KITAMO CHAKUBHOKA CHAKWE YOHANA 3
1
Yoeni ni lukundo lwa mbare ani Apa atuinga uswi, iti tuitangwe bhana bhakwe Izubha, na hubho ni bho bhundu tuoho. Na hena bhundu ubhu isanga lisitumaije uswi amu isanga lesem'maije yee.
2
Bhakundwa, iki tubhana bhakwe Izubha, kake isimejughuiwa bhula bhundu tuneoka. Tumanye iti igheri Kristo enefumia tuneoka saye, amuu tunem'bhona sa bhundu eho.
3
Na kila m'ndu ena lusiligi ulu hena yee ekuzerija sa bhundu yee edzerie.
4
M'ndu wowose eho ehira ng'oki eho ebaa sharia amuu ng'oki ni kubaa sharia.
5
M'maije iti Kristo ejuighuiwe nesa atushighie ng'oki amuu ndeni yakwe hesina ng'oki.
6
M'ndu wowose eho ndeni yakwe esihira ngo'oki na ula ehira esime m'bhone kana kum'manya.
7
Bhana bhadori, m'ndu asibhakenge. Ula ehira nezo niwedi sabhundu Kristo niwedi.
8
Ula enahira ng'oki ni wakwe m'keleki, amu m'keleki ehirie ng'oki too mboko. Hena hubho mwana wakwe Izubha ejughuiwe, nesa ashinije ndima jakwe m'keleki.
9
M'ndu wowose ebhoniwe ni izubha esina hira ng'oki amuu mbeu yakwe Izubha inaikaa ndeni yakwe. Esikahire ng'oki amuu ebhoniwe ni Izubha.
10
Hena hubho bhana bhakwe Izubha na bhakwe m'keleki bhebhikiwe mwaji.Eyee esihira bhiedi esi wakwe Izubha, kana ula em'suiye m'ndwabho.
11
Ii niyo ndumi ila m'sikie too mboko, iti tukundane uswi bhenye kwa bhenye,
12
esi sa Kaini eokie m'keleki akam'koma m'ndwabho na nikini em'komie? amuu mihiro yakwe yeokie mibhibhi, na m'ndwabho eokie na mihiro yedi m'songorana wakwe Izubha.
13
Bham'ndwetu, m'siitalwe isanga likabhasua.
14
Tumaije iti twakibheta kifwa tuho moo, amuu tubhakundie bham'ndwetu.
15
uo wose em'suiye m'ndwabho ni m'komi. Na m'maije iti moo wa ndarasi usinaikaa ndeni ya m'ndu m'komi.
16
Hena bhundu ubhu tumaije lukundo, amuu Kristo engolie moo wakwe hena bhundu bhwetu.Tukundikane na uswi tungole moo wetu hena bhundu bhwa bham'ndwetu.
17
Kake m'ndu eye ena bhwedi bhwa isanga, na akam'bhona m'ndwabho ekundie, na asim'sikia lumoo, lukundo lwa Izubha luikaze ndeni yakwe?
18
Bhakundwa bha bhangu, tusioke na lukundo lwa bhiteto kana lumi tiki, kake lwa kuhira na kididi.
19
Hena hubhu tumaije iti uswi tubhakididi na tune sobhosha ngoro jetu m'songorana wakwe.
20
Kake akicha ngoro jetu jatuchuiya, iti Izubha ni m'baha kukela ngoro jetu na emaije bhindu bhiose.
21
Bhakundwa akicha ngoro jetu jisioho jituchuia, tuna ngi'iria hakwe Izubha.
22
Na chochose tuomba kufuma hakwe etuinga, amuu tugurie maaghanyo makwe na kuhira bhindu bhila bhimuinare mesoni hakwe.
23
Na ama nimo maaghanyo makwe-iti tuidime kuing'idaki hena izina la mwana wakwe Yesu Kristo na kukundana uswi hena uswi-sabhundu etuingie ama maaghanyo.
24
Ula yee enegura maaghanyo ma Izubha eneikaa ndeni yakwe, na Izubha eneikaa ndeni yakwe. Hena bhundu ubhu tumaije enaikaa ndeni yetu, kubhetia Ngoro eye etuingie uswi.