¹ Yesu ki gbukɛl dyàn kɛl tɛl mɔ án kɛɛln-bishɛ́ɛ̀ŋɛ̂ se, nɔkɔ́ŋl k'à yɛ̀n yì to, dé dó b'á gbɛ́ɛ gbál á byéen to tonyɛɛl klɛfɔn fífí bo, ² k'à wú yì se dé: «Kítíkárɔn dyàn tɛ̀ŋnɛ̀n dyɛ dyàn mɔ ín, à wo Jɔnɔsɔ yànhlóon bo, à wo saaŋ jimin dó ɲáɲɛhlóon bo. ³ Fù dyɛɛ̂ mɔ, dè-kló-mél dyàn saaŋ tɛ̀ŋnɛ̀n ín, fù bè bɛ n'à wú à se, d'à w'àkun n'á kɛ̀ŋlshìî tyé mɔ kítíî kár. ⁴ À gbɔ̀nî ŋmel ta ki bè bɛlkwó, à w'à biî n'à kɛ̀ŋlshìî tyé mɔ kítíî káar gbɔɔ̂ tohláan bo. Kɛ̀, ki la bè lɔɔndya à wú á byéen wono dé: "Hlɔ ɔ, mún wo Jɔnɔsɔ yànhlóon bo, mún wo jimin dó ɲáɲɛhlóon bo. ⁵ Fù n'á nɔ̀nkurn mɔ, mún b'à biî n'á kɛ̀ŋlshìî tyé mɔ kítíî kárbɛ̂, ki kár mún to, à bè mún kyɛŋn ká bo. Fù bóló ɔ bo à ri gbɔ flɛ́liɲɛ̀n mún to."» ⁶ Yì Totɔn k'à wú yé dé: «Yíi la àni yɛŋntokwɔ́ɔŋn kaarn kítíkárɔnî ǹ kɛl gbukɛlî yiin! ⁷ Jɔnɔsɔ ǹ jimin mɔtɔ̂ŋmɛ́ɛ̀ɛ̂ mun n'á tomyɛl klɛɛ̀n à besé, ye gbo túun gbo, d'à ki ɲukwó yìkun to, à bè ɲáro ɲukwóa fɛ̀ to bo kɛ̀? ⁸ Mún n'à lóon yíkun se d'à bè ɲukwóa fɛ̀ to ɲáro sɔ́ɔ mɔ. Kɛ̀ Jimin Dye-Jɛn mùkâr ye á sɛbɛ, à b'á sɛbɛ̀ gbɔ hlɔja ŋmɔ́na à ɲáantyarî ta a?» ⁹ Jimiìî mun n'á byéen ɔ bùkwɔ̀ɛ̀ŋ jìrɲɛ̀n ín, yì w'à jimin búùrî gbɔ dwɔ̂nɲɛ̀n bo, Yesu k'à wú tɛl mɔ fɛ̀ se dé: ¹⁰ «Jir níin ki dénno à tonyɛɛlklɛ-lɔ́sɔ́ɔɔ̂ mɔ tonyɛɛl klɛ ɔ, à máâ ki Farisyɛ̂ŋu ɔ ín, à máâ bè martar-hlárɔn. ¹¹ À Farisyɛ̂ŋ jɔɔ̂ bè líɲɛ̀n, à b'án tonyɛɛlî klɛɛ̀n á wono dé "Ń tɔ Jɔnɔsɔ, mún n'ákún fuló bóló ɔ bo mún wo tɛ̀ŋnɛ̀n à jimin búùrî fáâ to bo: Yì bè wɛ́ɛln jimiì ta, yì wo bùkwɔ̀ŋbé klɛɛ̀n bo, yì bè nyɛ̀nkɛ́ɛln, á n'à ŋmɔ́n ár'à ni martar-hlárɔnî ɛ̀. ¹² Ń bè nìnfwɔ́ɔŋn klɔ́ ŋmel byéen wono yefyɛ̂l níin, ń bè ń ŋmɔ̂n mɔ́ɛ̀ nɔ̀nkurn kpinar lɛɛn". ¹⁵ À ta bisháaŋn-kpɛ̀ɛ̀ŋl kwó, jimiì ri yì gbɔɔ̀n bɛ ín, Yesu ki yì totá á kpɛŋn ɔ. Kɛ̀, à kɛɛln-bishɛ́ɛ̀ŋɛ̂ ri fù ŋmɔ́n gbârî mun ye, yì ki kwɔ́ŋn à jimiìî fléen. ¹⁶ Yesu ki yì fɛ́ŋn, k'à wú yì se dé: «Yíi w'à jél yì ki bɛ bisháɛ̀ŋ ɔ mún se, yíi be yì tó bo, bóló ɔ bo Jɔnɔsɔ ǹ faŋbéê k'àni bisháɛ̀ŋɛ̂ kúur jimiìî fù rɔ. ¹⁷ Hlɔ ta mún n'à lóon yíkun se dé jiminî mun nɔkɔŋl wo Jɔnɔsɔ ǹ faŋbéê ŋmɔ́n árí bisháaŋn bo, fù wo déa à mɔ fífí bo. ¹⁸ À Yawutuìî ŋmelɔn má ki Yesu du dé: «Kɛlɔn ɲɔn, mún ni yanɲɛ̀n ń ki myɛ́n kwo nɔkɔ́ŋl ń ki dɔ kaarn shi ŋmɔ́n?» ¹⁹ Yesu k'à wú à se dé: «Myɛ́n núkwɔ́ɔn ákún bè mún fɛ́ɛŋn dé ɲɔn? Jimin dó wo ɲɔn Jɔnɔsɔ byéen kwɔsé bo. ²⁰ Á r'à tɔ̂ŋn gbukɛɛ̀lî shi: Be nyɛ̀nkél bo. Be jimin marli bo. Be ɲra kwo bo. B'á krɔmá yɛŋntonɛ́n bo. Á k'á tɔ n'á nɔ ɲɛflɛ́ɲɛn.» ²¹ À jɔɔ̂ k'à wú dé: «Mún fɔn fù tɔ̂ɛ̀ŋɛ̂ nɔ̀nkurn to ń kpɛŋnjàɲɛ̀n má ń bisháaŋn gbâr ye lì bɛ̀ mɔ.» ²² Yesu ki fù gbukɛlî náaâ se, k'à wú à se dé: «Gbɔ dyàn ni fwɔ̂ŋnɲɛ̀n yé ákún to. Don, á k'á kpɛŋnmɔ́ɛ̀ɛ̂ nɔ̀nkurn yɛè, á ki yì yɛ̀ kpɛ̂ŋlî lú dàkpɛɛ̂ŋl to, á bè nòfel ŋmɔ́na jɔ̀nɔ̀kpár mɔ. Fù jìrɛ̂mun kwɔ́ɔn á ki kpé mún ta.» ²³ À jɔɔ̂ ri fù gbukɛlî ná gbârî mun ye, k'á ɲámɔɲànè, bóló ɔ bo nòfelɔn tɛ́tɛ̂ ɔ ín. ²⁴ Yesu r'à hlɔ̀ d'à r'á ɲámɔɲànɲɛ̀n gbârî mun ye, k'à wú à se dé: «Nòfel tɛ̀ŋnɛ̀n jimiìî mun se, fɛ̀ mùn dɛ́ɛ ri jaar Jɔnɔsɔ ǹ faŋbéê mɔ! ²⁵ Fù bóló ɔ bo ɲɔ̀mɛ̂ sɛ́lɛ la nar mísɛŋn dar se yé ki jìré nòfelɔn dɛ́ɛ to Jɔnɔsɔ ǹ faŋbéê mɔ.» ²⁶ Jimiìî mun n'àn gbukɛlî tonáan ín, fɛ̀ k'à wú dé: «Gbòɛ̀ nì gbòɛ̀ ki la à ɲɔnlɛ fɛ̀ɛ̂ rɔ kpɛ́?» ²⁷ Yesu ki yì ǹ gbukɛlî mɔli dé: «Jimin ni kyɛ̀ŋnliinè gbɔɔ̂ mun to, Jɔnɔsɔ wo kyɛ̀ŋnlɛɛn fù to bo.» ²⁸ Piyɛri k'à wú dé: «À nɛn, ŋmɛ́ɛn n'án gbɔɛ̀ nɔ̀nkurn jél ta n̂ ki kpé ákún ta.» ²⁹ Yesu ki yì ǹ gbukɛlî mɔli dé: «Hlɔ ta, mún