14
1
2
3
1.ಆತುಡು ಸಬ್ಬತ್ ದಿನಂಲಾ ಫರಿಸಾಯಲ ಮುಖ್ಯಸ್ಥರ್ಲಾ ಒಕ್ಕಡ ಇಂಟ್ಗಿ ಊಟನ್ಗಿ ಪೈನಪ್ಡು ವಾಳು ಆತುಡ್ನಿ ಹೊಂಚ್ಚಿಸೂಸ್ತಾಉಂಟಾರು. 2.ಅಪ್ಡು ಯೇಸು ತನ್ನೆದ್ರಂಗ ಜಲೋದ್ರಮುಳ್ಳ ಒಕ್ಕ ಮನುಷ್ಯಡು ನೀರೆದಾನ್ನಿ 3.ಸೂಸಿ-ಸಬ್ಬತ್ ದಿನಂಲಾ ಸ್ವಸ್ಥಂಸೇಸೆದಾನ್ನಿ ಸರಿಯೋ? ಸರಿಕಾದೋ ಅನಿ ಧರ್ಮೋಪದೇಶಕರ್ಲ್ನಿ ಫರಿಸಾಯರ್ಲ್ನಿ ಅಡ್ಗನ್ನಾಡು.
4
5
6
4.ವಾಳು ಊರ್ಕ ಉಂಡಲು ಆತುಡು ವಾಡ ಸೈ ಪೊಟ್ಟಿ ವಾಡ್ಗಿ ವಾಸಿಸೇಸಿ ಅಮ್ಪಿಚ್ಚಿ 5.ಮೀಲ ಯಾವ್ದೊಕ್ಕಡ ಕೊಡ್ಕಾನ್ನಿ ಎದ್ದುಕಾನಿ ಬಾವಿಲಪೋಡ್ತೆ ವಾಡು ತಡಂಸೇಯ್ಗ್ಗುoಡ ಸಬ್ಬತ್ ದಿನಂಲಕಾನಿ ಪೈಕಿತೀಸೆಲೆದೋ ಅನಿ ವಾಲ್ನಿ ಅಡ್ಗ್ ನ್ನಾಡು. 6.ವಾಳು ದಾನ್ಗಿ ಉತ್ತರಂಇಚ್ಛೆಕಾಗುಂಡ ಉಂಡರು.
7
8
9
7.ಊಟನ್ಗಿ ಪಿಲ್ಬಿಚ್ಚಗ್ಗನವಾಡು ಪಜ್ಞ್ತಿಯ ಮೊದ್ಲನೇ ಸ್ಥಾನಂನ್ನಿ ಆರ್ಪಿಚ್ಗಾನ್ನದಾನ್ನಿ ಸೂಸಿ ಯೇಸು ಒಕ್ಕ ಸಾಮ್ಯಮ್ನಿ ಸೋಪ್ನಾಡು,ಯೆಮಂಟ್ಟೆ- 8.ಯವ್ವಡೈನ ನಿನ್ನಿ ಪೆಂಡ್ಲಿಊಟನ್ಗಿ ಪಿಲ್ಸ್ತೆ ಪಂಕ್ತಿಲೊಗ ಮೊದ್ಲೇನೆ ಸ್ಥಾನಂಲಾ ಕುಚ್ಗಾವದ್ದು;ಒಕ್ಕ ವೇಳೆ ನಿಗಿಂತ ಮಾನವುಳ್ಳವಾಡ್ನಿ ವಾಡು ಪಿಲ್ಚುಡಬಹುದು, 9.ಮಲಿ ನಿನ್ನಿ ವಾಡ್ನಿ ಪಿಲ್ಚನ್ನಾವಾಡು ವಚ್ಚಿ-ಊಡ್ಗಿ ಸ್ಥಾಳಂಉಡಿ ಅನಿ ನೀಕಿಸೊಪ್ಪೇಪ್ದು ನುವ್ವ ನಾಚ್ಗನ್ನಿ ಕಡೆಸ್ಥನಂಲಾ ಕುಚ್ಗನಾಕಿ ಪಾತಾವು.
