¹ Yesu k'á kɔ́ŋnfɔn jìré Jeriko dyɛɛ̂ mɔ. ² Martar-hlárê ŋmelɔn jɔ dyàn bè tɛ̀ŋnɛ̀n, nòfelɔn ɔ ín, yì b'à fɛ́ɛŋn dé Jashe. ³ Fù jɔɔ̂ ri Yesu ɲɛ́ɛn ín k'à shu jiminî mun ɔ. Kɛ̀, à ri fáâ mun to à ŋmɔ́na à wo fù fáshi à jùmɔ̂ɔ̂ sɔ́ɔ se bo, bóló ɔ bo jimin kurn ɔ ín, ⁴ ki túno á munân ɔ à jùmɔ̂ɔ̂ nyân, ki tímɔ́n bɛl sɔ́ɔ dyàn jà dú à ŋmɔ́n gbɔ núkwɔ́ɔn, bóló ɔ bo à bè jìrébɛ̂ mímí. ⁵ Yesu mùfɔn bè lo fù tíkɛ́lî mɔ, k'á ŋmel tɔŋnkúr lɛ klɛ ɔ nɔ̀nfléen, k'à jɔɔ̂ ŋmɔ́n, k'à wú à se dé: «Jashe, kyɛl bɛ á munân ɔ, bóló ɔ bo à ri yanɲɛ̀n mún ki ń tɔ́nshîbé dé ɲa ákún sádi.» ⁶ À la máno tɛ̀ŋn híin, Jashe ki kyɛl á munân ɔ, ki Yesu hlú á sádi á gbɔmɔnar ɔ. ⁷ À jimiìî nɔ̀nkurn n'à kɔ́ŋnkúnî ŋmɔ́n híin, yì k'á yɛŋn kɔ̀ŋnɔn Yesu gbɔwú dé: «Àni jɔɔ̂ lɛ̀mun nɛn à ŋmáantɔn jɔɔ̂ sádi á tɔ́nshîbé dékɔ́ɔŋn ɔ.» ⁸ Kɛ̀, Jashe ki dukú, ki líè Yesu ɲɛro, k'à wú à se dé: «À nɛn, ń Totɔn, ń bè ń nòfelî síkárbɛ̂ mɔ́n níin, ń k'à síkâr máâ teè dàkpɛɛ̂ŋl to, ki saaŋ tɛŋn árí ń ni wôɲɛ̀n jir ta, ń k'à kpɛŋnmɔ́nî kúur mɔ́n yor tè à to.» ⁹ Yesu k'à wú à se dé: «Ɲɔnlɛɛ la ɲa byɛ̀ àni denî mɔ, bóló ɔ bo ákún ki Brayima kpaŋltosɛ̂ŋn má ɔ saaŋ. ¹⁰ Fù bóló ɔ bo Jimin Dye-Jɛn b'à jimin jɛɛlmɛ́ɛ̀ɛ̂ ɲɛ́n, ki yì ɲɔnli. ¹¹ À jimiìî ki fù gbukɛlî tonákúnî se, ki tɛl má wú yé yì se. Fù bóló ɔ bo yì ri shùnjàmun ɔ Jerisalɛmu dyɛɛ̂ to ín, ki tɛŋn yì ǹ jɛ́ɛn mɔ dé Jɔnɔsɔ ǹ faŋbéê bè yɛnbɛ̀ yìkun to fù tíkɛ́l byéenî mɔ. ¹² Fù kpɛŋnî ta, Yesu k'à wú dé: «Kìyɛŋntɔn dyàn dye-jɛn ni lɛ̀ dyɛwóon kɔ́ɔŋn ɔ, kìyɛŋn fɔŋn bɛl sɔ́ɔ mɔ; nɔkɔ́ŋl ki don kìyɛŋntɔnbé ŋmɔ́nké, k'á sɛbɛ fù kìyɛŋntɔnbéê kwo án kìyɛŋnî mɔ. ¹³ À kɔ́ɔŋnî n'á to gbɔ tyé, k'á tɔŋnklɛrêê mɔ jir fú fɛ́ŋn, ki tɔŋn-kpɛ̀ŋl