¹ Mrisha m'baha ekaghamba mburi ijo nijo jeokie? ² Naye akaghamba, bham'nduwetu na bhapapa bhangu sikijeni: Izubha wa lubhoro emfumie papa wetu Ibrahim mati eokie Mesopotamia, mari esimeikaa Harani, ³ ekambhura fuma hena isanga lako na hena bhandu bhako, utonge hena isanga lila ninekubhonya. ⁴ Niho ekafuma hena isanga lake la bhakaldayo akaikaa Harani, ekatonga uko mari bhabhee emefwe, Izubha ekamsamija m'haka isanga lila muoho muikaa iki. ⁵ Aho esimuingie bhuhoja hata handu ha kubhika kughu. Akamtemia iti enemuinga ioke bhuitori bhwake na mkuju wakwe kake igheri ilo eseokie na mwana. ⁶ Izubha akateta hubhu, iti kibajiko chake kineoka bhagheni hena isanga la bhandu bhengi, na bheneoka bhazoro bhabho, na bhenebhahiria mabhibhi hena igheri la miaka maghana mane. ⁷ Na lila isanga linebhaketa bhazoro ninebhabigha mi; ekaghamba Izubha. Ade aho bhakafuma bhenenitasa handu aha. ⁸ Akamwinga Ibrahimu aghanyo la kitabhani, ade Ibrahim akambhona Isaka, akamtabhana msi wa kanane. Isaka akambhona Jakobo, Jakobo akabhona bhala ikumi na bheri, ebho ni bhapapa bhetu. ⁹ Bhala bhapapa bhakambhonia lung'wara Yusufu, bhakamtagha Misri, kake Izubha akaoka hamwe naye. ¹⁰ Akamng'ola hena bhwasi bhwake bhose ekamuinga luidimo na hekima msongorano hake Farao mfumwa wa Misri. Farao akamketa muitori wa Misri na kaa yake yose. ¹¹ Ade hekaoka na nzaa isanga lose la Misri na Kanani na bhwasi bhubaha, kake bhapapa bhetu bhesipatie kijo cha kubharingania. ¹² Jakobo ekimesikie iti uko Misri hena mshee ekabhatuma bhapapa bhetu ndekero ya kubhoka. ¹³ Hata charo cha keri, Yusufu akakutwarijisha ha bhamndwabho .Kaa yabho Yusufu ikatisibhwa ni Farao. ¹⁴ Yusufu akatuma bhandu bhamuitange Jakobo bhabhee na kaa yabho yose bhandu makumi mafungate na bhasano bhaze Misri. ¹⁵ Ade Jakobo akasea mtano Misri na akasobheka ye na bhapapa bhetu. ¹⁶ Bhekatikwa mhaka Shekem bhekajikwa hena mbira ila eyo Ibrahim ezorie hena ifungu la mabengele ha bhana bhake Hamori uko Shekem. ¹⁷ Mati mala kiaze kila Izubha emuingie Ibrahim kikisongeria bhala bhandu bhakaongejika mno uko Misri. ¹⁸ Hakaketa mfumwa ungi wa Misri eye esem'maije Yusufu. ¹⁹ Uu mfumwa eeleje mbare yetu akabhainyale bhapapa bhetu, akabhaketa bhabhirite njaghagha esa bhaoke moo. ²⁰ Igheri ilo akabhoneka Musa, naye eokie wedi mno msongorana hake Mzuri, akarerwa mieji mitatu ha ianda la bhabhee. ²¹ Hata ekinabhiritwe, mwana wakwe Farao wa kiche akam'onja, akamrera sa mwana wakwe. ²² Musa akaloshwa hekima yose ya bhamisiri; akaoka long'oni lwa bhiteto na mihiro. ²³ Ekimefike miaka makumi maane, ekabhariria ngoroni hakwe kutonga kurebhona bhamndwabho bhana bha israeli. ²⁴ Ekabhona m'mwe wabho ekiinyalwa, Musa ekamkania na ekamuihijia kisasi ula ekiinyalwa hena kum'bigha m'misiri: ²⁵ egheshijie bhamndwabho bhenetwarija iti Izubha eho ebhakombola kubhetia hena mikono yakwe,kake bhesitwarije. ²⁶ Yabho lakwe ekabhatumukia bhaisraeli bhekikanana; ekakunda bhaarehiane; ekaghamba, 'Bhapapa, mubhamwe; nize m'bighana?' ²⁷ Kake ula eye emsimbie mghenji ekamrukumanya mbai, na ekaghamba, 'Niani akubhika mrongori na mchwa mburi ghati yetu? ²⁸ Utekundie kunikoma sabhundu umkomie ula m'misiri ibhuo?' ²⁹ Musa ekamatuka ekinasikie hubho; ekaoka mgheni hena isanga la Midian, ekabhona bhana bheeri. ³⁰ Miaka makumi maane imebhetie, malaika ekamfumiria hena ngarighashi ya Ndubhi ya Sinai hena lubherebhere lwa moto hena izungo. ³¹ Musa ekinaubhone moto, ekaitalwa mabhono mala na ekasongeria nesa ayoe. Ngori ya Mzuri ikamziia, ³² ''Mii ni Izubha wa bhapapa bhako , Izubha wa Ibrahim na Izubha wa Jakobo.'' Musa akadedema, esikarie kuyoa. ³³ Mzuri akambhura, ''Ng'ola bhiratu maghuni hako amu handu aha uimuke ni isanga litasiwe. ³⁴ Kididi nabhona bhwasi bhwa bhandu bhangu uko Misri; nasikia kiiyo chabho nami nasea esa nibhakombole. Iki nikutuma mhaka Misri .'' ³⁵ Musa uo eye bhemsuie bhekighamba, 'Ni ani ekuoshie mrongori na mchwa mburi?' niye atumwa ni Izubha kuoka mrongori na mkija kubhetia ha mkono wa ula malaika efumie hena lila izungo. ³⁶ Uo niye ebhang'olie Misri ekihira maitalisho na ishara, na hena ipe la Shamu,na hena ngarighashi hena miaka makumi mane. ³⁷ Uo Musa niye ebhabhurie bhaisraeli, 'Apa Mzuri wenyu ebhabhushijia mroti hena bham'ndwenyu sami, msikijeni ye.' ³⁸ Yee ni ye etetiye na ula malaika kula ngarighashi hena ndubhi ya Sinai, na eokie na bhapapa bhetu; niye eonjie kiteto cha lukio atuinga uswi. ³⁹ Mndu uu niye papa bhetu bhesuiye kumsikija, bhakamshindika hae na hena ngoro jabho bhakahunduka Misri. ⁴⁰ Bhakambhura Haruni , 'Tuharehie izubha wa kuturongoria amu uo Musa etung'olie hena isanga letu la Misri tusimaije kila champata.' ⁴¹ Bhekaareha ndama misii iyo, bhekaete masho hena fwana ya kindu kila, bhakaizirihihwa ni ndima ya mikono yabho. ⁴² Aho Izubha akareghija na akabhashigha bhaabudu ndondo ja wanga sa bhundu itamiwe hena kitamo cha bharoti. 'Adohio, muning'olie mi masho na sadaka miaka makumi mane hena ngarighashi bhandu bha Israel?' ⁴³ Nywi muuhie ihema la Moleki, na ndondo ja izubha wenyu Refani na fwana jila muharehe esa mujiabudu: 'Nami ninemuazerija mtonge hae kulela Babeli.' ⁴⁴ Lila ihema la bhuleli leokie hamwe na bhapapa bhetu uko ngarighashi sabhundu ebhabhurie mati etetie na Musa, iti aoke ehira sa bhundu ebhonyiwe. ⁴⁵ Ili nilo ihema elo bhapapa bhetu, bheuhiane na kuliingija na Joshua hena teri ya bhuitori bhwa masanga mala emo Izubha ebhakinyie msongorana ha bhapapa bhabho mhaka misi yake Daudi, ⁴⁶ eye eingiwe neema msongorana ha Izubha, akam'bhura aarehe ianda lakwe Izubha wake Jakobo. ⁴⁷ Metake Solomon em'arehie Izubha iyanda. ⁴⁸ Kake Ula Eho Wanga esinaikaa hena maianda meharehwe na mikono;sabhundu etetie mroti, ⁴⁹ 'Wanga ni kiringo changu na sii nikichumbi cha kubhikia maghu mangu. Iki ni iyanda ani muidima kuniharehia?' eghambie Mzuri. kana ni handu ani ninesobhoka? ⁵⁰ Kana kari ni mikono yangu iharehe bhindu ibhi bhose?' ⁵¹ Unywi bhenye singo idindie na msitabhanwe ngoro kana masikio,misi yose muoho mumsua Ngoro Msheneto sa bhundu bhapapa bhenyu bhehirie, naywi ni hubhohubho. ⁵² Ni uhi hena bharoti eye bhapapa bhenyu bhesimreghijishe?Bhebhakomie bhala bherotie mburi ja kuza kwake ula wa Kididi, eye unywi mwaoka bhalinganya bhakwe na kumkoma, ⁵³ nywi muuhie torati hena maazerijo ma malaika, kake msiigurie. ⁵⁴ Bhanjama bhemesikie bhiteto ibhwo bhakasha ngoro, bhakashagha majegho wanga yake Stefano; ⁵⁵ kake ye eho na Ngoro Msheneto, akadudua meso wanga akaubhona utukufu wa Izubha na Yesu eimuke mkono wa kuume wa Izubha. ⁵⁶ Stefano akaghamba, 'Nabhona wanga hajughuka na mwana wake Adamu eimuke mkono wa kuume wake Izubha.' ⁵⁷ Kake bhala bhanjama bhakagera kilonzo hena ngori mbaha bhejibha masikio mabho, bhakamtorokia bhose ⁵⁸ bhakamng'ola shighati ya isanga, bhakam'bigha na manoo: na mashaidi bhakauha suke jabho bhakajibhika maghuni ma mbwange eitangwa Sauli. ⁵⁹ Mari bhem'bigha na manoo, ye Stefano ekitasa eghamba, 'Mzuri Yesu uhia ngoro yangu. ⁶⁰ ' Akadung'uta ,akaiya hena ngori mbaha akaghamba, 'Apa usibhatarie ng'oki jabho.' Ekimekenje kuteta akashinjia.