¹ Yesu ki dénno Olifiye tímɔ́n fiîŋ káalî fléen. ² Fù wóontɛ̂lî mɔ lɛ́ɛ múmúr k'á sɛno yé à tonyɛɛlklɛ-lɔ́sɔ́ɔɔ̂ dishɛ́ŋɛ̂ mɔ. À jimiìî nɔ̀nkurn sukúr byɛ̀ɛ̂ se à to, ki ɲínɛ́ɛnè, ki jo yì kɛɛln gbɔ to. ³ Fù la klɛ̀ híin, à tɔ̂ŋn kɛlêê n'à Farisyɛ̂ɛ̀ŋɛ̂ ki mél dyàn jà bɛ̀ lí à jùmɔ̂ɔ̂ tyé mɔ, yì ri mùmun jaɲɛ̀n ín nyɛ̀nkɛ́lfɔn, ⁴ yì k'à wú Yesu se dé: «Ŋmɛ́ɛn Totɔn, àni mélî ri jà nyɛ̀nkɛ́lfɔn. ⁵ Musa r'à ɲúrɲɛ̀n à tɔ̂ŋn sɛ́bɛ̂ɛ̂ mɔ ŋmɛ́ɛn se d'àni méèlî kúur nin kwo timin ɔ. Ákún se kwó híin? Ákún ni gbáno à wúa? ⁶ Yì ri fù lóon ín à tɔŋnlɛ gbɔ núkwɔ́ɔn, nɔkɔ́ŋl yì k'à nɛ hìn tɛŋn. Kɛ̀, Yesu k'á ŋmel tùtwòn, ki jo á kpɛŋnbin ɔ ɲáan mɔɲwáar to. ⁷ À tɔ̂ŋn kɛlêê n'à Farisyɛ̂ɛ̀ŋɛ̂ ki Yesu dù tɛ̀ŋndɛ̂ se, k'à ŋmelî tɔŋnkúr, k'à wú yì se dé: «Yíkun tyé mɔ jimin nì fɔn, mùmun wo gbɔjáal kwò din bo, fù kyɛ̀ŋl w'à nin!» ⁸ Yesu k'á ŋmelî sɛtùtwònè, ki jo á kpɛŋnbin ɔ à ɲáanî sɛmɔɲwáar to. ⁹ Yì ri fù gbukɛlî ná gbârî mun ye, yì ki dénno byéen byéen ɔ ki gbɔ̀n yì mɔ klɔ̀rê to, ki dénno búrké yì besé bisháɛ̀ŋɛ̂ to, yì nɔ̀nkurn k'á sukúr li. Yesu ki tɛ̀ŋnè á byéen, fù nì yì ri mélî mun jà bɛ̀ lí. ¹⁰ Fù la klɛ̀ híin, Yesu k'à ŋmelî sɛtɔŋnkúr k'à mélî du dé: «Bi, ákún nɛtêê we? Jimin dó w'ákún kɛŋɲɛ̀n kpɛ́ bo kɛ̀?» ¹¹ À mélî k'à mɔli dé: «Dó ɔ bo mún Totɔn.» Yesu k'à wú à se dé: «Mún wo saaŋ ákún kɛŋa bo. Don, kɛ̀ be la gbɔjáalkwo ká bo dɛ!] ¹² Yesu ki gbukɛl má yɛ̀n yé à jimiìî to dé: «Mún ki niyɛ́ɛl ɔ díryɔ́ŋ mɔ, niyɛ́ɛlî mun ni shi tɛɛ̀n jimiì to, tɔŋnî mun nì kpɛ́ mún ta, fù tɔŋnî wo kéla butúun mɔ bo. Kɛ̀ à bè tɛŋna woyɛ́ɛl to.» ¹³ Fù kwɔsé à Farisyɛ̂ɛ̀ŋɛ̂ k'à wú à se dé: «Ákún n'á byéen gbɔ tokɛɛ̀ln, fù bè tɛŋna hlɔ gbukɛl ŋmɛ́ɛn se