10
11
10.ಆಯ್ತೆ ಯವ್ವಡೈನ ನಿನ್ನಿ ಪಿಲ್ಚನಪ್ಡು ನುವ್ವ ಪಾಯಿ ಕಡೆಯ ಸ್ಥಾನಂಲ ಕುಚ್ಗೋ;ಇಟ್ಟಸೇಸ್ತೆ ನಿನ್ನಿ ಪಿಲ್ಚಿನವಾಡುವಚ್ಚಿ ನಿನ್ನಿ ಸೂಸಿ-ಸ್ನೇಹಿತುಡೆ, ಇಂಕ ಪೈಕ್ಕಿರಾ ಅಂಟಾಡು.ಅಪ್ಡು ನೀ ಸಂಗಡ ಕುಚ್ಗವುಂಡವಾಲಂದ್ರ ಮುಂದ್ರ ನೀಕಿ ಮಾನಂ ವಸ್ತಾದಿ. 11.ತನ್ನಿ ಹೆಚ್ಚಿಚ್ಗನ್ನ ಪ್ರತಿಯೋಕ್ಕಡು ತಗ್ಗಿಚ್ಚಲ್ಪಡ್ತಾಡು;ತನ್ನಿ ತಗ್ಗಿಚ್ಗನ್ನವಾಡು ಹೆಚ್ಚಿಚ್ಚಲ್ಪಡ್ತಾಡು ಅನ್ನಾಡು.
12
12.ಆತುಡು ತನ್ನನ್ನಿ ಊಟನ್ಗಿ ಪಿಲ್ಚಿನ್ವಾಡ್ಗಿ ಸಹ ಒಕ್ಕ ಮಾಟ ಸೋಪ್ನಾಡು;ಅದೆಮಂಟ್ಟೆ -ಮೀಳು ಮಧ್ಯಾಹ್ನo ಊಟಾನ್ಗಿ ಅಥ್ವ ಮಾವ್ಟಾಲ ಊಟನ್ಗಿ ನೀ ಸ್ನೇಹಿತಾಲ್ನಿಕಾನಿ ನೀ ಅನ್ನಾದೊಮ್ಮಲ್ನಿಕಾನಿ ನೀ ಬಂಧುಬಾಂಧವಲ್ನಿಕಾನಿ ಐಶ್ವರ್ಯವಂತಲೈತೆ ನೆರೆವಾಳ್ನಿಕಾನಿ ಪಿಲದ್ದು.ಒಕ್ಕವೇಳೆ ವಾಳು ಸಹ ಪ್ರತಿಯಂಗ್ಗ ನಿನ್ನಿ ಪಿಲ್ಚಾಳು,ಮಲಿ ನೀಕಿ ಮುಯ್ಯಿಗಿಮುಯ್ಯಯ್ತಾದಿ.
13
14
13.ಆಯ್ತೆ ನುವ್ವ ಔತಣಂಸೇಬಿಚ್ಚಪ್ದು ಬಡವಲು ಊನಂಆಯ್ರಿ ಕುಂಟ್ಲೂ ಕುರುಡ್ಲು ಇಟ್ಟಿಟ್ಟವಾಲ್ನಿ ಪಿಲಿ; 14.ವಾಳು ನೀಕಿ ಮುಯ್ಯಿಗೆಮುಯ್ಯಿ ಸೇಸೆದಂಗಿ ಏಮು ಲೆಗುನ್ನವಾಳೈನು ನೀತಿವಂತುಲು ಜೀವಿತಲೈ ಲೇಸಿ ವಚ್ಚಲಗನೀಕಿ ಮುಯ್ಯಿಗಿ ಮುಯ್ಯಯ್ಯೇದಾನ್ನಿಂಕ ನುವ್ವ ಧನ್ಯಡೈತಾವು ಅನ್ನಾಡು.
