¹ Fù jìrɛ̂mun kwɔ́ɔn, Yesu ki Galile kìyɛŋnî mɔ kél, bóló ɔ bo à wo kɛ́ɛl besé Jude kìyɛŋnî mɔ ká ín bo. Fù bóló ɔ bo à Yawutu ɲɛrotêê r'à tofá ɲɛ́ɛn ín ki kwo. ² Fù gbâr ye, à Yawutuìî ǹ sɛ̀l kpɛ́ɛ wúwɔ́ɔŋɔ̂ ri shùnjàɲɛ̀n ín. ³ Yesu srɔ́ɛ̀ɛ̂ k'à wú à se dé: «Yesu, á sukúr li húnmɔ, á ki don Jude kìyɛŋnî mɔ, nɔkɔ́ŋl ákún fù kɛɛln-bisháɛ̀ŋɛ̂ ki saaŋ ákún ǹ klɛgbɔɛ̀ɛ̂ klɛ fɔn ŋmɔ́n. ⁴ Tɔnî mun n'à se ki shu, fù tɔŋnî w'án gbɔ klɛɛ̀n toyâ mɔ bo. Ákún k'àni gbɔɛ̀ɛ̂ klɛ fáâ mun nɛn, à kwo kpèn sɔ́ɔ, á k'á byéen yɛ̀n díryɔ́ŋ to.» ⁵ Fù b'à ŋmɔ̂nɲɛ̀n Yesu srɔ́ɛ̀ɛ̂ nɔ̀nkurni w'à gbɔ hlɔjàɲɛ̀n bo. ⁶ Yesu k'à wú fɛ̀ se dé: «Mún fù gbârî wo lò kɛŋn bo, kɛ̀ yíkun se kwó, gbâr kúur nɔkɔŋl ɲɔn má. ⁷ Yíkun gbɔndɛ́ɛ wo tɛŋn hìn díryɔ́ŋ jimiì to bo. Mún gbɔndɛ́ɛ mùn la díryɔ́ŋ jimiì to, bóló ɔ bo mún ni yì ǹ klɛ gbɔjáàlî lóon yì ɲíɲra hlɔtabê mɔ. ⁸ Yíkun wo don à wúwɔ́ɔŋɔ̂ wúwɔ́ŋ fɔŋnî mɔ, mún wo bè kɔ́ɔŋn wà bo. Fù bóló ɔ bo mún fù gbârî wo lò kɛŋn bo.» ⁹ Yesu ki fù gbukɛlî kɛl jìrɛ̂mun kwɔ́ɔn, ki tɛ̀ŋnè Galile kìyɛŋnî mɔ. ¹⁰ Yesu srɔ́ɔ jɛɛ̂ɛ̂ mùfɔn dénno à wúwɔ́ɔŋɔ̂ wúwɔ́ŋ fɔŋnî mɔ, àkun nɔ̀nkurni ki saaŋ bè dénno. Kɛ̀, à wo dòn jimiì ɲíɲra bo, à ri dénno ɲátoyâ mɔ. ¹¹ À Yawutu ɲɛrotêê ri Yesu bénɲɛ́ɛn ín à wúwɔ́ɔŋɔ̂ wúwɔ́ŋ fɔŋnî mɔ, yì ki dukwo dé: «À ri mí fɛ́ɛŋn?» ¹² À jùmɔ̂ɔ̂ tyé mɔ yɛŋn kɔ̀ŋnɔn kɛl gbukɛl tyɛɛ́ŋ sɔ́ɔ ri tɛ̀ŋnɛ̀n ín Yesu gbɔ mɔ. Fù bóló ɔ bo máɛ̀ r'à lóon ín dé jimin ɲɔn ɔ. Kɛ̀, máɛ̀ ɔ dé owo, fù rɔ bo, jimiì kpaŋlmɔkɛŋlɔn ɔ. ¹³ Fù n'á nɔ̀nkurn mɔ, à Yawutu ɲɛrotêê yànbê se dó wo kɛl ín à gbɔ mɔ kpèn sɔ́ɔ bo. ¹⁴ À wúwɔ́ɔŋɔ̂ tyé mɔ jìrɛ́ kpɛŋn ta, Yesu ki dé à tonyɛɛlklɛ-lɔ́sɔ́ɔɔ̂ dishɛ́ŋɛ̂ mɔ, à bè jimiì kɛɛln. ¹⁵ À Yawutuìî won ki kɔ́ŋnè, yì b'à lóon dé: «À ri gbáno