13 ^{1 2 3} 1.ಅದೇ ಸಮಯಂಲಾ ಕೆಲವ್ಳು ಆತುಡ ದೇಗ್ಗರುoಡ್ಡಿ-ಪಿಲಾತುಡು ಗಲಿಲಾಯಂವಾಳ ರಕ್ತಂನಿ ವಾಳು ಇಚ್ಚ ಬಲಿಲಾ ಸಂಗಡ ಬೆರಚ್ಚಿನಾಡುಅನಿ ಆತುಡ್ಗಿ ತಿಳ್ಬಿಚ್ನಾಳು. 2.ದಾನ್ಗೆ ಆತುಡು ವಾಳ್ಗಿ -ಆ ಗಲಿಲಾಯಂವಾಳು ಅಟ್ಟಕೊಲೇನಿ ಅನುಭವಿಚ್ನoದ್ಗು ವಾಲ್ನಿ ಅಂತಾ ಗಲಿಲಾಯಂವಾಳ್ಗಿoತ್ತ ಪಾಪಿಷ್ಟಾಲನಿ ಭಾವಿಸ್ತಾಳೋ? 3.ಅಟ್ಟೆ ಭಾವಿಚ್ಗುಡ್ದಾನಿ ಮೀಕಿ ಸೋಪ್ತಾನು.ದೇವುಡ ಕಡ್ಗಿ ತಿರ್ರಿಕ್ಕಬಾತೆ ಮಿಲಂದ್ರೂ ಅಟೀ ಪಾಡೇಪಾತಾರು. ^{4 5} 4.ಲೇದೆ ಸಿಲೊವಾಮಿಲಾ ಬುರುಜುಪೊಡಿ ಸಚ್ನಾ ಆ ಪದ್ದೆನoಮ್ಡಿ ಮಂದಿಯು ಯೆರುಸಲೋಮಿಲಾ ವಾಸಂಉಂಡ್ನಾ ಅಂತಾ ಮನುಷ್ಯಲ್ಗಿಂತಾನು ಅಪರಾಧಿಲನಿ ಭಾವಿಸ್ತಾರೋ? ಅಟ್ಟ ಕಾದು ಅನಿ ಮೀಕಿ ಸೋಪ್ತಾನು. 5.ದೇವುಡ ಕಡ್ಗಿ ತಿರ್ರಿಕ್ಕಬಾತೆ ಮಿಲಂದ್ರೂ ದಾನಂತ್ತೆ ಪಾಡೇಪಾತಾರು ಅನಿ ಸೋಪ್ನಾಡು. ^{6 7} 6.ಆ ಪೈನ ಆತುಡು ಊಕ ಸಾಮ್ಯಮ್ನಿ ಸೋಪ್ಪಿನಾಡು.-ಅದೆಮಂಟ್ಟೆ ಒಕ್ಕಾದೊಕ್ಕಡ್ಡು ತನ್ನ ದ್ರಾಕ್ಷೆಯ ತೋಟ್ಲಾ ಒಕ್ಕ ಅಂಜೂರo ಸೆಟ್ಟ್ನೀನೆಟ್ಬಿಚ್ನಾಡು.ತರುವಾಯo ವಾಡು ದಾನ್ಲಾ ಪೊಂಡ್ನಿ ಹುಡ್ಕತ್ತಾ ವಚ್ನಾನು,ಸಿಕ್ಲೇದು. 7.ಬಳಿಕವಾಡು ತೋಟo ಸೇಸೆವಾಡ್ಗಿ -ಸೂಡಿ,ನೀನು ಮೂಡೇoಡ್ಲನಿಂಕಾನು ಈ ಅಂಜೂರಮ ಮಾನ್ಲಾ ಪೊಂಡ್ನಿ ಹುಡ್ಕತಾ ವಚ್ಚಿನಾನು;ಆಯ್ನು ನಾಕಿ ಸಿಕ್ಲೇದು.ದೀನ್ನಿ ನರ್ಕಿಯೆಯ್ಯಿ;ದೀನ್ನಿಂಕ ಭೂಮಿಎಂದ್ಗೂ ಬಂಜೆಕಾವಾಲ ಅನಿ ಸೋಪ್ನಾಡು. ^{8 9} 8.