¹ Kukabhalilo kaka, amaelfu amingi ghabhandu bhakabhungana pamupene, mpaka nu kwansa ukukanyana, akanda ukujugha na bhasukula bhake tashi, ''Mubhe maso nu bhubhibhi bwa bhafalisayi bhabho bhamyashi'' ² Patapakabhepo nisha muchisi sho shimamite shisho shitashikufunuligwe, pamu limo lyimamite litalikabhoneke. ³ Lyoshi lyo mukulijugho mukati muchisu, tilikapulikishigwe pabwelu. Na ghoshi gho mukaghajugha mu fyufwo mukati mu fyumba fyinyu fya mukati fyo fipingigwe tighakajughigwe pamwanya pakasale ka nyumba. ⁴ Ngubhabhula bhamanyani bhangu, manyemwo ghopaghe bhala bhakughogha umubhili sona bhata ni chindu ichinine ichakubhomba, ⁵ Lole tingabhalangisha jujo timukamwoghopaghe. Mumwoghopaghe jula jujo linga akughogha ali nu lulaghilo lwa kutagha kumulilo popo. Ngubhabhula umwe, mumwoghopaghe jujujo. ⁶ Bhule utujuni tuhanu tutakulishigwa kutuhela tubhili? Nabhubhubwo najumo najumujwene mumwabho akamwibwe mundashi mwa Chala. ⁷ Lole mumanye ukuti, ichinghwili cha mumitu jingu chibhelengighwe. Manyemwoghopaghe. Umwe mulibha pamwanya ukukinda utujuni utwingi. ⁸ Ngubhabhula, nghweshishi jujo akunyitika une mundashi mubhandu, umwana ghwa Adamu tiakamwitike mundashi mu bhandumi bha Chala. ⁹ Lole ghweshi jotakangane mundashi mubhandu ghwepe tiakakanighwe mundashi mughwandumi ghwa Chala. ¹⁰ Ghweshi jo takajughe ishu ibhibhi kumwana ghwa Adamu, tikahobhokelighwe, lole ghweshi jujo tikamufuje umbepu umwelu, atakahobhokelighwe. ¹¹ Linga bhaja bhabhabhika mundashi mubho songo bha bhotembeli, abhalongoshi na bhandaghilo, manye mwoghopaghe nu kujugha mukati mukwitetela pamu choni cho tikajughe, ¹² Papo umbepo umwisa tiakabha manyishe bhubwo tumukajughe ku kabhalilo kakako.'' ¹³ Umundu jumo muchilundilo akamubhula akati, ''Mumanyishi, mubhule ughwa mwitu anjabhile ubhujo bwa chilingo changu.'' ¹⁴ Ghwini ambikite ukubha mwamuli nu kubhagheleshe pakati jinyu.? ¹⁵ Popo akabhabhula, mweteshange kukuti kandu ka finyonyo, papo ubwumi bwa mundu bhuta mufundu ifyingi fifyo alinafyo.'' ¹⁶ U Yesu akabhabhula ichifwani, akati, umughunda ghwa mundu jumo umukabhi ghukela ngani, ¹⁷ Po akibhusha mukati mumwake, akati, ngosheki kali inda napa kusengula ifindu fyangu? ¹⁸ Akajugha akati, ti mbombe indi. Kuti mbongole ighulu inandi ngusenga ikulu, mwotisengule ifindu fyangu fyoshi nu tundu utunine. ¹⁹ Kuti ni bhule junene, ''Ne, nibhikili nganila ifindu ifyingi ku fyinja ifyingi. Tushanga, ulyange, ughwange nu kusala.'' ²⁰ Lole Uchala akamubhula, ughwe ghwi mundu ghwimulenga, ubhushiku bwa musughu bha kujilonda indumbula ukufuma kwako, po ifindu fyoshi fyoghwibhikile ti fikabhe fyani? ²¹ Bwo tishikabhe ku mundu ghweshi jujo akwibhikila ichuma, lole atakukabhila kunongwa ja malafyale. ²² U Yesu akabhabhula abhasukulu bhake, po ngubhabhula manye mpashe mu bwumi bwinyu __ ishakuti timulyeki, pamu kumibhili jinyu __ ukuti timufwale koniko. ²³ Papo ubhughone bhuli pamwanya po kufyakulya, sona umubhili ghuli pamwanya kufifwalo. ²⁴ Muteshange utujuni twa kumwanya, tutakulima sona tutakwinula. Bhata ni nyumba pamu ighulu lya kusengulilo, lole ubhabha ghwinyu ahubhalisha. Umwe mutapakipo ngani ukukinda utujuni! ²⁵ Ghwe ghwini pakati papinyu jujo abhaghile ukwongelesha akapimo kamu mubwumi bwake? ²⁶ Linga po mutabhaghile ukubhomba chichicho ichinandi cho chipepe po koni mukwita mya mumanine?. ²⁷ Muteshange ubhulenge bwo bhukuj'ikumela. Ghatakubhomba imbombo sona ghatakunienga. Lole ngubhabhula, nu Sulemani mukati mubhutwa bwake atakakwata na limo mu ghaghagha, ²⁸ Linga Uchala akugha kwasha akisa amani gha muchiposa, ghagho umusughu ghalipo, ni ngelo ghakutaghighwa mumulilo. Bhule muta pamwanya ukubha kwasha umwe? Mubhula lwitiko ulunandi! ²⁹ Manye mwitamianga ukuti timulye koni pamutimu mughwe koni, pomu manye mubha nu bwogha. ³⁰ Papo ifikolo fyoshi fya muchisu fikulabhanagho. Po ubhabha ghunyu ukuti mukughalonda ghaghagho. ³¹ Lole londagha ubhutwa bwake tashi, na manine agho tighakongeleshigwe, ³² Manye mwoghopaghe, mwe kalundilo