1 Ulukomano lwoshi kukanyetuka, bhakamu bhika u Yesu mundashi mwa Pilato. 2 Bhakanda umupikila, bhakati, ''Twamwagha umundu uju akusofya ichikolo chitu, akutukanisha ukutisha isongo kwa kesali, nu kuti umwene jujo ghwi Kristi, umalafyale.'' 3 Pilati akamubhusha, akati, ''Bhuleughwe uli munyafyale ghwa bhajuta?'' U Yesu akamwamla, ''Akati ghwe ghwe ghwajugha shishisho.'' 4 Pilati akabhula umuputi usongo nu lukomano, ''Ndakulyagha ikosa mumundu uju.'' 5 Lole abhene bha kongelagha bhakajugha, ali abhasongagha abhandu, amanyishanga mujuta joshi, ukwandila mughalilayi nulu ali panu.'' 6 Pilati bwo apulika agho, akabhushikisha ngimba umundu ujo ghwa Mughalilayi? 7 Bwo amanya ukuti akabha kuse kubhula ghili bwa Heloti, amubhika u Yesu kwa Heloti, jujo ghwepe akabha mu Yerusalemu amashiku ghala. 8 Heloti bwo amubhona u Yesu, akasekela ngani akalondagha ukumubhona amashiku amingi. Akapulikagha utupango twake po akanyonywanga ukutesha ichika chimo cho chikubhombighwa naghwe. 9 Heloti akamubhusha u Yesu kumasha amingi, lole u Yesu atakamwamula nakamunakamu. 10 Abhaputi abhasongo pamupene na bhasimbi bhakanyetuka nu bhakali nu kumusitaka. 11 Heloti pamupene na bhashikali bhake,bhaka mutukania nu kumukosha isoni, nu kumukwasha imienda imiisa, popo bhamughalisha u Yesu kwa Pilati. 12 Pilati nu Pilati abha bhamanyani ukwandila ishiku ilyo, (kunyuma ukwo bhatangalagha). 13 Pilati akabhitisha pamupene abhaputi abhosongo na bhalaghili ni chilundilo cha bhandu, 14 Akabhabhula, ''Mwisa numundu uju uti ghwijula akubhagholosha bhandu kubhubhibhi, mwetesha, bwo na mubhusha mundashi mwinyu, ndalibhona ikosa ku mundu uju kushisho shoshi sho umwe mukumusitaka umwene. 15 Nashiku, nu Heloti, papo amughalusha kukwitu, bwo ngutesha nakamupelela ukuti alongighwange nu kufwa. 16 Po ulu timufundisheshe nu kumulekela. 17 (Po, u Pilati akulondighwa umulekela umufungwa jumo kubhajuta pakabhalilo ka lusekelo). 18 Lole bhoshi bhakajyegha umujyegho pamupene, bhakati, ''Mutishe uja, utwighulile u Balaba!'' 19 Balaba ali mundu jujo bhakamubhika mujela kunongwa ja bhutula nongwa bhumo mukaja nu ghogha. 20 Pilati abhabhulite sona, akanyonywa ukumulekela u Yesu. 21 Lole abhene bhakajyegha umujyegho bhakati, ''Mukomele, mukomele.'' 22 Akabhabhusha ulwa bhutatu, ''Kwo kuti koni, uju umundu abhombite mabhibhi ghaki? Ndalyaghite nalimo ikosa kukwake lilyo likuti alongighwe nu kufwa. Po linga namala umufunda ndumulekele.'' 23 Lole bhakongelapo kwishu lya pamwanya bhakalondagha akomelighwe na mashu ghabho gha kamulonga u Pilati. 24 Po u Pilati atumula ukubhalekela ubwighane bwabho. 25 Akamulekela jula jo bhamulondagha jujo apinyighwe kunongwa ja kufulighania nu kughogha. Lole amutisha u Yesu kushobhakulonda bhabho. 26 Bwo bhakuja pa kumubhika, bhakamukola umundu jumo u Simoni ughwa mukilene, bwo afuma kuchisu, bhamutwika ichikohekano ukuti apimbe bwa kumukonga u Yesu. 27 Ichilundilo ichikulu cha bhandu, na bhakolo bhabho bhakamusulumanikisha nu kumulilila panongwa jake bhakabha bhakumukononga. 28 Lole akabhasanukila, u Yesu akabhabhula, ''Bhalindwanabha mu Yerusalemu, manyemundililaghe une, lole mwilililaghe umwe mwibhene kunongwa uya bhana bhinyu. 