tɛ̀ŋn à bè gbɔ shi à wo kɛɛlnkwòɲɛ̀n bo?» ¹⁶ Yesu ki yì ǹ gbukɛlî mɔli dé: «Mún ni kɛɛlnî mun ɔ jimiì kɛɛln, à wo lìɲɛ̀n mún mɔ bo, mún tɔ́ŋ bɛ̀ Tɔnî mɔ lɛ̀ ɔ. ¹⁷ Tɔnî mun n'à se ki Jɔnɔsɔ tìyàgbɔ kwo, fù tɔŋnî b'à shua dé mún k'à jimiìî kɛɛlnkúnî nì lìɲɛ̀n Jɔnɔsɔ mɔ, fù nì kwoa bo mún ǹ kɛl gbukɛɛ̀lî nì lìɲɛ̀n mún nɔ̀nkurni mɔ. ¹⁸ Tɔnî mun n'á byéen tokɛɛ̀ln fù tɔŋnî r'á yin ɲɛ́ɛn, kɛ̀ tɔŋnî mun n'á tɔ́ŋ bɛ̀ tɔŋnî yin ɲɛ́ɛn àn lobéê ki shu, fù ki hlɔtatɔn ɔ, gbɔ shɛɛŋlmun bóló wo tɛ̀ŋnɛ̀n fù wono bo. ¹⁹ Musa mùn n'à tɔ̂ŋn sɛ́bɛ̂ɛ̂ mùn tèɲɛ̀n yíkun to be a? Yíkun mɔ dó w'á kpɛŋnjàɲɛ̀n fù to bo, myɛ́n núkwɔ́ɔn yíkun b'à ɲɛ́ɛn yíi ki mún kwo?» ²⁰ À jùmɔ̂ɔ̂ k'à mɔli dé: «Yesu, á ki tyɛ́ɛŋntɔn ɔ. Gbò fɔn à ɲɛ́ɛn k'ákún kwo?» ²¹ Yesu k'à wú yì se dé: «Mún ni gbɔ mɔ́n byéen klɛ̀, fù ki yíkun nɔ̀nkurn wonkɔ́ŋnè. ²² Musa r'à kpàkwóonhlɛŋ tɔ̂ŋnî ɲínɛ́ɲɛ̀n yíkun se, kɛ̀ à wo funkpéɲɛ̀n àkun ta bo. À ri funkpé lì bɛ̀ɲɛ̀n yíkun kpàɛ̀ŋɛ̂ se, à ta à tarwɔ yefyɛ̂lî ta kwó yíkun bè jɛn-bisháɛ̀ŋ kpàkwóonhlɛɛ̀ŋn. ²³ Yíkun nì jɛn-bisháɛ̀ŋ kpàkwóonhlɛɛ̀ŋn à tarwɔ yefyɛ̂lî ta, nɔkɔ́ŋl Musa ǹ tɔ̂ŋnî be kútúrê bo, myɛ́n n'à jɛ́l yíkun b'á nìrfúun mún to dé mún ni jir má kur nɔ̀nkurn kpɛ́lnjà à tarwɔ yefyɛ̂lî ta? ²⁴ Yíi be ɲáa ǹ ŋmɔ̂n ɔ kítíkár bo, kɛ̀ yíi wo kítíkár hlɔtabê mɔ.» ²⁵ Jerisalɛmu dyɛɛ̂ jimin máɛ̀ r'à lóon ín dé: «Yì ri jɔɔ̂ mun ɲɛ́ɛn krɔ ɔ ín, fù mùn nɛn be a? ²⁶ À nɛn, à bè kɛɛ̀ln à jùmɔ̂ɔ̂ ɲíɲra dó wo bóló lóon bo! Ŋmɛ́ɛn ǹ faɛ̀ŋɛ̂ r'à shi dé, Jɔnɔsɔ ǹ Jimin mɔtɔ̂ŋnmunî tɛ́tɛ̂ ɔ má a? ²⁷ Ta, à nì Jɔnɔsɔ ǹ Jimin Mɔtɔ̂ŋnmunî kwó, fù mùkâr ye bè bɛa, dó bè fù lì bla fɔŋn shua bo. Kɛ̀, àni jɔɔ̂ kwó ŋmɛ́ɛn ni fù lɛ̀ fɔŋn shi.» ²⁸ Fù gbâr ye Yesu bè jimiì kɛɛln gbɔ to yé à