¹ Kilozo kimesiiye, Paulo akaitanga bhandumi bhakwe akabhagera ngoro. Akabhaaghaya, akatonga Makedonia. ² Eokie ekibhagera ngoro bhareuhia kitamo chakwe mzuri hena ibhio bhighongo, akatonga Ugiriki. ³ Emekenje mieji mitatu, Bhayahudi bhakahira kiabhia bhamhirie kindu kibhibhi mari eokie ekundie kukwea ngalawa atonge Shami. Henahubho akabhona ahunduke kubhetia Makedonia. ⁴ Ebhotoke na Sopatro mwana wakwe Piro wakufumia Berea; Aristarko na Sekundo, bhauhia kitamo chake mzuri kufumia Thesalonike; Gayo mndu wa Derbe; Timotheo; na Tikiko na Trofimo bhandu bha Asia. ⁵ Kake abha bhandu bheokie bhetuindie Troa. ⁶ Tukafuma Filipi mati ma ibumunda lisichikie, tukabhafikia Troa, charo cha misi misano, tukaikaa aho bhio bhifungate. ⁷ Mari tutorane msi wa kubhoka wa wafungate kubaa ibumunda, Paulo akateta na bhareuhia kiteto chake mzuri. Etetie kio kizima amu ebharirie kubhotoka yabho lake. ⁸ Heokie na bhirangaro bhingi mbai ya wanga ya rumu yo tuokie hamwe. ⁹ Eutiko mbwange mdongo eokie eikesi ha mbarakanya, akabhetiwa ni lubhohe. Paulo akateta igheri ieza kake uu m'bwange mdongo eereshinjie, akagwa kufimi wanga ya gorofa mtano sii akasobheka. ¹⁰ Paulo akasea sii, akabhabhura bhandu bhasioke na isha amu mbwange eoho na moo. ¹¹ Akakwea waa gorofa ya wanga akabaa ibumunda akala. Akafuma nakutonga ekimekurije kuteta nabho henakieza mtano heyabho. ¹² Mbwange akahunduwa eho na moo na bhose bhakagerwa ngoro. ¹³ Uswi bhajenye tuokie na ngalawa yetu tumrongorie Paulo tukitonga Aso, handu tweokie twabhariria kumtika. Hubhu nibho bhundu Paulo eokie ekundie kuzoka, amu ebharirie kubhata na maghu. ¹⁴ Mari tutorane naye Aso, tukazoka hamwe na ngalawa kutonga Mitilene. ¹⁵ Tukazoka na ngalawa yetu tukatuluma msi wa keri, mbai ya keri ya handu ejungulukwe ni mbombe heitangwa Kio. Yabho lake tukafika Samo handu ejungulukwe ni mbombe, na msi wakatatu tukatuluma bomeni Mileto. ¹⁶ Amu Paulo eokie aamu kubhetia Efeso, esa asireshesha Asia. Eoki na mausara awahi msi wa Pentekoste, akicha kineidimikana. ¹⁷ Paulo akatuma bhandu kufuma Mileto kutonga Efeso akabhaitanga bharongori bha nyumba ya itasi. ¹⁸ Igheri bhemziie akabhabhura, ''nywii bhenye mumaije, naoka nanywi ingeri lose nikime fike aha Asia. ¹⁹ naoka mndu wakumwisisa mzuri ha masoji na ngoro yangu yose, na kubhinyika sababu ya bhiteto bhiya Bhayahudi. ²⁰ Munimaije nezo nisikinabhabhisa kubhatindia kiteto chochose cha lung'enjo henyu, na bhundu ni bhaloshie ena iwang'i na kutonga kaa mwe hadi ingiwa. ²¹ Mumaije bhundu nkinabhatabhasha Bhayahudi na Bhayunani kumhundukia Izubha na kumwitikija Yesu. ²² Yoweni iki noho gura jangu nzia kutonga Yerusalemu, na nisimaije kila kinenifumiria uko. ²³ Kake ngoro mshenete eho nishuhudia ninepata mateso uko mbele. ²⁴ henahubho maisha mangu esi mambucha pada kuliko kufisha kiteto chake mzuri kila napata kufuma hake mzuri apa. ²⁵ Yoweni iki raa, nimaije nywi bhose mwokie mtonga mkilosha kiteto chake izubha, kake msikabhubhone bhusho bhwangu waa. ²⁶ Hena hubho noho nibhabhura iyo iti, nisina bhubhibhi na dumu ya mundu wowose. ²⁷ Amu nisikubhikie mbai na kubhetija kiteto chake izubha. ²⁸ Kuyoeni na lila ifio lose. Eyo ngoro mshenete ebhabhikie nywi mwoke bharinji bhabho, muliibhushe ianda lakwe izubha la itasi, elizorie na dumu yake mwenye. ²⁹ Nimaije nikafuma maginga meneingi henyu , na mesikalibhonie ifio lumoo. ³⁰ Ghati yenyu heneimuka bhandu bhenebaa bhaghenji ngoro bhabhajute bhaloshwa bhabharatere. ³¹ Henahubho ikaeni meso, mkitwarija iti henaa bhio bhitatu, kio na hensi, nisishingie kubhatabhasha na masoji. ³² Hena hubho noho bhabhika bhena bhighaza bhakwe mzuri, na kiteto cha mvono wake, eho uidima kubhaarenga na kubhainga bhughabhi hamwe na bhose bhala bhezerijwe. ³³ Nisilangwa kibala cha mdu, dhahabu, kana suke jake. ³⁴ Mumaije maghaza mangu maoka ni makukuendia na bhala bheokie hamwe nami. ³⁵ Hena bhindu bhyose nibhaingie sa bhundu mneghenja bhanana kuhira ndima, na bhundu kiteto chake mzuri kisifume ndeni yenu: "kuinga ni itasi kukela kuingwa." ³⁶ Ekimekurije kuteta hubhu, Akatonga sii na kutasa nabho bhose. ³⁷ Bhakaiya pada na kum'busu Paulo. ³⁸ Bhose bheokie bhereghije hena kila Paulo etetie, iti bhesikabhone bhusho bhwake waa. bhakamtika mtano na ngalawa.