bo.» ¹⁴ Yesu ki yì ǹ gbukɛlî mɔli dé: «Mún ta la saaŋ ń byéen gbɔ tokɛl, mún ǹ lóo fù ri ki hlɔ ɔ. Fù bóló ɔ bo mún ni ń lì bla fɔŋn shi, ń bè ń kɔ́ɔŋn fɔŋn shi. Kɛ̀ yíkun kwó, yíkun wo mún lì bla fɔŋn shi bo, yíi wo mún kɔ́ɔŋn fɔŋn shi bo. ¹⁵ Yíkun ni kítíkáarn jimin ǹ kítíkáar mɔ. Mún kwó, mún wo jimin dóon kítíin bo. ¹⁶ Mún ta la saaŋ tɛ̀ŋn kítíkárɔn, mún ǹ kár kítíî bè kára hlɔ ɲáa ta. Fù bóló ɔ bo mún wo ń byéen bo, kɛ̀ mún Tɔɔ̂ mun ni mún búr bɛ̀ɲɛ̀n, fù ri mún wɔ́se. ¹⁷ Yíkun ǹ tɔ̂ŋn sɛ́bɛ̂ɛ̂ mɔ à ri ɲúrɲɛ̀n dé jir níin ǹ nínshîbé gbukɛl nì tɛ̀ŋn fá byéen fù k'à hlɔɔ̂ rɔ. ¹⁸ Mún ni ń byéen gbɔ tokɛɛ̀ln yíkun se, mún Tɔɔ̂ mun ni mún tɔ́ŋ bɛ̀ɲɛ̀n, fù ki mún nínshî ɔ.» ¹⁹ À jimiìî k'à du dé: «Ákún Tɔɔ̂ we la?» Yesu k'à mɔli dé: «Yíkun wo mún shi bo, yíi wo mún Tɔɔ̂ shi bo. Yíkun nì mún shi ín, yíkun ni mún Tɔɔ̂ shua ín.» ²⁰ Yesu r'àni gbukɛɛ̀lî kɛɛ̀ln ín à tonyɛɛlklɛ-lɔ́sɔ́ɔɔ̂ dishɛ́ŋɛ̂ mɔ, à b'à jimiìî kɛɛln gbɔ to à kpɛŋntabrée brê dɔ́ɔ̂ blɛ̀ se. Dó w'á kpɛŋn tá à to bo, fù bóló ɔ bo àkun fù gbârî wo lò kɛŋn ín bo. ²¹ Yesu ki saaŋ à wú yé yì se dé: «Mún bè kɔ́ɔŋn, yíkun bè mún bén ɲɛ́na. Yíi bè kúa án gbɔjáal-klɛɛ̂ mɔ. Mún bè dona tíkɛ́lî mun mɔ, yíkun bè don hìn tɛŋna mímí ni mɔ bo.» ²² À Yawutuìî k'à lóo kùnmɔ yíi se dé: «À bè dénno á byéen kwokɔ́ɔŋn la dàà?, bóló ɔ bo à r'à ló d'àkun bè dona tíkɛ́lî mun mɔ, dé ŋmɛ́ɛn bè don hìn tɛŋna mímí ni mɔ bo.» ²³ Yesu k'à Yawutuìî ǹ gbukɛlî mɔli yì se dé: «Yíkun k'à ɲáantyarî ta jimiì ɔ, mún bè jɔ̀nɔ̀kpár mɔ lì bɛ̀ jimin. Yíkun ki díryɔ́ŋ jimiì ɔ, mún wo díryɔ́ŋ jimin ɔ bo. ²⁴ Fù r'à jɛ́l mún k'à wú yíkun se dé yíkun bè kúbɛ̂ án gbɔjáal-klɛɛ̂ mɔ; bóló ɔ bo yíkun nì "Mún ki