ಆಯ್ತೆ ತ್ವಾಟಸೇಸೆವಾಡು ಅಯ್ಯೋ, ಈ ವರ್ಷಮು ದೀನ್ನಿ ಉಡಿ;ಅಂತಿಟ್ಲಾ ನೀನು ದೀನ್ನ ಸುತ್ಲೂ ಅಗ್ಸಿ ಗೊಬ್ಬರಂಎಸ್ತಾನು; 9.ಮುಂದ್ರ ಪೊಂಡ್ಲುಉಡ್ಸತೆ ಸರಿ;ಲೆಗಬತೆ ದೀನ್ನಿ ನರ್ಕಿಎಯ್ಯಬಹುದು ಅನಿ ಉತ್ತರಂಇಚ್ಚಾಡು. ^{10 11} 10.ಒಕ್ಕಾನೋಕ್ಕ ಸಬ್ಬತ್ ದಿನಂಲಾ ಆತುಡು ಒಕ್ಕ ಸಭಾಮಂದಿರಂಲೊಗ ಉಪದೇಶಂಸೇಸ್ತಾ ಉನ್ನಾಡು. 11.ಆನ ಪದ್ದೆನoದ್ದಿ ವರ್ಷಾಲ್ನಿoಕ್ಕ ದೈಮುಕೊಟ್ಟಿ ಪೈಲಾರೋಗಮುಂಡ ಒಕ್ಕ ಸ್ತ್ರಿ ಉಂಡ್ಡಿoದ್ದಿ.ಅದಿಯು ನಡ್ಮುವಂಗ್ಗಿಪಾಯಿ ಕೊಂಚ್ಚಮೈನಾ ಪೈನ್ನಿ ಪೈಕಿ ಎತ್ತಕಾಗುನ್ನ ಉಂಡ್ಡಿoದ್ದಿ. ^{12 13 14} 12.ಯೇಸು ದಾನ್ಗಿ ಸೂಸಿ ದೇಗ್ಗರ್ಗಿ ಪಿಲ್ಚಿ ದಾನ್ಗಿ-ಅಮ್ಮಾ,ನೀಕಿ ರೋಗಂ ಬಿಡುಗಡೆಆಯಾ ಅನಿಸೋಪ್ಪಿ ದಾನಪೈನಾ ತನ್ನ ಸೈಪೆಟ್ಟಿನಾಡು; 13.ಪೆಟ್ನಾಕೂಡ್ಲೇ ಅದಿ ನೆಟ್ಟಗಾಯ,ದೇವುಡ್ನೀ ಕೊಂಡಾಡಿoದ್ದಿ. 14.ಆಯ್ತೆ ಆ ಸಭಾಮಂದಿರಂನ ಅಧಿಕಾರಿಯು ನಡ್ಸನ ಸಂಗತಿನ್ನಿ ಸೂಸಿ ಸಬ್ಬತ್ ದಿನಂಲಾ ಯೇಸು ಸ್ವಸ್ಥಂಸೇಸಿಂದ್ದಿಕದ ಅನಿ ರೋಷoಗನಿ ಜನಾಲ್ಗಿ-ಕೆಲ್ಸಂಸೇಸೆದಂಗಿ ಆರು ದಿವಸಾಲು ಉಂಡವ್ವಂತೆ;ಆ ದಿವಸಂಲಾ ವಚ್ಚಿ ವಾಸಿ ಸೇಸ್ಗಂಡ್ಡಿ, ಸಬ್ಬತ್ ದಿನಂಲಾ ಮಾತ್ರ ವದ್ದು ಅನಿ ಸೋಪ್ನಾಡು. ^{15 16} 15.