akanadi, papo ubhabha ghwinyu tiakabhasekelele ukubhapa umwe ubhutwa ubwo. ³³ Ghulishanga ifyuma fyinyu muje mubhape abhapina, mwibhombele inyambi shisho shitanyapukite ichuma cha kumwanya chitakubhola, bhujo bhubwo na bhifi bhata kupalamila pamu imikono jita bhaghile ukukomania. ³⁴ Papo linga ichuma chako chili, po ni ndumbula jako tijibhepalapala. ³⁵ Imyenda jinyu imitali jibhe jipinyighwe nu mukanda, ni nyaleshinyu shisho nekaghe ukuti shikwendelela ukwaka, ³⁶ Mubha sabhandu bhabhe bhakumuteshekesha utata ghwabho ukufuma kulusekelo lwa bweghi, ukuti linga akwisa akuti hoti bhamwighuli umlyango lubhilo. ³⁷ Bhasajighwe abhabhombi bhala, bhabho utata tiakabhaghe bhali maso. Naloli takapinye umwenda ghwake umutali nu mushipi, potakabhi kashe pase nukubhopa ifindu, sona nukubhabhombela. ³⁸ Linga Utata akwisa kusanu ja bhubhuli ja bhushiku kubhulindilili, pamu na kuja bhutatu ija bhulindilili abhagha mulipo, tiji kabhe paki kubhabhombi abho. ³⁹ Ukwongela paghagho, mumanye ili, linga umwene nyumba amenye akabhalilo kako umwifi akwisa, ngali atajilekite inyumba jake ukuti jomolighwe. ⁴⁰ Mubha tajali papo mutamenye kabhalilo kaki kako umwana ghwa Adamu takaghaluke ukwisa. ^{41 42} Peteli akajugha, ''Tata, kutubhula twibheneshe ichifani ichi, pamu kumubhula kukuti mundu.? Utata akabhabhula, ''Ghwini umubhombi ughwanaloli pamu ughwa mahala jujo Utata ghwake takamubhike pamwanya pa bhabhombi abhanine, ukuti abha jabhile ichakulya chabho kukabhalilo koka kulondighwa? ⁴³ Asajighwe umubhombi yula, jujo utata ghwake linga akwisa tiakamwaghe akubhomba shisho alaghilighwe. ⁴⁴ Naloli ngubhabhula umwe ukuti takamubhike pamwanya pa chuma chake choshi. ⁴⁵ Lole umubhombi jujo akujugha mumwojo ghwake, ''Akuti utata ghwangu akabha akwisa; po akwanda ukubhakoma abhabhombi bhala abhalisha na bhakolo, po akwanda ukulya, ukug'wa nu kughala, ⁴⁶ Utata ghweke jula umubhombi linga akwisa pishiku lilyo atasubhilagha na kabhalilo kako atakamenye, ghwepe ti akamukende fibhali fibhali nu kumubhika pa bhujo pamupene nabho bhatali bhanaloli' ⁴⁷ Umubhombi, jujo amenye ubwighane bwa tata ghwake, ghwepe atakitajalisha sona atakabhomba ukukongana nu bwighane bwake, takakomighwe ni ngomo inyinji. ⁴⁸ Lole umubhombi uju atabhumenye ubwighane bwa tata ghwake, lole abhomba shoshi kulondighwa ulufundo, takakomighwe ingomo nandi. Ifyingi fikumelelighwa kufuma kukwake, ghwepe jujo akitikishighwa kufyingi, kukwake tifikamelleli ghwa inyingi ngani. ⁴⁹ Nisite kukukosha umulilo kuchisu, po ingunyonyua ukuti ghubhe bwo ghwaka, ⁵⁰ Lole ndinulwosho lulwo tingoshighwe, sona ndi nubhusulumanie mpaka papo ba jilana! ⁵¹ Bhule mukwinong'ona ukuti nishile pa kubhika ulutengano pachisu? Nashiku, ng'ubhula, lole nishile pa kujabhania. ⁵² Ukufuma ulu nu kwendelela tikukabhe na bhandu bhahanu mukati munyumba jimo bhajabhanite, po bhatatu tibhakabhe pashima na bhala bhabhili, na bhala bhabhili pashima na bhala bhala bhatatu. ⁵³ Tibhakajabhane, ubhabha tiakabhe pashima nu mwana, nu mwana takabhe pashima nu bhabha umama takabhe pashima nu mulindu ghwake, umulindu takabhe pashima numama ghwake, ung'inafyala takabhe pashima nu mukoghwake ghepe umuko takabhe pashima nu ng'inafyala ghwake. ⁵⁴ U Yesu akabha akuchibhula ichilundilo sona, ''Linga mukughate amabhingu gha kufumila kubhujongela, mukuti akabhalilo kafula kapalamile; popo bwoshi kubha, ⁵⁵ Nimbepo ja kusini jikukubha, mukuti, amafuku makali, po shikubha mwomumwo. ⁵⁶ Mwe bhamyashi, mubhaghile ukwilula ukubhoneka kwa chisu na kumwanya, po shingabha bhulele ukuti mutangilula akabhalilo kokalipo? ⁵⁷ Po koni kukuti munyinyu jumo ashaghaniange shisho shigholokite kukwake ukushibhomba kukabhalilo kako alini nafasi ja kubhamba bhubhubwo? ⁵⁸ Papo linga ughwa nongwa ghwako mundashi mumulongi, po ijula ukugihelela nu ghwa nongwa bwo mkali mulimusila manyiso akubhike kumulongi, nu mulongi akubhike kwa ofisa, nu ofisa akutaghile mujela. ⁵⁹ Ngukubhula utukatilemwo ukwo mupaka ulipe na kasenti ka bhumalilo.