15
16
17
15.ಊಟನ್ಗಿ ಕುಚ್ಗನ್ನವಾಳ ಒಕ್ಕಡು ಈ ಮಾಟಲ್ನಿ ಇನಿ-ದೇವುಡ ರಾಜ್ಯಮ್ಲಾ ಊಟಂಸೇಸ್ನೋಡೆಧನ್ಯಡು 16.ಅನಿ ಸೋಪ್ಪಾಲು ಯೇಸು ವಾಡ್ಗಿ ಸೋಪ್ಪಿಂದೆಮoಟ್ಟೆ -ಒಕ್ಕಾಡೋಕ್ಕಮನುಷ್ಯಡು ಪೆದ್ದ ಅಡ್ಗೆಸೇಬಿಚ್ಚಿ ಅನೇಕಲ್ಗಿ ಊಟನ್ಗಿ ಸೋಪ್ಪಿಚ್ನಾಡು. 17.ಆ ಪೈನ ಊಟಂನ ಪದ್ಗಿ ವಾಡು ಊಟಾನ್ಗಿ ಸೋಪ್ಪಿಚ್ಗನ್ನವಾಳ ದೇಗ್ಗರ್ಗಿ-ಇಪ್ದು ಸಿದ್ದಮಾಯ್ನದಿ,ರಾವಾಲ ಅನಿ ಪಿಲ್ಚೆದಾನ್ಗಿ ತನ್ನ ಮನ್ಸಿನ್ನಿ ಅಮ್ಪಿಚ್ಚನಾಡು.
18
19
20
18.ಆಯ್ತೆ ವಾಳನ್ದ್ರೂ ಕ್ಷಂಬಿಚ್ಚಾಲನಿ ಒಕ್ಕೆ ಮಂಸಿನ್ನಿಂಕ ಸೊಪ್ಪೇದಾನ್ಗಿ ತೊದ್ಗನ್ನಾಳು.ಮೊದ್ಲೇನೆವಾಡು ಆ ಮನ್ಸಿನ್ನಿ ಸೂಸಿ-ಸೇನ್ನಿ ಕ್ರಯನ್ಗಿ ತಿಸ್ಗನ್ನಾನು,ದಾನ್ನಿ ಪಾಯಿ ಸೂಸೆದಾನ್ಗಿ ನಾಕಿ ಅಗತ್ಯಮುಂದಿ,ನನ್ನಿ ಕ್ಷಮ್ಬಿಚ್ಚಾಲನಿ ಅಡಿಕ್ಕನಾಡನಿ ಸೊಪ್ಪು ಅನ್ನಾಡು. 19.ಮಲೋಕ್ಕಡು- ನೀನು ಐದು ಜೋಡಿ ಎದ್ದಲ್ನಿ ತಿಸ್ಗನ್ನಾನು,ಅವುಟ್ನಿ;ಪರೀಕ್ಷಿಚ್ಚೆದಾನ್ಗಿ ಪಾತಾನು,ನನ್ನಿ ಕ್ಷಮಿಚ್ಚಾಲನಿ ಅಡಿಕ್ಕನಾದನೀ ಸೊಪ್ಪು ಅನ್ನಾಡು. 20.ಇನ್ಕೊಕ್ಕಡು -ನೀನು ಪೆಂಡ್ಲಿಸೇಸ್ಗನ್ನಾನು,ದಾನ್ನಿಂಕ ನಾನು ವಚ್ಚೆಕಾಯೇಲೇ ಅನ್ನಾಡು.