kur byéen byéen ɔ yì nɔkɔŋl kɛ́ŋ, k'à wú yì se dé yì w'à nɔ á mɔjìr àkun sɛblaâ n'á to gbɔ tyé. ¹⁴ Kɛ̀, fù jɔɔ̂ gbɔ w'àn kìyɛŋnî jimiìî tìyà à gbɔdɛ́ɛ se bo. Yì ki twɔ́ɔŋnlórê búrno à besé, dé yì wo don à wúké à dòn fɔŋnî kìyɛŋntɔn jɔɔ̂ se dé yìkun w'à jɔɔ̂ ɲɛ́ɛn ki tɛŋn yìkun ǹ kìyɛŋntɔn bo. ¹⁵ À mùfɔn á sɛbɛ án kìyɛŋnî mɔ, án kìyɛŋntɔnbéê ŋmɔ̂n kpɛŋn ta, k'á tɔŋnklɛrêê fɛ́ŋn, à ri tɔŋn-kpɛ̀ŋl kur byéen byéen tè ta mɛ̀mun to; nɔkɔ́ŋl k'à shu yì nɔkɔŋl á fù rɔ á mɔjìr fáâ mun to. ¹⁶ À tɔŋnklɛrɔn túkyɛ̂ŋlî ki bɛ, k'à wú dé: "Ń Totɔn, á r'án tɔŋn-kpɛ̀ŋl kur byéenî mun tè ta mún to ín, à ri tɔŋn-kpɛ̀ŋl kur fú má dɛ́ tɔŋn ɔ." ¹⁷ À jɔɔ̂ k'à wú á tɔŋnklɛrɔnî se dé: "fù ri ɲukwɔ́, á ki tɔŋnklɛrɔn ɲɔn ɔ. Á tɛ̀ŋnî se yɛŋntokwɔ́ɔŋntɔn gbɔ tíin mɔ, dyɛ mɔ́n fú bè tebɛ̀ á to takɛl ɔ." ¹⁸ À tɔŋnklɛrɔn níintɔnî ki bɛ, k'à wú dé: "Ń Totɔn, á r'án tɔŋn-kpɛ̀ŋl kur byéenî mun tè ta mún to ín, à ri tɔŋn-kpɛ̀ŋl kur kwɛŋl má dɛ́ tɔŋn ɔ." ¹⁹ À jɔɔ̂ k'à wú fù à se dé: "dyɛ mɔ́n kwɛŋl bè tebɛ̀ á to saaŋ takɛl ɔ." ²⁰ Tɔnklɛrɔn má ki bɛ, k'à wú dé: "Ń Totɔn, á r'án tɔŋn-kpɛ̀ŋlî mun tè ta mún to ín, à nɛn. Mún n'à tityɛ́ŋn totìn yáè ín wúyáa mɔ; ²¹ fù bóló ɔ bo ákún yàn ni mún to, á se gbɔ jaarî se, á b'án ɲɛ̀n kaarn mɔ́n gbɔɔ̀n ki tɛŋn á fù, á b'án nùkwò kaarn kùnmɔ tityɛ́ɛŋn." ²² À kìyɛŋntɔn jɔɔ̂ k'à wú à se dé "Tɔnklɛrɔn jaal, án gbukɛlî kɛl fáâ se ń b'à yɛnbɛ̀ á to d'án lô fù ri w'á nar bo. Ákún n'à shi ín dé mún se gbɔ ri jaar, á b'à shi dé mún ni ń ɲɛ̀n kaarn mɔ́n gbɔɔ̀n ki tɛŋn ń fù, á b'à shi dé mún ni ń nùkwò kaarn kùnmɔ tityɛ́ɛŋn. ²³ Myɛ́n núkwɔ́ɔn á wo la mún ǹ tè ta kpɛ̂ŋlî ɲɛ̀n kpɛ̂ŋl-yálɔ́ mɔ bo, ń sɛbyɛ̀munî dénno à likúna à n'á ta