¹ Mati Yesu ekifuma hekaluni, m'mwe wa bhaloshwa bhake embhurie, "Yoa bhundu ni hedi manoo na mayanda! ² "Akamtalua na kughamba, "Ubhona ama mayanda mabaha lisikashighajike inoo wanga ya inoo elo lisikasazue." ³ Igheri eikesi hena ndubhi ya mzaituni ngaluko ya hekalu, Petero, Yakobo,Johana na Andrea bhakam'bhajanya, Hena ngilibhata, ⁴ "Tubhure bhindu ibho bhineoka rini? Ni kini kinebhonyanya iti bhindu ibho bhiho hafuhi kuhirika?" ⁵ Yesu akabhoka kubhabhura, "Kuyoeni msirekengwe. ⁶ Bheengi bheneza hena izina langu na kughamba, 'Mi niye' nabho bhenekenga bhengi. ⁷ Mkasikia mburi ja ibhoo na boghobogho ja ibhoo, msiitushwe; ibhi bhindu ni lazima bhihirike, kake tiricho isimefike. ⁸ Isanga linebighana na isanga, na kifumwa kinebighana na kifumwa. Heneoka na m'dedemo handu hengi, nanzaa mbaha. Ii ni mibhoko ya lubhabho lwa kubhona. ⁹ Unywi kuyoeni nezo. Bhenemtika hena njama, na mnebighwa hena masinagogi.Mneimushwa msongorana na maliwali nabhafumwa hena wanga yangu, sa ushuhuda wabho. ¹⁰ Kake kitamo ni lazima kichilwe masanga mose. ¹¹ Bhakakugura na kukutika, usiituke kugheshija kila uneteta. Mati amo uneingwa kindu cha kuteta, esiwe uneteta, kake ni Ngoro Msheneto. ¹² Mndu enemwingija mndu wabho akomwe, na papa na mwana wake ni hubho. Mwana bhenebhasua bhala bhebhabhonie na kubhakoma. ¹³ Na unywi mnesuwa ni bhandu bhose wanga ya izina langu. Kake ula enegumiria mhaka tiricho, niye eneokoka. ¹⁴ Kake mkalibhona ighesho la kinyamaro liimuka handu hesiinare, bhala bheho Judea bhamatuke hena ndubhi, ¹⁵ na bhala bheoho wanga ya nyumba bhasisee na kuingia nyumbeni,kana kufunya kindu, ¹⁶ naye eho mtemeni asihunduke kuuha iseto lakwe. ¹⁷ Kake yoko unywi mkuchungie na bhala bheamsha misi iyo! ¹⁸ Taseni bhisifumie mari ma mbeho. ¹⁹ Hena bhundu misi iyo ineoka na bhwasi bhubaha, bhula bhusimeoke too kubhoka, mari Izubha elungie isanga mhaka yoo, mhaka tiricho. ²⁰ Akicha Apa eseduishe bhio ibhio, hesina eye ena muri ekikia, kake hena wanga ya bharedangwa, bhala ebhesaghure, eduishe bhio. ²¹ Iki haketa mndu ekubhura ,"Yoa ,Kristo ewaha! kana 'Yoa Kristo eho kula!, usiing'idaki. ²² Amu heneketa Makristo maongo na bharoti maongo, bheneketa ishara na maitalisho nesa bhaidime kubhakenga, iidimika hata bhala bhesaghurwe. ²³ Iki nywi kuyoeni! Naidibha kubhaaghanya bhose msongorana. ²⁴ Kake misi ila ya bhwasi ikabhetia, nzano inejima, mweji usikang'ole kiangaji, ²⁵ ndondo jinegwa kufuma wanga, na nzinya jila jiho wanga jinededema. ²⁶ Aho bhenembhona mwana wake Izubha ekiza kufuma hena majumbi na nzinya nyingi na utukufu. ²⁷ Niho enebhatuma malaika abhabhunganyanye bhasaghurwa bhake kufuma malubhajo mane, kufuma tiricho ya sii na tiricho ya wanga. ²⁸ Tukuloshe kufuma hena mti wa mtini. Mbande yake ikaoka ngenya na kung'ola mani makenya mutisibha iti igheri la kuhulula lioho hafuhi. ²⁹ Nanywi ahoaho mkabhibhona ibhi bhindu bhibhoka, tisibheni eoho hafuhi, asongeria mbengeni. ³⁰ Kididi, nibhabhura, irika ili lisikabhetie mtano ibhi bhiose bhiringanie. ³¹ Wanga na sii bhinebhetia, kake kiteto changu kisikabhetie. ³² Kake msi na igheri hesina etwarije, hesina wa wanga eye etisibhe,esi malaika kana Mwana, kake Papa. ³³ Yoeni! Okeni meso, amu msitisibhe ilo igheri. ³⁴ Kioho ni sa mndu etonga charo: akashigha kaa yake akabhaazerija bhahiri ndima bhake, kila mndu na ndima yakwe. Akamuazerija mrinji wake aikae meso. ³⁵ Henahubho okeni meso! Amu msimaije igheri mzuri wakaa eneza, iti nichamagheri kana ni kio ghati, kana ni mari ngurubhi idengereka, kana heabho. ³⁶ Akabhaturuka asiremkichije mshinjie. ³⁷ Kila niho nim'bhura unywi, niho nibhabhura bhose: Okeni meso!