¹ Teemtana amaleh ufa olfuunah ntumtiini? Muu aka dega d'iwiah nuu bareesanih feenah faaruh d'ufteenafi kasah yah teenah? ² Isanumiti wark'atih teena tana tah malsuni ona teena kesaati bareesani tah deejih gudaani shoomteh beechu. ³ Balina isaani kaayanih aka isaani wark'atih Kristoh ah. Kah nutih bareesani kanaamuh kah baruh wiinoh atini himbareesini amoh Hara Waak'a jiruuni bareesani. Ishih d'akaacha araati himbareesineh, amoh ona anamah kesaati bareesani. ⁴ Amaleh abdih nutini k'amnu Waak'a kasah tana Kristoh araani. ⁵ Akuma nutini dendeenyumuh moma dubih teena ch'aalani. Dendeechah teena gara Waak'a atih d'upti. ⁶ Waak'a kah dendeechah nuuti kane ergatuh d'aamsa hareesah. Ishiini tuni d'aamsa wark'atih atimuh amoh kah Hara ati. Malyenani wark'atih ni hiinjepti amoh Hara tini jireena kaniti. ⁷ Lukah woh hujih duah nsuni d'akaacha artaati tah ishiini gudina ara d'upte kah anamah Israeelih ah fuula Muusah ah ilaachih iti kafatani. ⁸ Ishiini tuni gudina fuula isaatifi, gudina gidbuh akuma iniini buunini. Teemtana hujih Hara antuni wah iti hindaramtuh jaweenafi? ⁹ Malyenani woh hujih adaawa ntuni gudina k'abdu, hujih d'ugaa gudina malsuni arah k'abdi! ¹⁰ Suniifi, wunih dursah gudisani ishih tana kesa hiila hink'abduh, malyenani gudina ishih suni darfuuni. ¹¹ Malyenani woh tah dawartu suni gudina k'aawatu, tah teechu suni gudina aranah k'abdi. ¹² Aka nutini eegintah tana k'amnu, d'iiroma gudah k'amna. ¹³ Nutni aka Muusah timuh kah saara fuula ara kaayateh anamah Israelih ah isa ilaalchih kafate tah malsuni rhaawatu suniifi. ¹⁴ Amoh moma isanih hah d'eed'omsani. ¹⁵ Amoh guyah kaaleh, woh d'aamsa Muusah shoomanileah saara ini suni amaleh onuma isaanih ara ch'iisa. ¹⁶ Amoh woh anamah ani Kristoh abdatu saara suni achih fuud'ani. ¹⁷ Teemtana Aaboh Waak'a ini Hara, bere Hara Aaboh ah jirtu hiikamati jira. ¹⁸ Akumsuni nuh t'uut'umah kah saara fuulah hink'amne dendeechah Waak'a ah d'egera. Gudina Aaboh d'egereh akuma nuh galgalchanuuni gudina tanuumani gudina' akuma gara Aaboh atih, kah iniini Harah.