Metuh arie iyah jam, 2 urang anae buah Yesus ingkas ka sabuah desa banama Emaus am jaraknya kira-kira 60 kilumeter mulae Kota Yerusalem. ¹⁴ Kadua urang yah mamaner tentang sagala peristiwa am jadie tajadie. ¹⁵ Katika urang metuh bapaner lalue bahurup pamikir, Yesus datang badamping lalue bajalan basamah-samah urang. ¹⁶ Tapie, mata urang tahalang sahingga urang honta ulih mangonal Inya. ¹⁷ Yesus bapaner ka urang, " Apa am kolai badua paner samil bajalan?" Kadua urang yah jam bahontie lalue muha urang bera sedih. ¹⁸ Sikue mulae urang banama Kleopas bapaner ka-Inya, "Apa kolai satu-satunya urang asing ka Yerusalem am honta ingat tentang apa am jadie tajadie ka dikeh baharu tie?" ¹⁹ Yesus bapaner, "Tentang apa?" Urang jam bapaner ka Inya, " Tentang Yesus mulae Nazaret. Inya yah sikue urang nabi am ponuh kuasa lalam paner umakan pengawie-Nya ka paharap Hatalla lalue ka paharap saluruh bangsa kami. ²⁰ Tapie, imam-imam kepala umakan kawan pamimpin kami mayorahkan Inya nyaman kona hukum matie, lalue urang manyalibkan-Nya. ²¹ Sabujurnya kami baharap amun yah am akan mambebaskan bangsa Israel. Tapie, arie itie yah am arie katolue mulae uras am tajadie. ²² Tapie, barapae ikue labinie tege managiat kami. katika urang ka kuburan pagi-pagi jam, ²³ urang honta manomukan bangkai Yesus. Lalue, urang baulang lalue mamarahkan amun urang jadie mailae pailae malaikat-malaikat, am mamarah amun Inya hirup. ²⁴ Limah yah, sabagian mulae kami ingkas ka kubur lalue baulih jam samah am dipaner laie labinie-labinie yah. Tapie, urang honta mailae Yesus." ²⁵ Limah yah Yesus bapaner ka urang, "Oh, bungul bujur kolai umakan lambat atie nyaman percaya dengan segala sesuatu am jadie dipaner laie kawan nabi. ²⁶ Bukannya Kristus harus baulih penderitaan tie lalue tamae ka lalam kemuliaan-Nya." ²⁷ Lalue, Yesus manjelaskan sagala sesuatu am tertulis lalam saluruh Kitab Suci tentang dirie-Nya, mulai mulae Kitab Musa sampai saluruh kitab kawan nabi. ²⁸ Katika urang jadie damping ka desa Emaus, Yesus tarus bajalan berakan honae manaruskan pajalan-Nya. ²⁹ Tapie, urang manahan Inya dengan paner, "Tinggallah basamah kami laie arie jadie honae malam umakan mataarie honae tangolam." Maka, Yesus tamae akan tingal basamah urang. ³⁰ katika Inya bagabung basamah urang ka meja makan, Yesus maalap roti lalue mamberkatinya. Inya mamocah-mocahkannya, lalue mamorikannya ka urang. ³¹ Metuh iyah, mata urang tabuka lalue urang mangonal Yesus. Tapie, tiba-tiba Yesus mahilae mulae pailae urang. ³² Limah iyah, bapaner urang am sutie mulae am bukan,"Bukankah atie dirie banyala-nyalae kametuh inya bapaner dengan dirie palamat pajalan lalue katika Inya manjelaskan Kitab Suci ka dirie?" ³³ Metuh saat iyah jam, urang badirie lalue baulang ka Yerusalem. Urang manapat kasabolas murid umakan urang-urang am basamah urang metuh bakumpul basamh-samah. ³⁴ Kawan murid yah bapaner ka urang badua,"Tuhan, bujur-bujur jadie bangkit umakan manampakan kanirie nya ka Simon!" ³⁵ Kadua anae buah yah jam mangisahkan apa am jadie tajadie ka lalam pajalan urang. Urang mangisahkan beramanih urang mangonal Yesus katika Inya mamocahkan roti. (Yesus manampakkan Dirie ka kawan Anae buah-Nya) ³⁶ Katika kadua urang yah masih mangisahkan peristiwa ka tongah-tongah urang lalue bapaner ka urang, "Damai barotamu." ³⁷ Tapie, urang tagiat umakan golae. Urang manyangla amun urang metuh mailae hantu. ³⁸ Limah yah, Yesus bapaner ka urang, "Ngapae kolai tagiat umakan ragu yah muncul ka hatiemu? ³⁹ Ilae jarie-Ku umakan kakie-Ku. Tie bujur-bujur Aku. Suntu Aku lalue ilaelah, hantu honta bahompue daging umakan tulang bera am kolai ilae ka-Aku." ⁴⁰ Salopas Yesus mamarah itie, Inya manuyukkan jarie umakan kaki-Nya ka urang. ⁴¹ Samantara urang masih hompan percaya laie ramie umakan taheran-heran, Ysus batanya ka urang, "Apa ka ditie kolai bahompue sesuatu akan dipuseh?" ⁴² Lalue urang mamoriekan satota lauk pangang ka-Inya. ⁴³ Yesus maalap lauk yah umakan mamusehkany ka paharap urang. ⁴⁴ Limah yah, Yesus bapaner ka urang, "Itie paner am Aku parah ka kolai Katika Aku masih basamah kolai. Sagala sasuatu am tatulis tentang Aku lalam hukum Taurat Musa, kitab kawan nabi, umakan Mazmur harus digonapi." ⁴⁵ Limah yah Yesus mambuka pikiran urang sahingga urang ulih mamahami Kitab Suci. ⁴⁶ Yesus bapaner mulae ka urang," Tege tatulis amun Kristus harus menderita lalue bangkit mulae antara urang matie metuh arie katolue. ⁴⁷ Lalue, pertobatan umakan pangampunan dosa akan nyata lalam nama-Nya ka sagala bangsa, mulai mulae Yerusalem. ⁴⁸ Kolai yah saksi-saksi mulae uras tie. ⁴⁹ Ingatlah, Aku mangirim janji Ompai-Ku ka kolai. Tapie, tingallah ka kota Yerusalem sampai kolao dilengkapi honie kuasa mulai am tingie." (Yesus Taangkat ka Surga) ⁵⁰ Limah yah, Yesus manaing kawan anae buah-Nya maluar mulae kota sampai ke Betania. ka dikeh, Inya maangkat jarie-Nya lalue memberkati urang. ⁵¹ Katika Yesus memberkati urang, Inya bapisah mulae urang lalue taangkat ka surga. ⁵² Lalue, urang manyombah-Nya lalue baulang ka Yerusalem punae baramie-ramie. ⁵³ Urang salalue tege ka lalam Dangau Hatalla umakan mamujie Hatalla.