1 ¹ ದೇವುಡ ಚಿತ್ತನುಸಾರಾಮ್ ಮೈನಾ ಆಪೋಸ್ತಲ ಮೈನಾ ಪೌಲುಡು ಸಹೊದರ್ಲು ಮೈನಾ ತಿಮೊತಿಯೋಡು. ² ಕೊಲೋಸ್ಸಯ್ಲ ಕೊ೦ಚಾಮ್ ದೇವುಡ ಜನಲ್ ಕೀ ರಾಸೇಯೇಮಂಟೆ ಮಾಟ್ರೀ೦ಡ್ರಿ ಆಯ್ನ ದೆವುಡಿಂಚಿ ಕೃಪಾ ಶಾಂತಿ ಕಾನೀ. ³ / ಕ್ರಿಸ್ತ ಯೇಸುಡು ಮೀಳು ಪೆಟ್ಟನ್ನ ನಂಬಿಕೆ ವಿಷಯಮ್ ಮಾಯ್ಯಿ ದೇವ ಜನಲು ಮಿಂದ ಮೀ ಪ್ರೀತಿಯ ವಿಷಯಂ ಮಿಯ್ಯೀ. ⁴ / ಮಾಮು ಇನೀ ಪರಲೋಕಮು ಮೀಕೊಸ್ಕರಮು ಸಿದ್ದ ಮೈನಾ ಮಾಹ ಪದವಿನಿ ನೆನೆಪಿಚ್ಕೊನಿ. ⁵ / ಮಾಮು ಪ್ರಾರ್ಥನೆ ಸೇಸ್ ನೀ ಅಪ್ ಡಲಾ ಮೀ ನಿಮಿತ್ತಂ ಮಯ್ಯಿ ತಂಡ್ರಿ ಆಯ್ನಾ ದೇವುಡ ಕೀ ಸ್ತೋತ್ರಂ ಸೇಸ್ತಾಮು. ⁶ /ಮೀಳು ದೇವುಡ ಕೃಪಾ ನೀ ಕುರೀಚ್ಚಿನೀ ಇನಿ ತಿಳುಚ್ಕೊನೀ ದಿವಸಂ ನಿ೦ಚಿ ಆ ಸುವಾರ್ತ ಮೀಲ ಫಲಮ್ಮೀಂಚಿ ವೃದ್ದಿ ಆಯ್ನ್ ಓಚ್ನಾಟ ಪ್ರಕರಮು ಲೋಕಾಮುಲಾ ಅಭೀ ಫಲಮೀಚ್ಚೀ ವೃದ್ದಿ ಆಯ್ತು ವಾಸ್ತುಮೀ. ⁷ / ಪ್ರಿಯಾ ದಾಸು ಪೈನಾ ಯಡಪ್ರಮ್ನ್ ನಿ೦ಚಿ ಆ ಸತ್ಯ ಉಪದೆಶನೀ ನೆಚ್ಕೊತ್ನೀ. ⁸ / ವಾಡು ಮೀಕೊಸ್ಕರಮು ಕ್ರಿಸ್ತಡು ನಂಬಿಕೆ ಗೊಸ್ಕರಮು ಮೈನಾ ಸೇವಕುಡು ಪವಿತ್ರಾತ್ಮ ಪ್ರೇರಿತ ಮೈನಾ ಮೀ ಪ್ರೀತಿ ವಿಷಯಾಂ ಲಾ ನಾಕಿ ತಿಳಿಯ ಪಡಿವಿಂಚಿ ವಾಡೆ. ⁹ / ಅಂದುಗು ಮಾಮು ಮೀ ಸುದ್ದಿನೀ ಇನ್ನೇ ದಿವಸಂ ನಿ೦ಚಿ ನೀಕೊಸ್ಕರಮು ಪ್ರಾರ್ಥನೇ ಸೇಸೆದಾನಿ ಇಸ್ಪೆಡದನೇ ಮೀಳು ಸಕಲ ಆತ್ಮೀಯ ಜ್ಞಾನಾನೀ ಗ್ರಹಿಕೆನೀ ಹೊಂದಿ. ¹⁰ / ಕರ್ತುಡ ಚಿತ್ತ ಮೈನಾ ತಿಳುವಳಿ ಮಿಂಚಿ ನಿ೦ಟ್ಟೋ೦ದೊನೀ ಯೇಸು ಕೀ ಯೋಗ್ಯ ಲಯ್ಯಿ ನೆದೆಸ್ಕೊನೀ ಎಲ್ಲಾ ವಿಧಾಮ್ ಯೇಸುನೀ ಸಂತೋಷ ಪಡಿಚೋಲ್ ಆಯು೦ದಾಲನೀ ಮೀಳು ಸಕಲ ಸ್ಕೊರ್ಯಂ ಅನೀ ಫಲನೀ ಇಚ್ಚಿ ದೇವಾ ಜ್ಞಾನಮ್ ನಿ೦ಚಿ ಅಭಿವೃದ್ದಿ ಆಯ್ ತಾಳಾನೀ. ¹¹ / ಯೇಸು ಮಹಿಮ ಶಕ್ತಿಯಾ ಪ್ರಾಕಾರ೦ ಪರಿಪೂರ್ಣ ಬಲಂ ಹೊಂದಿ ಬಲಿಪ್ಪಲೈ ಆನಂದ ಪೂರ್ವಕ ಮೈನಾ ತಾಳೆನೀ ಧೀರ್ಘಶಾಂತಿನೀ ಯಪ್ಪುಡು ಸುಬಿಚ್ಚೀಳ್ ಆಯು೦ಡಾಲಾನೀ. ¹² / ಎಲಿಪನ ರಾಜ್ಯಾಂ ಲೋಕ ದೇವ ಜನಲು ಬಾದ್ಯತಲ ಪಾಲುಗಾರ ಲೈಕಿ ಮೀಮಾಲ್ ನೀ ಯೋಗ್ಯ ಲಯ್ಯಿ ಸೇಸ್ತಾನುಂಟೆ ತಡ್ರಿಕೀ ಕೃತಜ್ಞತಾ ಸ್ತುತ್ತಿನೀ ಸೈಯಂ ಪೊಳ್ ಕಾವಾಲಾನೀ ದೇವುಡ ನೀ ಆಡಿ ಕು೦ಟಾಮ್. ¹³ / ದೇವುಡ ಮಮುಲ್ನಿ ಅಂದಕಾರ ದೊರೆಥನಮಿ೦ಚ ಇಡಿಮಿ೦ಚೆ ಪ್ರಿಯಾ ಕುಮಾರು ಮೈನಾ ರಾಜ್ಯಂಲಾಗ ಸೊಂಪೀ0ಚೆ. ¹⁴ / ಆ ಕುಮಾರುಡ್ಲ್ ಮಾ ಪಾಪಲು ಪರಿಹಾರ ಮೈಯ್ಯಿ ಮಾಕೀ ಬಿಡುಗಡೆ ಆಯಾ . ¹⁵ / ಯೇಸು ಅದೃಷ ಮೈನಾ ದೇವುಡ ಪ್ರತಿರೂಪಮು ಸೃಷ್ಟಿಕ್ಕೆಲ್ಲಾ ಶ್ರೇಷ್ಠ ಪುತ್ರುಡು ಸ್ತಾನಾ ವೊಂದಿನೋ೦ಟೂಡು ಆಯ್ ನಾಡು. ¹⁶ / ಭೂ ಪರಲೋಕಂ ವು೦ಡ ದೃಷ್ಯ ದೃಷ್ಯ ಮೈನಾ ಎಲ್ಲಾ ನೀ ಸಿಂಹಾಸನ ಮ್ಮೂಲ ಕಾನೀ ಪ್ರಭುತ್ತ್ವಮುಲ ಕಾನೀ ಯೇಸುಲ ಸೃಷ್ಟಿ೦ಚಲಪ್ಟ್ಟೆ. ¹⁷ / ಯೇಸು ಎಲ್ಲಾಕು ಮೊದಲು ಉ೦ದೊ ನೋಡ್ ದೇವುಡ ಸಮಸ್ತಾನೀ ಆದಾರಾ ಭೂತುಡು. ¹⁸ / ಸಭೆಯಲ್ಲಿ ದೇಹಾಂತ್ ಯೇಸು ಶಿರಸ್ಸು ದೇವುಡು ಆದೀ ಸಂಭುಕುಡು ಎಲ್ಲಾಲ್ಲಾ ಪ್ರಮುಖ ಮೈನ್ ತಗ ಸೇಚ್ಚೀ ಪೋನೋಳು ನಿ೦ಚಿ ಮೊದ್ಲು ಲೇಸಿ ಒತ್ತನೋಡು. ¹⁹ / ತಂದ್ರಿ ಆಯ್ನ್ ದೇವುಡ ಯೇಸುಲ ಸರ್ವ ಸಂಪೂರ್ಣತೇ ವಾಸ್ ಮೈ ವುನ್ದಲಾನೀ . ²⁰ / ಯೇಸು ಶಿಲುಭೆಯಿಂದ ಸುರಿಬಿಚ್ಚನೆ೦ಟ ರಕ್ತಂ ನಿ೦ಚಿ ಸಮಧನಮು ನೀ ವು೦ಟ ಸೇನೀ ಭೂ ಪರಲೋಕಂಲುಂಡ ಸಮಸ್ತ ಮುನೀ ಯೇಸು ಮೂಲಕಮ್ ಮಾಕಿ ಸಂ ಧಾನಾ ಪಡಿಚಾಲನೀ ನಿಷ್ಕ್ರ್ಷ ಸೇ ಸೆ . ²¹ / ಇದಿ ಕಾಕುಂಡ್ ಮೀಳು ಯಾನಕ ಕಾಲಂ ಅನ್ಯಲು ದುಸ್ತತ್ವಮುನೀ ಸೇಸೋಳು . ²² / ದ್ವೇಷ ಮನಸುಂದೊಳು ಆಯುನ್ತಾನ ಯೇಸು ಮಿಮುಲ ನೀ ಸಹತನ ಕುಮಾರ ಮೂಲ ವು೦ತ್ತಾನ ಮರಣ ಮೂಲಕ ಇಪ್ಪುಡು ಸಂಧಾನಾ ಪಡಿಚ್ಕೊನೀ ಮಲ್ಲಿ ಮಿಮುಲ್ ನೀ ಪರಿಶುದ್ದಲಯ ನಿರ್ದೋಷಿಲಯ್ಯಿ ತನ್ನ ಸಂನಿದಿಲ ನೀಲ್ ಪೆಟ್ಟ ಅನ್ ಕೊನ್ನದು . ²³ / ಮೀಳು ನ೦ಟ್ಟೆ ಸುವಾರ್ತ ಇಂಚ ವು೦ಟೈನಾ ನಿರೀಕ್ಷೆ ನೀ ಇಸ್ಪೆ ಟೀ ತೊಲಗೀ ಪೋದೆನೀ ಅಸ್ತಿವಾರಂ ನಿ೦ಚಿ ಸ್ತಿರ್ ವುಯುಂಡೆ ನಂಬಿಕೆಲ ನೆಲೆ ಗೊಂದೊಳು ಆಯ್ವುತೆ ಆ ಪದವಿ ಮೀಕೀ ಪ್ರಾಪ್ತ ಮೈತಾದೀ . ²⁴ / ಪಾಲು ದೇನೇ ನೂವು ಕೀ ಸುವಾರ್ತ ಸೇವುಕು ಪೈಕೀ ನೂವು ಇಪ್ಪುಡು ಮೀ ಕೊಸ್ಕರಮು ಅನುಭವೀ ಸ್ತಾಂಗ ಬಾದೆಲ ಸಂತೋಷಮು ಕಟ್ಟಿ ಕ್ರಿಸ್ತ ಸಂಕ ತಂ ವಾಂಗ ಎಂಕ ಬದುಕೊ೦ ಡ ದಾನೀ ಸಭೆನೀ ದೇಹಕೊಸ್ಕರಮು ನಾ ಶರೀರಂ ಅನುಭವಿಚ್ಚ ತಿರಿವಿಸ್ತಾನು. ²⁵ /ನೂವು ಸಭೆಗೆ ಸೇವಕು ಪಿನಾನು ದೇವುಡ ತನ ವಾಕ್ಯಂ ನೀ ಸಂಪೂರ್ಣ ಮೈ ನೀ ತಿಳುವೀಚ್ಚಿ ಕೆಲಸಂ ನೀ ಪ್ರಯಜನಕೊಸ್ಕರ್ಮ್ ನಾಕೀ ದಾಯಪಾಲಿಂಚಿ . ²⁶ / ಆ ವಾಕ್ಯಮು ಯನ್ನಕ ಯುಗಲ್ ನಿ೦ಚಿನು ತಳತಲಾನರಲು ನಿ೦ಚಿನು ಮರೆ ಆಯುಂಡೆ ಈ ಕಾಲಂ ಲಾ ದೇವ ಜನಲ್ ಕೀ ತಿಳಿ ಬಿಚ್ಚ್ಜನು ಪಟ್ಟೆ . ²⁷ / ಅನ್ಯ ಜನಲು ವಿಷಯಂ ಮೈನಾ ಈ ಮಾರ್ಮು ಮಹಿಮ ಅತಿಶಯಮು ಎನ್ಥದಾನೀ ದೇವುಡು ತನ್ನ ಜನಲ್ ಕೀ ತಿಲಿವಿಚ್ಚಲ್ ಕೀ ಮನಸ್ಸು ಸೇಸ್ ಕೊನೆ ಈ ಮಾರ್ಮು ಏಮಂಟೆ ಕ್ರಿಸ್ತ ಡು ಮೀಳಾ ವು೦ಡಿ ಪ್ರಭುವ ನೀರಿಕ್ಷೆಕೀ ಆಧಾರ ಭುತುಡು ಆಯುಡದೇ. ²⁸ / ಮಾಮು ಯೇಸುನೇ ಪ್ರಸಿದ್ದಿ ಪಡಿಚಾಲನೀ ಈ ಸಕಲ ಜನಲ್ ಕೀ ಭುದ್ದಿ ಸೋಪತ್ತ್ ಪೂರ್ಣ ಜ್ಞಾನಮ್ ಮುನಿ ಉಪದೆಶಂ ಮುನೀ ಸೇಸ್ತ ದೇವುಡ ಅಂದ್ರು ನೀ ಕ್ರಿಸ್ತುಲೀ ಪ್ರವೀಣ್ ಲೈ ನೀಲ್ ವಿಚ್ಚನ್ ಕೀ ಪ್ರಯತ್ನ್ಮ್ ಸೇಸ್ತಾ ವು೦ಟಾ ಮು ²⁹ / ನೂವು ಕಾರ್ಯ ಸಂದಿಚ್ಚೆ ದೇವುಡ ಬಲಾನೀ ಪ್ರಯೋಗಂ ಸೆಸೆ ದಿನಕೊಸ್ಕರಮು ಹೋರಾಡ ತಾನು ಪ್ರಯಾಸ ಪತ್ತಾನು.