¹ Bhezie kufuma ngaluko ya ipe hena kighongo cha Ungerasi. ² Na ngwangu Yesu ekimefume hena ngalawa, mndu akamziia kufuma ngomeni ena mbepo ya luhungu ikamzia kufumia hena mbira. ³ Uo mndu etue ngomeni. Hesina mundu eidima kumgura, hata hena mnyororo. ⁴ Mari kengi eokio ekichungwa na menya na rachi. Eokie engola minyororo mbai na pingu jikashighirija. Hesina eokie na nzinya ja kumkinda. ⁵ Kiyo na hemsi hena mbira na ndubhini, eiya na kukuchwa na mano mekaehe. ⁶ Ekimembhone Yesu kwa hae, akam'matukia akamguia. ⁷ Akaia na ngori ya wanga, ''Ni kini niidima kukuhiria, Yesu, Mwana wakwe Izubha Wa Wanga? Natekusemba hakwe Izubha mwenye, usiniinyale." ⁸ Mati ereoho eelebha naye, "Fuma hena uu m'ndu, wee mbepo." ⁹ Na akambhujanya, "Izina lako uitangwaze?" Akamtalua, "Izina langu ni Legion, amu toho bhengi." ¹⁰ Akamsemba asibhakinye shighati ya lila isanga. ¹¹ Kake ifio la ngubhe leokie likila ndubhini, ¹² na bhakamsemba, bhakaghamba, "Tuazerije hena ngubhe; shigha tuingie ndeni yabho." ¹³ Akajiazerija; jila ngoma jikatonga jikaingia hena jila ngubhe, jikamatuka jikasea hena ndubhi mtano hena ipe, hafuhi ngubhe bhiku bhiri jikaguia hena ipe. ¹⁴ Na bhala bharisha bha ngubhe bhakasea bhakateta bhose bhila bhi fumie hala shombeni na hena isanga lose. ¹⁵ Bhakaza hakwe Yesu bhakambhona ula m'ndu eena mbepo-ula eokie Legion- eikesi, ekudokanye, ena mtwi wedi, bhakaituka. ¹⁶ Bhala bhebhonie jila ngoma ha ula mundu bhakambhura kila kimfumie hamwe na jila ngubhe. ¹⁷ Bhakabhoka kumsemba afume hena kighongo chabho. ¹⁸ Na mati ekiingia hena ngalawa, ula mundu eena ngoma akabhasemba bhatonge nae. ¹⁹ Kake esuie, kake akambhura, "Tonga kaa hako na ha bhandu bhako, ubhabhure bhundu Mzuri akuhiria, na lula lubhoro akuinga." ²⁰ Iki akatonga akabhoka kuchila mburi jakwe Yesu bhundu emhirie uko Dekapoli, na bhandu bhose bhakaitalwa. ²¹ Na Yesu ekimekele ngaluko mbai ingiwa, hena ngalawa, mbotu ya bhandu bhakamjunguluka, eokie hena kibhambara cha ipe. ²² Na mrongori m'mwezu wa sinagogi, izina lakwe Yairo, akaza, na ekimembhone, akamguia hena maghu. ²³ Akamsemba kandu kengi, akambhura, "m'bora wangu mdori eoho hafuhi kufa. Nakusemba wee,uze um'bhikie manghaza iti enesikia nezo akie." ²⁴ Kwa hubho akatonga nae na mbotu ikamuatera bhakamsisima mbai na mbai jose. ²⁵ Iki heokie na mche ekirua sakame miaka ikumi na miri. ²⁶ Naye elie bhwasi hena bhaghanga bheengi akatagha bhindu bhiose eena. Kake esipatie lughejo, kake hali yake ikaoka mbibhi. ²⁷ Eokie asiikia mburi jakwe Yesu. Akaza kibhebhe mati ereoho ebhata hena mbotu, akakunda iseto lakwe. ²⁸ Ye akaghamba, "Nikakunda suke yakwe tiki, Ni dinda." ²⁹ Na ekimemkunde, kurua kukasia, akakusikija hena mwiri akabhona adinda hena bhula bhwasi. ³⁰ Aho aho Yesu akatwarija iti nzinya jamfuma ndeni yakwe. Akagharukia mbotu akabhujanya, "niani akunda suke jangu?" ³¹ Bhaloshwa bhakaghamba,"uyoiye mbotu ikusisima mbai yako,na ughamba, 'ni ani anikunda?"' ³² Kake Yesu akayoa mbai Jose kubhona ni ani ahira hubho. ³³ Ula mche, ekimemanye kila kimfumie, akaituka na kudedema. Akaza akamguia akambhura kididi chose . ³⁴ Akambhura, "M'bora, luing'idaki lwako lwa kukija. Tonga na mvono na udinde bhuaji bhako." ³⁶ Kake Yesu akimesikia bhundu bhateta, akambhura ula mrongori wa sinagogi, "Usiituke. We ing'idaki." ³⁷ Akasua mundu asimuatere, mbai na Petro, Yakobo, Yohana, mndwabho Yakobo. ³⁸ Bhakaingia nyumbeni ha mrongori wa sinagogi na akabhona kiiyo, ngunga na masoji. ³⁹ Ekimeingie nyumbeni, akabhabhura, "Nize muoho mgera ngunga na nize muoho muia? Mwana esimefa kake eshinjie." ⁴⁰ Bhakamseka, kake ye, akabhafunya bhose shighati, akamuonja bhabhe ula mwana na mee nabhala bheokie hamwe nae, na bhakaza handu ula mwana eokie. ⁴¹ Akambhikia ula mwana maghaza akambhura, "Talika kaum,' Eyo ighamba, "M'bora mdori, nakubhura wee, bhukika." ⁴² M'bora akabhukika ngwangu akabhata (amu eena miaka ikumi na miri). Na aho aho bhakaitalwa pada. ⁴³ Akabhabhura hasirekete emanya ibhi. Akabhabhura bhamwiinge kindu ale.