ಆ ಮಾಟ್ನಿ ಇನಿ ಸ್ವಾಮಿಯು ವಾಡ್ಗಿ-ಕಪಟಿಲು ಮೀಳು,ಮೀಲ ಪ್ರತಿಯೋಕ್ಕಡು ಸಬ್ಬತ್ ದಿನಂಲಾ ತನ್ನ ಎದ್ದನೀ ಕಾನಿ ಗಾಡ್ದಿನ್ನಿಕಾನಿ ಗೋದಲಿನ್ನಿಕ ಉಡ್ಸಿ ನುಳು ತಾಗ್ಬಿಚ್ಚೆದಾನ್ಗಿ ಪೊಟ್ಗಾನಿ ಪಾತಾಡುಕಾದೆ. 16.ಆಟ್ಟತೇ ಪದ್ದೆನoದ್ದಿ ವರ್ಷಾಲ ತನ್ಕ ಸೈತಾನುಡು ಕಟ್ಟಿಎಸಿಂದ್ದಿ ಅಬ್ರಹಾಮುಡ ವಂಶಂದ್ದಿ ಆಯ್ನಾ ದೀನ್ನಿ ಸಬ್ಬತ್ ದಿನಂಲಾ ಈ ಕಟ್ಟಿಲೋಗನ್ನಿಂಕ ಉದ್ಬಿಚ್ಚ್ಗುಡ್ದೋ ಅನಿ ಉತ್ತರಂಇಚ್ಚಾಡು. ¹⁷ 17.ಈ ಮಾಟ್ಲಿ ಆತುಡು ಸೋಪ್ಪುತುಂಡಾಗ ಆತುಡ ವಿರೋಧಿಲಂದ್ರು ನಾಚಿಗಂನ್ನಾರು;ಗುಂಪುಕೋಡಿನ ಜನಲಂದ್ರು ಆತುಡ್ನಿಕ್ಕೈತುನ್ನ ಅಂತಾ ಮಹತ್ವಂನ ಕಾರ್ಯಾಲ್ಗಿ ಸತೋಷಂಪಡ್ನಾರು. ^{18 19} 18.ಆತುಡು ಸೋಪ್ಪಿಂದೆಮoಟ್ಟೆ-ದೇವುಡ ರಾಜ್ಯಮು ಯಾವ್ದಾನ್ಗಿ ಹೋಲಿಕೆಆಯ್ಡಿ? 19.ದಾನ್ನಿ ನಾನು ಯಾವ್ದಾನ್ಗಿ ಹೊಲ್ಬಿಚ್ಚುದ್ನು?ಆದಿ ಸಾಸಿವೆಗಿನ್ಜಲ್ಗಿ ಹೋಲಿಕೆಅಯ್ನ್ಡಿ.ಒಕ್ಕ ಮನುಷ್ಯಡು ದಾನ್ನಿ ತಿಸ್ಗಾನ್ನಿಪಾಯಿ ತನ್ನ ತ್ವಾಟಲ ಎಸ್ನಾಡು;ಆದಿ ಪೆರ್ಗಿ ಮಾನಾಯ;ಮಲಿ ಆಕಾಶಂಲಾ ಹಾರಾಡ ಪಕ್ಷಿಲು ದಾನ ಕೊಂಬೆಲಾ ವಾಸಿಸೇಸ್ನಾವು ಅನ್ನಾಡು. ^{20 21} 20.ಆತುಡು ಇಂಕಾ ಸೋಪ್ಪಿoದೇಮoಟ್ಟೆ-ದೇವುಡರಾಜ್ಯಾಮ್ನಿ ನೀನು ಯಾವ್ದಂಗಿ ಹೊಲ್ಬಿಚ್ಚುದ್ನು?ಅದಿ ಪುಲ್ಪುಪಿಂಡಿಗಿ ಹೋಲಿಕೆಆಯ್ನ್ಡಿ. 21.ದಾನ್ನಿ ಒಕ್ಕ ಆಡದಿ ತಿಸ್ಗಾನಿ ಮೂಡುಸೇರು ಪಿಂಡಿಲಾ ಕಲ್ಪಿಪೆಟ್ಟಾಲು ಆ ಪಿಂಡoತಾ ಪುಲ್ಪುಆಯಾ ಅನ್ನಾಡು. ^{22 23 24} 22.