tonyɛɛlklɛ-lɔ́sɔ́ɔɔ̂ dishɛ́ŋɛ̂ mɔ, ki kɛl á myɛl tokpâr ɔ dé: «Yíkun ǹ jɛ́ɛn mɔ dé yíkun ni mún shi, yíi bè mún lɛ fɔŋn shi! Ta, fù n'á nɔ̀nkurn mɔ, mún blaâ ki mún mɔ lɛ̀ gbɔ ɔ bo, kɛ̀ mún tɔ́ŋ bɛ̀ tɔŋnî ki hlɔtatɔn ɔ, yíkun wo fù tɔŋnî shi bo. ²⁹ Mún kwó, mún ni la ń tɔ́ŋ bɛ̀ tɔŋnî shi, bóló ɔ bo mún ni lì bɛ̀ɲɛ̀n àkun tɔŋnimɔ, àkun bè mún tɔ́ŋɲɛ̀n.» ³⁰ Fù núkwɔ́ɔn yì bè Yesu ɲɛ́ɛn ja ɔ, kɛ̀ jimin dó w'á kpɛŋn tá hìn tɛ̀ŋn à to bo, bóló ɔ bo àkun ǹ gbârî wo lò kɛŋn ín bo. ³¹ Fù n'á nɔ̀nkurn mɔ jimin tyɛɛ́ŋ sɔ́ɔ k'à gbɔ hlɔjà à jùmɔ̂ɔ̂ tyé mɔ, yì k'à wú dé: «Jɔnɔsɔ ǹ Jimin Mɔtɔ̂ŋnmunî nì byɛ̀, àkun ǹ klɛ shɔ́gbɔɔ̂ bè sɔ́tɛŋna àni jɔɔ̂ fù ri to bo kɛ̀?» ³² À Farisyɛ̂ɛ̀ŋɛ̂ k'à jimiìî ǹ yɛŋn kɔ̀ŋnɔn kɛl gbukɛɛ̀lî ná Yesu gbɔ mɔ. Fù núkwɔ́ɔn à Farisyɛ̂ɛ̀ŋɛ̂ n'à flɛ́klɛrê ŋmelêê ki fɛŋnɛnklɛrê búrno Yesu jakɔ́ɔŋn ɔ. ³³ Yesu k'à wú dé: «Mún bè tɛŋnbɛ̂ yíkun wɔ́se kyáaŋne yé, ń ki kwɔ́ɔn don ń tɔ́ŋ bɛ̀ tɔŋnî se. ³⁴ Yíi bè mún bén ɲɛ́nbɛ̂, kɛ̀ yíi bè mún ŋmɔ́na bo. Mún bè tɛŋna bénî mun se yíkun wo don hìn mímí bo.» ³⁵ À Yawutuìî ri yíi duùn ín dé: «Àkun bè kɔ́ɔŋn fɛ́ɛŋn, ŋmɛ́ɛn w'àkun ŋmɔ́n hìn tíkɛ́lî mun mɔ bo? Yawutuìî mun ni dénno dɔ́se, yì ki ɲínɛ́ɛn ɲínɛ́ɛn mliŋ à Gerɛsi yinî tyé mɔ, à bè kɔ́ɔŋn fɛ̀ besé, à bè fù Gerɛsi yinî kɛɛln a? ³⁶ À r'án gbukɛlî mun kɛl dé ŋmɛ́ɛn b'àkun bén ɲɛ́nbɛ̂, kɛ̀ ŋmɛ́ɛn b'àkun ŋmɔ́na bo. Àkun bè tɛŋna bénî mun se dé ŋmɛ́ɛn wo don hìn mímí bo. Fù gbukɛlî ki myɛ́n lô ɔ?» ³⁷ À wúwɔ́ɔŋɔ̂ totɔ́ŋ lɔ, fù mun k'à wúwɔ́ɔŋɔ̂ yefyɛ̂l sɔ́ɔ ɔ, Yesu ki dukú lí, ki kɛl á myɛl tokpâr ɔ dé: «Nìn nì tɔŋnî mun to, fù tɔŋnî wo bɛ á gbɛ mún se. ³⁸ Tɔnî mun ki mún gbɔɔ̂ hlɔja, fù tɔŋnî bè tɛŋna árí yísɔ́ɔ nun kùndur fɔŋn, mùmun bè fwoòn, nunî mun ni shi tɛɛ̀n jimin to, à