21
22
21.ಆ ಮನ್ಸಿ ವಚ್ಚಿ ತನ್ನ ಯಜಮಾನುಡ್ಗಿ ಈ ಸಂಗತಿನ್ನಿ ತಿಲ್ಬಿಚ್ಚಾಲು ಇಂಟ್ ಯಜಮಾನುಡು ಸಿಟ್ಟೇತ್ಗಾನಿ ಮನ್ಸಿಗಿ-ನುವ್ವ ತಟ್ಟನೇ ಈ ಊರ ಈದ್ಈದ್ಗು ಸಂದ್ಸಂದ್ಗು ಪೈಯ್ಯಿ ಬಡವ್ಲು ಊನಮೈನೋಳು ಕುರುಡ್ಲು ಕುಂಟ್ಲು ಇಟ್ಟವಾಲ್ನಿ ಇನ್ಗೆ ಪಿಲ್ಚ್ಗಾನಿ ರಾ ಅನಿ ಸೋಪ್ನಾಡು. 22.ಬಳಿಕ ಆ ಮನ್ಸಿ-ಅಯ್ಯಾ,ನುವ್ವ ಅಪ್ಪಣೆಇಚ್ನಾಟ್ಟೆ ಸೇಸ್ಸಿನ್ದಾಯ;ಆಯ್ನೂ ಇಂಕ ಸ್ಥಳoಮುಂದಿ ಅನ್ನಾಡು.
23
24
23.ಅಪ್ಡು ಆ ಯಜಮಾನುಡು ತನ್ನ ಮನ್ಸಿಗಿ ಸೋಪ್ಪಿಂದಿ ನುವ್ವ ಹಾದಿಲ್ಗು ಬೇಲಿಲಾ ದೇಗ್ಗರ್ಗು ಪಾಯಿ ಆನ ಸಿಕ್ಕಿನವಾಲ್ನಿ ಬಲವಂತಂಸೇಸಿ ಲೋಕಿ ಪಿಲ್ಚಗಾನಿ ರಾ, ನಾ ಇಲ್ಲೂ ನಿಂಡ್ನಿ. 24.ಆಯ್ತೆ ಊಟನ್ಗಿ ಸೋಪ್ಪಿಚ್ಗಾನ್ನವಾಳ ಒಕ್ಕಡೈನ ನೀನು ಸೇಬಿಚ್ಚಿನ ಅಡ್ಗೆಯ ಸವಿನಿ ಸೂಡ್ಗಡ್ದು ಅನಿ ಮೀಕಿ ಸೋಪ್ತಾನು ಅನ್ನಾಡು.
25
26
27
25.ನಿಂಡ ಜನಾಲು ಗುಂಪುಗುoಪ್ಪoಗ್ಗ ಯೇಸುಜೊತ್ಲಾ ಪಾತಾ ಉಂಡಲು ಆತುಡು ತಿರ್ರಿಕಾನಿ ವಾಳ್ಗಿ ಸೋಪ್ಪಿನ್ದೆಮಂಟ್ಟೆ 26.ಯವ್ವಡೈನಾ ನಾ ದೇಗ್ಗರ್ಗಿ ವಚ್ಚಿ ತನ್ನ ತಂಡ್ರಿ ತಲ್ಲಿ ಪೆಂಡ್ಲಾಮು ಬಿಡ್ಲು ಅಣ್ಣ ದೊಮ್ಮಲ್ಳು ಅಕ್ಕ ತೊಡ್ಬುಟ್ಲು ಊಳ್ನಿ ತನ್ನ ಪ್ರಾಣಂನ್ನಿ ಸಹ ಹಗೆಸೇಯ್ಗಬಾತೆ ವಾಡು ತನ್ನ ಶಿಷ್ಯಡೈಯೇಟ್ಲೇದು. 27.ಯವ್ವಡೈನಾ ತನ್ನ ಶಿಲುಬೆನಿ ಮೊಸ್ಗಾನಿ ನಾ ಎನ್ಕ ವಚ್ಚ ಹೊರ್ತುವಾಡು ನಾ ಶಿಷ್ಯಡಾಯೇಲೇದು.
