¹ kitamo kila cha mboko nitamie;Theophilo; kitinda bhindu bhwiose Yesu ehirie na kulosha ; ² mtano igheri euhiwe wanga. Ne magheti ebhaaghanye bhandumi bhakwe kubhetia ha Ngoro Msheneto bhala ebhasabhure. ³ Baada ya bhwasi bhwake, ekufunyirije habho ena moo na bhushahidi bhwingi. Hena bhio makumi maane ebhafumirie,na kubhatindia wanga ya kifumwa chakwe Apa. ⁴ Emetorane hamwe nabho, ebhaaghanye bhasirefume Yerusalemu, metae bhainde bhutemi bhwake Apa, ebho eghambie, ''mwasikia kufuma hangu ⁵ iti kididi yohana ebatize na mbombe, kake hena bhio bhya hafuhi mnebatizwa hena Ngoro Mshenete.'' ⁶ Bhekimetorane hamwe bhembhujanye,''Mzuri, ili nilo igheri unehundua kifumwa cha bhaisiraeli?'' ⁷ Ekabhatalua, ''esiwanga yenyu kutwarija igheri kana msii Apa abhika hena kifumwa chakwe. ⁸ kake mneketa zinya, Ngoro Msheneto ekinabhaseiya, na aho mneoka bhakara bhangu kubhokia Yerusalemu, Judea yose na Samaria, mtano tiricho ya isanga.'' ⁹ Yesu ekimebhatindie hubho, bhereho bhetungululia wanga, epehuiwe ,ijumbi likam'bhisa kufuma habho. ¹⁰ Bhereho bhedudua meso haijumbi ekimetonge, turu na turu, bhandu bheeri bhedokie suke nyewa swee bhekaimuka msongorana habho. ¹¹ ''Bhekaghamba, ''inywii bhandu bha Galilaya, nize muimuke mdudua meso uko wanga? U Yesu bhundu mwam'bhona etonga nirebhobhundu enehunduka.'' ¹² Kufuma nduwi ya mizeituni bhekahunduka Yerusalemu, charo kifuhi. ¹³ Bhekimefike handu bhenaikaa bheingie ianda labho la wanga. Nabho ne Petro, Yohana, Yakobo, Anderea, Filipo, Tomaso, Batolomayo, Matayo, Yakobo mwana wakwe Alifayo, Simioni na Yuda mwana wakwe Yakobo. ¹⁴ Bheokie na bhumwe, bhekisengera na itasi,hamwe nabho ne bhache na mcheku Mariamu mee Yesu na bham'nduabho bhakiume. ¹⁵ Magheri amo Petro eimuke ghati ya bhandu, ighana na makumi meeri, akaghamba, ¹⁶ ''bham'nduetu, cheinare mno kitamo kihirike sabhundu Ngoro Msheneto etetie kubhetia ha lumi lwake Daudi wanga yakwe Yuda, ula ebharongorie bharemgura Yesu. ¹⁷ Kwakuoka iti eokie m'mwezu wetu na epatie mbucha ya bhughabhi bhwa ii ndima.'' ¹⁸ [Hena hubho uu mundu ezorie teri na bhughabhi bha bhukeleki bhwake,na aho ekawaa mtwii ,mwiri wake ukabuuka,matumbo mekaitika shighati. ¹⁹ Bhose bhala bhetue yerusalemu bhekapata ndumi iyo,bhekahaitanga handu hala ''Akeldama,'' hena kihabho, yaani, ''Teri ya Sakame.''] ²⁰ ''Amu itamiwe hena kitamo cha Zaburi, 'Na kaa yakwe iyoke isamo, na hasirekete mundu enetuwa aho'; na, 'Haketike mundu egura handu hakwe.' ²¹ Kiinare iki, ghati ya bhandu bheaterane naswi magheti Yesu ebhatie ghati wetu, ²² kubhokia na ubatizo wakwe Yohana mtano igheri epehuwe wanga kufuma hetu eesa aoke m'mwezu wabhakara wanga ya kuruka kifwa aoke hamwe nasawi.'' ²³ Bhekasabhura bhandu bheeri ghati yabho; Yosefu hena izina lingi Barsaba, eye bhemwingie izina la Justus, na Matiasi. ²⁴ Bhekatasa na kughamba, ''Apa Mzuri, utwarije ngoro ja bhose, tubhonye eye akuizirihia ghati ya abha bheeri. ²⁵ Agure ndima ya bhukara badala yakwe Yuda wanga ya matekwa makwe yemwenye esabhure handu hakutonga.'' ²⁶ Bhekahira masabhuro; na Matiasi ekasabhurwa naye akatariwa kuoka hamwe na bhakara ikumi na m'mwe.