¹ Yakobo, mseng'wa va Nguluvi na va Bwana Yeesu khilisiti, khwa makhabila lichumi na khavili kekatawanyikhe, salamu. ² Mvalilake uhuva yivele fulaha necho, valongo vangu, peyamwiluta mumatatiso tofavuti, ³ mwiyelewa uhuva ukhujalibiwa khwa imani yihavapela uvufumilifu. ⁴ Mulekhake uvufumilifu ukamilise ikhaasi ya mwene, uhutya muwese ukhukomaa khikamilifu, bila ya khupunguswa mu shoshondi. ⁵ Lakhini kama umunu kati yenyo ikhitaji ihekima, ayinyilikhe khukhuma khwa Nguluvi, ambaye vihecha hwa vukalimu na pesipaveli nukhu khenyela hwa vondi vevakhamunyilikha, na ahavapela ihekima. ⁶ Lakhini nyilikhake hwa imani, bila wasiwasi, hwakhuva umunyahusopa ishaka yivele ngita mveelo mu nyanja, hutekulwa ni ng'ala nu khutakwa huno na uhwe. ⁷ Khwa hakika umuunu uyu asifikilila uhutya yacha iyanukhilwa ilinyilikho lya mwene ukhuhuma hwa Mutwa; ⁸ Muunu uyu ana niya chivili,siyo imala mu njila cha mwene chondi. ⁹ Valongo vangu masikhini itahiwa ukhwifuna mu khuyima khwa mwene hushanya, ¹⁰ umsikha kukwe mlongo tajilimvu nyenyekefu wa mwene, khwa sababu yeiheka ngita liuwa lya hukondeni mumugunda kwe iluta. ¹¹ Ilichuva lihumanicha ni joto ya khunyanya huyumya imimelo, na mauwa kidima nu vunofi wakhe wifwa. Deni deni vaanu vatajili yavichakaa katikati ya khaasi chavo. ¹² Akhinilichwe muunu yula yeifumilila amajalibu, khwa khuva bada ya khulemwa ilijalibu ilyo, yaiyanukhila itaji ya vusima, ambayo yiahidiwe khwa vala vevahamunokwa u Nguluvi. ¹³ Muunu yeyondi siipaswa uhuchova peijalibiwa, "Ilijalibu ili likhuma khwa Nguluvi ," khwasabu u Nguluvi siijalibiwa nuvuofu, nu Nguluvi yumwene sihamujalibuyeyondi. ¹⁴ Khila munu ijalibiwa khwa tamaa cha mwene mbaya chechihamushawishi nukhu khweka hutali. ¹⁵ Apo bada ya tamaa ya njanangifu ukhupinda imimba, injanangifu yiholwa, na bada ya njanangifu ukhukhangala sawasawa, husilila mu mauti. ¹⁶ Valongo vangu vakhelwa, msiyo khuchangikha. ¹⁷ Khila sawadi yeyivele nofi na khila sawadi yeyikhamilikhe huhuma hushanya, huyikha panyi khuhuma hwa Baba wa Nuru. Kamwe sibadilikha ngita mwisigila shekhibadilikha. ¹⁸ Nguluvi achakwe uhutupela unefwe uvusima hwa licho lya salwesi, ili uhutya tuwese uhuva ngita lubabo lwa khwanja miongoni mwa fiumbe fya mwene. ¹⁹ Mumanyile ili, valongo vangu vakhelwa. Khila yumonga ipaswa uhuva mwebepe va khupulikha, siyo mwebepe va khulongela wala hudada, ²⁰ khwahuva hasila ya mwanadamu siyiwesa uhutenda ihaki ya Nguluvi. ²¹ khwa hiyo mvimbake khutali uvuchafu wa njanangifu nu vubaya wondi wevuvele mahali popondi, na hwavunyenyekefu liwanuhilake ilicho lyeliyalilwe mkati mwenyo, ambalyo linavuweso wa khuokola mbepo chenyo. ²² Litiini neno,mtanake ukhupulikha tu, mukhichanga inafusi chenyo yunye. ²³ Khwakhuva yeyondi yeakhalipulikha ilicho bila khutendela ikhaasi yevele sawa nu muunu yeikhilola khumiho hwa mwene halisi mukhiyoo. ²⁴ Akhilola humikho kamwene, na ihelela na baada ya musikha mfupi isemwa sheiwanana. ²⁵ Bali umuunu yula yeahayilola khwa vuyangalifu sheliya kamili, sheliya ya vuhulu, nukhuyendelela ukhuyitii, siyo khwa sabu umwene yeipulihicha nuhusemwa, umunu uyu hacha ikhinikhilwa peayitenda. ²⁶ Uvone umunuyeyondihacha ifikilila yumwene uhuva muunu va duniya, lakhini siwesa uhutawala ululimi lwa mwene, huchanga inumbula ya mweneni dini ya mwene bule. ²⁷ Dini yeyivele nofu na yesiyihalibiha pavulongolo pa Nguluvi veetunu baba njo iyi: huvatanga avayatima na vajane mumapumukho khavo, na khwilinda yuve nuvufisadiwa duniya.