ಆತುಡು ಊರೂರ್ಗು ಗ್ರಾಮಗ್ರಾಮನ್ಗು ಪಾಯಿ ಉಪದೇಶಂಸೇಸ್ತಾ ಯೇರುಸಲೆಮ್ಗಿ ಪ್ರಯಾಣoಸೇಸ್ತಾಉಂಟಾಡು. 23.ಆ ಕಾಲಮ್ಲಾ ಒಕ್ಕಡು ಸ್ವಾಮಿ,ರಕ್ಷಣೆಹೊಂದಾವಾಳು ಕೊಂಚಂಜನಲೋ ಅನಿ ಅಡ್ಗಲು ಆತುಡು ವಾಳ್ಗಿ 24.ಇಕ್ಕಟೈನ ವಾಕಲ್ನಿoಕ್ಕ ಲೋಕಿ ಪಾಯೇದಾನ್ಗಿ ಹೆಣಗಾಡoಡ್ಡಿ.ಬಹುಜನo ಲೋಕಿಪಾಯೇದಾನ್ಗಿ ಸೂಸ್ತಾಳು,ಆಯ್ತೆ ವಾಳ್ನಿಕಾಎಲೇ ಅನಿ ಮೀಕಿ ಸೋಪ್ತಾನು. ^{25 26 27} 25.ಇಂಟಯಜಮಾನುಡು ಲೇಸಿಕದಏಸಿಗಾನ್ನಪೈನಾ ಮೀಳುಅತರ್ಗೆ ನಿಲ್ಚಗಾನಿ ವಾಕ್ಲಿತಟ್ಟಿ-ಸ್ವಾಮಿ,ಮಾಕಿತೆರಂಡ್ಡಿ ಅನಿ ಸೋಪ್ಪೆದಾನ್ಗಿ ತೊಡ್ಗೆನಪ್ಡು ವಾಡು-ಮೀಳು ಯಾನೋಳೋ?ಮೀ ಗುರ್ತು ನಾಕ್ಲೆದು ಅನ್ನಾಡು. 26.ದಾನ್ಗೆ ಮೀಳು ನೀ ಸನ್ನಿಧಿಲಾ ಮಾಮು ಊಟಂಸೇಸ್ನಾಮು,ತಾಗ್ನಾಮು,ಮಾ ಈದ್ಲಾ ಮೀ ಉಪದೇಶಂಸೇಯ್ಯೊಂಡ್ಡಿ ಅನಿ ಸೊಪ್ಪೇದಾನ್ಗಿ ತೊಡಗ್ಗoಡ್ಡಿ; 27.ಆಯ್ತೆ ವಾಡು-ಮೀಳು ಯಾನೋಳೋ ಮೀ ಗುರ್ತು ನಾಕ್ಲೆದು;ಅಧರ್ಮಸೆಸ ಮೀಳoದ್ರು ನಾ ಕಡೆನ್ನಿಂಕ ಎಲ್ಲಿಪೊಂಡ್ಡಿ ಅನಿ ಮೀಕಿ ಸೋಪ್ತಾನು ಅoಟಾಡು. ^{28 29 30} 28.ಅಬ್ರಹಾಮ ಇಸಾಕ ಯಾಕೋಬ ಊಳು ಮಲಿ ಅಂತಾ ಪ್ರವಾದಿಲ ದೇವುಡರಾಜ್ಯಮ್ಲಾ ಉನ್ನದಾನ್ನಿ ಮಿಮ್ಮಲ್ನಿ ಮಾತ್ರ ಇತರ್ಗಿ ಎಸೆದಾನ್ನಿ ಮೀಳು ಸೂಸಪ್ದು ಮೀಕಿ ಗೋಳಾಟಮು ಕಟಕಟನೆ ಪೊಂದ್ಲು ಕೊರ್ಕೆದಿ ಉಂಟಾವಿ. 29.ಇದೆದಾಗುಂಡ ಪೂರ್ವ ಪಶ್ಚಿಮ ಉತ್ತರಂ ದಕ್ಷಿಣo ದಿಕ್ಕುಲ್ನಿಕಾನು ಜನಲು ವಚ್ಚಿ ದೇವುಡ ರಾಜ್ಯಂಲ ಊಟಾನ್ಗಿ ಕುಚ್ಚಂಟಾರು. 