29 Tesha, amashiku ghakwisa ghagho tibhakajughe, ''Bhasajighwe abhaghumba ni fukwe shitapate na mongo ghabho ghatongeshishe. 30 Popo tibhakande ukutubhula utughamba, ''Tughwilaghe; ni fighamba, ''Mutwifunikile.' 31 Linga bhakubhomba imbombo ishi bwo umukokwe mubhisi linga ghumatishikabhe bhulele?'' 32 Abhalisha abhanine, abhakukomania bhabhili, bhakabhabhika pamupene ukuti bhaghoghighwe. 33 Bwo bhafika pabhujo bhubwo bhakuti palupaja, popo bhakakomelighwa pamupene na bhatula nongwa bhala, jumo kulubhafu lwa kumwisa nu munine ulwa kushomi. 34 U Yesu akati, ''Tata, ubhaswange, papo bhatamenye shobhabhomba. ''Bhope bhabhika ubhulaghushi, ukujabho imwenda jake. 35 Abhandu bhakima bwa bhakutesha kuno abhalaghili bwa bhakumutania, bhakati, ''Abhapokagha abhanine. Po ipoke umwene, linga ghejo ghwini Kristi ghwa Chala, umusalighwa.'' 36 Nabhashikali bhakamufuja, bhakamubhijilila jujo bhaka mupa ubwalwa, 37 Bhakati, ''Linga ughwe uli malafyale ghwa bhayuta ipoka ghwi mwene'' 38 Kukabha ni chinangisho pamwanya papake cho chakasimbighwa ''UJU GHWI MALAFYALE GHWA BHAJUTA.'' 39 Jumo mubhatula nongwa jo akakomelighwa akamutuka akati, ''Ughwe uta ghwe Kristi? Ipoka jughweghwe nutwe'' 40 Lole jula umunine akamwamula, akamukela nu kujugha, ''Ghwe ughwe utakumwoghapa Uchala, bwo nughwe uli mubhulongi bhu bhubwo? 41 Utwe tuli panu shanaloli, papo utwe tukupokela chicho chikukongana ni mbombo shitu. Lole umundu uju atabhombite nachicho ichibhibhi.'' 42 Po akongelesha, ''Yesu, ungumbuke linha kwingila mubhutwa bwako.'' 43 U Yesu akamubhula, ''Itika ngukubhula, ghumusughu ulipamupene nune kubhushuka.'' 44 Apo kakabha papipi akabhalilo ka tuhanu na kamu sita, ichisi chikaghwa pamwanya, pachisu choshi ukufika mukabhalilo ka tuhanu na tuna tisa, 45 Umbwelu bwa lisubha bhukashima. Po umwenda ghwa mwa tembeli ghukajabhana pakati ukwandila kumwanya. 46 Akalila kulishu ikulu, Yesu akajugha, ''Tata mutukono twako ngujibhika indumbula jangu, ''Bwo ajugha shishishi, afwanga. 47 Po umulindilili bwo ashibhona shoshabhombighwa akamutufya Uchala akati, ''Naloli uju ali mundu ghwa naloli.'' 48 Po ichilundilo chabhandu bhakisa pamupene pakushishikisha bwo bhaghabhona ghoghabhombighwa, bhakaghaluka kuno bhakwikomakoma kufifubha fyabho. 49 Lole abhamanyini bhake, na bhakolo abhabha kamukongagha ukufuma Mugalilayi, bhakima kubhutali bhakutesha shila shilipo. 50 51 Tesha, pakabhapo nu mundu jo ghwi Yusufu, jujo ghwi jumo mubhalishalasa, umundu umwisa nu ghwa naloli, (Akabha atikikana nabho amamulo pamu imbombo shabho), ukufuma ku Armataya, mukaja ka chijuta, kako kakasubhilagha ubhutwa bwa Chala. 52 Umundu ujo, akapalamila kwa Pilati, akasuma bhamupe umubhili ghwa Yesu. 53 Akamwilomusha, amuniengela imyenda, amubhikamwipumba lilyo bhakasongola pi jondo, lilyo na jumo atashilighwemo. ` 54 Lyali lishu lya kwitendekesha, nu Sabhati bwo jikupalamila. 55 Abhakolo, bhobhakisa nabho ukufuma mu Ghalilaji, bhakamukonga, nu kutesha ipumba na mumwo umubhili ghwake ghukulashighwa. 56 Bhakaghaluka nu kwanda ukwitensekesha ifya lunushi na marashi. Po ilishiku lya Sabhati bhakatusha kunongwa ja lulaghilo.