¹ మార్ భాయిబoదో తమార్ డై హమ్ ఆయెజకో కామ్ వ్యర్ద్ వోకోని కన్ తమేనే మాలమ్. ² హమ్ తమార్ డై ఆయెకొని జేర్ ఆంగె, ఫిలిప్పయూమా ఒత్తెరెజనా హమేనే భాoడన్, హమార్ హిజ్జత్ లేలిదే తోయీ, అస్మాన్ భావేటీతీ దేవేర్ ఆచ్ ఖబరేనే ప్రచార్ కరేనే దేవ్ హమేనే హిమ్మత్ దీనోకన్ తమేనె మాలమ్. ³ కసన్ కతో హమ్ తమేనే కర్ రేజకో బోదా కపటేతీ కోని డోకోదేర్ కోని ఖరాఫ్ సోంఛేతీ ఛజకోకోని. ⁴ పణ్, దేవ్ హమేనె డై కరన్, ఆచ్ ఖబరేనే హమేనే ఓపాదినో జేర్ వాసే, హమ్ హమేసా దేవ్ వాతేకర్ కన్ కోజు కర్ రేఛా మన్ క్యావూనే ఖుషీకరేనే హమ్ కోశీస్ కర్ రేకొనిపణ్, అపణ్ దల్ పరిచో దేకేవాళో ఛజే దేవేనే ఖుషీ ఆవజు బోద్ కర్ రేఛా. ⁵ తమేనే మాలమ్ ఛజు, హమ్ కన్నాయీ కేని డోకో దేర్ వాతేకే, ధనేర్ ఆసాకే, కీదేకొని ఏర్ కార్ణే దేవజ్ గవాయి. ⁶ ఉజ్జీ హమ్, క్రీస్తూర్ అపోస్తల్ కన్ హమేనే తమాపర్ హక్ రత్తీ, తమార్ డైతీకె, పరల్ జనూడైతీకె. మెప్పు పాలేణో కన్ హమ్ కోశీస్ కీదెకొని. ⁷ లపణ్ హమ్ తమార్ డై రేజనా నాన్ క్యాచచ్యాబరేనే పాళేవాళ్ మా కత్రా శాoతీతీ రఛకో హనూహమ్ తమార్ కన్నె శాoతీతీరే. ⁸ తమ్ హమేనే ఘణో ప్రేమేవాళ్ వేగే జేర్ కార్ణే తమాపర్ ఘణో ఖాస్ ఘాల్లేన్, దేవేర్ ఆచ్ ఖబరేనేజ్ కొనిపణ్, హమార్ జాన్ తమార్ సారూ దేనేసదా హమ్ తయ్యార్ వేగే. ⁹ భాయిబoదో, హమార్ వేలా, భావేటీ కస్సేక్ రకో, తమేనే హర్డేఛ కొనికె? దేవేర్ ఆచ్ ఖబర్ తమేనె ప్రచార్ కీదెజనా, హమారో భార్ తమాపర్ న రేణోకన్, హమ్ రాతన్ దియె భావేటీతీ కామ్ కీదె. ¹⁰ విశ్వాస్ కీదెజే తమార్ హుడియాoగె హామ్ కత్రాభక్తితీన్, నియతేతీన్, కసాఫ్ న రజు చాలేకో ఏర్ కార్ణే తమ్ గవాయి ఛో, దేవ్ సదా గవాయి ఛే. ¹¹ బాప్ ఓర్ బేటావూనె కు యిసారఛేకో హనూజ్ హమ్ సదా తమామా ఏకేకేనె యిసారేకన్ తమేనె మాలమ్. ¹² దేవేర్ రాజేనే, మహిమానే హాసాపాల్డేనే, తమేనె బలాయొజకో దేవేర్ ఖాతరేర్ నై తమ్ బంఛోకన్ తమేనె హిమ్మత్ దేతే, తమేనె సమ్ దేతేరే. ¹³ ఓ కారణేసారున్, ఉజ్జీ హమ్ దేవేర్ ఖబరేనే తమేనె మాలమ్ కీదె జనా, ఉ ఆద్మీర్ ఖబర్ కొని పణ్, దేవేరజ్ ఖబర్ ఛకన్ తమ్ ఓనె సామళన్ మాన్ లీదే జేర్ వాసే సదా దేవేనే హమేసా వందనం కేరేఛా ఉ సాసీజ్ దేవేర్ వాత్, ¹⁴ భాయిబందో, యూదేవాలేర్ సంగేమా ఛజకో యేసు క్రీస్తూర్ జనూనే కాయివోకో, హనూజ్ తమేనే సదా వో ఓ యూదేవాళేర్ కార్ణే కాయి భావేటీ కీదెకో అస్ భావేటీనే తమార్ మల్కేవాళేతీ తమ్ సదా పాలిదే. ¹⁵ ఓ భక్తిదారూనన్ యేసుప్రభూనె మార్ నాకన్, హమేనే సదా గోసా ఘాలే పరల్ జనూనె రక్షణ్ దజే ఆచ్ ఖబరేనే హమ్ ప్రచార్ నీకరాజు హమేనె ఓ హట్టాయె ఓ దేవేనే అసల్ ఖాతర్ ఛేనిజకో; సే మన్ క్యావూతీ విరోద్ వేన్ ఛే. ¹⁶ ఓ హమేసా కర్ రేజే పాపేమా ఈ ఆకర్ ఘణో మోటోపాప్ అబె దేవేర్ రీస్ ఉందూపర్ ఆయి. ¹⁷ భాయిబందో, హమ్ జీవేతీ ధోడాదాడ్ తమాతీ ఘణ్ దూర్ వేగేతోయి, హమార్ మన్ సారీ తమార్ డై రేన్, కత్రాయికో ఆసతీ తమేనే దేక్ ణోకన్ ఘణో కోశీస్ కీదే. ¹⁸ జేర్ కార్ణే హమ్ తమార్ డై అవ్ ణో కన్ కేల్ దో పణ్ సైతాన్ హమేనే బిగ్డానాకీ. ¹⁹ హనువతోయీ, ఆపణ్ యేసుప్రభు ఆవెజనా,ఓర్ ముణాoగె హమార్ నీరీక్షణ్, హమార్ ఖుషీ, హమార్ జీతేర్ కిరీట్, హమార్ మోట్ పణ్ తమజ్. ²⁰ సాసీజ్ తమజ్ హమార్ మోట్ పణేనె, ఖుషీనె కారణ్ ఛో.