n'à lóon yíkun se dé jiminî mun nɔkɔŋl án den jél ta, k'á lu jél ta, k'á tɔbiîŋ jél ta, k'á kwɔ̀ŋmɔ́ɛ̀ jél ta, k'á derê jél ta Jɔnɔsɔ ǹ faŋbéê ŋmɔ̂n núkwɔ́ɔn, ³⁰ fù tɔŋnî bè fù tonur tyɛɛ́ŋ sɔ́ɔ ŋmɔ́na díryɔ́ŋ wono, ki dɔ kaarn shi ŋmɔ́n dwɔn.» ³¹ Yesu k'à kɛɛln-bisháaŋn jir fú-níinî jàno á wɔ́se dɔkâr mɔ, k'à wú yì se dé: «Ŋmɛ́ɛn kɔ́ŋnkún nɛn Jerisalɛmu dyɛɛ̂ mɔ; à tɔ́ŋrêê ri gbɔɛ̀ɛ̂ mun nɔ̀nkurn ɲúrɲɛ̀n ín Jimin Dye-Jɛn gbɔ mɔ, fɛ̀ nɔ̀nkurn dénno máno kwokɔ́ɔŋn ki mɔyîn. ³² Fù bóló ɔ bo à ri dénno tobúrkɔ́ɔŋn Jɔnɔsɔ hlɔ kaarn tê se, yì ki myɛn à to, yì k'à fɛ, yì k'á kpiyáaŋ búr à to. ³³ Yì k'à ŋmɛ saŋbwàr ɔ, yì ki kwɔ́ɔn à kwoê. À bè ɲinɛna á kwò yefyɛ̂l tyáarɔn lɔ.» ³⁴ Kɛ̀, àn kɛɛln-bishɛ́ɛ̀ŋɛ̂ w'àn kɛl gbukɛlî mɔ bin bólóon gbɔ̀n bo, ki tɛ̀ŋnè gbukɛl toyâmun yì se. Yì w'à hlɔ̀ gbɔɔ̂ mun lókún ɔ bo. ³⁵ Yesu shùnjà blakúnî se Jeriko dyɛɛ̂ to, fù k'à ŋmɔ́n kyar jɔ dyàn bè ɲínɛ̂nɲɛ̀n à ɲɛ̂l blɛ̀ se, à bè mɔ́n nyɛɛln, ³⁶ k'à jùmɔ̂ɔ̂ jìrɛ́ɛ myɛl ná, ki dukwo à mɔfáhlɔ besé. ³⁷ Yì k'à wú à se dé Nasarɛti jir Yesu ri jìrɛ́ɛ myɛl ɔ. ³⁸ À jɔɔ̂ k'á myɛl tɔŋnkrɔ̂ mɔ à wú dé: «Yesu, kìyɛŋntɔn Dawuda Dye-Jɛn, ń mùnur ja!» ³⁹ Jimiìî mun ni kélkɔ́ɔŋn à ɲɛro ín, fɛ̀ k'à tafɛ́ d'à w'á sháaŋn yíi fléen. Kɛ̀, k'á myɛlî sɛtɔnkúr yé tokpâr sɔ́ɔ dé: «Kìyɛŋntɔn Dawuda Dye-Jɛn ń mùnur ja!» ⁴⁰ Yesu ki líè, k'à wú à jimiìî se dé yì w'à ja bɛ. À mùfɔn bè lo à to híin, k'à du dé: ⁴¹ «Jɔ, á r'à se ń ki myɛ́n kwo á se?» À jɔɔ̂ ki Yesu ǹ gbukɛlî mɔli dé: «Ń Totɔn, ń ɲáaâ tofli ń se!» ⁴² Yesu k'à wú à jɔɔ̂ se dé: «Á ɲáaâ ri toflìè, án gbɔ hlɔjaâ r'á ɲɔnlɛ.» ⁴³ À jɔɔ̂ ɲáaâ k'á toflìè fù tíkɛ́l byéenî mɔ, ki kpé Yesu ta, à bè Jɔnɔsɔ súnkwɔ́ɔn. À jimiìî nɔ̀nkurn ni fù gbɔɔ̂ klɛ̀ fáâ ŋmɔ́n híin, yì ki Jɔnɔsɔ tofɛ́ŋn.