¹ Afuma uko akatonga mhaka isanga la habho, bhaloswa bhake bhakamuatera. ² Na imefike sabato, ebhokie, kulosha hena masinagogi. Bhandu bhengi bhemesikie bhakaitalwa. Bhakaghamba, "Uuabhifunya hii ibhi?" "Na ni hekima ani ii eingiwe uu?" "Na ni kini bhiitalisho ibhi bhibaha bheoho bhihirika hena maghaza makwe?" ³ "Amba uu ni seremala, mwana wakwe Mariam mundu bhabho Yakobo na Yose na Yuda na Simion? Na bhamduabho bhakiche bhesiwaha hetu?" Bhakabibha msadara hakwe Yesu. ⁴ Yesu akabhabhura, "Mroti esisobha nganyi, esibho hena isanga lakwe mwenye, na hena bhandu bha mbare yakwe,na ya kaa yabho." ⁵ Hata esiindime kuhira maitalisho momose uko, esibho ebhabhikie maghaza makwe wanga ya bhawaji bhadori akabhadindija. ⁶ Akaitalwa hena wanga yabho bhesimuing'idaki . Akajunguluka hena bhila bhinghongo ekilosha. ⁷ Akabhaitanga bhala ikumi na bheeri akaazerija, bheeri, bheeri, akabhainga nzinya wanga ya mbepo mbibhi, ⁸ akabhabhura bhasile chochose zieni, mbai na bhila bhabho: hesina ibumunda, kana ibene, kana bhibala bhena lucholo, ⁹ kake mdoke bhiratu, na msidoke maseto meri. ¹⁰ Akabhabhura,"Handu hohose mneingia hena nyumba ikaeni aho mtano mari mnefuma aho handu. ¹¹ Handu hala mwa siorwa kana kusikijwa, fumeni aho handu, kukundeni purughushe aho sii ya maghu menyu maoke ushuhuda habho." ¹² Bhakatonga bhakachilia bhandu bhashighe ng'oki. ¹³ Bhakangola mbepo fuanda, bhakabhira bhawaji bhengi mafuta bhakabhadindija. ¹⁴ Mfumwa Herode akasikia mburi, iti Yesu' izina lakwe latisibhikana hose. Bhengi bhakaghamba, "Yohana Mbatizaji akuruka hena kifwa amu nzinya ja maitalisho jioho ndeni hakwe.'' ¹⁵ Bhengi bhakaghamba, "Ni Eliya." Na bhengi bhakaghamba, "Ni mroti, bhengi bhakaghamba ni m'mwezu wa bha roti." ¹⁶ Kake Herode emesikie akaghamba, ''Yohana, ula ni mchuie mutwi, akuruka". Amu Herode mwenye eoikie etumie bhandu bhakamgura Yohana akachugwa jela hena wanga yakwe Herodia (mche wakwe Filipo mche wa mundu wabho) amu emuuhie. ¹⁸ Amu Yohana embhurie Herode, "Esichedi kumhoja mche wa mndwabho". ¹⁹ Naye Herodia akaoka na bhuring'a naye iti amkome, kake akaremwa, ²⁰ amu Herode emuituke Yohana; emaije iti mundu wa kididi na ezerie, akamrinda. Akamsikija akakusara mno, naye eokie ekimskija hena kuizirihiwa. ²¹ Na umefumie msi uinare Herode msi wakwe m'baha wa kubhoneka kwake emebhahirie ngasu bhabaha bhake, na majemedari, na bharongori bha Galilaya. ²² Niho m'mbora wakwe Herodia emeingie akacheza akamuizihija Herode na bhala bheikesi hamwezu naye hena ngasu. Mfumwa akambhura ula m'bora, "Niomba chochose ukundie nami nikuinga." ²³ Akakusesa, "Iti chochose uneniomba, nikuinga, hata nusu ya kifumwa changu." ²⁴ Aho akafuma akambhujanya mee, "Nimbhujanyie kini?'' Mee akambhura, "Mutwi wakwe Yohana Mbatizaji." ²⁵ Naye akaingia nguangu hafuhi na mfumwa akaomba, ikinghamba, "Nikundie unienge iki iki hena mwanje mutwi wakwe Yohana Mbatizaji." ²⁶ Mfumwa akaingiwa ni longa mno, kake hena wanga ya seso jakwe, hena wanga ya bhala bhagheni, bheokie hena ngasu na esikiidima kusua kumwinga. ²⁷ Hubho mfumwa akaazerija bhalong'oni bhakwe bhamuetie mutwi wakwe Yohana. Mrinji akatonga akamchwa mutwi kula jela. ²⁸ Akauete ula mutwi uho hena mwnje akamwinga ula m'mbora, na ula m'mbora akamwinga mee. ²⁹ Na bhalosha bhake, bhakasikia ibhio, bhakaonja muri wakwe bhakaubhika hena mbira. ³⁰ Na bhandumi, bhakatorana hamwe msongorana na Yesu, bhambhura bhindu bhose bhila bhahira na kulosha. ³¹ Akabhabhura, "Izoni uywi tiki kunu mbai,hena itanga msobhoke hadori.'' Amu heena bheengi bhekiza na kutonga, amu heseena ngalo ya kula. ³² Bhakatonga uko hena ngalawa mtana hena itanga bhobhenye. ³³ Bhakabhabhona bhekitongo bheengi bhakabhatisibha, bhakabhadindikia na maghu mtano bhighongo bhose bhakabharongoria. ³⁴ Bhemesee kufuma hena ngalawa bhakabhona mbotu mbaha, akabhabhonia lumoo amu ebhariganyanye na mangonji mesina mrisha. Akabhoka kubhalosha bhindu bhiingi. ³⁵ Maari igheri lime sheshe, bhaloshwa bhakamuatera bhakaghamba, "Aha hena itanga na iki haaswa. ³⁶ Bhaaghanye esa bhatonge heha bhighongo bhabho bhazore kijo chabho bhale." ³⁷ Akabhatalua akabhabhura, ''Bhaingeni kijo bhale." Bhakambhura, "Tutonge turezora mabumwunda ma dinari maghana meri tubhainge bhale?" ³⁸ Akabhabhura, "Mhete mabumwunda amo? Tongeni mreyoa." Bhemetisibhe, bhakaghamba, "Mabumwunda masano na nguluma mbiri." ³⁹ Akabhabhura bhandu bhose bhaikae sii hena mafungu hena mani mabhisi. ⁴⁰ Bhakaika sii hena mafio mafio; mafio ighana na makumi masano. ⁴¹ Akaonja mala mabumunda masano na nguluma mbiri, akayoa wanga, akatasia akabaa lila ibumunda akabhainga bhaloshwa bhake bharehiye ila mbotu. Kabhaghanyia ila nguluma bhose. ⁴² Bhose bhakala bhakaibhuta. ⁴³ Bhakadodola bhihindi bha mabumunda, bhikapu ikumi na bhiri bhiizue, na bhihindi bha nguluma. ⁴⁴ Bheokie bhome bhiku bhisano bhala bhelie mabumunda. ⁴⁵ Akabhabhura bhaloshwa bhake bhaingie hena ngalawa nguangu bhatonge ngaluko ingi, mtano Betsaida, mari ekiaghanya bhala bhandu bhabhotoke. ⁴⁶ Mari bhekitonga, etongie wanga ya ndubhi kuretasa. ⁴⁷ Hekimeswe, na ngalawa yabho yeokie ghati ya ipe, naye eokie mwenye shighati. ⁴⁸ Akabhabhona bheoho bheilimana na kujuta kafi amu ngungu yeokie ikibhashindika. Ebhabhonie kio ekibhazia, ekibhata wanga ya ipe, akakunda kubhabhetia. ⁴⁹ Kake mari bhembhonie eoho etonga wanga ya ipe, bhakaosha iti ni kibhuiri bhakaiya, ⁵⁰ amu bhembhonie bhakaituka. Na ungwangu akabhabhura, "Okeni na ng'iria! nimi ! msiituke!" ⁵¹ Eingie hena ngalawa hamwezu nabho, na ngungu ikazidi kubigha, na bhokie bhaitalwa mno wanga yake. ⁵² Amu bhokie bhesitisibhe wanga ya mabumunda, kake akili jabho jokie mboha kutisibha. ⁵³ Mari bheokie bhakela, bhakafika Genezareti bhakashigha ngalawa. ⁵⁴ Bhemefuma shighati ya ngalawa, aho aho bhakamtwarija ye. ⁵⁵ Na bhakamatuka kujunguluka isanga lose na kubhoka kuete bhawaji hakwe hena bhiraro, bhemesikie iti ehoeza. ⁵⁶ Emeingie hena kighongo, kana shombeni, kana hena isanga, bhakabhika bhawaji hena kichinda, na bhakamsemba iti bhagure lucholo lwa suke yake. Na bhengi bhala bhegurie bhakadinda.