Mún" gbɔɔ̂ hlɔjà bo, yíi bè kúbɛ̂ án gbɔjáalî mɔ. ²⁵ Yì k'à du dé: «Ákún ki gbò rɔ?» Yesu ki yì ǹ gbukɛlî mɔli dé: «Mún ki tɔŋnî mun ɔ, mún ni mùmun ló yíkun se ín ki gbɔ̀n à funkpɛ̂ gbâr ye mún ki fù rɔ. ²⁶ Gbɔ tyɛɛ́ŋ sɔ́ɔ ri fɔn mún se ń k'à wú yíkun se ín, fù nì ń ki kítíkár yíkun gbɔ mɔ, kɛ̀ mún tɔ́ŋ bɛ̀ tɔŋnî fù ri k'à hlɔɔ̂ rɔ. Mún ni mùmun ná àkun se mún ni fù mùn lóon jimiì se díryɔ́ŋ mɔ.» ²⁷ À jimiìî w'à hlɔ̀ dé Yesu w'á Tɔ Jɔnɔsɔɔ̂ gbɔ kɛɛ̀ln ín bo. ²⁸ Fù wono, Yesu k'à wú yì se dé: «Yíkun mùkâr ye bè jimin Dye-Jɛn tɔŋnkrɔ́, yíkun b'à shua dé Mún ki Mún ɔ. Fù nì yíkun b'à shua dé mún wo gbɔ dó klɛɛ̀n ki li mún mɔ bo. Kɛ̀, mún Tɔ Jɔnɔsɔɔ̂ ri mún kɛɛlnɲɛ̀n mùmun ɔ mún ni fù mùn lóon. ²⁹ Mún Tɔ Jɔnɔsɔɔ̂ mun ni mún tɔ́ŋ bɛ̀ɲɛ̀n, àkun ni tɛ̀ŋnɛ̀n mún wɔ́se, à wo mún jélɲɛ̀n ń byéen bo, bóló ɔ bo mún ni gbɔɛ̀ɛ̂ mun klɛɛ̀n tòmɔ̀-tomɔ, fɛ̀ ri klɛɛ̀n à tìyà fáâ to.» ³⁰ Yesu ǹ gbukɛlî kɛlkúnî se máno, jimin tyɛɛ́ŋ sɔ́ɔ k'à gbɔ hlɔja. ³¹ Fù la klɛ̀ híin, à Yawutuìî mun n'à gbɔ hlɔjà, k'à wú fɛ̀ se dé: «Yíkun n'á kpɛŋnjaàn mún ǹ kɛl gbukɛlî to, yíkun bè tɛŋna mún ǹ kɛɛln-bisháɛ̀ŋ hlɔtabê mɔ. ³² Yíkun bè hlɔ shua, hlɔ ki yíkun tobúrê.» ³³ Yì k'àn gbukɛlî mɔli dé: «Ŋmɛ́ɛn ki Brayima kpaŋltosɛ̂ɛ̀ŋ ɔ, ŋmɛ́ɛn wo fwɔŋbé kwò din dó se bo. À ri gbáno jà ákún b'à lóon dé ŋmɛ́ɛn bè tobúra?» ³⁴ Yesu ki yì ǹ gbukɛlî mɔli dé: «Hlɔ ta, hlɔ ta mún n'à lóon yíkun se dé tɔŋnî mun nɔkɔŋl ki gbɔjáal kwo, fù tɔŋnî ri tɛ̀ŋn gbɔjáal ǹ fwɔŋ. ³⁵ Ta, fwɔŋ wo tɛɛ̀ŋn tòmɔ̀-tomɔ den mɔ jir bo, kɛ̀ à totɔn jɔɔ̂ dye-jɛnî ki den mɔ jir ɔ tòmɔ̀-tomɔ. ³⁶ Fù se kwó, Jɔnɔsɔ Dye-Jɛnî nì yíkun tobúrè, yíkun ni tɛ̀ŋnè jimin tobrêmun sɛ̀bɛ̂ sɛ̀bɛ̂ɛ̀ɛ̂ ɛ̀. ³⁷ Mún n'à shi