¹ Ishiintuni diiginsa Yeesuh Kristoh ah tah Waak'a ini isaati kaneh aka ergatuh isah d'egersiisa wunih turchah mid'aafamtuh. Iniini hah barachiisa malaikah isah ergatini gara ergatuh Yohaanah. ² Yohaanani k'awih gidbaasa wunih t'uut'umah tah iniini d'erge dubih Waak'a ah ara amaleh k'awih kanani Yeesuh Kristoh arah. ³ Wah eebisanuh kah k'oonk'oh guduyuh ani shooma, amaleh dega t'uut'umah kah dubih rhaagah ch'ak'asu amaleh hiila wunih ishih kesa bareesani, malyenani wogah ani hah d'iyaate. ⁴ Yohaanah, gara mina Waak'a ah toiba tah Asiah jirtu. Dada ini gara keesani jiraatuh amaleh nageh gara isaati kah jiru amaleh kah malsuni jiru, amaleh kah d'ufu amaleh hara toiba kasah barchuma dendeechah dura. ⁵ Amaleh Yeesuh Kristoh kasah, kah kawih abdih ah, kah d'aloota duraa kah guduyuh hayooleh d'uniah. Isa gula kah nuh fed'u amaleh hah diiga isaatini namseh teena nuh arah d'ik'e. ⁶ Amaleh hah hayuma nuh toche, kaloleh Waak'a gula amaleh abah isah dada amaleh jaweena gara isah durih durih. Halaaleh. ⁷ ilaala, dumeesah ni d'ufa, ila t'uut'umah isa d'egertu dega isa woraanta suuleh. Amaleh gosa t'uut'umah tah d'uniah hih yuulani isaatifi. Akumsuni, Halaaleh. ⁸ " Ana alfah amaleh omeegah, Aaboh Waak'a ini akah dubata, kah jiru, amaleh kah malsuni jiru amaleh kah d'ufa, dendeechah." ⁹ Ana Yohaanah ebeleesa keesani amaleh kah isanini wiliini hanshaara kesa amaleh hayuma kesa amaleh omsah Yeesuh kesa jirtu, malsuni hori Patmosih yed'anih jira malyenani dubih Waak'a atini amaleh k'awih Yeesuh ara. ¹⁰ Malsuni ana hara kesa jira guyah Aaboh ah. Hirba kinkih k'oonk'oh aka faagah d'egeh. ¹¹ Wah ishiini yete, " Bareesa wunih atih d'egertu kitaawa kesa, amaleh geesa gara mina Waak'a ah toiba kah Efeesoh ah, Smirnah amaleh pergaamoh amaleh Tiat'irah amaleh Sard'ih amaleh Filadelfia afi Laodikiah. ¹² Eegiah ana keh galgaleh ilaale k'oonk'oh aanti dubatu suni. Amaleh maluma ana galgaleh suni, kee d'isah t'aa toiba kah kaluh ani mid'aasani d'erge. ¹³ Jiduh d'isah t'aa sunih nama tokoh ti jira kah Gurbah Anamah ah fakaatu, Kaanzuh d'eertuh tah faana isah geechu hid'ate amaleh hiituh kaluh ah handarafati marate. ¹⁴ Matah afi sifansa isa malsuni adih aka yuuba hoolah, adih aka chululutuh, amaleh ila isah aka arawa abidah jirti. ¹⁵ Miila isah aka maaldeh arah dudugana jira, aka maaldeh abida ani d'ik'ana amaleh k'oonk'oh isah aka madiisuh daada bisaaniti. ¹⁶ Harka isah kah miidah urjih toiba kesa jira, amaleh afaana isah biloh gara t'uut'umah tini muru amaleh kariinsa k'au kasah bah. Fuula isah malsuni hih kilkilsa aka kilkila guduyuh aduh ah. ¹⁷ Mala ana isa d'erge , miila isah jala lafa dee , akuma nama dueh. Iniini kee harka isah kah miidah ara ana kaaye, amaleh dubate, "Hinsodatinah. Ana dursah amaleh mumeh, ¹⁸ amaleh kah jiruh. Malsuni ana hah due amoh ilaali jireena mumeh hink'amne k'awa. Amaleh ana chufanah duh ati yoh kah awantiah k'awa. ¹⁹ Suniifi bareesa wunih atih d'egerte, wunih temtanah, amaleh wunih mid'aafamte beetah arah. ²⁰ Malyenani d'osih urjih toibah tah atih harka kinkih kah miidah kesa d'egerte, amaleh d'isah toiba taa kah kaluh ah. Urjih toiba suni malaikah toiba tah mina Waak'a atih, amaleh d'isah t'aa toiba suunti mina Waak'a ah toiba.