28
29
30
28.ಮೀಲಾ ಯವ್ವಡೈನಾ ಒಕ್ಕ ಬುರುಜ್ನಿ ಕಟ್ಟಿಚ್ಚಲನಿ ಯೋಚಿಸ್ತೆ ವಾಡು ಮೊದ್ಲು ಕುಚ್ಗಾನಿ -ದಾನ್ಗಿ ಎಂತ ಖರ್ಚು ಪೊಟ್ಟಿoದ್ದಿ,ದಾನ್ನಿ ತಿರ್ಪೆದಾನ್ಗಿ ಸುಖಮೈಯ್ಯoತ್ತ ದುಡ್ಲು ನಾಲ ಉಂದೋ ಅನಿ ಲೆಕ್ಕಸೇಸೆಲೆದೋ? 29.ಇಟ್ಟೆ ಲೆಕ್ಕ ಸೇಯ್ಗುoಡ್ಡ ದಾನ್ಗಿ ಅಸ್ತಿವಾರಂ ಎಸಿನ್ಪೈನ ಆ ಕೆಲಸಂನಿಪೂರೈಚ್ಚಕಾಗುಂಡ ಪಾತೆ ಸೂಸವಾಳoದ್ರು 30.ಈ ಮನುಷ್ಯಾಡು ಕಟ್ಟಿಚ್ಚೆದಾನ್ಗಂತೂ ತೊಡ್ಗಾನಾಡು,ಕೆಲ್ಸಂ ಪೂರೈಚ್ಚೆಕಾಗುಂಡ ಪೈನಾಡು ಅನಿ ವಾಡ್ನಿ ಹಾಸ್ಯಂಸೇಸಾಳು.
31
32
33
31.ಲೇದೆ ಯಾವ ಅರಸಡೈನ ಮಲೋಕ್ಕಡ ಅರಸಡಜೊತ್ಲಾ ಯುದ್ದಂ ಸೇಸೆದಾನ್ಗಿ ಪಾಯೇಪ್ದು ತನ್ನ ಪೈನ ಇರ್ವೈಸಾವಿರದುಡ್ಲು ತಿಸ್ಗಾನಿ ವಚ್ಸೆದಾನ್ನಿ ತಾನು ಪದಿಸಾವಿರ ದುಡ್ಕ್ನಿಂಕ ದಡ್ಬಿಚ್ಚೆದಾನ್ಗಿ ಶಕ್ತಡೈನಾಡೂ ಲೇದೋ ಅನಿ ಕುಚ್ಗಾನಿ ಆಲೋಚಿಚ್ಚೆಲೇದೋ? 32.ತಾನು ಶಕ್ತಡುಕಾಗುಂಟ್ಟೆ ವಚ್ಚಾ ಅರಸಡು ಇಂಕಾ ದೂರ್ಮುನ್ನಪ್ಡೆ ರಾಯಭಾರಿಲ್ನಿ ಅಂಪಿಚ್ಚಿ ಸಂಧಾನ್ಗಿ ಒಪ್ಪಂದಮ್ನಿ ಅಡಿಕ್ಕನಾಡು. 33.ಅಟ್ಟೆ ಮೀಲಾ ಯಾವ್ಡೆ ಕಾನಿ ತಾನ್ಗುಡದ್ದoತ್ತ ಉಡ್ಗುಡಬಾತೆ ವಾಡು ತನ್ನ ಶಿಷ್ಯಡಾಯ್ದೇಟ್ಲೇದು.
34
35
34.ಉಪ್ಪಂತು ಮoಚ್ಚಿ ಪಧಾರ್ಥಮೇ;ಉಪ್ಪು ಸಪ್ಪೈತೆ ದಾನ್ಗಿ ಇಕ್ಯಾವ್ದಾನ್ನಿಂಕ ರುಚಿವಚ್ಚಿಂದಿ? 35.ಅದಿ ಭೂಮಿಗೈನ ತಿಪ್ಡಗೈನ ಉಪಯೋಗಂಕಾದು;ದಾನ್ನಿ ಇತರ್ಗಿ ಪಾರೆಸ್ತಾರು.ಅಡ್ಗೆದಾನ್ಗಿ ಸೇವ್ವುಂಡವಾಡು ಇನಿ ಅನ್ನಾಡು.