30.ಇನೋ,ಕಡೆವಾಲೈನ ಕೆಲವ್ಳು ಮಾದ್ಲಿನ ವಾಲೈತಾಳು;ಮೊದ್ಲವಾಳು ಕೆಲವ್ಳು ಕದೆವಾಲೈತಾಳು ಅನ್ನಾಡು., ^{31 32 33} 31.ಅದೇ ಗಳಿಗೆಲಾ ಕೆಲವುಮಂದಿ ಫರಿಸಾಯಲು ದೇಗ್ಗರವಚ್ಚಿ ಆತುಡ್ಗಿ-ನುವ್ವ ಇನ್ನಿಂಕ ಎಲ್ಲಿಪೋ,ಹೇರೋದುಡು ನಿನ್ನಿ ಸಂಪಾಲoಕುನ್ನಾಡು ಅನಿ ಸೋಪ್ಪಾಲು ಆತುಡು ವಾಳ್ಗಿ - 32.ಮೀಳು ಪಾಯಿ ಇನೋ ನೀನು ಈ ಪದ್ದು ರೇಪು ದೈಯ್ಯಲ್ನಿ ಉಡ್ಬಿಸ್ತಾ ರೋಗಾಲ್ನಿ ವಾಸಿ ಸೇಸ್ತಾ ಉಂಡಿ ಮೂಡ್ನೆ ದಿನಂಲಾ ಸಿದ್ದಿಗಿ ವಸ್ತಾನು ಅನಿ ಆ ನಕ್ಕಗಿ ಸೊಪ್ಪಂಡಿ. 33.ಎಟ್ಟೋ ನೀನು ಈ ಪದ್ದು ರೇಪು ದಾನ್ರೇಪು ಸಂಚಾರಂಸೇಯ್ಯಾಲ;ಪ್ರವಾದಿಆಯ್ನಾವಾಡು ಯೆರುಸಲೆಮ್ಲಾನೇ ಹೊರತು ಬೇರೆ ಪಟ್ಟಣಂಲಾ ಸಂಪ್ಪೆಗೂಡ್ದಂತ್ತೆ. ^{34 35} 34.ಯೆರುಸಲೇಮೇ ,ಯೆರುಸಲೇಮೇ,ಪ್ರವಾದಿಲಾ ಪ್ರಾಣಂತೀಸೇದೆ,ದೇವುಡು ನೀ ದೇಗ್ಗರ್ಗಿ ಅಂಪಿಚ್ಚಿಚ್ಚಿನವಾಡ್ನಿ ರಾಯ್ಪಾರೆಸಿ ಸಂಪ್ಪೆದೆ,ಕೋಡಿ ತನ್ನ ಪಿಲುಲುನ್ನಿ ರೆಕ್ಕೆಲಾ ಕಿಂದ ಕೂದ್ಬಿಚ್ಚ್ಗಟ್ಲ ನೀ ಬಿಡ್ದಲ್ನಿ ಕೂಡಿಚ್ಚಿದಾನ್ಗಿ ನಾಕಿ ಎಂತೋ ಸಾರಿ ಮನ್ಸುoಡ್ಡೆ;ಆಯ್ತೆ ಮೀಕಿ ಮನ್ಸಲೇಗುಂಡ ಪಾಯೇ. 35.ಸೂಡoಡ್ಡಿ,ಮೀ ಆಲಯಮು ಮೀಕಿ ಬರೀದoಗ್ಗ ಉಡ್ಸಿoದ್ದಿ.ಕರ್ತುಡ ಪೆರ್ಲಾ ವಚ್ಚವಾಡ್ಗಿ ಆಶೀರ್ವಾದ ಅನಿ ಮೀಳು ಸೋಪ್ಪ ತನ್ಕ ಮೀಳು ನನ್ನಿ ಸೋಸನೆಲೇದನಿ ಮೀಕಿ ಸೋಪ್ತಾನು ಅನ್ನಾಡು.