dé yíkun ki Brayima kpaŋltosɛ̂ɛ̀ŋ ɔ, kɛ̀, fù n'á nɔ̀nkurn mɔ, yíkun b'à se yíi ki mún kwo, bóló ɔ bo mún ǹ gbukɛlî wo ɲínɛ́ɛn fɔŋn ŋmɔ́nɲɛ̀n yíkun mɔ bo. ³⁸ Mún ni mùmun ŋmɔ́n mún Tɔ Jɔnɔsɔɔ̂ se, mún ni fù mùn lóon yíkun se. Yíkun híin, yíkun ni mùmun ná yíi tɔ se, yíkun ni fù mùn klɛɛ̀n.» ³⁹ À Yawutuìî ki Yesu ǹ gbukɛlî mɔli dé: «Ŋmɛ́ɛn tɔɔ̂ ki Brayima ɔ.» Yesu k'à wú yì se dé: «Yíkun tɔ nì Brayima kwó ín, yíkun ni Brayima ǹ klɛ gbɔ kwoa ín. ⁴⁰ Kɛ̀, kyáŋmɔ la, yíkun n'à se, yíi ki mún kwo, mún mun ni hlɔ gbukɛl ná Jɔnɔsɔ se, ń k'à wú yíkun se. Brayima la fù kúur klɛ̀ ín bo dɛ́! ⁴¹ Yíkun n'á tɔɔ̂ klɛgbɔɛ̀ɛ̂ klɛɛ̀n.» Yì ki fù gbukɛlî mɔli dé: «Ŋmɛ́ɛn ki nyɛ̀nkɛ̂l derê 'ɔ bo. Tɔ mɔ́n byéen tɛ̀ŋnɛ̀n ŋmɛ́ɛn se, fù ki Jɔnɔsɔ ɔ.» ⁴² Yesu k'à wú yì se dé: «Jɔnɔsɔ nì yíkun Tɔ kwó ín, mún gbɔ ri yíkun mɔnukwóa ín, bóló ɔ bo mún ni lìɲɛ̀n àkun Jɔnɔsɔ mɔ ń ki bɛ. Mún byɛ̀ɛ̂ wo lìɲɛ̀n mún nɔ̀nkurni mɔ bo, kɛ̀ àkun Jɔnɔsɔ mùn ni mún tɔ́ŋn bɛ̀ɲɛ̀n. ⁴³ À la gbáno jà yíkun wo mún ǹ kɛl gbukɛlî mɔfáhlɔɔ̀n bo? ⁴⁴ Fù bóló ɔ bo yíkun wo gbɔlônáan bo. Yíkun tɔ ki Sutana mùn ɔ. Yíkun n'à se yíi ki fù tìyà gbɔ kwo, fù mun ki yíkun tɔɔ̂ rɔ, ki gbɔ̀n díryɔ́ŋ brê funkpɛ̂ gbâr ye jimin krɔ ki fù ǹ klɛwɔ ɔ. À w'án gbɔ dó klɛɛ̀n hlɔ ta bo, bóló ɔ bo hlɔ w'àkun mɔ bo. À mùkâr ye bè kɛɛŋn lóon, à r'án kɛɛŋnî wúun nì yan á nɔ̀nkurni shɔn to, bóló ɔ bo àkun ki kɛɛŋnlórɔn ɔ. À bè kɛɛŋn tɔ. ⁴⁵ Mún kwó, mún ki hlɔ lórɔn ɔ, fù r'à jɛ́l yíkun wo mún gbɔ hlɔjaàn bo. ⁴⁶ Yìkun mɔ gbò r'á kpɛŋnbin byéen tɔŋnkúr hìn, k'à wú dé mún ni gbɔjáal klɛ̀? ⁴⁷ Fù wono, mún nì hlɔ lóon, à ri gbáno jà yíkun wo mún gbɔ hlɔjaàn bo? Tɔnî mun ki Jɔnɔsɔ ǹ jimin ɔ, fù ri Jɔnɔsɔ ǹ gbukɛlî