¹ ಆ ದಿವ್ಸುಮ್ಲ ಜನಲು ತಿರ್ಗಿ ಗುಂಪು ಕೂಡಿ ವಚ್ನಪ್ಡು ವಾಳ್ಕಿ ಊಟುಮ್ಕಿ ಏಮಿ ಲೇಕುಣ್ಣಾ ವುಂಡೇಕಿ ಯೇಸು ತನ್ ಶಿಷ್ಯುಲ್ನಿ ಹತ್ರುಮ್ಕಿ ಪಿಲ್ಚಿ - ² ಈ ಜನಲ್ನಿ ಸೂಸಿ ಕನಿಕರ್ಮು ಪಡ್ತಾನು , ವೂಳು ನಾ ದೆಗ್ರುಕಿ ವಚ್ಚಿ ಮೂಡು ದಿನಲಾಯೇ , ವೂಳ್ಕಿ ಊಟುಮ್ಕಿ ಏಮಿ ಲೇದು , ³ ವೂಳ್ನಿ ಉಪ್ವಾಸ್ಮಾಯಿ ಇಂಟ್ಕಿ ಅಂಪಿಚ್ಚಿಡ್ಸ್ತೆ ದಾವ್ಲ ಬಳಲಿ ಪಾತಾರು , ವೂಳ್ಳಾ ಕೆಲುವ್ಲು ದೂರ್ಮಿಂಚ ವಚ್ನಾರೆ ಅನಿ ವಾಳ್ಕಿ ಸೊಪ್ಪಿನ್ದಾನ್ಕಿ ಶಿಷ್ಯುಲು - ⁴ ಆ ಅಡ್ವಿಲ ಯಾನಿಂಚ ರೊಟ್ನಿ ಎತ್ಕೊಚ್ಚಿ ಈ ಜನಲ್ನಿ ತೃಪ್ತಿಪಡಿಚ್ಚೇಕಿ ಆಯ್ತಾದಿ ? ಅನ್ರಿ . ⁵ ಯೇಸು - ಮೀಲಾ ಎನ್ನಿ ರೊಟ್ಳು ವುಂಡಾವಿ ಅನಿ ವಾಳ್ನಿ ಅಡ್ಗಿನ್ದಾಂಕಿ ವಾಳು - ಯೋಡು ವುಂಡಾವಿ ಅನ್ರಿ . ⁶ ಅಪ್ಡು ಯೇಸು ಜನಲು ಗುಂಪ್ಕಿ - ನೆಲ್ಮಿಂದ ಕುಚ್ಚೊಂಡ್ರಿ ಅನಿ ಅಪ್ಪಣ್ಮು ಇಚ್ಚಿ ಆ ಯೋಡು ರೊಟ್ಳುನಿ ಸೀಸ್ಕೋನಿ ದೇವುಡು ಸ್ತೋತ್ರುಮು ಸೇಸಿ ಅವುಟ್ಲುನಿ ಇರ್ಸಿ ಪಂಚೆದಾನ್ಕಿ ತನ್ ಶಿಷ್ಯುಲು ಸೇತ್ಕಿ ಇಚ್ಛೆ , ವಾಳು ಗುಂಪ್ನೋಳ್ಕಿ ಇಚ್ರಿ . ⁷ ಇದ್ಕಾಕುನ್ನಾ ವಾಳ್ಳಾ ಕೆಲುವು ಸನ್ ಶಾಪ್ಲು ವುಂಡೆ , ಅವುಟ್ಲುನಿ ಯೇಸು ಸೀಸ್ಕೋನಿ ದೇವುಡು ಸ್ತೋತ್ರುಮು ಸೇಸಿ - ಇವುಟ್ಲುನಿ ಪಂಚಿಯಂಡ್ರಿ ಅನೆ . ⁸ ವಾಳು ಊಟ್ಮು ಸೇಸಿ ತ್ರುಪ್ತುಲಾಯ್ರಿ . ಮಿಕ್ಕಿನ ತುಂಡ್ಲುನಿ ಕೂಡಿಚ್ಚಾಯಿ ಯೋಡು ಎಡ್ಗೆ ಆಯೇ . ⁹ - ¹⁰ ಊಟ್ಮು ಸೇಸ್ನೊಳು ಸುಮಾರು ನಾಲ್ಗು ಸಾವ್ರಾಲು ಮಂದಿಲು . ಆಮಿಂದ ಯೇಸು ವಾಳ್ನಿ ಅಂಪಿಚ್ಚಿ ಇಡ್ಸಿ ಕೂಡ್ಲನೆ ತನ್ ಶಿಷ್ಯುಲ್ನಿ ತೋಡ್ಕೋನಿ ದೋಣಿನಿ ಎಕ್ಕಿ ದಲ್ಮನೂಥ ಸೀಮೇಕಿ ವಚ್ಚೆ . ¹¹ ಆಮಿಂದ ಪರಿಸಾಯುಲು ಹೊರ್ಟಿ ವಚ್ಚಿ ಯೇಸು ಜೊತ್ಲ ತರ್ಕುಮು ಸೇಸ್ತಾ ಪರಿಕ್ಷಿಚ್ಚೆದಾನ್ಕಾಯಿ - ನುವ್ವ ಆಕಾಶ್ಮುಲ ಒಕ್ಟಿ ಸೂಚಕ್ಮು ಕಾರ್ಯುಮ್ನಿ ಸೂಬಿಚ್ಚಿಯಾಲ ಅನಿ ಅಡ್ಗ್ತವುಂಡೆಕಿ ಯೇಸು ತನ್ ಆತ್ಮುಮ್ಲ ನೊಂದಿ ನಿಟ್ಟುಸಿರು ಇಡ್ಸಿ - ¹² ಈ ಸಂತತಿ ಸೂಚಕ್ಮು ಕಾರ್ಯುಮ್ನಿ ಅಪೇಕ್ಷಿಚ್ಚೇದಿ ಎಂದ್ಗೂ ? ಮೀಕಿ ಸತ್ಯುಮಾಯಿ ಸೊಪ್ತಾನು , ¹³ ಈ ಸಂತತಿಕಿ ಸೂಚಕ ಕಾರ್ಯುಮು ಸಿಕ್ಕೇಕೆ ಲೇದು ಅನಿ ಸೊಪ್ಪಿ ವಾಳ್ನಿ ಇಡ್ಸಿ ತಿರ್ಗಿ ದೋಣಿನಿ ಎಕ್ಕಿ ಅಕ್ಡ ದಡುಮ್ಕಿ ಪಾಯೇ . ¹⁴ ಆಯ್ತೆ ಶಿಷ್ಯುಲು ರೊಟ್ಟ ಬುತ್ತಿನಿ ಕಟ್ಕೊನೆದಾನ್ನಿ ಮರ್ಸ್ರಿ . ದೋಣಿಲ ವಾಳ್ಕಿ ಓಕ್ ರೊಟ್ಟ ಮಾತ್ರ ವುಂಡೆ , ಬೇರೆ ವುಂಡ್ಲೆದು . ¹⁵ ಯೇಸು ವಾಳ್ಕಿ - ಎಚ್ರುಕಾ , ಪರಿಸಾಯುಲ ಮಲಿ ಹೆರೋದುಡು ಪುಲ್ಪು ಸಂಪ್ಳಿಕ್ಮು ವಿಷಯುಮ್ಲ ಸೂಸ್ಕೊಂಡ್ರಿ ಅನಿ ಕಂಡಿತ್ಮಾಯಿ ಸೊಪ್ಪೇಕಿ ವಾಳು - ¹⁶ ಮಾಲ ರೊಟ್ಟ ಲೇದೆ ಅನಿ ವಾಳ್ ವಾಳ್ನೋನ ಮಾಟ್ಲಾಡ್ಕೊಂಟ ವುಂಡ್ರಿ . ¹⁷ ಯೇಸು ದಾನ್ನಿ ತಿಲ್ಚಿ - ರೊಟ್ಟ ಲೇದೆ ಅನಿ ಮಾಟ್ಲಾಡ್ಕೊನೇದಿ ಎಂದ್ಗೂ ? ಮೀರು ಇಂಕ ಗ್ರಹಿಚ್ಕೊಲೇದಾ ? ತಿಳ್ವಳಿಕಾ ರಾಲೇದೋ ? ¹⁸ ಮೀ ಮನ್ಸು ರಾಯಾಯಿಂದೋ ? ಕನ್ಲುಂಡಿ ಕನೆಟ್ಲೇದಾ ? ಶವ್ಲುಂಡಿ ಇನ್ಲೇದೋ ? ಮೀಕಿ ನೆನ್ಪ್ಲೇದಾ ? ¹⁹ ನಾನು ಆ ಐದು ರೊಟ್ಳುನಿ ಇರ್ಸಿ ಐದು ಸಾವ್ರಲು ಜನಲ್ಕಿ ಪಂಚಿಚ್ನಪ್ಡು ತುಂಡು ನಿಂಡಿನ ಎನ್ನಿ ಪುಟ್ಟಿಲ್ನಿ ಸೀಸ್ಕೋನಿ ಪಾತ್ರಿ ಅನಿ ಅಡ್ಗಿನ್ದಾಂಕು ವಾಳು - ಪನ್ನೆಂಡು ಪುಟ್ಟಿ ಅನ್ರಿ . ²⁰ ಆ ಯೋಡು ರೊಟ್ಳುನಿ ನಾಲ್ಗು ಸಾವ್ರಲು ಜನಲ್ಕಿ ಪಂಚಿಚ್ನಪ್ಡು ತುಂಡು ನಿಂಡಿನ ಎನ್ನಿ ಎಡುಗ್ಲುನಿ ಸೀಸ್ಕೋನಿ ಪಾತ್ರಿ ಅನಿ ಅಡ್ಗಿನ್ದಾಂಕು ವಾಳು - ಯೋಡು ಎಡ್ಗೆ ಅನ್ರಿ . ²¹ ಅಪ್ಡು ಯೇಸು ವಾಳ್ಕಿ - ಮೀಕಿ ಇಂಕ ತಿಳುವಳಿಕಾ ರಾಲೇದಾ ? ಅನಿ ಸೊಪ್ಪೆ . ²² ಮಲಿ ವಾಳು ಬೆತ್ಸಾ ಇಂಚ ಊರ್ಕಿ ವಚ್ರಿ . ಆನ ಜನಲು ಓಕ್ ಗುಡ್ಡೋಡ್ನಿ ಯೇಸು ದೆಗ್ರುಕಿ ತೋಡ್ಕೋನಿ ವಚ್ಚಿ - ವೂಡ್ನಿ ಮುಟ್ಟಾಲ ಅನಿ ಯೇಸುನಿ ಬೇಡ್ಕೊನ್ರಿ. ²³ ಯೇಸು ಗುಡ್ಡೋಡು ಸೈ ಪಟ್ಕೋನಿ ಊರ್ ಆಕ್ಟರ್ಕಿ ತೋಡ್ಕೋನಿ ಪಾಯಿ ವಾಡ್ ಕನ್ಲುನಿ ಊಸಿ ವಾಡ್ ಮಿಂದ ಸೈಪೆಟ್ಟಿ - ನೀಕೆಮಾರಾ ಕಂಟಾದೋ ? ಅನಿ ವಾಡ್ನಿ ಅಡ್ಗೆ . ²⁴ ವಾಡ್ ತಲಕೈ ಎತ್ತಿ ಸೂಸಿ - ನಾಕಿ ಜನಲು ಕಂಟಾರು , ವಾಳು ಮಾನ್ಲುಲಾಕ ಕನ್ಬಿಚ್ರಿ ತಿರ್ಗಾಡ್ತಾ ವುನ್ಡಾರು ಅನೆ . ²⁵ ಅಪ್ಡು ಯೇಸು ವಾಡ್ ಕನ್ಲು ಮಿಂದ ತಿರ್ಗಿ ಸೈ ಪೆಟ್ಟೆ , ವಾಡು ಕನ್ಲಿಡ್ಸಿ ಸೂಸೇಕಿ ವಾಡ್ಕಿ ಗುಣ್ಮಾಯುಂಡೆ , ಅಂತವೇ ಸ್ವಷ್ಟುಮಾಯಿ ಕನ್ಬಿಚ್ಚೆ . ²⁶ ಆಮಿಂದ ಯೇಸು - ನುವ್ವ ಊರ್ಲೆಕೇಮಿ ಪೋವೊದ್ದು ಅನಿ ಸೊಪ್ಪಿ ವಾಡ್ನಿ ಇಂಟ್ಕಿ ಅಂಪಿಚ್ಚಿಡ್ಸೆ . ²⁷ ಯೇಸು ವಾಳ್ ಶಿಷ್ಯುಲು ಪಿಲಿಪ್ಪುಡ ಕೈಸೆರೆಯ ಅನೆ ಪಟ್ಟಣುಮ್ಕಿ ಸೇರಿನ ಗ್ರಾಮಲುಕಿ ಪಾಯ್ರಿ . ದಾವ್ಲ ಯೇಸು - ಜನಲು ನನ್ನೀ ಯೋಳು ಅಂಟಾರು ಅನಿ ತನ್ ಶಿಷ್ಯುಲ್ನಿ ಅಡ್ಗಿನ್ದಾಂಕು ವಾಳು - ²⁸ ನಿನ್ನಿ ಕೆಲುವ್ಲು ಸ್ನಾನಿಕುಡೈನ ಯೋಹಾನುಡು ಅಂಟಾರು , ಕೆಲುವ್ಲು ಎಲೀಯುಡು ಅಂಟಾರು , ಇಂಕ ಕೆಲುವ್ಲು ಪ್ರವಾದಿಲ್ಲಾ ಒಕ್ಡು ಅಂಟಾರು ಅನಿ ಸೊಪ್ರಿ . ²⁹ ಯೇಸು ವಾಳ್ನಿ - ಆಯ್ತೆ ಮೀರು ಯೋಳಂಟಾರು ಅನಿ ಅಡ್ಗಿನ್ದಾಂಕು ಪೇತ್ರುಡು - ನುವ್ವ ರಾಬೇಕಾಯುಂಡೆ ಕ್ರಿಸ್ತುಡು ಅನಿ ಉತ್ರುಮಿಚ್ಚೆ . ³⁰ ಅಂದ್ಗೆ ಯೇಸು - ನಾ ವಿಷಯ್ಮಾಯಿ ಯೋಳ್ಕು ಸೊಪ್ಪೋದಂಡ್ರಿ ಅನಿ ವಾಳ್ಕಿ ಖಂಡಿತ್ಮಾಯಿ ಸೊಪ್ಪೆ . ³¹ ಇದ್ಕಾಕುನ್ನಾ ಯೇಸು - ಮನುಷ್ಯ ಕುಮಾರುಡು ಬಹು ಕಷ್ಟಲ್ನಿ ಅನುಭವಿಚ್ಚಿ ಪೆದ್ದೊಳಿಂಚಾನು ಪೆದ್ ಯಾಜಕುಲುಯಿಂಚಾನು ಶಾಸ್ತ್ರಿಲಿಂಚಾನು ನಿರಾಕೃತ್ಮಾಯಿ ಸೊಂಪಲ್ಪಡಿ ಮೂಡು ದಿನಾಲು ಮಿಂದ ಜೂಡಾಯಿ ಲೇಸಿ ರಾಬೇಕಾಯಿಂದಿ ಅನಿ ಉಪದೇಶ್ಮು ಸೇಸೆದಾನ್ಕಿ ಪ್ರಾರಂಭ್ಮು ಸೇಸೆ . ³² ಯೇಸು ಈ ಮಾಟ್ನಿ ಏಮಿ ಗುಂಬ್ಮುಲೇಕುಣ್ಣಾ ಸೊಪ್ಪೆ . ಅಪ್ಡು