tɔŋnî ɔ ín be a?" ²⁴ Fù jìrɛ̂mun kwɔ́ɔn jimiìî mun tɛ̀ŋnɛ̀n mímí ín, à kìyɛŋntɔn jɔɔ̂ k'à wú yì se dé yì w'à kpɛŋn fù tɔŋn-kpɛ̀ŋlî sɛ́ ki teè à tɔŋn-kpɛ̀ŋl kur fú tɔŋnî to. ²⁵ Yì k'à wú dé: "Ŋmɛ́ɛn Totɔn, fù ki tɔŋn-kpɛ̀ŋl kur fú ŋmɔ̂nmun ɔ." ²⁶ Mún n'à lóon yíkun se dé mɔ́n bè tea mɔ́ntɔn to, à se fù ri ki tosáŋ. Kɛ̀ mɔ́n wo tɛ̀ŋnɛ̀n tɔŋnî mun se bo, à se fù tíinî nɔ̀nkurni bè sùnsùr lia à kpɛŋn. ²⁷ À kìyɛŋntɔn jɔɔ̂ k'à wú à jimin búùrî se dé: "Yíi wo mún kɛ̀ŋlshìtêê ja bɛ húnmɔ, mɛ̀mun w'à se ín mún ki tɛŋn yìkun ǹ kìyɛŋntɔn bo, yíi ki yì kprakwa ń ɲíɲra".» ²⁸ Yesu la máno àni gbukɛlî kɛl kɔ́ŋnè híin, ki búr à kɛɛln-bishɛ́ɛ̀ŋɛ̂ ɲɛro Jerisalɛmu dyɛɛ̂ mɔ kɔ́ŋnfɔn. ²⁹ Yesu n'án kɛɛln-bishɛ́ɛ̀ŋɛ̂ mùfɔn shùnjà Bɛtifase dyɛɛ̂ nì Betani dyɛɛ̂ to, Olifiye tímɔ́n fiîŋ káalî blɛ̀ se híin, ki kɛɛln-bisháaŋn jir níin tɔ́ŋ, ³⁰ k'à wú yì se dé: «Yíi wo don á ɲɛro dyɛɛ̂ mɔ, yíkun mùkâr ye dɛ́ à dyɛɛ̂ wono, yíi bè sùnbaarnbin dyàn tìnɲɛ̀n ŋmɔ́na dó wo dú kɛŋn mùmun ta bo. Yíi k'à jal, yíi ki bɛ à nɔ. ³¹ Jir nì yíi dù dé yíkun n'à sùnbaarnbinî jaàln myɛ́n núkwɔ́ɔn? Yíi w'à wú à tɔŋn se d'à togbɔ ri ŋmɛ́ɛn Totɔn se.» ³² À r'à blê jir níinî mun tɔ́ŋè, fɛ̀ dònmunî ki dénno à ŋmɔ́nké máno, Yesu ǹ lô fáâ to yì se. ³³ Yì rɔ dé yíi k'à sùnbaarnbinî jal, à sùnbaarn têê ki yì du dé yì r'à sùnbaarnbinî jaàln myɛ́n núkwɔ́ɔn? ³⁴ À kɛɛln-bisháaŋn jir níinî k'à mɔli dé: «À togbɔ ri ŋmɛ́ɛn Totɔn se.» ³⁵ À la máno tɛ̀ŋn híin, yì k'à sùnbaarnbinî jàno teké Yesu to. Yì k'án wâɛ̀ɛ̂ gbe à sùnbaarnbinî bùndùr mɔ, yì ki Yesu dú ɲínɛ́ɛn à fléen. ³⁶ À kɔ́ŋnkúnî wono à jimiìî bè máno án wâɛ̀ɛ̂ mɔkìr búr dékɔ́ɔŋn à ɲɛ̂lî ta. ³⁷ À shùnjàmun kwɔ́ɔn Jerisalɛmu dyɛɛ̂ to, yì mùfɔn bè lobɛ̀ Olifiye tímɔ́n fiîŋ káalî kyɛɛlî to lo ɔ lò mɔ, à kɛɛln-bisháaŋn jùmɔ̂ɔ̂ nɔ̀nkurn k'á gbɔmɔnar se jo Jɔnɔsɔ tofɛ́ŋn gbɔ to, á myɛl tɔŋnkrɔ̂ mɔ àn klɛ̀ shɔ́gbɔɛ̀ɛ̂ ŋmɔ̂n ɔ. ³⁸ Yì b'à lóon dé: «Kyon ki nɛ́n kìyɛŋntɔn mɔ, mùmun mí blaàn Diryɔŋtotɔn yin ɔ! Ɲámɔgbâl ki tɛŋn jɔnɔkpár mɔ, Fulóo ki tè Jɔnɔsɔ to nɔ̀nfléen jɔ̀nɔ̀ ɲɛ.» ³⁹ Farisiyɛ̂ŋ máɛ̀ k'à jùmɔ̂ɔ̂ tyé mɔ tɛ̀ŋn mɔ à wú Yesu se dé: «Kɛlɔn, à wú án kɛɛln-bishɛ́ɛ̀ŋɛ̂ se dé yì w'á sháaŋn jimiì féen.» ⁴⁰ Yesu ki yì ǹ gbukɛlî mɔli dé: «Mún n'à lóon yíkun se dé yì ta á sháaŋnè, kàkrɔ̂ɛ̀ myɛl bè libɛ̂!» ⁴¹ Yì shùnjà blakúnî se Jerisalɛmu dyɛɛ̂ to, Yesu ri gbârî mun ye á ɲáa bré à dyɛɛ̂ to, k'à gbɔ to. ⁴² À b'à lóon dé: «Jerisalɛmu dyɛɛ̂ ɛ̀, ákún nɔkɔŋl nì jàrfyɛ ŋmɔ́n fáâ shi ín ɲaâ mɔ mano, fù ri fín ín! Kɛ̀, kyáŋmɔ la, fù wóon n'ákún jàè, ki toyáè ákun to. ⁴³ Ye dyàn bè fɛ́a, fù lɔɔ̂ mɔ á kɛ̀ŋlshìtê bè kyɛla á ta, yì ki kɛ́l twɔ̀ŋn á tomliŋ kpɛ́è, yì k'á tokpârè bén kúur nɔ̀nkurn se. ⁴⁴ Yì b'á ŋmɛ̀ kɛ́ɛna, yì k'á mɔ jimiìî nɔ̀nkurn kwoê. Yì bè kàkrɔ̂ má jéla kàkrɔ̂ má fléen bo. Fù bóló ɔ bo Jɔnɔsɔ ri blaàn gbârî mun ye ákún núkwɔ́ɔn, á wo fù hlɔ̀ bo.» ⁴⁵ Yesu ki dé à tonyɛɛlklɛ-lɔ́sɔ́ɔɔ̂ mɔ, ki wo jo à yɛ klɛ klɔ́kɛ́lêê tó lɛ to, ⁴⁶ à b'à lóon yì se dé: «À ri ɲúrɲɛ̀n Jɔnɔsɔ ǹ gbukɛlî ɲwâr sɛ́bɛ̂ɛ̂ mɔ dé "Mún ǹ lɔ́ɔ̂ bè tɛŋna tonyɛɛlklɛ-lɔ́." Kɛ̀, yíkun k'à nɔ shɛnflɛrê ki yíi ŋmelhlú fɔŋn jìrè.» ⁴⁷ À ri jimiì kɛɛln ín ye mun nɔkɔŋl à tonyɛɛlklɛ-lɔ́sɔ́ɔɔ̂ mɔ. À flɛ́klɛrê ŋmelêê n'à tɔ̂ŋn kɛlêê n'à dyɛ klɔ̀rêê k'à to fá ɲɛ́n kùnmɔ krɔ ɔ. ⁴⁸ Kɛ̀, yì wo la à to klɛ fá ɲáa ɲɔn sɔ́ɔ shi bo, bóló ɔ bo jimiì nɔ̀nkurn ni kpéɲɛ̀n ín à kɔŋn gbukɛɛ̀lî ta ɲátolîbé mɔ.