tonáan. Yíkun wo Jɔnɔsɔ gbukɛlî tonáan bo, bóló ɔ bo yíkun ki Jɔnɔsɔ ǹ jimiì ɔ bo.» ⁴⁸ À Yawutuìî k'à wú dé: «Ŋmɛ́ɛn nargbɔ ɔ n̂ k'à wú d'á ki Samari jir* ɔ, fù n'á bè tyɛ́ɛŋntɔn.» ⁴⁹ Yesu k'à mɔli dé: «Tyɛ́ɛŋn wo jòɲɛ̀n mún mɔ bo, kɛ̀ mún ni ń Tɔ Jɔnɔsɔɔ̂ ɲɛflɛ́ɲɛɛ̀n, yíkun b'á káɲɛ̀n mún ɲɛflɛ́ɲɛn ɔ. ⁵⁰ Mún wo ɲɛflɛ́ɛ ɲɛ́ɛn ń k'à ɲɛn ń byéen ta bo. Àkun n'à ɲɛ́ɛn mún se, àkun bè kítíkáarn. ⁵¹ Hlɔ ta, hlɔ ta, mún n'à lóon yíkun se dé tɔŋnî mun k'á kpɛŋnja mún ǹ kɛl gbukɛlî to, kùn bè loa à tɔŋn fífí bo. ⁵² À Yawutuìî k'à wú dé: «Ŋmɛ́ɛn la kyáŋmɔ à hlɔ̀ dé tyɛ́ɛŋn jòɲɛ̀n ákún mɔ. Ŋmɛ́ɛn kpàŋn Brayima ri kúè, à tɔ́ŋrêê ki saaŋ kú kúè. Ákún ɔ dé tɔŋnî mun k'á kpɛŋnja ákún ǹ kɛl gbukɛlî to, dé kún bè loa fù tɔŋn fífí bo. ⁵³ Brayima mun ni kúè, ákún ni nur fù to a? À tɔ́ŋrêê saaŋ kú kúè, ákún ni la á byéen ɔ myɛ́n jìrɲɛ̀n?» ⁵⁴ Yesu k'à mɔli dé: «Mún nì ɲɛflɛ́ɛ ɲɛ́ɛn nì ɲɛn ń byéen ta, fù ɲɛflɛ́ɛɛ̂ ki bólóon ɔ bo. Tɔnî mun ni ɲɛflɛ́ɛ nì ɲɛ́ɛn ɲɛn mún ta, fù ki mún Tɔ Jɔnɔsɔɔ̂ rɔ. Yíkun n'à lóon dé mùmun ki yíkun ǹ Jɔnɔsɔ ɔ. ⁵⁵ Yíkun w'à shi bo, mún ni la à shi. Mún n'à ló dé ń w'à shi bo, mún bè tɛŋna yíkun kúur kɛɛŋnlórɔn. Kɛ̀, mún ni la à shi, ń bè ń kpɛŋnjàɲɛ̀n àn gbukɛlî to. ⁵⁶ Brayima gbɔmɔnar se, àkun ǹ jɛ́ɛn mɔ d'àkun bè mún yeê ŋmɔ́na, k'à ŋmɔ́n, à gbɔ k'à byéen mɔnukwó.» ⁵⁷ À Yawutuìî k'à wú à se dé: «Ákún wo nɔ̀tɔ̂ŋn kúrfú (50) ŋmɔ́n kɛŋn wà bo, ákún ɔ d'ákún ni Brayima ŋmɔ́n á ɲáa ɔ a?» ⁵⁸ Yesu ki yì ǹ gbukɛlî mɔli dé: «Hlɔ ta, hlɔ ta mún n'à lóon yíkun se dé: "Brayima kwɔŋɔɔ̂ n'á to gbɔ tyé díryɔ́ŋ wono, Mún ki mún ɔ má ín".» ⁵⁹ Fù núkwɔ́ɔn, yì ki timiî tɔ́ŋn à lɛŋ ɔ, kɛ̀ k'á yá li à tonyɛɛlklɛ-lɔ́sɔ́ɔɔ̂ mɔ yì fur.