ಪೇತ್ರುಡು ವಾಡು ಸೈ ಪಟ್ಟಿ ವಾಡ್ನಿ ಗದರಿಚ್ಚೆ ದಾನ್ಕು ಪ್ರಾರಂಭಿಚ್ಚೆ ವಾಡು ಎನ್ಕ್ ತಿರಿಕೋನಿ ತನ್ ಶಿಷ್ಯುಲ್ನಿ ಸೂಸಿ ಪೇತ್ರುಡ್ಕಿ - ³³ ಸೈತಾನುಡಾ ನಾ ಮುಂದ್ರ ನಿಲ್ಲೊದ್ದು , ಪದ , ನೀ ಯೋಚ್ನುಮು ಮನುಷ್ಯುಲ ಯೋಚ್ನುಮೆ ಹೊರ್ತು ದೇವುಡಿದಿ ಕಾದು ಅನಿ ಗದ್ರಿಚ್ಚಿ ಸೊಪ್ಪೆ . ³⁴ ಆಮಿಂದ ವಾಡು ತನ್ ಶಿಷ್ಯುಲು ಜೊತ್ಕಿ ಜನಲು ಗುಂಪ್ನಿ ಹತ್ರುಮ್ಕಿ ಪಿಲ್ಚಿ ವಾಳ್ಕಿ ಸೊಪ್ಪಿನ್ದೆಮಂಟೆ - ಯೋಡ್ಕಾರ ನಾ ಎನ್ಕ ವಚ್ಚೆ ಮನ್ಸುಂಟೆ ವಾಡು ತನ್ನಿ ನಿರಾಕರಿಚ್ಚಿ ತನ್ ಶಿಲುಭೇನಿ ಮೋಸ್ಕೋನಿ ನಾ ಎನ್ಕ ರಾನಿ . ³⁵ ತನ್ ಪ್ರಾಣುಮ್ನಿ ಉಳ್ಬಿಚ್ಕೊವಾಲ ಅನುಂಡೋಡು ದಾನ್ನಿ ಕಲ್ಸ್ಕೊಂಟಾಡು , ಆಯ್ತೆ ನಾ ನಿಮಿತ್ಮಾಯಿನು ಸುವಾರ್ತುಮು ನಿಮಿತ್ಮಾಯಿನು ತನ್ ಪ್ರಾಣುಮ್ನಿ ಕಲ್ಸ್ಕೊನೋಡು ದಾನ್ನಿ ಉಳ್ಬಿಚ್ಕೊಂಟಾದು . ³⁶ ಓಕ್ ಮನುಷ್ಯುಡು ಲೋಕ್ಮುನಿ ಅಂತ ಸಂಪಾದಿಚ್ಕೊಂಟೆನು ಪಾಣ್ಮು ನಷ್ಟುಮು ಪಡ್ತೆ ವಾಡ್ಕಿ ಪ್ರಯೋಜ್ನುಮು ಏಮಿ ? ³⁷ ಒಕ್ಡು ತನ್ಪ್ರಾಣುಮ್ಕಿ ಏಮಿ ಈಡು ಇಯೋಚ್ಚು ? ³⁸ ವ್ಯಭಿಚಾರಿಣಿಲಾಕವುಂಡೆ ಈ ಪಾಪಿಷ್ಟುಮು ಸಂತತಿಲ ಯೋಡು ನಾಕು ನಾ ಮಾಟ್ಳುಕು ನಾಚಿಕೊಂಟಾಡೋ ವಾಡ್ಕಿ ಮನುಷ್ಯ ಕುಮಾರುಡು , ತಾನು ತನ್ ತಂಡ್ರಿ ಪ್ರಭಾವ್ಮು ಜೊತ್ಲ ಪರಿಶುದ್ಧ್ಮು ದೇವುಡು ದೂತುಲ ಸಮೇತ್ಮಾಯಿ ವಚ್ಚೆನಪ್ಡು ನಾಚಿಕೊಂಟಾಡು ಅನೆ .