tɔ̂ŋn sɛ́bɛ̂ɛ̂ mɔ gbukɛlî ǹ lô fáâ to.» ³⁹ Fù gbukɛlî kɛlkúni ki Tɛ́l-Féné gbukɛl kɛlkún ɔ ín Yesu se, mùmun bè tebɛ̀ jimiì to, mɛ̀mun nì b'àkun gbɔɔ̂ hlɔja. Tɛ́l-Féné wo tɛ̀ kɛŋn jimiì to ín bo, bóló ɔ bo Yesu wo ŋmelɔnkrɔ̂ ŋmɔ́n kɛŋn wà án lobéê mɔ ín bo. ⁴⁰ À jùmɔ̂ɔ̂ r'àni gbukɛlî ná híin, máɛ̀ k'à wú d'àni jɔɔ̂ k'à tɔ́ŋrɔnî tɛ́tɛ̂ ɔ. ⁴¹ Máɛ̀ k'à wú d'à jɔɔ̂ ki Jɔnɔsɔ ǹ Jimin Mɔtɔ̂ŋnmunî ɔ. Máɛ̀ ɔ dé Jɔnɔsɔ ǹ Jimin Mɔtɔ̂ŋnmunî ri li hìn Galile a? ⁴² À wo ɲúrɲɛ̀n à tɔ̂ŋn sɛ́bɛ̂ɛ̂ mɔ ín dé: Jɔnɔsɔ ǹ Jimin Mɔtɔ̂ŋnmunî bè tɛŋna Dawuda kpaŋltosɛ̂ŋn mɔ jir, ki li Betelehɛmu dyɛɛ̂ mɔ, Dawuda ri tɛ̀ŋnɛ̀n dyɛɛ̂ mun mɔ ín be a? ⁴³ Fù la à jɛ́l à jimiìî myɛɛ̂lî ki tɛ̀ŋnè á dɔ ɔ yíi to Yesu gbɔ mɔ. ⁴⁴ Yì tyé mɔ jimin máɛ̀ r'à se ín ki ja, kɛ̀ dó w'á kpɛŋn tá à to bo. ⁴⁵ À fɛŋnɛnklɛrêê mun ni dénno ín Yesu jakɔ́ɔŋn ɔ, fɛ̀ k'á sɛno à Farisyɛ̂ɛ̀ŋɛ̂ n'à flɛ́klɛrê ŋmelêê se, fɛ̀ ki yì du dé: «À ri gbáno jà yíi w'à jà bɛ̀ bo?» ⁴⁶ À fɛŋnɛnklɛrêê k'à mɔli dé: «Jimin dó w'àni gbukɛlî kúur kɛl din bo.» ⁴⁷ À Farisyɛ̂ɛ̀ŋɛ̂ ki yì sɛdu yé dé: «À saaŋ yíkun kpaŋlmɔkɛŋl a? ⁴⁸ Ŋmɛ́ɛn ŋmelêê mɔ jir, fù nì kwoa bo à Farisyɛ̂ɛ̀ŋɛ̂ mɔ jir r'à gbɔ hlɔjà a? ⁴⁹ Kɛ̀, àni jùmɔ̂ɔ̂ w'à tɔ̂ŋn gbukɛlî hlɔ̀ bo, fù r'à jɛ́l yì ki gbɔ hlɔja, jimin to bâl klɛ̀mɛ́ɛ̀ ɔ!» ⁵⁰ Nikodɛmu mun dénno Yesu se ín, àkun mun k'à farisyɛ̂ɛ̀ŋɛ̂ mɔ jir ɔ ín, àkun k'à wú yì se dé: ⁵¹ «Ŋmɛ́ɛn ǹ tɔ̂ŋn gbukɛlî ɲwârmunî ǹ yɛ̀n fáâ se, ŋmɛ́ɛn ni yanɲɛ̀n n̂ ki jimin kɛŋ, à wo dù àn klɛ̀ fù ri ki hlɔ̀ be a?» ⁵² Yì k'àn gbukɛlî mɔli à se dé: «Ákún saaŋ lɛɛ̀n Galile a? À tɛ́ŋlɛ́n yi ɲɔn sɔ́ɔ, á b'à ŋmɔ́na tɔ́ŋrɔn dó wo lɛɛ̀n Galile kìyɛŋnî mɔ bo. ^{53 53} [Fù jìrɛ̂mun kwɔ́ɔn, yì byéen byéenî nɔkɔŋl k'á bur jìr, yì k'á sádi kɔ́ɔŋn ɲɛ̂l ja.